Ebhikorwa bhya Abhatumwa 10
10
Koroneriyo kaabhirikira Peetero
1Ku-musi gwa Kayijaariya ꞉aariga ariwo omukuru wa abhasirikare, riisiina rya omukuru uyo ꞉aariga ˆnaatogwa Koroneriyo. Koroneriyo uyo ꞉aariga ari muyambaasi wa bhasirikare egana. Abhasirikare bhayo ku-bhukumi bhwebhwe ꞉bhaatogwaga ati Kiitaariya. 2Koroneriyo na abhaanu bhoone kutyo abha iika ewaaye ꞉bhaariga mbaramya Nyamuwanga. Koroneriyo ꞉aariga ˆnaasaasaama ku-Nyamuwanga ku-nsiku, na okusakira abhatobhu woone ꞉aariga ˆnaasakira muno.
3Rusuku rumwi iri muna nsa kenda mu-mwisi, Koroneriyo ˆnaarora ebhiroro. Ku-bhiroro bhiyo, ˆnaarora bhwerubhweru maraayika wa Nyamuwanga ˆnaamuuja-ko ˆnaamubhirikira ati, “Koroneriyo!” 4Koroneriyo ˆnaaringira maraayika uyo enu oobhayire, ˆnaamubhuusha ati, “Raatabhugenyi, kyabha-yoki?”
Maraayika uyo ˆnaamubhwira ati, “Nyamuwanga oongwa gayo owusabha, na aarora kutyo owusakira abhatobhu. Obhusaasaami na obhusakisi bhwawo bhubheeye kibharikisho mu-meeso ga Nyamuwanga. 5Mmbe woori, tuma abhaanu bhagende ku-musi gwa Yopa, bhakubhirikirire Simooni. Simooni unu riisiina ryaye erindi kaatogwa Peetero. 6Eekaaye iika ewa omuroosha wa amaayi, riisiina ryaye kaatogwa Simooni. Iinyumba yaaye iri ku-ngego ya iinyanja.”
7Bhunu maraayika uyo ꞉aamarire okubhwira Koroneriyo amangʼana gayo, ˆneemuka. Mmbe, Koroneriyo ˆnaabhirikira abhajuuma bhaaye bhabhiri abha iika ewaaye, na musirikare wumwi ku-bhasakisi bhaaye unu woone ꞉aariga ˆnaaramya Nyamuwanga. 8Koroneriyo ˆnaabhabhwira amangʼana goone kutyo ganu maraayika ꞉aamuragiriiye, kimwi ˆnaabhatuma bhagende Yopa.
Ebhiroro bhya Peetero
9Mwejo, bhunu abhaanu abhasatu bhayo ꞉bhaariga bharebhereeye omusi gwa Yopa, Peetero ˆnaariinya iiguru ku-nyumba#10:9 ˆNaariinya iiguru ku-nyumba. Abhayawudi ꞉bhaariga mbaswika giinyumba gyebhwe kutya, abhaanja amasagi iiguru, mbatusha-ko gimbasi, mbagikaata na riiswa. Woori, ayo niwe ꞉bhaariga mbamuunyira. okusaasaama Nyamuwanga, iri mu-mwisi riisuubha riri mu-ruwotoosi. 10Peetero omweko ngumuruma. Bhunu ꞉bhaariga mbamukorera ebhyokurya, gintiro ngimugega ˆnaarora ebhiroro. 11Mu-bhiroro muyo, ˆnaarora orwire ndwiguka, na ekiinu muna egibho enene ndiisibhwa ansi, enu rigwatiriiwe mbaara gyaryo ena. 12Mw-igibho riyo ꞉gyariga girimo mbaga nyafu egya gintyanyi, ebhisoro, ganyabhuterere, na giinyonyi ginu egibhuruka iiguru.
13Kimwi Peetero ˆnoongwa obhuraka, mbumubhwira ati, “Peetero, iimuka, ubhaage urye!” 14Peetero ˆnaamubhwira ati, “Uri, Raatabhugenyi! Riibhaga, nikyariga okurya ekyokurya kyonekyone kinu kyaikirwe mu-bhiraagiro bhya Ekiyawudi ati ni kijabhi, amwi ati ni kinaabhi okukirya!”#10:14 Ringira Abharaawi 11. 15Kimwi obhuraka bhuyo mbubhwira Peetero kweki ati, “Bhinu Nyamuwanga eesiishe,#10:15 Eesiishe. Ringira riingʼana Abhataakatiifu mu-Mangʼana Amakomeeye. siga okubhyaika ati ni bhinaabhi.” 16Riingʼana riyo ndiisubhiirisha kasatu, kimwi riigibho riyo ndifutwa, ndisubha-yo mu-rwire.
17Bhunu Peetero ꞉aariga akyeebhuusha iiguru ya insonga ya ebhiroro bhiyo, abhaanu abhasatu bharya ꞉bhaatumirwe na Koroneriyo mbayika, mbabhuusirisha omusi gwa Simooni, mbagumenya, mbagenda mbayambaara ku-kishooko. 18Mbabhuusha raabhe Simooni unu kaatogwa Peetero eekaaye ayo. 19Na bhunu Peetero ꞉aariga akyeeganiirisha iiguru ya ebhiroro bhiyo, Mwoyo Omutaakatiifu ˆnaamubhwira ati, “Yungwa! Bhariwo abhaanu bhasatu anja ayo, abhakwagara. 20Woori yiika, ubhaseete usige okubha na kiitimaato, kwa okubha ni anye omwene naabhatuma ku-awe.”
21Mmbe, Peetero ˆneeka ansi, ˆnaabhwira abhaanu bhayo ati, “Ni anye omwagara. Mwareetwaki anu?” 22Mbamusubhya ati, “Mukuru wumwi owa abhasirikare riisiina ryaye kaatogwa Koroneriyo, omurengeresi ku-Nyamuwanga niwe aakituma. Koroneriyo uyo kaaramya Nyamuwanga na ekyaro kyone kutyo ekya Abhayawudi abhamwaika kujomu. Woori maraayika omutaakatiifu wa Raatabhugenyi Nyamuwanga amubhwiriiye ati akujiire ugende iika ewaaye, insonga eetegeereshe amangʼana ganu owuuja okumubhwira.” 23Peetero ˆnaabharamira ˆnaabheengisha mu-nyumba bhamaame.
Peetero ari mu-nyumba ya Koroneriyo
Mwejo, Peetero na abhaanu abhasatu bhayo, na abheeyigira abhandi okusooka Yopa mbaamba orugendo rwebhwe orwa okuja Kayijaariya. 24Runu bhaamba orugendo mwejo yeende-ko niwe mbayika Kayijaariya. Mbanyoora Koroneriyo araarikire abhayiiri na abhasaani bhaaye, ˆnaarindiriraga Peetero na bhanu ꞉aariga atumire.
25Bhunu Peetero ꞉aayikire ewa Koroneriyo, Koroneriyo ˆnaawuruka okumuramira, ˆneefukama, ˆnaamugwa-ko ku-maguru okumuramya. 26Nawe Peetero ˆnaamuyambaasha ˆnaamubhwira ati, “Yambaara! Anye noone niri omuunu era rwa awe!” 27Kimwi Peetero ˆneengira na Koroneriyo mu-nyumba enu mbaaikanaga, ˆnaanyoora abhaanu bhaafu bhasangiiye-mo. 28Peetero ˆnaabhabhwira ati, “Emwe mumenyere kujomu ati eswe Abhayawudi kitakwenderwa na ebhiraagiro bhyeswe okubha amwi na abhaanu bha ebhyaro ebhindi, na okutaarirana nabho. Nawe Nyamuwanga angaanyiishe ati nisige okubhirikira omuunu woonewoone ati ni mujabhi, amwi ati ni munaabhi.#10:28 Munaabhi. Ringira riingʼana Obhunaabhi mu-Mangʼana Amakomeeye. 29Kyakora bhunu utumire abhaanu okumbirikira, nniija nitari na kiitimaato. Mmbe, woori enisabha umbwire kinu umbirikiriiye!”
30Koroneriyo ˆnaamubhwira ati, “Nsiku esatu ginu giturire, ꞉naariga niri iika anu niisaasaamaga Nyamuwanga, mu-nsa kenda gya mu-mwisi rwa woori kutya. Kimwi nintaka era nindora omuunu ˆnaayambaara imbere waani afwayega ngibho ngingʼarabhyaga. 31ˆNaambwira ati, ‘Koroneriyo, Nyamuwanga oongwa obhusabhi bhwawo na aarora kutyo owusakira abhatobhu. 32Okuriingʼaana na gayo, woori nuutume abhaanu Yopa, bhajiire Simooni unu riisiina ryaye erindi kaatogwa Peetero. Simooni unu eekaaye ewa Simooni omuroosha wa amaayi. Iinyumba ya Simooni uyo iri ku-ngego ya iinyanja.’ 33Mmbe, nintuma abhaanu bhaaje ku-awe bhwangu. Awe woone waakora kujomu okuuja. Woori eswe bhoone kutyo kiri anu mu-meeso ga Raatabhugenyi Nyamuwanga, insonga kyungwe amangʼana goone kutyo ganu akuragiriiye okukibhwira.”
34Mmbe, Peetero ˆnaabhwira abhaanu bhayo ati, “Woori niwe naamenya ati, kimari Nyamuwanga atakusoroora bhaanu! 35Nawe keekirisha abhaanu bha ebhyaro bhyone kutyo bhanu abhamuungwa, na okukora ganu keenda. 36Emwe mwone mumenyere ati, Nyamuwanga ꞉aareeteeye Abhaijirayeeri iingʼana, mbaraasibhwa Amangʼana Amajomu aga omurembe okuturira ku-Yeesu Kiriisitu. Yeesu uyo niwe Esebhugenyi wa abhaanu bhoone kutyo. 37Na emwe abheene mumenyere amangʼana ganu ꞉gaabheeye ku-kyaro kyone kutyo ekya Ebhuyawudi. ꞉Gaambiiye Gariraaya, bhunu Yowana Omubhatiisha ꞉aaraasishaga abhaanu iiguru ya obhubhatiisha. 38Mumenyere ati Nyamuwanga ꞉aasorere Yeesu wa Naajareeti ˆnaamuyaana Mwoyo Omutaakatiifu, na obhuturo. Yeesu woone ˆneeyindaga enu na eyo, ˆnaakoraga amajomu na okuwosha bhoone kutyo bhanu ꞉bhaanyansibhwaga na Sitaani, kwa okubha Nyamuwanga ꞉aariga ari amwi nawe.
39“Goone kutyo ganu Yeesu ꞉aakorere mu-kyaro kya Abhayawudi, na Yerusareemu, eswe ni bharori bha amangʼana gayo ꞉aakorere. Mbamusunga ku-musarabha mbamwita, 40nawe orusuku rwa akasatu, Nyamuwanga ˆnaamusuura, ˆnaamweresha ku-bhaanu. 41꞉Ataarorerwe na abhaanu bhoone kutyo, tari Nyamuwanga ꞉aasorere abhaanu abharebhe okumurora. Abhaanu bhayo ni eswe, ꞉kyamurorere, ꞉kyariiye na okunywa amwi nawe bhunu ꞉aasuukire okusooka mu-bhafuuye. 42ˆNaakiragirira okuraasisha abhaanu Amangʼana Amajomu, na okubhwira abhaanu ekimari ati omwene niwe ꞉aatuuywe-wo na Nyamuwanga, aramurire bhanu abharora na abhafuuye. 43Yeesu uyo, niwe abharagi bhoone kutyo ꞉bhaaikiraga ati, omuunu woonewoone unu arimwikirisha aryabhirwa ebhikayo bhyaye kw-isiina ryaye.”
44Bhunu Peetero ꞉aariga ˆnaaika amangʼana gayo, Mwoyo Omutaakatiifu ˆneekira abhaanu bhoone kutyo bhanu ꞉bhaariga mbageetegeeresha. 45Abheeyigira Abhayawudi bhanu ꞉bheejire na Peetero, mbaruguura muno okurora ati Nyamuwanga kaayaana Mwoyo Omutaakatiifu na bhanu bhatari Bhayawudi. 46꞉Bhaamenyere kutyo kwa okubha ꞉bhoonguuywe abhaanu bhayo mbaaikaga mu-nyaaika egindi nyaaya okukumangya Nyamuwanga.
Niwe Peetero ˆnaaika ati, 47“Niga kaatura okugaanya abhaanu bhanu bhasige okubhatiisibhwa mu-manji? Bhaaramira Mwoyo Omutaakatiifu rwa kutyo eswe kyone ꞉kyamuramiiye.” 48Niwe Peetero ˆnaaragirira ati bhabhatiisibhwe kw-isiina rya Yeesu Kiriisitu. Kimwi abhaanu bhayo mbasabha Peetero eekare nabho nsiku ntooto.
Trenutno izabrano:
Ebhikorwa bhya Abhatumwa 10: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved