Ebhikorwa bhya Abhatumwa 11
11
Peetero keeresha kutyo ꞉aatumirwe ku-bhanu bhatari Bhayawudi
1Abhatumwa bha Yeesu na abheeyigira abhandi abha mu-kyaro kyone kutyo Ebhuyawudi eyo, mboongwa ati abhaanu bhanu bhatari Bhayawudi bhoone bhaaramiiye Riingʼana rya Nyamuwanga. 2Mmbe, Peetero ˆnaasubha Yerusareemu. Bhunu ꞉aasubhire Yerusareemu, Abhayawudi bhanu ꞉bhaariga mbeekirisha Yeesu mbaamba okuyajana nawe, 3mbaaikaga ati, “Kubhaki awe wingiiye mu-nyumba gya abhariisha nuwikara nuurya ebhyokurya amwi nabho!”
4Niwe Peetero ˆnaamba okubhabhwira engʼana rimwirimwi kutyo ꞉gaabheeye, ˆnaaika ati, 5“Rusuku rumwi ꞉naariga niri mu-musi gwa Yopa. Bhunu ꞉naariga nnisaasaama Nyamuwanga, nindora ebhiroro. Ku-bhiroro bhiyo, nindora ekiinu muna egibho enene rinu ꞉ryariga rigwatirwe mbaara gyaryo ena gyone kutyo, ndiisibhwaga. Riigibho riyo ꞉ryariga ndiisibhwa okusookerera mu-rwire, ndiiyikira anu ꞉naariga niri. 6Nindiringira kujomu, nindora mbaga nyafu egya gintyanyi, ebhisoro, ganyabhuterere, na giinyonyi ginu egibhuruka iiguru.
7“Mmbe, nuungwa obhuraka mbumbwira ati, ‘Peetero, iimuka, ubhaage urye!’ 8Anye nnaaika ati, ‘Uri, Raatabhugenyi! Riibhaga nikyariga okurya ekyokurya kyonekyone kinu kyaikirwe mu-bhiraagiro bhya Ekiyawudi ati ni kijabhi, amwi ati ni kinaabhi okukirya!’ 9Nawe obhuraka bhuyo mbunsubhya kweki okusooka mu-rwire mbwaika ati, ‘Bhinu Nyamuwanga eesiishe,#11:9 Eesiishe. Ringira riingʼana Okwera mu-Mangʼana Amakomeeye. siga okubhyaika ati ni bhinaabhi.’ 10Riingʼana riyo ndiisubhiirisha kasatu, kimwi ebhiinu bhiyo bhyone kutyo mbifutwa, mbisubha-yo mu-rwire.
11“Kimwi ayoayo abhaanu abhasatu bhanu ꞉bhaariga bhatumirwe okusooka Kayijaariya mbayika ku-kishooko kya iinyumba inu ꞉naariga niikaaye. 12Mwoyo Omutaakatiifu ˆnaambwira ati nisige okwitimaata ati bhatari Bhayawudi, nigende nabho era. Niwe ningenda nabho ewa Koroneriyo. ꞉Kyariga kiri amwi na Abhayawudi bheejaasu bhanu, bhaanu bhasansabha. Okuyika eyo, nkiingira mu-nyumba ya Koroneriyo. 13Koroneriyo ˆnaakitondera kutyo maraayika ꞉aamwijire-ko ari mu-waaye, ˆnaamubhwira ati, ‘Nuutume abhaanu Yopa, bhabhirikire Simooni unu riisiina ryaye erindi kaatogwa Peetero, aaje. 14Uyo niwe kaaja okukubhwira iingʼana, na okuturira ku-ngʼana iyo owuuja okwerusibhwa awe na abhaanu bhoone kutyo abha ewaawo.’
15“Bhunu ꞉naambire okwaika na abhaanu bhayo era, ayoayo Mwoyo Omutaakatiifu ˆnaabheekira, rwa kutyo ꞉eekire kw-iswe ku-bhwambiro.#11:15 Ku-bhwambiro. Anu kaaikira kutyo Mwoyo Omutaakatiifu ꞉aabheekiiye ku-rusuku rwa Pentekoositi. Ringira Ebhikorwa bhya Abhatumwa 2:1-4. 16Anye noone nniyiita riingʼana rirya Raatabhugenyi Yeesu ꞉aakibhwiriiye ati, ‘Yowana ꞉aabhatiishaga abhaanu mu-manji, nawe emwe omuuja okubhatiisibhwa na Mwoyo Omutaakatiifu.’ 17Mmbe, ikabha ati Nyamuwanga wa obhutungi abhayaaye ekiyaanwa kiyokiyo rwa kinu ꞉aakiyaaye eswe bhanu ꞉kyeekirisiishe Raatabhugenyi Yeesu Kiriisitu, mmbe woori, ni anye niga nireme aga Nyamuwanga?”
18Bhunu Abhayawudi bhayo ꞉bhoonguuywe amangʼana gayo, mbageekirisha. Mbakumangya Nyamuwanga mbaaika ati, “Kaana, Nyamuwanga asakiiye na bhanu bhatari Bhayawudi bhoone bhanuge ebhikayo bhyebhwe, insonga bhanyoore obhurame bhunu bhutakuweera!”
Riikanisa rya Antiyokiya
19Mmbe, abheeyigira bhanu ꞉bhaanyarageene ku-nsonga ya ebhinyansho okuseetana na okwitwa kwa Sitefwano, mbeerukira mu-bhyaro bhya Foyinike, Kiipuro, na mu-musi gwa Antiyokiya. Eyo woone, mbaamba okwiyigishaga amangʼana iiguru ya Raatabhugenyi Yeesu ku-Bhayawudi era. 20Mu-bheeyigira bhayo, abhandi ꞉bhaariga bhasookereeye Kiipuro na Kureene, na bhunu ꞉bhaayikire Antiyokiya, mbaaika na bhanu bhatari Bhayawudi mbabheeyigishaga Amangʼana Amajomu aga Raatabhugenyi Yeesu. 21Obhuturo bhwa Raatabhugenyi Nyamuwanga ꞉bhwariga bhuri amwi nabho, na abhaanu bhaafu muno mbeekirisha na okuyindukira ku-Raatabhugenyi Yeesu.
22Amangʼana gayo ngayika mw-ikanisa rya Yerusareemu. Bhunu ꞉bhaagoonguuywe, mbatuma Bharinaabha agende Antiyokiya. 23Bhunu Bharinaabha ꞉aayikire eyo, ˆnaarora kutyo Nyamuwanga ꞉aayaanaga abhaanu iinema yaaye, ˆnaajomerwa muno. ˆNaagendereraga okubhabhwira bhagenderere okugwatana na Raatabhugenyi ku-mitima gyebhwe gyone kutyo, 24kwa okubha Bharinaabha ꞉aariga eekirisiishe Yeesu muno, na ꞉aariga ari omuunu wa mutima mujomu, eejuuywe Mwoyo Omutaakatiifu. Na obhukumi bhwa abhaanu mbwiyongesha ku-Raatabhugenyi, okuriingʼaana na kutyo Bharinaabha ꞉aabhasakiraga okumenya Riingʼana rya Nyamuwanga.
25Okumara gayo, Bharinaabha ˆnaagenda mu-musi gwa Taruso okwagara Saawuri eyo. 26Bhunu ꞉aamunyoorere, ˆnaamureeta Antiyokiya ayo. Kimwi bhoone kutyo Bharinaabha na Saawuri mbeekara na riikanisa riyo omwaka mugima, mbeeyigishaga bhaanu bhaafu muno iiguru ya Yeesu. Antiyokiya ayo niwe abheeyigira ꞉bhaambiiye okubhirikirwa ati Abhakiriisitu.
27Mu-nsiku giyogiyo, abharagi mbaaja okusookerera Yerusareemu, mbasangira Antiyokiya ayo. 28Owumwi weebhwe, riisiina ryaye ˆnaatogwa Agabho, ˆnaayambaara mw-isangi, ˆnaasoosha obhuragi kwa njira ya Mwoyo Omutaakatiifu ati injara nene eyiija okubha-wo mu-bhyaro bhyone kutyo. Injara iyo niibha-wo bhunu Kayijaari Kirawudiyo ꞉aariga ˆnaatunga ebhyaro bhiyo. 29Okuseetana na obhuragi bhuyo, abheeyigira bhayo mbeekirishaanya ati, muunu wumwiwumwi okuriingʼaana na obhuturo bhwaye, asooshe obhusakisi ku-bheeyigira bheejaabho bhanu ꞉bhaariga ꞉bheekaaye Ebhuyawudi. 30Mmbe, mbasoroosha, mbayaana Bharinaabha na Saawuri insororo iyo, insonga bhasirire abhakaruka bha riikanisa rya Ebhuyawudi.
Trenutno izabrano:
Ebhikorwa bhya Abhatumwa 11: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved