यूहन्ना 9
9
येशूकी अन्धला थोङा थुप्च्या जोबाते
1थेमे डुइन डुइनला येशूकी केजीनमेईराङ अन्ध ओताते मिज्यीकला थोङसुङ। 2थेमे चेलातेबेकी येशूला “गुरू, दि दोक अन्ध गाल्गीन क्या फापाते सुई पापकी खित्सादु ईन्ताका? दि खोरोङ पापकी खित्सादु ईन्ताकाना आबा आमे पापकी खित्सादु ईन्ताका?” सिन ठिसुङ। 3ठिजीन थेकी “दि दोक गाल्गीन केबाते दि खोरोङ पापकी खित्सादुङ मेन, आबा आमे पापकी खित्सादुङ मेन। दि जुनीदु ओङाते काम थोङला परमेश्वर शक्ति चुक छ्ये ईन्दे सिन मिओनगी छ्या स्येस्यीत सिनराङ दि दोक गाल्गीन केबाते ईन। 4ङीन ओत ओतसाक ङुरूङगी ङाला दुरू तोङकान्तेकी खि साबाते कामतेबा खिता फाप्क्यो। था नाम स्योक्यो। थेमे थेजीन सुङगीङ काम खिता मुथुबो। 5दि सा लुङबादु देत देतसाक दि सा लुङबे मिओनला नाम्दाक तेरकान्ते स्वर्गे नाम्दाक ङाराङ ईन,” सिन सिदुक। 6दोस्यिक साकीन थेकी साला थुक खाईन छ्यिमाकताङ सबी टिक्पीस्यिक ङेकिन थे अन्धे मिकला कुकीन बिन्सुङ। 7थेमे थेला “लो था खो दुरूकी सिलोआम पोखरीदु गाल्ला छ्येत ठु,” सिन सिदुक। सिलोआम साबातेचेन ताङाते साबाते ईन। थेमे थे मिकीङ गाल्गीन थे पोखरीदु छ्येत टुसुङ। थेमे थोङच्या गाल्गीन ग्युरगीन लिच्युङ।
8थे मिला थोङगीन थे युल्बाओन थेमे थेला गोमा नाङ खिता थोङकान्ते मिओनगी “च्यि दि मि लामदु देत्ला नाङ सिरकान्ते मेनरो?” सिन ठिरीङ खासुङ। 9लालेकी “ईन ईन, दि थेरू देत्ला नाङ खित्कान्ते मिराङ ईन,” सासुङ। लालेकीचेन “मेन मेन, दि होथे मि च्योक थोङातेकामा ईन,” सिन सासुङ। थेबा थोक खाला ईनताङ मेन सिन बात खिता थोकीन थेकी थे खोरोङगीराङ “ईन ईन, ङा होथे मिराङ ईन,” सिन सिदुक। 10थेकी थोक सिरजीन थेबेकी “आबिई, थोक ईन्सीन चुक खाईन खुई मिक थोङच्या गाल्सुङा?” सिन ठिसुङ। 11ठिजीन थेकी “येशू सिराते मिकी हिलो जोकीन थे ङे मिकला कुकीन बिन्सुङ। थेमे ङाला सिलोआम पोखरीदु गाल्ला छ्येत ठु सिदुक। थेकी साबाच्योक खाईन थेपा गाल्गीन छ्येत टुनामेई ङा थोङा थुप्च्या गाल्सुङ,” सिन सिदुक। 12थोक सानामेई थेबेकी “थे मि खापा दुका?” सिन ठिसुङ। थेमे थेकी “छ्येमेदो खापा गालाना ङालानी छ्या मेत,” सिन सिदुक।
फरिसी पाटी मिओनगी थे मिक थोङच्या गालाते
मिला बात ठिबाते
13थेमे थे मिओनगी गोमा अन्ध ओताते थे मिला फरिसी पाटी मिओन ओत्सादु क्याल्सुङ। 14येशूकी थोक खाईन हिलो कुकीन बिन्गीन थे अन्धे मिक थोङच्या जोबाते सन्चारी छोमु ओतान। 15थेमे फरिसी पाटी मिओनगीङ थेला चुक खाईन थे थोङा थुप्च्या गाल्सुङा सिन ठिसुङ। ठिजीन थेकी “थे मिकी ङे मिकला हिलो कुकीन बिन्सुङ। थेरूई ङे छ्येत टुबाप। थेमे ङा थोङा थुप्च्या गाल्सुङ,” सिन सिदुक। 16थेमे फरिसी पाटी मि नाङ कोई कोईकी “थे मिला परमेश्वरगी ताङाते मेन। सन्चारी छोमु काम खिता मेङगो सिरच्येते परमेश्वर नियम थेकी मेङेन्दुक,” सिन सिदुक। लोक्ला ज्येनतेबेकीचेन “थे पापी ईन्दा ईन्सीन चुक खाला दोक अचम्बते कामओन खिता थुप्कीते?” सिन सासुङ। थोक खाईन थेबे नाङ बात माडिक्सुङ। 17थे फरिसी पाटी मिओनगी गोमा अन्ध ओताते थे मिला याङराङ “खोचेन थे मिकीराङ खोल्ला थोङा थुप्च्या जोसुङ खिदुक। था खो थेला सु ईन सिते ओना?” सिन ठिसुङ। थेमे थेकी “थेनी परमेश्वर बात खित्कान्ते मिराङ ईन,” सिन सिदुक।
18थे मि अन्ध ओतान थेमे था मिगी थोङच्या गालाते ईन सिन थेबेकी थोरूमोङ पत्ते माक्यासुङ। थोगी थेबेकी थे मि आबा आमातेबाला काताङगीन 19“च्यि दि ख्योकोन फुज्युङ ईन? दि केजीनमेईराङ अन्ध ओतानलो मेन? थोक ईन्सीन था दि चुक खाईन थोङा थुप्च्या गाल्का?” सिन ठिसुङ। 20थेमे आबातेताङ आमातेकीचेन “ईन ईन, दि ङ्योकोन फुज्युङ ईन। दि केजीनमेईराङ अन्ध ओतान। 21तर दि चुक खाईन थोङा थुप्च्या गाल्सुङा थेमे दि मिक सुई थोङच्या जोसुङा सिनचेन ङ्योकोनला छ्या मेत। थे बातचेन दिलाराङ ठि। दि फिजा मेन। दिकी थे खोरोङ बात दि खोरोङगीराङ खिता थुप्क्यो,” सिन सिदुक। 22जो जसकी येशूला परमेश्वरगी तोङगो साबाते ख्रीष्ट ईन खिदुक, थेबा सुङलाङ मिटिङ खित्च्येते खाम्बादु स्यूक्पा मेङेत्च्या खाला तेन्ला तोङगो सिन यहूदीओनते छ्ये छ्ये मिकी गोमाका साबा ओतेकी थेबाला ज्यीबा लाबा ओतान। 23थोगीराङ थे मि आबा आमेकी “दि फिजा मेन, थे बाततेबा दिलाराङ ठि,” सिन साबा ओतान।
24गोमा अन्ध ओताते थे मिला थेबेकी याङराङ काताङगीन च्याकीन “लो परमेश्वर साक्षी ज्याक्ला खो साँचोते बात खि। थे मि पापी ईन सिन ङ्योकोनला लेमु खाला छ्या ओत,” सिन सिदुक। 25थोक सिरजीन थेकीचेन “छ्येमेदो थे मि पापी ईन्दा मेन्दा सिन ङाला छ्या मेत। ईन्सीनोङ दि बातज्यीकचेन ङाला लेमु खाला छ्या ओत। चुक सासीन गोमा ङा अन्ध ओतान। तर थानी ङे थोङा थुप्कीदुक,” सिन सिदुक। 26लोईन थेबेकी “थेकी खोल्ला च्यि खासुङा? थेकी चुक खाईन खुई मिक थोङच्या जोसुङा?” सिन ठिसुङ। 27थेमे थे मिकीङ “दि बात ङे गोमाकाराङ लाःपाप। ईन्सीनोङ ख्योकोनगी छ्याःङ वास्ता माक्यासुङ। था लोक्ला च्यिला दि गाङे बात ङेन्दा छोल्गीते? ना ख्योकोनलाङ थे चेला ओङा सेम लासुङा?” सिन सिदुक। 28थेकी थोक सिरजीन आउदी खाला स्येदाङ खिन थेबेकी “खोका थे चेला ईन। ङ्योकोननी मोशे चेला ईन। 29मोशाताङचेन थाङबो परमेश्वरगी बात खाबा ओतान सिन ङ्योकोनला छ्या ओत। तर दि मिनी खापेकी वाबाते ईन्दे सिनोङ ङ्योकोनला छ्याःङ छ्या मेत,” सिन सिदुक। 30थेमे थेकी “आबिई, च्यि अचम्ब ईन्दाका। थे खापेकी वाबाते ईन्दे सिननी ख्योकोनला छ्या मेताक्वा। ङे मिक थोङच्या जोकान्तेनी थेराङ ईन। 31पापीते मि बात परमेश्वरगी मेङेनो, परमेश्वरला मन परे खित्च्येते काम खाला थेला छ्ये जोकान्ते मिकी साबाते बातकामा थेकी ङेन्ग्यो सिन ङुरूङला लेमुराङ खाला छ्या ओत। 32सा नाम जोबा छुरला केजीनमेईराङ अन्ध ओताते मिला दोक खाईन थोङच्या जोदुक्लो सिरच्येते बात समेदोङ थोरूमसाक सुङगीङ थोबा मेत। 33थे मि परमेश्वरगी ताङाते मेन्दा ईन्सीन दोक्ते काम थेकी छ्याःङ खिता थुप्च्या मेतान,” सिन सिदुक। 34थोक सिरजीन थेबेकी “खोनी केजीनमेईराङ पापदु नुपा ओतान। खोङ ङ्योकोनला च्यि लोपा छोल्गीते?” सिन सिदुक। थेमे थेबेकी थेला मिटिङ खित्च्येते खाम्बे नाङ स्यूक्पा मेङेत्च्या खाईन तेन्गीन ताङसुङ।
मिक थोङकान्ते मिओनोङ अन्ध च्योक ओङा थुप्क्यो
35थे मिला मिटिङ खित्च्येते खाम्बादु स्यूक्पा मेङेत्च्या खाईन तेन्दुक्लो सिन येशूकी थोसुङ। थेमे थेकी थेला ठेता खाईन “च्यि खो परमेश्वर ओत्सादुई वाबाते मिला विश्वास खिओ?” सिन सिरजीन 36थेकी “थे सु ईन्दे हजूर? थे मि ङाला तेन्ला नाङना। थेमे ङा थेला विश्वास खिओ,” सिन सिदुक। 37थेरूई येशूकी “खुई थे मिला थोङा ओत। थेचेन थाल्ला खोत्ताङ बात खिन ओताते मिराङ ईन,” सिन सिदुक। 38थेमे थेकी “प्रभु, ङा खोल्ला विश्वास खिओ,” सिन थेला से खासुङ। 39थेमे येशूकी “मोथोङकान्ते मिओनगी स्वर्गे नाम्दाक थोङा थुप्स्यीत थेमे लेमु खाला थोङगीदुक सिरकान्तेबाचेन अन्ध ईन सिन छ्या स्ये ज्युताला ङा दुरू वाबाते ईन,” सिन सिदुक। 40थोक सिरजीन थेरू ओताते फरिसी पाटी मि कोई कोईकी “चुक साबाप्लो? च्यि खुई ङ्योकोनलाङ अन्ध ईन सिन साबाप?” सिन सिदुक। 41थेमे थेकी थेबाला “ख्योकोन अन्ध ईन्दा ईन्सीन ङा ख्योकोनगी पाप खाबाते ईन सिन सिरच्या मेतान। तर ख्योकोनचेन लेमु खाला थोङगीदुक खिदुक। दोक साबेकीराङ ख्योकोन पापदुकी ठाला मुथुबो,” सिन सिदुक।
Trenutno izabrano:
यूहन्ना 9: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
