यूहन्ना 7
7
येशूताङ थे न्वाओन बात
1दि तिरी येशू गालील अञ्चलदु युल युलला थेमे सार सारला युगीन देत्सुङ। यहूदीओनते छ्ये छ्ये मिकी थे खोरोङला सेता चाला ओतेकी थे यहूदियापा मागाल्सुङ। 2थे बेलाला यहूदीओनते पली क्योरला देत्ला माने खित्च्येते चाड लेपा लेपा खाबा ओतान। 3थेमे न्वातेबेकी थेला “आज्यो, खो देङला देता भन्दा यहूदियापा ग्युक। दोक खासीन खुई खित्च्येते अचम्बते कामओन थेपा खोरोङ ज्येन चेलाओनगीङ थोङा ङेत्क्यो। 4दाक्पोन चुक छ्ये ईन्दाका सिन ज्येनगी छ्या स्येस्यीत सिन सेम खित्कान्ते मिकीनी सुङगीङ दोक खाला ईप्ला काम मिक्किओ। खुई खिन ओताते दि कामओन गाङेपा गाल्ला मिओन ङोन्ला खाला तेनना,” सिन सिदुक। 5न्वातेबेकी च्यिला थोक साबा ओताने सासीन थेबेकीङ थेला परमेश्वरगी ताङाते ईन सिन पत्ते खिन मेतान। 6थोक सिरजीन थेकी “मिओनला ङा सु ईन्दे सिन छ्या स्ये ज्युत्च्येते ङेते ठीक बेला थोरूमोङ लेपा मेत। ख्योकोनलाचेन जे खिता फाप्सीनोङ जुन बेलाङ ठीक ओङगो। 7दि सा लुङबे मिओनगी ख्योकोनला छ्याःङ मिक्किओ। तर ङे थेबाला ख्योकोनगी दि दि मेलेबा काम खिन दुक सिन साबेकी खित्सादु थेबेकी ङालाचेन मिगी थोङसार्मु खिओ। 8ग्युक, ख्योकोन चाड माने खिताला यहूदियापा गाल्सीन ओङगो। ङाचेन थाल्लाराङ मोन्डोओ। ङेते ठीक बेला थोरूमोङ लेपा मेत,” सिन सिदुक। 9थेबाला थोक साकीन थे गालीलदुराङ देत्सुङ।
येशूकी चाडगी बेलाला मिओनला लापाते बात
10ईन्सीनोङ न्वातेबा यहूदियापा चाड माने खिताला ख्याम्नामेकी येशूङ थेपा गाल्सुङ। मि गाङेकी मोथोङस्यीत सिन थे खाराक्पा थेपा गाल्सुङ। 11थेमे यहूदीओनते छ्ये छ्ये मिकी “थे मि खापा दुका हँ?” सिन थेरू चाड माने खिताला वाबाते मिओन नाङ येशूला छोलाला स्यूसुङ। 12थेङला मिओन स्यापस्यापताङ स्युपस्युप खिन येशू बात आदोराङ खिन ओतान। थेबे नाङ लालेकी “थे लेमु मि ईन,” सिन ओतान। लाला लालेकीचेन “मेन मेन, थेनी मिओनला छक्के खित्कान्ते ईन,” सिन ओतान। 13थोक ईन्सीनोङ यहूदीओनते छ्ये छ्ये मि ज्यीबेकी खित्सादु सुङगीङ गाङेकी थोच्या खाला बात खिन मेतान।
14थे चाड माने खिताला स्यूबाते ङीमा सुमजो तिरी येशूकी परमेश्वर मन्दिरदु गाल्गीन मिओनला परमेश्वर बात लोपाला स्यूसुङ। 15थेकी थोक लेमु खाईन थे बात लापा थोकीन यहूदीओनते छ्ये छ्ये मि छक्क परे खिन “आबिई, धर्मे गुरूओनगी च्योक खाईन परमेश्वर बात नोमुङ पढे माक्याबाते ईन्सीनोङ दिकी दि बाततेबा चुक खाईन छ्या स्येताका?” सिन बात खिताला स्यूसुङ। 16थेबे बात थोकीन थेकी “ङे लोप्च्येते बात ङाराङगी जोकीन खाबाते मेन। दि बाततेबानी ङाला दुरू तोङकान्तेकीराङ खित च्युताते ईन। 17परमेश्वरगी खि साबाते ङेन्दा छोल्कान्ते मिकीकामा ङे लोप्च्येते बात ङाराङगी जोला लोप्च्येते ईन्दाना परमेश्वरगीराङ लोप च्युताते ईन्दे सिन लेमु खाला छ्या स्येक्यो। 18दाक्पोनगी जोबाते बात लोप्कान्ते मिकीचेन ज्येनगी थे खोरोङला मान खित्स्यीत सिन लोप्क्यो। तर थे खोरोङला तोङकान्तेला मिओनगी मान खित्स्यीत सिन काम खित्कान्ते मिकीचेन ईन्दाते बातकामा खिओ, मेन्दाते बात सिराते थेकी दोक्पोईओङ मिक्किओ। 19च्यि मोशेकी ख्योकोनला परमेश्वर नियम बिन्दा मेतरो? ईन्सीनोङ ख्योकोन खाङगीङ थे नियम मेङेन्दुक। थेमे ङालाचेन ख्योकोन च्यिला सेता छोल्गीते?” सिन सिदुक।
20थेकी दोक सिरजीन थेरू ओताते मिओनगी “खोल्ला ल्हन्डीक खोला दुक। खोल्ला सुई सेता छोल्गीका?” सिन सिदुक। 21थेमे थेकी “ङे अचम्बते कामज्यीक खाबाप। ख्योकोनला थे काम थोङजीन अचम्ब लासुङ। 22मोशेकी ख्योकोनला जीउला खतकी चिनु जोच्येते नियम बिन्दा ओतान। ईन्दानी दि चलन ख्योकोन ज्युज्यु पुर्खे पालोमेईराङ चले खिन वाबाते ईन। खेराङ फुज्युङला दि चिनु जोच्येते दिन सन्चारी छोमु फाप्सीन ख्योकोन थे छोमुराङ थे चिनु जोइदुक। 23मोशेकी टिबाते परमेश्वर नियम ङेन्दाला सन्चारी छोमुङ ख्योकोन थे चिनु जोइदुक सासीन सन्चारी छोमु ङे मिज्यीकला पूरो खाईन ठाक्पा खाबा थोङजीनचेन ख्योकोन च्यिला ङात्ताङ स्येदाङ खिते? 24ख्योकोनगी मि छ्येत ताला काम माकेत। सुइँदा मि दोषी ईन्दाना मेन्दे सिन लेमु खाला विचार खालाकामा सि,” सिन सिदुक।
मिओनगी येशू सु ईन्दे सिन बात खाबाते
25येशूकी दि बात खिन खिनलाराङ कोई कोई यरूशलेम मिओनगी “च्यि छ्ये छ्ये मिकी सेता चालाते मि दिराङ मेनरो? 26दि दुरू मि गाङे दोन्दु देत्ला बात लोप्कीन ओत्सीनोङ थेबा सुङगीङ छ्याःङ मिसिरदुक ओना। ना थेबेकी दिला परमेश्वरगी तोङगो साबाते ख्रीष्टराङ दुका सिन साबा ईन्ताका? 27दि मि खापेते ईन्दे सिन ङुरूङला लेमुराङ खाला छ्या ओत। ख्रीष्ट ओङजीन थे दुरूकीराङ वाबाते ईन सिन सुङगीङ छ्या मेस्येओ,” सिन सिराला स्यूसुङ। 28येशू थोरूमोङ परमेश्वर मन्दिरदु मिओनला लोप्कीनराङ ओतान। थेबेकी खाबाते बात थोकीन गाङेकी थोच्या खाईन थेकी “ईनरो? ङा सु ईन्दे थेमे खापेकी वाबाते ईन्दे सिन ख्योकोनला पक्काराङ छ्या ओत ओना? ङा दुरू ङाराङ खुशीकी वाबाते मेन। ङाला दुरू तोङकान्तेला पूरो खाला भर परे खिता थुप्क्यो। थे सु ईन्दे सिन ख्योकोनला छ्याराङ मेत, 29ङालानी लेमु खाला छ्या ओत। च्यिला सासीन ङा थे ओत्सादुईराङ वाबाते ईन। थेमे ङाला तोङकान्तेङ थेराङ ईन,” सिन सिदुक। 30थेकी थोक सिरजीन थेबेकी थेला जिन्दा चाल्सुङ। तर थेला जुम्ला छ्ये छ्ये मि लाःक्तु सोम्पे खित्च्येते बेला लेपा मेतेकी सुङगीङ थेला रिक्लाङ द्वा माथुप्सुङ। 31कोईकी थोक खासीनोङ थेरू ओताते मि काल्बेईकी येशूला विश्वास खासुङ। थेबेकी “च्यि था ख्रीष्ट वानामेई थेकी दि मिकी खाबाते भन्दा छ्ये छ्ये अचम्बते काम खाओङरो?” सिन बात खासुङ।
येशूकी आबाते ओत्साने डोच्येते बात खाबाते
32थोक खाईन मिओनगी स्यापस्यापताङ स्युपस्युप खिन होथोक सिन येशू बात खाबाते फरिसी पाटी मिओनगी थोसुङ। थेमे छ्ये छ्ये पूजारीताङ फरिसी पाटी मिओनगी येशूला जुम्ला खोरच्योक सिन मन्दिरदु देत्कान्ते पुलिसओन ताङसुङ। 33थोरूमोङ बात खिन येशूकी “था टिक्पी दिनसाककामा ङा ख्योकोनताङ देत्क्यो। थे तिरी ङा दाक ङाराङला दुरू तोङकान्ते ओत्साने ग्युरला डुइओ। 34ख्योकोनगी ङाला खापा गाल्ताका सिन छोल्ग्यो। ईन्सीनोङ मेथेबो, ङा गाल्सादुनी ख्योकोन ओङाराङ मुथुबो,” सिन सिदुक। 35थेकी थोक सिरजीन यहूदीओनते छ्ये छ्ये मिकी “आछ्यि दिकी चुकस्यिक बात खिका। ङुरूङगी थेपराङ मेथेप्साला डुइओ सिरच्या दि खापा ड्वाप सिताका? ना दि ठाउँ ठाउँला ग्रीकओन नाङ गाल्गीन देता ओताते यहूदीओन ओत्साला गाल्ला ग्रीकओनला दि खोरोङ बात लोपा सिताका? 36थेमे दिकी ‘ख्योकोनगी ङाला खापा गाल्ताका सिन छोल्ग्यो। ईन्सीनोङ मेथेबो, ङा गाल्सादुनी ख्योकोन ओङाराङ मुथुबो,’ सिन च्यि साबाते ईन्ताका,” सिन खोपरोङ नाङ बात खासुङ।
नोमुङ माकाम्च्येते छ्युई मोनगी बात
37थे चाडगीते गाङे भन्दा तिरी छोमुचेन छ्येते दिन सिन माने खिन ओतान। थेमे थे छोमुराङ लाकीन देत्कीन येशूकी गाङेकी थोच्या खाईन “सुइँदाला कोम्बा लाबा ओत्सीन ङा ओत्सादु वाला च्याला थुङ। 38ङाला विश्वास खित्कान्ते मि सेमगी नाङचेन परमेश्वर बातला साबा ओता च्योकराङ ‘जुनी ङेत्च्येते छ्यु दोल्गीनराङ देत्क्यो’,” सिन सिदुक। 39दि बात थेकी थे खोरोङला विश्वास खित्कान्ते मिओनगी तिरी परमेश्वर आत्मा ङेत्क्यो सिन सिराला साबा ओतान। परमेश्वरगी येशूला स्यिसादुकी सोम्बो लोक्ला स्वर्गने खेरच्येते काम थोरूमसाक खाबा मेतेकी परमेश्वरगी थेजीनसाक सुङलाङ परमेश्वर आत्मा बिन्दा मेतान।
मिओन नाङ बात माडिक्पाते
40येशूकी थोक सानामेई मि कोईकी “दि मिनी पक्काराङ दुरू ओङगो साबाते परमेश्वर बात खित्कान्तेराङ दुका,” सिन सासुङ। 41कोईकीचेन “दि परमेश्वरगी तोङगो साबाते ख्रीष्टराङ दुका,” सिन सिराला स्यूसुङ। लोक्ला ज्येन ज्येनगीचेन “ख्रीष्ट चुक खाला गालीलदुकी ओङगीतेरो? 42च्यि परमेश्वर बातला ख्रीष्ट दाऊद गेल्बो सन्तान नाङ केइओ। थेमे थाङबो दाऊद गेल्बो केकीन हुर्के खाबाते बेथलेहेम युलदुराङ केइओ सिन साबा मेतरो?” सिन सिदुक। 43थोक खाईन कोईकी बातज्यीक, कोईकी ज्येनज्यीक बात खाईन थे मिओन खोपरोङ नाङराङ माडिक्सुङ। 44कोई कोईकीचेन येशूला जिन्दाङ चाला ओतान। ईन्सीनोङ सुङगीङ थेला रिक्लाङ द्वा माथुप्सुङ।
छ्ये छ्ये मिकी येशूला विश्वास माक्याबाते
45थोक थोक ओङनामेकी येशूला जिन ताङाते पुलिसओन ग्युरगीन छ्ये छ्ये पूजारीताङ फरिसी पाटी मिओन ओत्सापा गाल्सुङ। थेमे थेबेकी पुलिसओनला “खोइ ख्योकोनगी थेला च्यिला जुम्गीन खुला माबे?” सिन ठिसुङ। 46ठिजीन थेबेकी “आबिई, ङ्योकोननी थेकी बात खाबा थोङगीनराङ ख्यारसुङ। थेकी च्योक खाईननी ङ्योकोनगीनी थातासाक सुङगीङ बात खिताराङ थोबा मेत,” सिन सिदुक। 47थोक सिरजीन फरिसी पाटी मिओनगी “ए थोक सासीन थेकी ख्योकोनलाङ मिकला छारो ग्याप्तुक मेन ओना? 48च्यि ङुरूङ छ्ये छ्ये मि थेमे फरिसी पाटी मि ङ्योकोन सुइँदेकी थेला विश्वास खाबाते थोङा ओत? 49परमेश्वर नियम लेमु खाईन छ्या स्येबा मेताते मिओनकामा थे छ्य्वापा लै खाबा ओत। थेबाला परमेश्वर सराप फाप्क्यो,” सिन सिदुक। 50थेरू गोमा बाजिई येशू ओत्सादु बात खित डोकान्ते निकोदेमस सिरातेङ ओतान। थे छ्ये छ्ये मि नाङ थेङ दोक्पोई ओतान। 51थेमे थेकी ज्येनतेबाला “च्यि सुइँदा मिला गोमा थे बयान लाला थेकी च्यि खाका सिन छ्या मास्येबालाराङ थे दोषी ईन सिरा ङुरूङ नियमताङ डिइओतरो?” सिन सिदुक। 52थेकी थोक सिरजीन ज्येनतेबेकी “खुई चुक साबाप्लो? च्यि खोङ गालीलपे मि ईन? खो परमेश्वर बात पढे खाला तोते। थेरूनी परमेश्वर बात खित्कान्ते मिचेन नोमुङ गालीलदुकी मेङगो सिन साबा ओत,” सिन सिदुक।
53थोक थोक ओङनामेकी थेबाबरी खोपरोङ खाम्बा खाम्बाला ग्युरगीन गाल्सुङ।
Trenutno izabrano:
यूहन्ना 7: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
