Yôan 4
4
1Rerè amyeṉi nè, ifarisi s’aliwô s’ajogyô inè, Yesu e panga aṽatiz’iṉèngi vyagaṉô ni Yôan. 2Vangaṉe Yesu ayèmè e pa batiza, ndô kaô iṉèngi yè. 3Vovo alubwi yè gô Yuda, awinya gô Galile.
4Gw’avegagi yè n’isolo inè, e ga vyagaṉe gô Samarya, 5aṽyeṉi gô nkala yi Samarya y’aweyôgô inè, Sikar, pyèrè ni mbèy yi ntye y’avenyô Yakob gôre Yôsèf y’ômwaṉi wè. 6Everô zi Yakob z’avegagi vovo. Yesu jasa pa n’ôgèndo, alwaṉi baru pyèrè n’everô. Avegagi pyèrè n’agwèr’ôrôṽa.
7Aṽyeṉ’ômwantô Samarya gô per’aṉingô. N’awulinyô yè ne Yesu inè: Va myè aṉingô mi jonga. 8Konde iṉèngi yè y’aliwô y’akèndi gô nkala gô kôl’inya. 9Awulinyô yè n’ômwantô Samarya inè: Awè, mwô’Ju, ô bambya myè ômwantô Samarya aṉingô sèṉi? Konde Iju wi ze n’alato na mongi Samarya. 10Awiṉizyô yè ne Yesu inè: Arwe nè w’amyeṉi mpagaga y’Anyambyè, n’ayè y’abulinyo inè: Va myè aṉingô mi jonga, gavoṉo w’atô bambyè, ko yè po aṉingô m’em̃èṉo! 11Awulinyô yè n’ômwantô inè: Rera, ô zele n’ezom̃a zi kul’aṉingô, n’everô zi r’ôronga; sambô aṉingô mè m’em̃èṉo mi re na wè mi pila na gweṉi? 12Ô r’ômpôlô vyagaṉô na reri yazô Yakob, aveṉi zwè everô ziṉo z’ayongôgô yè ayèmè n’awaṉi wè n’ilembi yè? 13Awiṉizô yè ne Yesu inè: Ôm’edu e jong’aṉingô miṉo e be tô jeṉ’esôve; 14ndô ayè yi be jong’aṉingô mi be pa myè yè ayeṉ’esôve nyèṉè, n’aṉingô mi be pa myè yè mi be kalwa gô gare yè everô z’aṉingô mpôvaga kwanga gw’em̃èṉo za koṉako. 15N’awulinyô yè n’ômwantô inè: Rera, va myè aṉingô mèmoṉo, ko my’arô jeṉ’esôve nyèṉè, gô bya guṉu gô per’aṉingô. 16Awulinyô yè ne Yesu inè: Gènda gô fwey’ôṉôm̃u wo, ko bya guṉu. 17Awiṉizi ômwantô inè; Myè zele n’ôṉôm̃e. Awulinyô yè ne Yesu inè: W’abulyi mbyambye inè: Mi zele n’ôṉôm̃e. 18Konde ô re jômba p’aṉôm̃e ataṉè, na wiṉo wi re na wè vèṉo arang’ôṉôm̃u wo. Igamba nyiṉo nyi re wè bulya pa nyi re mèmè. 19Awulinyô yè n’ômwantô inè, Rera, mi jeṉa nè, awè ôvogisi. 20Ireri sazô s’azaviṉagi gô nômba yiṉo; ndô aṉwè bulya inè, Yerusalèm ne mbôra yi r’aṉaga gô saviṉa. 21Yesu awulinyi yè inè: Ômwantô, ṽekelya myè, inè, igwèra nyi bya, nyi re aṉwè azaviṉe Rerè gô nômba yiṉo ge gô Yerusalèm. 22Aṉwè saviṉ’ezom̃a zi re ṉwè pa mya; azwè, azwè saviṉ’ezom̃a zi re zwè mya pa, konde isungiṉa si pila gôr’Iju. 23Ndô igwèra nyi bya, nye nyiṉo kè, nyi re waô wi saviṉa rèti wi be saviṉe Rerè n’iṉiṉa n’ômyèṉè, konde Rerè e but’aṉaga ôṉongo mè gô saviṉè. 24Anyambyè iṉiṉa, na waô wi saviṉè wi ga zaviṉe yè n’iṉiṉa n’ômyèṉè. 25Awulinyô yè n’ômwantô inè: My’avôrô inè, Mesya e bya (e fweyô inè, Krist); gô be byè e be bulinya zwè isam̃u yôdu. 26Awulinyô yè ne Yesu inè: Myè yi kamba na wè, ne yè.
27Vovo aṽyeṉ’iṉèngi yè, n’am̃ami waô konde agambi n’ômwantô. Ndô e re pegeg’ôma w’awulyi nè: Ô but’ande? ge inè: Ô kamba n’ômwantô sèṉi? 28Vovo ômwantô arigi ntyugi yè, agènda gô nkala, awuliny’aṉaga inè: 29Yôgôṉi gô jeṉ’ôma w’abulinya myè isam̃u yôdu yi re myè denda pa, wiṉo arange Krist? 30N’agogwi waô avila gô nkala, aṽya gôre yè.
31Ômwantô kèndaga pa, iṉèngi y’agweni yè inkolo gô nya, awulyi waô inè: Ôṉènji, nya. 32Ndô awulinyi waô inè: My’are n’inya gô nya si re ṉwè pa mya. 33Yeṉo agambaṉ’iṉèngi inè: Apiṉ’ôma inya? 34Awulinyô waô ne Yesu inè: Inyi sam̃ ne gô dende ntondiṉi y’ôma w’arôm̃i myè, na gô sukiz’eṽilô zè. 35Aṉwè pa bulya nè, atigaṉ’agwèli anay gambèṉè egômbe z’iteṉa z’abya? Vônaṉi, mi bulinya ṉwè inè: Rômbiṉaṉi antyo maṉi, ko pônaṉ’intyaga inè, ôwongo wi re jola pa gô teṉô. 36Ayè yi teṉa e dèng’ipa, agenj’ilônda gw’em̃èṉo za koṉako, ko ayè yi bèṉa n’ayè yi teṉa jeṉe mbya ta. 37Konde g’ôsam̃u wiṉo nkôgô mè yi re rèti inè: Ôm̃ori ayè bèṉa, n’ôm̃ori ayè teṉa. 38My’arôm̃i ṉwè gô teṉa yom̃a yi re ṉwè e pa janja; am̃ori wi re janja pa, ko ṉwè jinginyô gw’ijanji saô.
39Awenge wa mongi Samarya avila gô nkala mè w’aṽekelyi Yesu g’ômwanja w’igamba mènyoṉo ny’ômwantô ny’arakilyô yè inè: Abulinya myè isam̃u yôdu yi re myè denda pa. 40Yeṉo gw’aṽyeṉi mongi Samarya gôre yè, w’agweni yè inkolo gô dwaṉa na waô. N’alwaṉi yè vovo ntyugu mbaṉi. 41N’aṉag’awèṉè awenge w’aṽekelyi g’ômwanja w’igambi nyèmè; 42n’awulinyi waô ômwantô inè: Azwè pa bekelya nyèṉè g’ômwanja w’igambi nyomè, konde azw’are jogo pa azwèmè, amya kè inè, ayè ne Ôzungè wi ntye.
43Intyugu mèsoṉo mbaṉi vyagaṉô, Yesu alubwi avila vovo, agènda gô Galile; 44konde Yesu ayèmè arakilyi nè, ôvogisi e zele n’ôlubô gô ntye yèmè. 45Gw’aṽyeṉi yè gô Galile, mongi Galile w’awongi yè, konde w’aliwô w’ajeṉ’isam̃u yôdu y’alendyô yè gô Yerusalèm gw’egômbe zi fèti, konde waô kè w’agèndi gô fèti. 46Yeṉo awinyi yè gô Kana yi Galile, mbôra y’agaluṉi yè aṉingô ivè.
Avegagi gô Kapèrnaum yôfisyè y’ôga, n’ômwaṉi wè avegagi n’ijogo. 47Gw’ayogyô yè inè, Yesu abyeṉi avila gô Yuda aṽya gô Galile, agèndi gôre yè, agwenè inkolo inè, e ga zum̃iṉe aying’ômwaṉi wè, konde avegagi pyèrè ni juwa. 48Awulinyô yè ne Yesu inè: J’aṉwè ayeṉe lemba n’isam̃u yi mamô, aṉwè aṽekelye. 49Awulinyô yè ne yôfisyè y’ôga inè: Rera, zum̃iṉa ’mwaṉi wam̃ yuwaga ro. 50Awulinyô yè ne Yesu inè: Gèndaga, ’mwaṉi wo atôli. N’aṽekelyi ôma mèwoṉo igamba ny’awulinyô yè ne Yesu. 51Na gw’azum̃iṉagi yè, inyôngô sè s’aṽyeṉi gô dataṉa na yè, arwaṉè ntyangô inè: ’Mwaṉi wo atôli. 52N’aṽambyi yè waô igwèra ny’avakilyi yè gô tôla, n’awulinyi waô yè inè: Jaô agwèr’ôrwageṉô alubw’ijôrô avila gôre yè. 53Yeṉo amyeṉi rerè inè, nyô n’igwèra mè ny’awulinyô yè ne Yesu inè: ’Mwaṉi wo atôli. N’aṽekelyi yè, ayè ni nagô yè yôdu.
54Ziṉo n’elemba zi ṽaṉi z’arô dendyô ne Yesu, ayè pila pa avila gô Yuda aṽya gô Galile.
Trenutno izabrano:
Yôan 4: MYE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Published by the British and Foreign Bible Society in 1927.
