यूहन्ना 8
8
येशूकी ज्येनताङ ङ्याल्कान्ते फेम्मे मिला माफ बिन्दाते
1थेमे येशूचेन जैतुन बोमने गाल्सुङ। 2ङारो च्योक्ते ङोमुका थे लोईन परमेश्वर मन्दिरदुराङ ग्युरगीन लिच्युङ। थेमे मन्दिरदु मि गाङे थे खोरोङ फेरो खाङ जम्मा ओङनामेई थेकी देत्कीन थेबाला परमेश्वर बात लोपाला स्यूसुङ। 3थे बेलालाराङ ज्येन मित्ताङ ङ्याला ओते बेलाला थेपाते फेम्मे मिज्यीकला धर्मे गुरूओनताङ फरिसी पाटी मिओनगी येशू ओत्सादु क्याल्गीन मि गाङे सामुन्नेदु ठाङे लाङगीन ज्याक्सुङ। 4थेमे थेबेकी येशूला “गुरू, दिला ज्येन मित्ताङ ङ्याला ओते बेलालाराङ थेपाते ईन। 5मोशेकी टिबाते परमेश्वर नियमला दोक्ते फेम्मे मिला दोईकी ग्याप्ला सेत सिन ङ्योकोनला साबा ओत। था खोचेन दिला च्यि खि सिन सिते?” सिन सासुङ। 6थेकी खाबाते बातला खइँदा गल्ती तेन्ला थेकी गल्ती खासुङ सिराप सिन थेबेकी थोक साबा ओतान।
थेबेकी थोक सानामेई येशूचेन खुङ खुगीन लाक्पे जुकी साला टिक्पाला स्यूसुङ। 7थेबेकी थे बात ठिइनराङ देत्नामेई थेकी खुक्सादुकी गोः खोक लाङगीन “ओङगो ओङगो, ख्योकोन नाङ नोमुङ पाप मिक्किकान्ते जो दुक, थेकीराङ दिला गाङे भन्दा गोमा दोईकी ग्योप,” सिन सिदुक। 8थोक साकीन लोईन थे खुङ खुगीन साला टिगीन देत्सुङ। 9थेकी थोक सानामेकी थेबा गोमा गान्दा गान्दातेबा थेमे थे तिरी ज्येनतेबा रेरे रेरे खाईन थेरूकी गाङे गाल्सुङ। थे फेम्मे मिचेन येशू दोन्दु गोमा थे मिओनगी ज्याक्सादुराङ ठाङे लाकीन देता ओतान। 10थेकी खुक्सादुकी गोः लाङगीन थे फेम्मे मिला “खो दोषी ईन सिन खोल्ला दुरू खुलाङकान्ते मिओन खापा गाल्सुङा? च्यि थेबा सुङगीङ छ्याःङ माक्यासुङ?” सिन सासुङ। 11थेमे थे फेम्मे मिकी “उँ ङाला सुङगीङ छ्याःङ माक्यासुङ प्रभु,” सिन सिदुक। थेमे थेकी “ङाङ खोल्ला छ्याःङ मिक्किओ। था खो दुरूकी ग्युक। थेमे थानामेकी दोक्ते मेलेबा काम माकेत,” सिन सिदुक।
येशू दि सा लुङबे मि लाईदु नाम्दाक ईन
12येशूकी लोईन मिओनताङ बात खिन “दि सा लुङबे मिओनला नाम्दाक तेरकान्ते स्वर्गे नाम्दाक ङाराङ ईन। ङे बात ङेन्ला ङे साबाच्योक खित्कान्ते सुङ नोमुङ मुन्दाकला ख्याम्बा माफाबो। थेकीचेन ङे छ्य्वापेकी जुनी ङेत्च्येते नाम्दाक ङेत्क्यो,” सिन सिदुक। 13थेमे फरिसी पाटी मिओनगी थेला “खो खोरोङराङ ङा दोक दोक ईन सिन खोरोङ बात खाला खोरोङला छ्ये जोइदुक। थोगी खुई साबाते बात पक्काराङ ईन सिन चुक खाला सिरच्येरो,” सिन सिदुक। 14थोक सिरजीन थेकी “ङा ङाराङगी ङाराङ बात खासीनोङ खालि ईन्दाते बातकामा खिओ। च्यिला सासीन ङा ङाराङ खापेकी वाबाते ईन्दे थेमे था तिरी खापा डुइते सिन ङाला लेमु खाला छ्या ओत। ख्योकोनलाचेन ङा खापेकी वाबाते ईन्दे थेमे खापा डुइते सिन छ्याःङ छ्या मेत। 15ख्योकोनचेन सु मि चुक्ते ईन्दे सिन लेमु खाला विचारराङ मिक्किता खाला फलाना दोषी ईन खिदुक। ङानी दोक मिक्किओ। 16ङे सुइँदा मि दोषी ईन्दाना मेन्दे सिन सिरा फाप्सीन ङा लेमु खाला विचार खालाकामा थोक खिओ। च्यिला सासीन दि काम ङाराङकामा मिक्किता खाला ङाला दुरू तोङकान्ते आबाताङ ङा ङिकाराङ डिक्ला खिओ। 17‘खइँदा बातला दि बात दोक दोक ईन सिन मेन्दा ङि मिकी सानामेई थे बात पक्का ओङगो,’ सिन ख्योकोनला बिन्दाते परमेश्वर नियमला टिबा ओत। 18ङे ङाराङ सु ईन्दे सिन ख्योकोनला ईन्दाते बात साबाप। थेमे दि बात साँचो ईन सिन सिरकान्ते ज्येनज्यीगोङ ओत। थेचेन ङाला दुरू तोङकान्ते आबाराङ ईन,” सिन सिदुक। 19थेमे थेबेकी “खुई आबा खापा ओते ओना?” सिन सिरजीन थेकी “ख्योकोनगी ङालाङ छ्या मेस्येदुक, ङे आबालाङ। ङाला छ्या स्येबा ईन्सीन ख्योकोनगी आबालाङ छ्या स्येच्या ओतान,” सिन सिदुक।
20थेकी दि बाततेबा परमेश्वर मन्दिरदु भेटी चढे खित्से खादु देत्ला मिओनला लोप्जीन खाबा ओतान। मिओनगी थेला जुम्ला छ्ये छ्ये मि लाःक्तु सोम्पे खित्च्येते बेला लेपा मेतेकी थेजीनोङ सुङगीङ थेला छ्याःङ माक्यासुङ।
येशूकी थे खोरोङ डोसादु सुङ ड्वा मुथुबो साबाते
21येशूकी लोईन थेबाला “था तिरी ङा दुरूकी डुइओ। थेमे ख्योकोनगी ङाला छोल्ग्यो। पाप खाबेकी खित्सादु ख्योकोन पापकी सजाय ङेत्ला स्यिइओ। ङा डोसादु ख्योकोन ओङा मुथुबो,” सिन सिदुक। 22थोक सिरजीन यहूदीओनते छ्ये छ्ये मिकी “दिकी ‘ङा डोसादु ख्योकोन ओङा मुथुबो,’ साबाते च्यि साबाते ईन्ताका? ना दिकी थे खोरोङ स्येरे खाला स्यिइओ साबाते ईन्ताका?” सिन सिराला स्यूसुङ। 23थोरूमोङ बात खिन येशूकी “ख्योकोन दि सा लुङबादु ठुङाते ईन, ङाचेन स्वर्गनेकी वाबाते ईन। ख्योकोन दि सा लुङबे मि ईन, ङा दि सा लुङबे मि मेन। 24थोगीराङ ङे ख्योकोनला ‘पाप खाबेकी खित्सादु ख्योकोन पापकी सजाय ङेत्ला स्यिइओ,’ सिन साबाते ईन। ङे ङाराङ सु ईन्दे सिन साबाते बात ख्योकोनगी पत्ते माक्यासुङ सासीन ख्योकोन खेराङ पापकी सजायदुकी थारराङ माथारो,” सिन सासुङ। 25थोक सिरजीन थेबेकी “खो सु ईन्दे ओना?” सिन सासुङ। थेमे थेकी “ङा सु ईन्दे सिन ङे ख्योकोनला थोङलामेई याङ याङ सिन वाबा ओत। 26ख्योकोनगी दोक दोक खाबेकी सजाय ङेत्क्यो सिरच्येते बात ङे थोरूमोङ काल्बेई सिरा फाप्च्या ओत। ङाला दुरू तोङकान्तेला पूरो खाला भर परे खिता थुप्क्यो। थेकी जे जे साबा ङे थोकीदुक, थे थेराङ ङा दि सा लुङबे मिओनला सिओ,” सिन सिदुक।
27थेकी खाबाते दि बाततेबा आबाते विषयला खाबाते ईन सिन थेबेकी थोरूमोङ माखोसुङ। 28थेमे थेकी याङराङ “ख्योकोनगी परमेश्वर ओत्सादुई वाबाते मि ङाला स्यिङगी थामला टाँए खानामेकी ङा सु ईन्दाका थेमे ङे ङाराङ खुशीकी छ्याःङ मिक्किच्याक्वा बरू आबेकी ङाला लापाते बातकामा खाबाते दुका सिन लेमु खाला छ्या स्येक्यो। 29ङाला दुरू तोङकान्ते ङात्ताङ ङ्योम्बुराङ ओत। ङे थेला मन परे खित्च्येते कामकामा खित्च्येते ईन्देकी थेकी ङाला च्यिकराङ ज्याक्पा मेत,” सिन सिदुक। 30थेकी साबाते दि बाततेबा थोकीन मि काल्बेईकी थेला विश्वास खासुङ।
चुक्ते मि अब्राहाम पक्काते सन्तान ईन्दे
31थे खोरोङला विश्वास खिताला स्यूबाते यहूदीओनताङ बात खिन येशूकी “ख्योकोनगी ङे लापा च्योकराङ खिन देत्सीन ख्योकोन पक्काराङ ङे चेला ईन। 32दोक खिनराङ देत्सीन ख्योकोनगी सत्यते परमेश्वरला लेमु खाला छ्या स्येक्यो। थेमे थेकी ख्योकोनला योक्पो योङमु खिन ओत्सादुई डेल्ग्यो,” सिन सिदुक। 33थोक सिरजीन थेबेकी “ङ्योकोननी अब्राहाम सन्तान ईन। थेमे थातासाक सुङगीङ योक्पो योङमु ओङा मेत सासीन खो चुक खाला ङ्योकोनला योक्पो योङमु खिन ओत्सादुई डेल्च्ये बात खिते?” सिन सासुङ।
34थेमे थेकी थेबाला “ङा ख्योकोनला दि बात सिओ। च्यि सासीन जसकी पाप खिदुक, थेचेन पापकी योक्पो ओङला पाप खिन देता फाप्क्यो। 35योक्पो थे खोरोङ काम खित्च्येते खाम्बादु सधैँभरि देता ङेत्क्यो सिरच्येते छ्याःङ टुङ्गो मेङगो। तर थे मालिक फुज्युङचेन थे खाम्बे मिराङ ईन्देकी सधैँभरि देता ङेत्क्यो। 36परमेश्वर फुज्युङगी ख्योकोनला पापदुकी टाल्सुङ सासीन ख्योकोन पूरो खाला पापदुकी ठाल्ग्यो। 37ईन, ख्योकोन अब्राहाम सन्तान ईन सिन ङाला लेमुराङ खाला छ्या ओत। ईन्सीनोङ ख्योकोन ङाला सेता छोल्गीदुक। च्यिला सासीन ख्योकोनगी ङे बात खेराङ सेमदु ज्य्वाराङ मोज्योदुक। 38ङाचेन आबाताङ देता ओते बेलाला ङाराङगी थोङाते बात ख्योकोनला लाःप्क्यो। ख्योकोनचेन खेराङ आबेकी जे साबा थोकीदुक थे थेराङ खिदुक,” सिन सिदुक। 39थेकी थोक सिरजीन लोईन थेबेकी “ङ्योकोन आबानी अब्राहामराङ ईन,” सिन सिदुक। थेमे थेकी “ख्योकोन अब्राहाम सन्तान ईन्दा ईन्सीन ख्योकोनगी थेकी खाबा च्योकराङ खित्च्या ओतान। 40परमेश्वरगी सिरजीन ङाराङगी जस्तो थोबा ओतान होथे साँचोते बातराङ ङे ख्योकोनला लाःपाप। थोक ईन्सीनोङ ख्योकोननी ङाला सेताका छोल्गीदुक। दोक्ते मेलेबाते कामनी अब्राहामगी खाबा मेतान। 41ख्योकोनचेन खेराङ आबेकी खित्च्येते च्योक्ते काम खिदुक,” सिन सिदुक। थेकी साबाच्योक ईनराङ मेन सिन थेबेकी “ङ्योकोननी ज्येन मि फिजा मेन। ङ्योकोनते आबाज्यीककामा ओत, थेचेन परमेश्वरराङ ईन,” सिन सिदुक।
येशूकी शैतानताङ डिक्कान्ते मि बात खाबाते
42याङराङ येशूकी थेबाला “ख्योकोन आबा परमेश्वर ईन्दा ईन्सीन ख्योकोनगी ङाला ङिङज्ये खित्च्या ओतान। च्यिला सासीन थे ओत्सादुकीराङ ङा दुरू वाबाते ईन। ङा दुरू ङाराङ खुशीकी वाबाते मेन, ङालाचेन थेकीराङ ताङाते ईन। 43ख्योकोनगी ङे साबाते बात च्यिला खोबा मुथुप्का? ङेन्दा चाला ईन्सीन ख्योकोनगी ङे साबाते लेमु खाला खोबा थुप्च्या ओतान। 44ख्योकोनचेन खेराङ आबा शैतानताङ डिक्कान्ते मि ईन। थेमे ख्योकोन खेराङ आबेकी खित्च्येते कामकामा खिता सेम खिदुक। थेकीनी च्याक दि जुग शुरू ओङजीनमेईराङ मि सेत्च्येतेकामा खिन ओत। ईन्दाते बातला थेकी बान्दा गा मिक्किओ। साँचोते बात सिरातेचेन थेकी नोमुङ मिक्किओ। ढाँर खित्च्येतेनी थेते बानीराङ ईन्देकी थेचेन ढाँर खित्कान्ते ईन। ढाँर खित्च्येते सिराते गाङे थे छ्य्वापेईराङ ओङच्येते ईन। 45ङा साँचोते बात खिओ। थोगीराङ ख्योकोन ङे बात पत्ते मिक्किदुक। 46ख्योकोन नाङ खाङगीचेन ङाला खुई दि दि पाप खासुङ सिन सिरा थुप्कीते? थोक मेन सासीन ङे साँचोते बात खित्जीन ख्योकोन च्यिला ङे बात पत्ते मिक्किते? 47परमेश्वरताङ डिक्कान्ते मिकीचेन थेकी साबाते बात ङेन्ग्यो। ख्योकोन थेत्ताङ डिक्कान्ते मि मेन्देकीराङ ख्योकोनगी थे बात ङेनराङ मेङेन्दुक,” सिन सिदुक।
येशूकी अब्राहाम भन्दा थे खोरोङ छ्ये ईन साबाते
48थेमे यहूदीओनगी थेला “ङ्योकोनगी खोल्ला खो सामरी ईन थेमे खोल्ला ल्हन्डीक खोला दुक साबाते बात पक्काराङ मेन्दाक्वा ओना?” सिन सिदुक। 49थोक सिरजीन थेकी “अहँ ङाला ल्हन्डीक खोबा मेत। ङा आबाला मान खिओ। ख्योकोनचेन ङाला छ्याःङ च्योक गने मिक्किदुक। 50ज्येनगी ङाराङला मान खित्स्यीत सिराच्योक खाला ङा छ्याःङ कामोङ मिक्किओ। मिओनगी ङाला मान खिता फाप्क्यो सिरकान्ते दोक्पोई ओत। सु मि चुक्ते ईन्दे सिन सिरकान्ते थेराङ ईन। 51दि बात ङेन। च्यि सासीन ङे साबाते बात ङेन्कान्ते मिचेन स्यिराङ मिस्यिओ,” सिन सिदुक। 52थोक सिरजीन थेबेकी “खोल्ला ल्हन्डीक खोबातेराङ ईन सिन थानी ङ्योकोनगी लेमु खाईन छ्या स्येसुङ। थाङबो अब्राहाम स्यिसुङ। थोकराङ खाईन परमेश्वर बात खित्कान्ते मिङ गाङे स्यिसुङ। खोचेन खुई साबाते बात ङेन्कान्ते मिचेन स्यिराङ मिस्यिओ खिदुक। 53च्यि खो ङ्योकोन ज्युज्यु अब्राहाम भन्दाङ छ्ये ईन सिन साबाप? थाङबो थेङ स्यिसुङ। थेमे परमेश्वर बात खित्कान्ते मिङ गाङे स्या ओतान। थेबा थेबानी थोक खाईन स्या ओतान सासीन खुईचेन खोरोङला सु ईन सिन साबे हँ?” सिन सिदुक।
54थोक सिरजीन थेकी “ङाराङगी ङा दोक्ते ईन, ङे दोक खिता थुप्क्यो साबा ईन्सीन छ्याःङ काम लै खित्च्या मेतान। ख्योकोन ङे आबाला खेराङ परमेश्वर ईन खिदुक। ङाला मान बिन्ला छ्ये जोकान्ते थेराङ ईन। 55थे सु ईन्दे, चुक्ते ईन्दे सिन ख्योकोनला छ्याःङ छ्या मेत्सीनोङ ङालानी लेमु खाला छ्या ओत। ङे थे सु ईन्दे, चुक्ते ईन्दे सिन छ्या मेत साबा ईन्सीन ङाङ ख्योकोन च्योकराङ ढाँर खित्कान्ते ओङच्या ओतान। थे सु ईन्दे, चुक्ते ईन्दे सिन ङालानी लेमु खाला छ्या ओत। थेमे ङा थेकी साबाते बात ङेन्ग्यो। 56ख्योकोन ज्युज्यु अब्राहाम ङा दुरू ओङच्येते बात छ्या स्येकीन आउदी गा खाबा ओतान। ङा दुरू वाबाते थोङगीन थे खुशी ओङा ओत,” सिन सिदुक। 57थेकी दोक सिरजीन थेबेकी “खुई चुक साबाप्लो? खो लो खाल ङिताङ च्युताम्बाजोङ गाला मेत। थेमे खुई चुक खाईन ङ्योकोन ज्युज्यु अब्राहामला थोङा ओताने?” सिन सिदुक। 58थोक सिरजीन थेकी “ङा ख्योकोनला दि बात सिओ। च्यि सासीन ङानी अब्राहाम क्या भन्दा गोमामेईराङ ओतान,” सिन सिदुक। 59थेकी दोक सिरजीन थेबेकी दिला सेताराङ फाप्क्यो सिन दो तुकीन थेला देक्पा चाल्सुङ। तर थे ईप्कीन परमेश्वर मन्दिरदुई थेन्गीन गाल्सुङ।
Trenutno izabrano:
यूहन्ना 8: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
