Yoane 15
15
Yesu Inyi Ajalaŋi Ahode
1Ani ajalaŋi ahode bwo Monyoŋ ahedulani ajalaŋi. 2Isisalutta inyi atanata hoŋ omuk hun obeŋi’to oŋiji bwo oŋututta inyi atanata daŋ hun oŋiji’to jo oŋida inyyahi ŋijuna arryai. 3Ihwania iliboroto tai te ekyana en ekyana ni jihatai. 4Ogolihina jihoŋ bwo fe ni agolik jihatai. Ihwa obeŋ atanati ajalaŋi oremik ŋijuna aŋer honyi hama bwo obeŋ iryata ilajalaŋi obeŋ obo alatai oremik ŋijuna aŋer many igolihiniete tai jihoŋ. 5Ani ajalaŋi, bwo itai atanata. Ol ogolik’to jihoŋ bwo ni jihonyi oŋiju inyi aŋer arryai. Nyo al ilamajata tai jihoŋ ibyaŋata tai iremehina ihanio obo ariŋ. 6Al obeŋ obo ogolik jihoŋ irwoŋoro inyi alet ihwa atanati iyohojori. Atanata hunia aharanyuni isi ette irwoŋonia ihima iswahiniere. 7Al igolihina tai jihoŋ bwo ekyanita hoŋ ogolihini jihatai, ifiyete anyo iwahata tai bwo inyurana adi itai. 8Ta aŋijuna haŋer iko aratan aheyiyanak hoŋ itahabuyete tai Monyoŋ. 9Ihwa omuno Monyoŋ ani bwo fe amuno ni itai, ogolihina limuno hoŋ. 10Al igotyete tai efahita hoŋ igolihina adi itai imuno hoŋ ihwa en efahari ni efahita Monyoŋ bwo fe agolik ni imuno honyi. 11Eramak ni itai erre huna jo oŋida amuno hoŋ arasa jihatai bwo fe oŋida amuno hatai ifut.
12Efahi hoŋ ana, omunoti illarak hatai ihwa an amunori ni itai. 13Obeŋ obo atulo oremik itahutana amuno agalik ana jo oye inyi imaji illarak honyi. 14Itai illarak hoŋ al ihaniete tai ariŋ en efak ni itai. 15Abeŋ adi ni eloŋo itai apiti nyo obeŋ apit omijak anyo ihanio eleittok honyi ati eloŋo ni itai illarak nyo etahutak ni jihatai erre daŋ hunya ettiyenu ni jyo Monyoŋ. 16Ibyaŋata tai inyimuna ani ati anyimu ni itai ette ifahina itai jo oŋida ifwatta tai ŋijuna aŋer. Bwo fe oŋida aŋer hatai arasahinie bwo fe te erre daŋ hun ifiyete tai jyo Monyoŋ ta afure hoŋ isyo adi inyi jihatai. 17Efahi hoŋ ana, omunoti illarak hatai.
Aliwari Ono Afau
18Al oliwarik omuk aati itai ogiluna jo oliwarik isi ani ahosyere. 19Irata dwo itai ahulo afau ana omunoi dwo aati hulo itai ihwa illarak hosi, ati ibyaŋata tai irata hulo afau ana nyo anyimu ni itai jyo afau ana, inyi on oliwarik aati itai. 20Ogotyete erre hun eramak ni itai, obeŋ lapit agalik eleittok honyi. Al ittigemye isi ani ittigemye adi bwo fe isi itai. Kuyya ogotyerek isi ekyana hoŋ, ogotyerek adi bwo fe isi nekyana hatai. 21Ihanie adi isi erre hunia daŋ jihatai ta afure hoŋ nyo obeŋi isi omijani lya al ifahu’to ani. 22Hara dwo abeŋ ni attu ikyana jihosi obeŋi dwo oŋoti eyyata jihosi. Ati ihwania obeŋi elyeti jihosi te eyyata hosi. 23Ol oliwari’to ani oliwari inyi Monyoŋ bwo fe. 24Hara dwo abeŋ ni ehanio egyamita hun hobeŋ tulo igyama ihiji hosi obeŋi dwo oŋoti eyyata hosi. Ati ihwania igonyuni isi, bwo fe oliwarik ani iko Monyoŋ. 25Ihwania itasiruni ekyana ninya igyoroni ifahita hosi ojo, “Oswarik isi ani oboijai.” 26Ottu adi Etalwahani, inyi Oloyiri olo nelahode ol odetuno’to jyo Monye. Efak adi ni inyi jihatai bwo inyi ahetamijanani hoŋ. 27Bwo fe irata adi itai etamijanak hoŋ nyo ewon nya itai ikoŋ many t’etteri.
Trenutno izabrano:
Yoane 15: LOT1969
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
This text was originally published by the British and Foreign Bible Society in 1969.
