यूहन्ना 21
21
येशूकी चेला दुईनताङ ठेता खाबाते
1थे तिरी लोईन येशूकी चेलातेबाला तिबेरियास समुन्द्रे छेउदु ठेता खासुङ। थेरू थेकी थेबाला चुक खाईन ठेता खासुङा सासीन 2थे छोमु थेरू शिमोन पत्रुस, दिदिमस सिराते थोमा, गालील अञ्चल कानापे नथानेल, जब्दी फुज्युङबा ङिबो थेमे ज्येन मेन्दा ङि येशू चेलाओन ङ्योम्बुराङ ओतान। 3थेमे शिमोन पत्रुसकी ज्येनतेबाला “ङानी ङ्या सेताला डुइओ,” सिन सिरजीन ज्येनतेबेकीङ “ङ्योकोनोङ खोत्ताङ डुइओ,” सिन सिदुक। थेमे थेबाबरी डुङ्गाला जेकीन ङ्या सेत ख्याम्सुङ। तर नुप खाङ ङ्याज्यीगोङ माथेप्सुङ।
4थेमे ङोमुका ह्रामह्रीमलाराङ येशू समुन्द्रे छेउदु ख्योल्गीन लाकीन देत्सुङ। ईन्सीनोङ चेलातेबेकीचेन थे येशू ईन सिन छ्या मास्येसुङ। 5थेमे थेकी थेबाला “ए होइबावे, ख्योकोनगी छ्याःङ माथेप्सुङ?” सिन सिरजीन थेबेकी “अहँ, दोक्पोईओङ माथेप्सुङ,” सिन सिदुक। 6थेमे थेकी “जाल डुङ्गे सामे छ्य्वापा ग्योप थेमे थेप्क्यो,” सिन सिदुक। साबा च्योकराङ खाईन थेबेकीङ जाल सामे छ्य्वापा ग्याप्सुङ। थेमे ङ्या काल्बेई थेपेकी थेबेकी जाल डुङ्गे नाङ ठुता माथुप्सुङ। 7थेमे येशूते ङिङज्येते चेलेकी पत्रुसला “थेनी प्रभु येशूराङ ईन,” सिन सिदुक। “थेनी प्रभु येशूराङ ईन,” सिरा थोबासात्तु पत्रुसकी टोल्गीन ज्याक्पाते लाक्तु खोन्च्येते खोलाक खोन्सुङ। थेमे थे डुङ्गादुई छ्युनामाराङ फिरगीन येशू ओत्सापाला गाल्सुङ। 8थेमे ज्येन चेलातेबाचेन ङ्या खाङाते जाल ठुत्कीन ठुत्कीन समुन्द्रे छेउनापा थेन्सुङ। थेबा समुन्द्रे छेउदुकी सय गजजो छुरकामा ओतान। 9छेउदु लेप्ला ताजीन थेबेकी थेरू मे बुबुरे लाक ङ्या स्येबाते थेमे स्योबेन थोङसुङ। 10थेमे येशूकी थेबाला “ख्योकोनगी थाल्ला जुम्बाते ङ्या टिक्पीई दुरू खोरच्योक,” सिन सिदुक। 11थेमे शिमोन पत्रुसकी डुङ्गादु स्यूकीन जाल छेउदु ठुत्सुङ। थे नाङ जोदा जोदातेन्दे ङ्या खाल दुईनताङ च्युक्सुम ओतान। ङ्या थोक काल्बेई ओत्जीनोङ जाल राला मेतान। 12थेमे येशूकी थेबाला “लो स्योक, था वाला सो,” सिन सिदुक। थे प्रभु येशूराङ ईन सिन छ्या स्येबेकी थेबे नाङ सुङगीङ थेला “खो सु ईन्दे?” सिन माठिसुङ। 13थेमे येशूकी स्योबेन लाःक्तु लाकीन थेबाला गोकीन बिन्सुङ। थोकराङ खाईन ङ्याङ बिन्सुङ। 14थे खोरोङ सोम्बो लोक्नामेकी थेकी चेलातेबाला ठेता खाबाते दि पालो सुमगी बाजि ओतान।
येशूकी पत्रुसताङ बात खाबाते
15थेबेकी सोकीन सिन्नामेकी येशूकी शिमोन पत्रुसला “योआनेस फुज्युङ शिमोन, च्यि खो ङाला दिबाबरीकी भन्दा काल्बा ङिङज्ये खिओ?” सिन सिदुक। थेमे पत्रुसकी “उँ प्रभु, ङे खोल्ला ङिङज्ये खिओ सिन खोल्ला छ्याराङ ओत,” सिन सिदुक। थेमे थेकी थेला “ङे लुई रीउओनला लेमु खाला तो,” सिन सिदुक। 16लोईन थेकी थेला “योआनेस फुज्युङ शिमोन, च्यि खो ङाला पक्काराङ ङिङज्ये खिओ?” सिन सिदुक। थेमे थेकी “उँ प्रभु, ङे खोल्ला ङिङज्ये खिओ सिन खोल्ला छ्याराङ ओत,” सिन सिदुक। थेमे थेकी “ङे लुकओनला लेमु खाला गोठाला खि,” सिन सिदुक। 17थेमे लोक्लाङ थेकी थेला “योआनेस फुज्युङ शिमोन, च्यि खो ङाला ङिङज्ये खिओ?” सिन सिदुक। थोक खाला बाजि सुमसाक “च्यि खो ङाला ङिङज्ये खिओ?” सिन सिरजीन पत्रुसला मेलेबा लासुङ। थेमे थेकी “प्रभु, खोल्ला गाङे बात छ्याराङ ओत। ङे खोल्ला ङिङज्ये खिओ सिनोङ खोल्ला छ्या ओत,” सिन सिदुक। थेमे थेकी “ङे लुकओनला लेमु खाला छो। 18ङा खोल्ला दि बात सिओ। चुक सासीन खो स्यारा ओत्जीन खोरोङ काराक खोरोङराङ छ्यिङगीन ओतान। थेमे खोरोङला गा लासाला डुइन ओतान। था गान्दा गाल्नामेकी खुई खोरोङ लाक्पा स्योङगो। थेमे ज्येनज्यीगी खुई काराक च्यिला बिन्ला खोल्ला ड्वा सेम मालासाला टीला खेरग्यो,” सिन सिदुक। 19तिरी पत्रुस चुक खाला स्यिला परमेश्वरला छ्ये जोइते सिराला येशूकी होदि बात साबा ओतान। दोक साकीन सिन्नामेई थेकी पत्रुसला “लो ङात्ताङ ख्योम,” सिन सिदुक।
20थेमे ख्युर ग्युरला ताजीन येशूते ङिङज्येते चेलाङ थेबे तिरी तिरी ओङगीन ओता पत्रुसकी थोङसुङ। येशूला पक्रे खिते छोमु ग्वासे साप सा बेलाला येशू ठाङनापाला ङेला “प्रभु खोल्ला धोका तेरकान्ते मि खाङ ईन्दे सिना,” सिन ठिकान्ते चेला होदिराङ ओतान। 21पत्रुसकी थे तिङ ङ्याला ओङगीन ओता थोङगीन येशूला “प्रभु, उथेलाचेन तिरी चुक ओङोङा याङ?” सिन सिदुक। 22थोक सिरजीन थेकी “थे था तिरी ङा ग्युरला ओङ ओङसाक सोन्लाराङ देत्स्यीत सिरच्येते ङे सेम ओत्सीनोङ दि बात खोल्ला च्यिला छ्या स्येबा फाप्सुङारो? खो ङात्ताङ ख्योम,” सिन सिदुक। 23थोगी ज्येन चेलातेबेकीचेन था होथे चेला मिस्यिओ सिन बात खिताला स्यूसुङ। थे स्यिराङ मिस्यिओ सिनचेन येशूकी साबा मेतान। थेकी खालि “थे था तिरी ङा ग्युरला ओङ ओङसाक सोन्लाराङ देत्स्यीत सिरच्येते ङे सेम ओत्सीनोङ दि बात खोल्ला च्यिला छ्या स्येबा फाप्सुङा?” सिन साबा ओतान।
24थे खोरोङ मिगीराङ थोङाते होदि गाङे बात होथे चेलेकीराङ टिबाते ईन। थेकी थोङगीन टिबाते दि बात गाङे साँचोते ईन सिन ङुरूङगी छ्या स्येक्यो।
25येशूकी खाबाते काम थोरूम ज्येन ज्येनोङ काल्बेई ओत। ङालानी थेकी खाबाते काम रेरेते किताब टिसीन ज्य्वाबाला दि सा लुङबादु ठाउँराङ ओङच्या मेतान सिराच्योक लाङगीदुक।
Trenutno izabrano:
यूहन्ना 21: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
