Yôan 5
5
1Isam̃u yiṉo vya, arweṉi fèti y’Iju, n’avandi Yesu gô Yerusalèm.
2Ndô, gô Yerusalèm, pyèrè n’iguge ny’adombè, are mbôra yi sovuṉa yi fweyô gô nkambiṉi y’Ebèr inè, Betesda, ni mbôra mè yi re ni vungu ôtaṉè. 3-4Gô vungu yiṉo alwaṉagi aṉag’awenge w’avegagi n’inkaṉi, apoku, ni bôke, na mongi wi jogo awogo.
5Avegagi vovo ôṉôm̃e w’alwaṉi ni nkaṉi agôm̃i m’impum̃’ararô n’impum̃’eṉanay. 6Gw’ayenyô yè ne Yesu dèwa pa bi, amya inè, adwaṉi ni nkaṉi ôling’ôla, awulinyi yè inè: Ô bele tôlizô? 7Awiṉizô yè n’ôma wi jogo inè: Rera, mi zele n’ôma wi fwela myè gô mbôra yi sovuṉa gô sugô aṉingô, ndô ôlingô wi bya myè gôgô, ôm’ômwèṉè e diwô kweṉa myè myè ziṽaga ro. 8Awulinyô yè ne Yesu inè: Nongwa, rômbiṉ’ôdô wo, ko kèndaga. 9N’arôlizyô ôma mè pelè, n’arômbiṉi yè ôdô wè, agèndaga.
10N’ôwenja mè w’avegagi soṉo. Yeṉo awulinyi Iju ôma w’ayingyô inè: Nèṉo soṉo, e zele kwèkwè gôre wè gô twaṉ’ôdô wo. 11Ndô awiṉizi waô inè: Ayè y’atôliza myè abulinya myè inè: Rômbiṉ’ôdô wo, ko kèndaga. 12Aṽambyi waô yè inè: Ôma mè mande abulinyo inè: Rômbiṉ’ôdô wo, ko kèndaga. 13Ndô ayè y’arôlizyô e pa my’ebagaṉô z’ôma w’arôlizi yè; konde Yesu aliwô atômbi ôkuṽi wè avila gôr’aṉaga w’avegagi gô mbôra mèyoṉo. 14Avila vovo, Yesu aliṽinyi yè gô nagô y’Anyambyè, n’awulinyè yè inè: Vôna, w’atôli; arô dend’ibe nyèṉè, awè vende byeṉô n’ôsam̃u ômbe vyagaṉô na wiṉo. 15N’agèndi ôma mè, amyeze Iju inè, ôma w’arôlizi yè ne Yesu. 16Gô ntiṉa mèyiṉo Iju w’agombizi Yesu, konde alend’isam̃u yiṉo gô ntyugu yi soṉo.
17Ndô Yesu awiṉizi waô inè: Reri yam̃ e janja kwanga gw’egômbe ziṉo; myè kè mi janja. 18Gô ntiṉa yiṉo Iju w’arô buti vyagaṉô gô jôṉè, konde e pa jôṉa dadyè ntyugu yi soṉo, ndô aweyi Anyambyè inè, Reri yè kè, mpangag’ôkuṽi wè mbela mô n’Anyambyè.
19Yeṉo awiṉizi Yesu, awulinya waô inè: Giligili mi bulinya ṉwè inè, Ômwaṉa ayolye dend’ezom̃a ayèmè, ndô kaô nte jeṉè Rerè e denda; n’ezom̃’edu zi dendô ne Rerè, zô kè zi dendô n’Ômwaṉa mbela mô. 20Konde Rerè e tond’Ômwaṉa, arevè isam̃u yôdu yi dendô yè; e be tevè kè isam̃u impôlô vyagaṉô na yiṉo, ko ṉwè m̃ama. 21Konde ga nte tôngunye Rerè mongi wi re juwa pa alwaṉiza waô bo, yeṉo kè Ômwaṉa e dwaṉiza waô wi belô yè bo. 22Konde Rerè e pa jèkèly’ôma, ndô are pa p’ijèkèlya sôdu gôr’Ômwaṉa, 23inè, aṉaga waôdu wi ga lub’Ômwaṉa ga nte duba waô Rerè. Ayè yi re e pa dub’Ômwaṉa, e pa duba kè Rerè y’arôm̃i yè. 24Giligili mi bulinya ṉwè inè, ayè yi jogw’igambi nyam̃, aṽekely’ôma w’arôm̃i myè, are n’em̃èṉo za koṉako, aṽye kè gw’ijèkèlya, ndô are pyagaṉa pa avila gw’ijuwa agènda gw’em̃èṉo. 25Giligili mi bulinya ṉwè inè, igwèra nyi bya, nye nyiṉo kè, nyi be jogo mongi wi re juwa pa inyôy ny’Ômwaṉa w’Anyambyè; na waô wi be jogo nyô wi be dwaṉa bo. 26Konde ga nt’are Rerè n’em̃èṉo g’ôkuṽi wèmè, yeṉo kè are pa p’Ômwaṉa gô dwaṉa n’em̃èṉo g’ôkuṽi wè. 27Are pè pa k’inyanga nyi jèkèlya, konde ayè n’Ômwaṉa w’ôma. 28Am̃amaṉi g’ômwanja w’igamba nyiṉo; konde igwèra nyi bya nyi be jogo waôdu wi re gw’irôngiṉô ayogw’inyôy nyè, ko waô kogwa. 29Waô wi re denda pe mbya wi be tôngwa gw’em̃èṉo, ndô waô wi re denda pe mbe wi be tôngwa g’ôgara. 30My’ayolye dend’ezom̃a myèmè: mi jèkèlya nte jogo myè; n’ijèkèlyi sam̃ si r’ôgôre, konde mi pa bute ntondiṉi yam̃imè, ndô ntondiṉi y’ôma w’arôm̃i myè.
31Ja my’atakilya g’ômwanja w’ôkuṽi wam̃imè, agambi mam̃ mi zele rèti. 32Ar’ôm’ômwèṉè wi takilya g’ômwanji wam̃, my’avôrô kè inè, agamba mi takilyô yè g’ômwanji wam̃ mi re rèti. 33Aṉw’are tôm̃a pa gôre Yôan, n’arakilyi yè ôrèti. 34Agamba mi bongô myè mi pa pila gôr’ôma; ndô mi buly’isam̃u yiṉo inè, aṉwè ga zungiṉô. 35Yôan avegagi lambi yi bam̃iṉa aṽamba, arondi ṉwè gô jeṉe mbya g’ôzange wè vo mw’ôlingô. 36Ndô my’are n’agamb’ampôlô vyagaṉô na mi Yôan, konde ṽilô yi re Rerè pa pa myè gô denda, ṽilô mèyoṉo yi dendô myè; yô takilya g’ômwanji wam̃ inè, Rerè ayè re tôm̃a pa myè. 37Ni Rerè kè y’arôm̃i myè, ayèmè re takilya pa g’ômwanji wam̃. Aṉwè pa jogw’inyôy nyè ni mori, ge jeṉ’ôzô wè, 38n’igambi nyè nyi pa dwaṉa gôre ṉwè, konde aṉwè pa bekely’ôma wi re yè tôm̃a pa. 39Aṉwè kèlagèl’Irèndo, konde aṉwè pikilya inè, gô yô aṉw’are n’em̃èṉo za koṉako, n’Irèndo yiṉo yô takilya g’ômwanji wam̃. 40N’aṉwè pa bela gô bya gôre myè gô dèng’em̃èṉo!
41Mi pa bong’inyanga avila gôr’aṉaga. 42Ndô my’avôrô ṉwè inè, aṉwè aze n’itonda s’Anyambyè gw’ikuṽi yaṉi. 43My’are bya pa gw’ina nya Reri yam̃, ndô aṉwè pa bonga myè; j’abya ôm’ômwèṉè gw’ina ny’ôkuṽi wèmè, aṉwè be bongè. 44Aṉwè be bekelya sèṉi, aṉwè yi pô inyanga ôm̃ori n’ôm̃ori, ndô aṉwè pa but’inyanga nyi pila gôr’Anyambyè dadyè? 45Avikilyaṉi nè, mi be soziza ṉwè g’ôzô wa Rerè; ôma wi be soziza ṉwè, ne Môsès yi dôṽiṉô ṉwè igum̃u. 46Konde arwe nè aṉwè bekelye Môsès, gavoṉo aṉw’atô bekelya myè kè, konde arèndi g’ômwanji wam̃. 47Ndô j’aṉw’aṽekelya nt’are yè tènda pa, gambèṉè aṉwè be bekely’agambi mam̃ sèṉi?
Trenutno izabrano:
Yôan 5: MYE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Published by the British and Foreign Bible Society in 1927.
