मारकुस 3
3
हुक सोप्खॆम्पा याॽमि नुबक्मिॽमिम्पा
(मट्टि १२:९-१४; लुका ६:६-११)
1होइखेपा फेरि येसु याहुडिचि खोम्ठाम् खिम्पि खारा। आक्रल आक्कुबि हुक् सोप्खॆमिम्पा एक्क याॽमि चुआ। 2नाचामॆ डिना येसुऎ आक्क हुक् सोप्खॆम्पा याॽमि नुबक्मिकुयॆ रु हाङ् आब्डिक् टिहिऎरु कामानुङ् येसु सिच्चाखुबा फारिसिचिऎ खो चोप्मे पाइटुचि। 3येसुऎ आक्क हुक् सोप्खॆम्पा याॽमि लोसु, “डाबॆहाङ् चोब्नमि लुम्पि येबॆ।” 4हाङ् येसुऎ आक्खाचि लोसुचि, “लु इसाम्नॆ, यायेॽमाऎ नाचामॆ डिना नुऎ योम्पक् मुमाइकुयॆ रु काइसॆ? हिङ्पक्मिॽमा लोकुयॆ रु सेॽमा?”#३:४ येसुऎ आक्कुबि चुखुबा फारिसिचि वोःमानुङ् ग खानावाँ लोमिम्पा यो। मान्ठाभनॆ नाचामॆ डिना नुऎ योम्पक् यिग्मान काम्नुऎ लॆटा। टर याॽमिचि माङ्स मॆकामि। 5हाङ् मिक् फिन्से येसुऎ आक्कुबिहा चोब्न याॽमिचि खाङुचि। आक्खा याॽमिचिम् लुङ्कॽवा रक्मा निवाँ खाङुहाङ् येसु एट्टान डुखा मिनु। हाङ् खोसॆ आक्क याॽमि लोसु, “आनाम् हुक् खिङ्पकॆ।” खोसॆ सङ्क उम् हुक् खिङ्पकु हाङ् उम् हुक् नुबखारा।
6ह आक्खा फारिसिचि याहुडिचि खोम्ठाम् खिम्बाङ् खाइटामि हाङ् मरक्लन येसु मान्टहाङ् सेॽमॆ कामानुङ् हेरोडमि याॽमिचि नुङ् खानावाँ इसामि।
7आक्क डॆङ्पि येसु खोम् टिङ्खुबाचि नुङ् गालिल टोम्पॽलिॽवा कॆक्पि खारा। हाङ् गालिल लोमॆ ठावाँबिहा डिरिक् याॽमिचिऎ खो टिङ्पकुचि। 8येसुऎ लॆःॽमिम्पा आक्खॆॽमाहा योम्पक्मि बारेबि खेमुचिहाङ् याॽमिचि याहुडिया, यरुसालेम हाटा नुङ् इडुमियाबाङ् हाङ् यारडान हङ्मा मॆआरॆङ् हाङ् टायार नुङ् सिडोन लोमॆ ठवाँमि गॆअङ्मॆअङ्बाङ् सङ्क टाआमि। 9डिरिक् याॽमिचिऎ ऎचॽङामिर मिन्मानुङ् येसुऎ खोम् टिङ्खुबाचि एक्क मिःछुॽमा सिङ्खङ् परक्मिट्टुचि।
10खोसॆ डिरिक् टुक्खाचि नुःबक्मिॽमिम्पासॆ, डिरिक् टुक्खाचिऎ खो डिन्चामाम् लागि सयक्पयक् लॆःॽमॆ पाइटामि। 11खारिॽमाङ्ऎ लाॽमिम्पा याॽमिचिऎ येसु खाङ्टॽमा अक्सि खो स्यामिसे लोसुचि, “आना निवाँहाङ्मि पासानान।”#३:११ याॽमिऎ हॆॽनॆ टर आक्खा याॽमिचि हङ्सि पेन्डॆ खारिॽमाङ् चाइ यामुडॆ रेम। 12टर येसुऎ आक्खा खारिॽमाङ्चि काङा आसाङार कामानुङ् ऎइसाम्नॆ कामानुङ् वोसुचि।
येसुऎ एपङ्हि टिङ्खुबाचि सॆःक्मिम्पा
(मट्टि १०:१-४; लुका ६:१२-१६)
13येसु एक्क पङ्पङ्माबि ठाङा हाङ् खोम् निवाँऎ चामिम्पाचि खोनुङ् सेःरुचि हाङ् खोचि सङ्क येसुबि टाआमि। 14हाङ् खोसॆ खोनुङ् पेन्माम् लागि हाङ् खोम् खानावाँ खेम्मिसि पाङ्हाङ्माम् लागि एपङ्हि सॆगुचि हाङ् खोचि सॆःक्ढुङ्पाचि कामानुङ् निङ् पिट्टुचि। 15हाङ् खोचि खारिॽमाङ्चि लाःबक्मॆ ढुप्पाट्ट सङ्क पिट्टुचि। 16येसुऎ सॆःक्मिम्पा एपङ्हि जाना इघाचिन यो, सिमोन#३:१६ सिमोन लोमॆ गिरिक् खाप्पि लुङ्कॽवा लोमॆ लिः, खो येसुऎ पाट्रुस निङ् पिट्टु। 17जाब्डियामि पासा याकुब हाङ् खोम् नुसा युहान्ना। खोसॆ आक्खाचि बोआरगानेस लोसुचि, म लोमिम्पा चाइ नाम्टुरुङ्मामि पासाचि रेम। 18हाङ् आन्डेरेयास, फिलिप, बारठोलोमाइ, मट्टि, ठोमा, आल्फायासमि पासा याकुब हाङ् ठेडियास हाङ् हाङ्टेम् नेन्चा सिमोन। 19हाङ् येसु बङ्सिखुबा याहुडा इस्कारियोटि।
येसु हाङ् बालाजिबुला
(मट्टि १२:२२-३०; लुका ११:१४-२३; १२:१०)
20आक्क डॆङ्पि येसु एक्क खिम्पि खाराहाङ् भॆना। फेरि गर डिरिक् याॽमिचि खोम्पकामि, येसु हाङ् खोम् टिङ्खुबाचिऎ चामा सङ्क माटक्कुचि। 21हाङ् ग खानावाँ येसुमि खिम्पिहा याॽमिचिऎ खेमुचि हाङ् खोचिऎ खो ङाङ्पखारा मिट्टुचि। मसॆ खोचि येसु सॆॽडाॽमाम् लागि खारामि।
22हाङ् यरुसालेमबाङ् टामिम्पा मोसामि यायेॽमा चिन्खुबाचिऎ गर लोसुचि, “गग बालाजिबुला लोमॆ चोब्बाङ् ढ्या खारिॽमाङ्ऎ लाब्डु, हाङ् म ढ्या खारिॽमाङ्मि चॆक्मावाऎन खारिॽमाङ्चि लाबकु।”
23मसॆ येसुऎ आक्खा मोसामि यायेॽमा चिन्खुबाचि सेःरुचिहाङ् काठाबि लोसुचि, “मान्टक्ल साइटानऎ साइटान लाबहिकुयॆ टा? 24एक्क हाङ्डाम् हङ्सिॽयुन टाङ्पाटाङ्पाबि खिमाटुमा चु हाङ्ग आक्क हाङ्डाम् डिरिक् लःढारि लिढाङ्नि। 25हाङ् एक्क खिम्पि खिमाटुमा लिसा हाङ्ग, आक्क सङ्क डिरिक् लःढारि लिढाङ्नि। 26गरहाङ्न साइटानमि साइटान नुङ्न खिमाटुमा लिसा हाङ्ग, आक्क सङ्क लिढाङ्हिनि, आक्क लुख्खॆ। 27एक्क चॆकुयॆ याॽमिमि खिम्पिहा चासुम् लुप्चामाम् लागि आक्क चॆकुयॆ याॽमि नुःर माठुप्पा आसॆस लुप्हिहिसुचिनि। आक्क ठुप्सिकुचि हाङ्टेःॽन चासुम् लुप्हिकुचि।
28“चाइबान कॆ आन्ना लोकानि, याॽमिमि चोब्न हिङ्वा हाङ् निवाँहाङ् काइर लोमिम्पा खानावाँ सङ्क यङ्निहि। 29टर सॆङ्सॆङॆ लावा काइर लोमिम्पासॆ लिमिम्पा हिङ्वा चाइ हानाम्स यङ्निमा लिनि, टर आक्क हानाम्स सःग्क्लेनॆ हिङ्वामि आब्डिक् नुङ्मा लि।” 30खोसॆ ग खानावाँ लोसु मान्ठाभनॆ खोचिऎ येसु खारिॽमाङ्ऎ लाःब्डु लोमिम्पा लॆटुचि।
येसुमि आमा नुङ् नुसाचि
(मट्टि १२:४६-५०; लुका १९:१९-२१)
31हाङ् खोम् उम्मा हाङ् नुसाचि टाआमि हाङ् बाहिरान येप्मानुङ् येसु सेहाङ्सुचि।
32येसुमि गॆअङ्मॆअङ् याॽमिचि पेन्ढाङ्पा लॆटामि। खोचिऎ येसु लोसुचि, “चिन्खुबो, खाङॆ, आनाम् आमा नुङ् नुसाचिऎ आना बाहिर यक्मे पाइमि।” 33खोसॆ आक्खाचि लोसुचि, “काम् आमा नुङ् नुसाचि आसाचिर?” 34खोसॆ खोम् गॆअङ्मॆअङ् पेन्मिम्पाचि खाङ्से लोसुचि, “काम् आमा नुङ् नुसाचि इघाचिन। 35मान्ठाभनॆ आसा निवाँहाङ्मि निवाँ रक्न पाइ खोचिन काम् आमा हाङ् नुसाचि रेम।”
Trenutno izabrano:
मारकुस 3: LBR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. and Nepal Bible Society
