Ebhikorwa bhya Abhatumwa 12
12
Maraayika kaasoosha Peetero mu-nyumba ya abhabhoywa
1Mu-nsiku giyo, omukama Yerode Agiripa#12:1 Yerode Agiripa. Ringira riingʼana rinu mu-Mangʼana Amakomeeye. ˆnaamba okunyansha abheeyigira bha Yeesu abhandi. 2꞉Aasiigire abhaanu bhagwate ekiraawa bheete Yakobho#12:2 Yakobho. ꞉Aariga ari omwana wa Jebhedaayo, na ꞉aariga ari wumwi wa abheeyigira bha Yeesu ekumi na bhabhiri. waamuwaabho Yowana. 3Bhunu ꞉aarorere ati ekikorwa kiyo kyajomisha Abhayawudi, ˆnaasiiga kweki Peetero agwatwe. Riingʼana riyo ꞉ryabheeye-wo mu-kabhaga ka insikukuru ya emikaate ginu gitatunduuye.#12:3 Insikukuru ya emikaate ginu gitatunduuye. Ringira riingʼana Ipaasaka mu-Mangʼana Amakomeeye. 4Okumara okugwata Peetero, Yerode ˆnaaragirira atuurwe mu-nyumba ya abhabhoywa. ˆNaamutuurira-wo makemba gana aga bhasirikare bhanaabhana, insonga bhamwangarire kujomu. ꞉Aariga akenere amuramurire mu-meeso ga abhaanu Insikukuru iyo ikawa. 5Mu-kabhaga kayo Peetero ꞉aariga abhoyerwe mu-nyumba ya abhabhoywa, abheeyigira ꞉bhaariga mbamusabhira muno ku-Nyamuwanga.
6Mu-ngeta ya okuramukira orusuku runu Yerode ꞉aariga aramuuye aramurire Peetero, Peetero ꞉aariga awongeeye atuuywe agati wa abhasirikare bhabhiri, mu-nyumba ya abhabhoywa. Na ꞉aariga abhoyerwe na eminyororo ebhiri ku-mabhoko gaaye, orubhaara orumwi omunyororo gubhoyerwe ku-kubhoko kwa omusirikare, orubhaara orundi rwone gubhoyerwe ku-wundi. Anja ku-rwigi rwa iinyumba iyo, abhasirikare abhandi ꞉bhaariga mbaangarira.
7Kimwi mu-kyumba kiyo Peetero ꞉aariga arimo, maraayika wa Raatabhugenyi Nyamuwanga ˆneengira ˆnaayambaara ayeeyi na Peetero, obhweru mbubha mu-kyumba muyo. Maraayika uyo ˆnaabhuma Peetero mu-rubhafu ˆnaamuramusha, ˆnaamubhwira ati, “Iimuka bhwangu!” Kimwi eminyororo ginu ꞉bhaariga bhamubhoyere ku-mabhoko, ngigwa ansi.
8Mmbe, maraayika uyo ˆnaamubhwira ati, “Fwara gingibho gyawo na ebhikwirya bhyawo.” Peetero ˆnaakora kutyo, kimwi maraayika ˆnaamubhwira ati, “Nuufware na riikabhuuti ryawo, unseete!” 9Peetero ˆnaaseeta maraayika uyo mbayika anja wa ekyumba kiyo, nawe Peetero ꞉aariga atakumenya ati ni kimari amangʼana gayo, weeki ꞉aariga ˆnaatoga ati ꞉aariga ˆnaarora bhiroro era! 10Peetero na maraayika uyo ꞉bhaaturire ku-bhariisi abha okwamba, na abha akabhiri, mbayika ku-rwigi orwa ekyuma orwa okuwurukira mu-nyumba ya abhabhoywa. Orwigi ruyo rwone ndubheegukira orwene, mbawuruka anja. Mbatura njira yimwi, Peetero ˆnaataka era maraayika uyo ˆnaamubhura-ko.
11Niwe Peetero ˆnaamenya ati amangʼana gayo ꞉gaariga gari kimari, ˆnaaika ati, “Woori naamenya kimari ati Raatabhugenyi niwe aantumira maraayika waaye, anyeerushe okusooka mu-mabhoko ga Yerode, na mu-mabhiibhi goone kutyo ganu Abhayawudi ꞉bhaariga bheendere okunkorera.”
12Bhunu Peetero ꞉aamarire okumenya gayo, ˆnaagenda aroobhere ˆnaayika ewa Maryamu nyira Yowana. Yowana uyo riisiina ryaye erindi ꞉aariga ˆnaatogwa Maariko. Mu-nyumba ya Maryamu iyo ꞉bhaariga bhasangiiye-wo bheeyigira bhaafu mbasaasaamaga Nyamuwanga.
13Mmbe, Peetero ˆnaakongʼoona orwigi rwa anja ˆnaabhirikiraga ati, “Iika anu!” Omuyara wumwi omukosi wa emirimu, riisiina ryaye kaatogwa Rooda, ˆnaaja okumwigurira. 14Kimwi ˆnoongwa riisi rya Peetero. ˆNaajomerwa muno, ˆnaarabhirwa na okumwigurira orwigi, ˆnaabhirimira okwamba ku-bheejaabho ˆnaabhabhwira ati, “Bhamura! Peetero ayambaaye anja ku-rwigi ayo!”
15Bheeki mbamubhwira ati, “Waasara!” Nawe omuyara uyo weeki ˆnaakomeeresha okwaika ati oongwa riisi rya Peetero, niwe mbamubhwira ati, “Amwi uyo ni maraayika waaye.” 16Nawe Peetero ˆnaagenderera okukongʼoona orwigi ˆnaabhirikiraga. Kimwi mbeegura orwigi mbamurora, mbaruguura muno. 17Peetero ˆnaabheemusisha okubhoko bhajibhire, ˆnaabhabhwira kutyo Raatabhugenyi aamusoosha mu-nyumba ya abhabhoywa. Kimwi ˆnaabhabhwira kweki ati, “Amangʼana ganu, mubhwire Yakobho na abheejaasu abhandi.” Kimwi Peetero ˆneemuka ayo, ˆnaagenda ayandi.
18Anu obhukya, abhasirikare bha iinyumba ya abhabhoywa mbabha na kiyayo kyafu muno iiguru ya ganu ganyoorere Peetero. Mbabhuushaanyaga ati, “Kana Peetero agendere aaki?” 19Kimwi Yerode ˆnaasiiga bhamwagare, nawe ꞉bhaatamirwe okumunyoora. ˆNaabhuusha kujomu abhariisi, mbataamibhwa okumenya, kimwi ˆnaasiiga bheetwe. Okumara gayo Yerode ˆnaasooka Ebhuyawudi ayo, ˆnaagenda Kayijaariya, ˆneekara eyo nsiku ntooto.
Okufwa kwa Yerode
20Yerode ꞉aariga asinirwe muno na abhaanu bha omusi gwa Tiiro, na abha Sidooni. Niwe abhaanu bha emisi giyo mbagwatana, mbatuma abhareeti bha amangʼana ku-Yerode. Abhareeti bha amangʼana bhayo, mbakongya Bhurasito, omuyambaasi omwende wa mu-bhukama bhwa Yerode. ꞉Bhaariga mbeenda Bhurasito agende ku-mukama, abhasabhire obhusaani okwagara omurembe, kwa okubha abhaanu bha emisi giyo ꞉bhaariga mbeesiga okunyoora ebhyokurya okusooka mu-kyaro kyaye.
21Orusuku runu omukama Yerode ꞉aasorere okurorana na abhareeti bha amangʼana bhayo, ˆnaafwara gingibho gyaye egya ekikama, ˆneekara ku-kitebhe kyaye ekya okuramurira-ko abhaanu okuriingʼaana na ebhiraagiro, ˆnaamba okwaika imbere wa abhaanu bhayo ꞉bhaariga bhasangire ayo. 22Mmbe, abhaanu mbaamba okujomerwa mbaamura obhuraka ati, “Rinu ritari esi rya muunu! Riyo ni esi rya Nyamuwanga!” 23Kwa okubha Yerode ꞉ataayaaye Nyamuwanga ginkuma giyo, kimwi maraayika wa Raatabhugenyi Nyamuwanga ˆnaamusoma na iimuka ku-mwoyo, Yerode ˆnaasinga, ˆnaafwa aanyankire.
24Riingʼana rya Nyamuwanga ndigenderera okuswerana mu-bhaanu, na abheeyigira mbabha bhaafu muno. 25Bharinaabha na Saawuri bhoone, mbamara emirimu gyebhwe Yerusareemu ayo, mbagega Yowana unu riisiina ryaye erindi ꞉aatogwaga Maariko, mbasubha Antiyokiya.
Trenutno izabrano:
Ebhikorwa bhya Abhatumwa 12: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved