मारकुस 2
2
लाङ् फॆन्नॆ याॽमि नुबक्मिम्पा
(मट्टि ९:१-८; लुका ५:१७-२६)
1एक्क हिच्चि डिना डॆङ्पि येसु फेरि कफारनुहुम् लोमॆ हाटाबि ऎन्टाआ। हाङ् याॽमिचिऎ खो खिम्पि चुक् कामानुङ् खेमुचि। 2हाङ् येसु चुऎ खिम्पि गर डिरिक् याॽमिचि खोमामि कि, आक्कुबि हङ्सिॽयु नुङ् बाहिरा लॆठाम् ठावाँ सङ्क मान्चु। खोसॆ आक्खा याॽमिचि निवाँहाङ्मि खानावाँ खेम्मिॽमे पाइटुचि।
3हाङ् रिचि जाना याॽमिचिऎ खिन्से लाङ् फॆम्पिटुनॆ एक्क याॽमि चिःक्मानुङ् याॽमिचि आक्कुबि टाआमि। 4डिरिक् याॽमिचि लिमिम्पासॆ खोचिऎ म लाङ् फॆम्पिटुनॆ याॽमि येसुबि टॆःॽमा माहेसुचि, मसॆ खोचिऎ येसु पेन्डॆ ठालमि सङ्पिटुऎ वाचेन् अःगुचि हाङ् लिठाम्नुङ् आक्क लाङ् फॆन्नॆ याॽमि लाढिन्टुचि। 5येसुऎ आक्खाचिम् निवाँयुङ् वाप्टकुहाङ् आक्क लाङ् फॆम्पिटुनॆ याॽमि लोसु, “लाङ्काम्, आनाम् चोब्न हिङ्वा यङ्मिॽडा।”
6हाङ् आक्कुबि पेन्ढाङ्मिम्पा एक्क हिप्पा मोसामि यायेॽमा चिन्खुबाचि उम्चि निवाँबि गर मिॽमे पाइटुचि, 7“गसॆ ग निवाँहाङ् रे पेचायॆ रछ। निवाँहाङ्बाङ् होइक आसॆ हिङ्वा यङ्मिॽहिकुयॆ?” 8मरक्लन येसुऎ खोम् निवाँबि आक्खाचिऎ माङ् मिॽलामॆ पाइकुचॆ कामानुङ् लेटकु हाङ् आक्खाचि लोसुचि, “मान्ठा आन्नॆ गरक्मा खानावाँ मिॽलामे पाइकाम्नॆ? 9ग लाङ् फॆम्पिटुनॆ याॽमि, काङॆ ‘आनाम् हिङ्वा यङ्निडा’ लोमा खॆन्चाकुवॆ रु ‘आनाम् लिःॽमारा खिनॆहाङ् लाम्ढुसॆ’ लोमा खॆन्चाकुवॆ? 10टर आन्नॆ ग लेसाम्नॆ, काङा याॽमिमि पासा नुङ् बाखाटेम्पि हिङ्वा यङ्मिॽमॆ ढुप्पाट्ट चु।” हाङ् येसुऎ आक्क लाङ् फॆम्पिटुनॆ याॽमि लोसु, 11“कॆ आना लोक्ना, येप्पकॆ, हाङ् आनाम् लिःॽमारा खिम्मानुङ् आम् खिम्पि खारॆ।” 12हाङ् आक्क येप्पका हाङ् मरक्लन उम् लिःॽमारा खिम्मानुङ् चोब्नमि लुम्पाङ् खाइटा। आक्कुबि चुखुबा याॽमिचिऎ आक्टिखॆस्से गर कामानुङ् निवाँहाङ्मि निङ् ठेरुचि, “गरक्मा खानावाँ ग काङ्कॆ हानाम्स माखाङ्टिटुङ्का।”
येसुऎ यावॆङ्ग लाखुबा लेबि लोमॆ याॽमि सेःॽमिम्पा
(मट्टि ९:९-१३; लुका ५:२७-३२)
13येसु फेरि गालिल टोम्पॽलिॽवा कॆक्पि खारा। डिरिक् याॽमिचि खोबि टाआमि हाङ् खोसॆ आक्खाचि खानावाँ चिनुचि। 14येसु आक्कबा लाम्ढुमे सिसार आल्फायासमि लेबि लोमॆ पासा यावॆङ्ग लामॆ ठालबि उम् योम्पक् यिग्मे सिऎ खाङ्टकु। येसुऎ खो लोसु, “काङा टिङ्ङॆ।” लेबि येप्पकाहाङ् खो टिङ्पकु।
15येसु लेबिमि खिम्पि चाम् चासि पेन्मार#२:१५ याहुडि चालाना रक्न खोचि चामा चामार इम्चाइन्ट सॆन्टिखॆस्से चायुक्सामि। , यावॆङ्ग लाखुबा होइढा डिरिक् याॽमिचि, हिङ्वाचि सङ्क खोनुङ् खोम् टिङ्खुबाचि नुङ् चासि पेनामि। 16मोसामि यायेॽमा चिन्खुबा फरिसि लोमाहा एक्क हिप्पा याॽमिचिऎ येसुऎ यावॆङ्ग लाखुबाचि हाङ् हिङ्वाचिनुङ् सोरि पेन्से चामिम्पा खाङ्टकुचिहाङ् येसुमि टिङ्खुबाचि गर कामानुङ् सिमुचि, “मान्ठा खो आक्खा यावॆङ्ग लाखुबा नुङ् हिङ्वा नुङ्मा याॽमिचि नुङ् सोरि पेन्से चाऎ?”
17टर येसुऎ आक्खाचिम् खानावाँ खेमुहाङ् लोसुचि, “सिढा याङ्खुबा ग टुक्खाचिम् लागि रे पाबुक् टा, टुक्मिनिहाचिम् लागि ग पाब्नि। गरहाङ्न काङा निवाँनेन्चि हॆॽनॆ टर हिङ्वाचि सेसि टाडिङ् यो।”
साक्नॆॽमॆ खानावाँ
(मट्टि ९:१४-१७; लुका ५:३३-३९)
18बाप्टिस्मा पिख्खुबा युहान्नामि टिङ्खुबाचि हाङ् फारिसिचिऎ साक्नॆॽमार एक्क हिप्पा याॽमिचि टाआमिहाङ् येसु गर कामानुङ् सिमुचि, “बाप्टिस्मा पिख्खुबा युहान्नामि हाङ् फारिसिचिम् टिङ्खुबाचि साक्नेरुक्मि, टर आनाम् टिङ्खुबाचि चाइ मान्ठा साक्नेॽमिनिहा?”
19येसुऎ आक्खाचि लोसुचि, “माल् भ्या चासि सेःॽमिम्पा याॽमिचि साक्नेरुक्मिहॆटा? डाङ्पा खोचिनुङ् लिरढारि खोचि साक्नेॽमिनि। 20टर गरक्मा डिना सङ्क टा, खोचिबाङ् डाङ्पा फाॽलाङ् म डिना खोचि साक्नेरुॽमि।
21“आसॆस याॽलियाॽलिहा चे उम्चङ् चेऎ लेबुचिनि। लेबुकुचि हाङ्स उम्चङ् चेऎ म याॽलऎ झाना ढ्या नाःग्बकु।
22“हाङ् आसॆस उम्चङ् आङ्गुरमि डिबु याॽलिहा साखक्मि बॆक्खाबि डॆन्टुचिनि। डॆन्इटा हाङ्स बॆक्खा सङ्क नाःग्लिङ्खॆ हाङ् आङ्गुरमि डिबु सङ्क बोप्लिङ् खॆ। मसॆ उम्चङ् आङ्गुरमि डिबु उम्चङ् साखक्मि बॆक्खाबिॽन डॆन्मा लॆ।”
नाचामॆ डिनामि खानावाँ
(मट्टि १२:१-८; लुका ६:१-५)
23नाचामॆ डिना येसु सिःचाम्मि रोपाबाङ् खॆॽमॆ पाइटार खोम् टिङ्खुबाचिऎ सिःचाम्मि बाला सुप्चाउचि। 24फारिसिचिऎ खो लोसुचि, “खाङॆ, मान्ठा आनाम् टिङ्खुबाचिऎ यायेॽमाऎ नाचामॆ डिना लॆःॽमा फॆन्नि लोमिम्पा योम्पक् सङ्क यिगुक्मिहा?”#२:२४ यायेॽमा २३:२५ गुबि फरिसिचिऎ मान्ठा येसुमि टिङ्खुबाचिऎ सिचाम् खुमिम्पा लोमानुङ् वोमिम्पा चाइ हॆॽनॆ, मान्ठाभनॆ याहुडिचिम् चालाना रक्न होइढाचिम् रोपाबाङ् मिॽमिॽ चामॆङ् कोप्चामा टक्चायुङ्सुचि। टर नाचामॆ डिना चाइ माङ्स योम्पक् यिग्मा माफॆन्युङ।
25येसुऎ आक्खाचि लोसुचि, “माल् आन्नॆ डाउड हाङ् नुङ् खोम् लाङ्काम्चि सागॆ सिसुचिर चामाम् लागि माङ्स माऎ बेला माङ् लॆटुयॆ हानाम्स मापाढालॆटिटाम्नॆ?#१ सामुएल २१:१-६ 26आबियाठार लोमॆ याॽमि चोब्बाङ् ढ्या याटाङ्पा लॆटार डाउड निवाँहाङ्मि खिम्पि खारा हाङ् युङ्ठङ्बि सङ्टिम्पा याटाङ्पाचिऎ टेःॽन चामा नुऎ चामा ठका टाबु हाङ् चउ हाङ् खोम् याॽमिचि सङ्क पिट्टुचि। यायेॽमा रक्न आक्क चोब्बाङ् ढ्या याटाङ्पाचिऎ टेःॽन चामा नुऎ लॆटा।”
27हाङ् येसुऎ खानावाँ लुक्पिसे लोसुचि, “याॽमिमि लागि रे नाचामॆ डिना मुमिम्पा, नाचामॆ डिनामि लागि याॽमि मुमिम्पा हॆॽनॆ। 28मसॆ काङा याॽमिमि पासा नाचामॆ डिनामि सङ्क पारभुङा यो।”
Trenutno izabrano:
मारकुस 2: LBR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. and Nepal Bible Society
