यूहन्ना 20
20
येशू सोम्बो लोक्पाते बात
(मत्ती २८:१-८; मर्कूस १६:१-८; लूका २४:१-१२)
1थेमे आदेरी छोमु साला नाम्दाक माफोक्पालाराङ मरियम मग्दलिनी येशू रो ज्याक्पाते फुकनापा गाल्सुङ। थेपा लेप्नामेकी थेकी थेरू फुगी गोदु ज्याक्पाते दो थेरूकी थेन्दा ओता थोङसुङ। 2थोक थोङनामेकी थेकी छ्य्वाकीन गाल्गीन शिमोन पत्रुसताङ येशूते ङिङज्येते चेला ओत्सादु लेप्कीन “थेबेकी फुकदुकी प्रभु येशू रो थेन्गीन खेरदुक। थे खापा ज्याक खापा, ङ्योकोनगी छ्याःङ छ्या मास्येसुङ,” सिन लाःप्सुङ। 3थेमे पत्रुसताङ थे ज्येनते चेला थे फुकनापा ताप्ला गाल्सुङ। 4थेबा ङिकाराङ छ्योङगीन गाल्सुङ। छ्योङगीन डोजीन ज्येनते चेलाचेन पत्रुसला ग्याल्गीन थोङला फुकनापा लेप्सुङ। 5थेरू लेप्कीन नाङने ज्यीला ताजीन थेकी येशू रो ठीलाते खोलाककामा थोङसुङ। फुगी नाङराङचेन थे मास्यूसुङ। 6थेमे शिमोन पत्रुसोङ लेप्सुङ। लेप्कीन थेचेन नाङनेराङ लोक स्यूसुङ। थेकी थेरू येशू रो ठीलाते खोलाक थेरूराङ साला ओता थोङसुङ। 7थेमे थे गोःला ठीलाते खोलाकचेन जीउला ठीलाते खोलाकताङ मेन्गीन छ्य्वाज्यीक्तु खुदुकराङ ओतान। 8थेमे गोमाका थेरू लेप्कान्ते चेलाङ ताप्ला नाङनेराङ स्यूसुङ। थेमे नाङने थोक थोक थोङनामेकी थेकी येशू पक्काराङ सोम्बो लोक्पा दुका सिन पत्ते खासुङ। 9येशू स्यिनामेई सोम्बो लोइओ सिन परमेश्वर बातला टिबाते बात थेबेकी थेजीनसाकोङ खोबा मेतान। 10थे तिरीचेन थेबा ङिबो खोपरोङ खाम्बापा ग्युरसुङ।
येशूकी मरियम मग्दलिनीला ठेता खाबाते
(मत्ती २८:९-१०; मर्कूस १६:९-११)
11तर मरियमचेन थेरू थे फुगी फिनामा गोई खादु लाकीन देत्कीन ङुइन ओतान। ङुइन ङुइनला थेकी थे फुगी नाङने ज्यीकीन तासुङ। 12ताजीन थेकी खोलाक कार्मु खोन्दातेन्दे परमेश्वर दूत मेरा ङि थोङसुङ। थेबा ङिबोचेन गोमा येशू रो ज्याक्सादु दोक्पोई गोःकी छ्य्वानेला थेमे ज्येनतेचेन काम्बे छ्य्वामाला देता ओतान। 13थेमे थेबेकी थेला “खो च्यिला ङुइते?” सिन ठिजीन मरियमगी “थेबेकी प्रभु येशू रो दुरूकी थेन्गीन खेरदुक। थेला खापा ज्याक खापा, ङे छ्याःङ छ्या मास्येसुङ,” सिन सिदुक। 14थोक साकीन ल्हाकनापा ग्युरजीन मरियमगी थेरू येशू लाकीन देता ओता थोङसुङ। तर थे येशू ईन सिन छ्या मास्येसुङ। 15थेमे येशूकी थेला “खो च्यिला ङुइते? खुई सुला चाले?” सिन ठिसुङ। मरियमगीचेन थेला बगैंचादु काम खित्कान्ते मिका ईन्दा च्यिन्दा सिन “हजूर, ना खुईका थेला खेरे? खेरा ओत्सीन खापा ज्याक्पा ओते ङाला लोःपना। ङा लाला खुलाङामीन,” सिन सिदुक। 16थोक सिरजीन येशूकी “मरियम,” सिन सिदुक। थेमेका मरियमगी थे दोन्नापाला ख्युर ग्युरगीन हिब्रू बातला “रब्बोनी,” सिन सिदुक। रब्बोनी साबाते गुरू साबाते ईन। 17थेमे थेकी थेला “ङाला मादो। च्यिला सासीन ङा थोरूमोङ आबा ओत्साने गाला मेत। खो था दुरूकी गाल्ला ङे न्वाओनला ‘ङा था आबा ओत्साने डुइन ओत। थेचेन ख्योकोनतेङ आबा ईन। थे ङेते परमेश्वर ईन, थोकराङ खाला ख्योकोनतेङ परमेश्वर ईन,’ साला बिन,” सिन सिदुक। 18थेमे मरियम मग्दलिनी थेरूई ग्युरगीन गाल्गीन येशू चेलाओनला “ङे प्रभु येशूला ठेत्सुङ,” सिन साकीन थेकी थेबाला लोःप साबाते बात गाङे लाःप्सुङ।
येशूकी चेलातेबाला ठेता खाबाते
(मत्ती २८:१६-२०; मर्कूस १६:१४-१८; लूका २४:३६-४९)
19थेमे थे आदेरी छोमुराङ नाम स्योनामेई यहूदीओन छ्ये छ्ये मि ज्यीबेकी येशू चेलाओन गोई लास्यिङ ग्याप्कीन देता ओतान। थे बेलालाराङ येशू थेबा ओत्सादु ख्योल्गीन “ख्योकोनला लेमु ओङस्यीत,” सिन सिदुक। 20थोक साकीन च्याकीन थेकी लाक्पाला काँटी ग्यापाते मे डामताङ कोखादु मे डाम थेबाला तेन्सुङ। थोक खाला प्रभु येशूला याङराङ थोङा ङेत्जीन थेबाबरी आउदी खाईन गा खासुङ। 21थेमे येशूकी लोईन “लो ख्योकोनला लेमु ओङस्यीत। आबेकी ङाला देमा ताङा च्योकराङ खाला ङाङ ख्योकोनला ज्येन मि नाङ तोङगो,” सिन सिदुक। 22दोक सानामेकी थेकी थेबा ओत्सापा फु सिन ङेपाक ताङगीन “लो ख्योकोनगी परमेश्वर आत्मा ङेत्स्यीत। 23ख्योकोनगी सुइँदा मि पाप माफ बिन्सीन परमेश्वरगी थे पाप माफ तेरग्यो। ख्योकोनगी सुइँदे पाप माफ माबिन्सीनचेन थे पाप थोकराङ देत्क्यो,” सिन सिदुक।
येशूकी थोमाला ठेता खाबाते
24थोक खाला थे चेलातेबा ओत्सादु ओङे छोमु चेला च्युन्ङी नाङ दिदिमस सिराते थोमाचेन थेबाताङ मेतान। 25थेमे ज्येनतेबेकी “ङ्योकोनगी प्रभु येशूला ठेत्सुङ,” सिन सिरजीन थेकी “थे लाक्पाला काँटी ग्याप्कीन थोताते मे डाम माथोङथुप, काँटी ग्याप्सादु ङाराङ लाक्पे जु च्वाकीन माताथुप थेमे थे कोखापा लाक्पा ज्याइन माताथुपचेन ङा दि बात पत्तेराङ मिक्किओ,” सिन सिदुक।
26थेमे हप्ताई तिरी येशू चेलाओन लोईन खाम्बादु ङ्योम्बुराङ ओतान। दि पालोलाचेन थेबाताङ थोमाङ ओतान। गोई लास्यिङ ग्यापा ओत्सीनोङ थे छोमुङ चेलातेबा ओत्सादु येशू ख्योल्सुङ। थेमे थेबाला “ख्योकोनला लेमु ओङस्यीत,” सिन सिदुक। 27थेमे थोमाला “लो ङे लाक्पाला काँटी ग्याप्कीन थोताते मे डाम खो खोरोङ लाक्पे जुकीराङ छामे खाला तो। थोकराङ खाला कोखादु बार्सा रोपे खासादुङ खो छामे खाला तो। थेमे शंका खिता ताङला बरू ङा सोम्बो लोक्पाते पक्काराङ दुका सिन पत्ते खि,” सिन सिदुक। 28थेमे थोमेकी “प्रभु, खोराङ ङे मालिक ईन, खो ङे परमेश्वर ईन,” सिन सिदुक। 29थेमे येशूकी “खुईनी ङाला थोङेकी खित्सादु ङा सोम्बो लोक्पाते दुका सिन पत्ते खासुङ। ङाला माथोङालाङ ङा सोम्बो लोक्पाते ईन सिन पत्ते खाला ङाला विश्वास खित्कान्ते मिओन भाग्यमानी ईन,” सिन सिदुक।
दि किताब च्यिला टिबाते ईन्दे
30येशूकी थे खोरोङ चेलाओन ङोन्दु अचम्बते काम ज्येन ज्येनोङ काल्बेई खाबा ओतान। थे गाङे अचम्बते कामगी बात दि किताबला टिबा मेत। 31दि बातओन टिबातेचेन येशू परमेश्वरगी तोङगो साबाते ख्रीष्ट ईन, थे परमेश्वर फुज्युङ ईन सिन छ्या स्येला ख्योकोनगी थेला विश्वास खित्स्यीत थेमे थेला विश्वास खाला नोमुङ मिसिन्च्येते जुनी ङेत्स्यीत सिनराङ ईन।
Trenutno izabrano:
यूहन्ना 20: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
