Matyò 5
5
Njisə̀s ə zaʼlê ghɨə ə pfɨyn
(Lûk 6.20-23)
1Kə Njisə̀s tè fe nɔ̂yn ə ghɨ̀ vɛ, ə kɔʼɔ ə pfɨ̀yn ə tsɨsə̂ fumə. Chùmtè epàm sə vəynse ə zùŋtə̀ ə və ngwùŋ. 2È və zhə̀tə̀ sè zaʼlə̂ ghənə pîə nə:
3Pɔsê nyì sê ghɨ ghɛ ə fɨfə ə sezuʼ,
kûmə̀ nə fɔ̂yn ekwùtwəynve nyi sê ghənə.
4Pɔsê nyì sê ghɨ ghɛ ə ghe chîə kwue,
Zhə̀fè tə nə̂ nə ghənə saŋnə̂.
5Pɔsêzè nyì sê ghɨ ghɛ ə kyi ngɨmnêzè;
ghənə tə kyîə àfɨa kɛ Zhə̀fè tsɨ̀nè.
6Pɔsê nyì sê ghɨ ghɛ ə chɨ̀ŋ zafə ghənə sə̂ nə̂ ə̀ghɛ ghɛ Zhə̀fè kyiŋə. Zhə̀fè tə fo sê ghənə kè kə ghənə kyiŋə.
7Pɔsê nyì sê ghɨ ghɛ ə ghe kosə səyn sê ghɨə mɔ̀ʼɔ̂,
Zhə̀fè tə kosə̂ èsəyn sê ghənə.
8Pɔsê nyì sê ghɨ ghɛ təm ə ghənə̂ghè zo,
Ghənə tə fe Fèzhə̀.
9Pɔsê nyì sê ghɨ ghɛ ə fɨaʼà nə pɔ̂ynè ə nyi,
Zhə̀fè tə tɔŋtə̂ ghənə nə ghɔ Və.
10Pɔsê nyì sê ghɨ ghɛ ə chɔʼɔ gholə ghənə̂ghè kûmə̀ nə ghənə nə̂ èghɛ zɛ ə Zhə̀fè kyiŋə,
Fɔ̂ynə̂ Fezhə̀zè nyì sê ghənə.
11Pɔsê nyì sê ghàyn ezhoghɛ ghɨ sòlə̀ ghàyn, chɔʼɔ àghol kaynke, fɨnə wamtə̂ tèkyì tə ekwaŋte tekɨ̂m kûmə̀ ghàyn kè kûmə̀ nə ghàyn nyi əghɨ ghɨmə. 12Ghàyn e saŋnə̂ fɨnə tyalə, kûmə̀ nə ə ndə̀m mâʼte eghaʼâvè ekwùtwəyn sê ghàyn. Ə̀ nyì kepî za kə ə tè chɔʼɔ ghol ə sèfɨ̀aʼtè sə shise.
Njisə̀s ə zaʼlê kûmə̀ fèngwaŋ è lâm
(Mâk 9.50; Lûk 14.34-35)
13Ghàyn nyiə kɔʼnə̂ sê ndam tə ghɨ̀tè ə mbi kè kə ngwaŋfe kɔʼnə se fɨazhiəve. Mə ə tɔfə fengwaŋ mî, ə kaʼa nəyn zayn nə fə fɨnə tɔfə? Ə fə fɨnə tsɔ̂fə̀ va sê ghɛ zhîze, ə̀ tsɛ̂ kə va nə ə sɨs mâʼà, ə ghɨə tsə̂yle.
14Ghàyn nyi kə lâm se chwitè sê ghɨ mbi ghə kɨ̂m ndom ə Fezhə̀vè. Ndaʼ zɛ ə è nyi etûə pfɨ̀yn vâyn kàʼa ze ndəte. 15Wùə tyàynə̀ va lâm è və pfɨsə̂ tɔmə etyə̂ àkɛ̀. Ə pɨlə tɔmə etùə elùʼ engaŋtəu kə è zə panə sê nâʼàpî ndè ə ndɛ. 16Kèpî endom nə vɨ̂nə̀ mə, payn zaynze kyi sə̂ panə ə ghɨə ghə shi, kə ghənə fe ə̀ghɛ echûŋ ghɛ ə ghàyn nə̀, tsîtə̀ Pɨ̀a vâyn vɛ ə è nyi ekwùtwəyn.
Njisə̀s ə zaʼlê kûmə̀ Àlâŋ
17Kə ghàyn ə kwaʼtə nə m pə̂ mbi se kəʼsê Alâŋ ə Mosîskè è zaʼlê ə se fɨ̀aʼtè. M pâʼà pə̀yn se kəʼsə̂ təynte, pîza se pɨlə nə̀yn nə zaʼlê ə ghənə̂zè pəyn səmɔʼ. 18M tsâ sê ghàyn səmɔʼ, kə kwutwəyn è chike tə ndamə zaʼâ pî zàyn, wùə tə kəʼsə̂ va nâʼàpî fèghɛlə̀ fɛ ə fe tətə kwûŋsə̀ əfètə̂ Àlâŋ nə kɛ, ə̀ tsɛ̂ kə va mə ghɛ ə̀kɨ̂m ə kyayn. 19Zôyn, pîndè vɛ ə è kim lâŋ etətə̂kè amɔ̀ʼ elwɔ̂ŋ ə Fezhə̀ nə vɛ, nâʼàpî kɛ ghənə kwâʼtə̀ nə ke kɔʼnə̂ va, è fɨnə zaʼlə̂ kəpî ə̀ghɨ nə ghə nə̂ eghɨ nyiə mə, kyì ə wûə nə vɨnə tə nə̂ ə è və nyi wùə èkwùŋsə əfètə̂ ghɨ̀ ghɛ ə ghe nyi ekwùtwəyn. Pîza nâʼà pîndè vɛ è nə̀ ghɛ zɛ ə lâŋkè pìə, kɛsə̂ zaʼlə̂ ə̀ghɨ mɔ̀ʼɔ nə ə nə̂ kəpì eghɨ nyiə mə, è tə nə̂ ə è və nyi wùə engɨsə kɔʼnə əfètə̂ ghɨ̀ ghɛ ə ghe nyi ekwùtwəyn. 20M tsâ sê ghàyn nə, ghàyn tə njiə elùʼ efɔ̀yn ə Fezhə̀zè kè ezhoghɛ ghɛ zɛ ə ghàyn nə̀ sê Zhə̀fè tsɨ̀ə zə setyə̀ynsè se elwɔ̀ŋsè è ghɨ Falàsîə.
Ezaʼlê ə Njisə̀sè kûmə̀ èfɨsê endwɔ̀zè
21Njisə̀s ə kwəynsə̂ mə È pìə nə, Ghàyn ə zɨ nə ə tè pì sê ghɨ sə shi nə, “Kə wùə tə zhwi wùə. Ə̂ zhwi pîndè wùə ə pə̂yn è vəyn sê saʼe.” 22Pîza, zôyn m tsâ sê ghàyn nə: ə nyɔ̀ʼsə̀ pi ndè tɔŋ sê ànyìə vəyn, ə tə pəyn è vəyn sê saʼe. Ə tɔŋte pîndè ànyìə vəyn nə, “Ò tsɔ̀fə kə eshi sə ndô!” Ə tə ndu è vəyn ashi əghɨ̀e saʼake. Ə tɔŋtə̂ pî ndè ànyì nə, “Ngô afɨake!” Ə zə pofə nə è nə̀ ndûə elùʼ ewùs. 23Ə ò nyì se ndù èmâʼteze sê Zhə̀fè alaŋ efoke, ə kwàʼtə̀ fumə nə ghô ghânə̀ ànɛ̂ nyîə kyi ngəʼ, 24o zà èmâʼte ətəyn ashi alaŋ efoke. O ndùə chîə sə shi ə nə̀ pɔ̂ynè ghâyn ànɛ̂ nə vɛ, tsɔ̀fə ə ò se pə fo efo zɛ sê Zhə̀fè.
25Ə Wùə pə̀yn è ŋwàʼlè esaʼ se ghò ə njì ndùə è ghò elùʼ ə saʼe, o fɛtə̂ èghɛ ətəynze ghâyn vəyn mə shîŋə̀kè pa nyi ndò, ə̀ pu zâ ə è ndu eghò elùʼ ə saʼe. Ghɨ ghɛ ə saʼa pɔŋ fo kepî ghò sê sokə̀ʼ, ə sokə̀ʼ ə̀təyn ndəm gho ə ndɛ̂ chaʼ. 26M pîə sê gho nə, ə e kyàyn zâ, ə ò faŋ ke fu ə ndɛ̂ chaʼ se zaʼâ kə ò ndaʼ mɨ̂sè èkɛ vɛo nâʼà èkɨ̂m.
Ezaʼlê kûmə̀ ènyɨ̂ŋə̀ zhwîə wùəzè è ndômə̀ wùə
27Ghàyn ə zɨ nə ə tè pi nə, “Kə wùə tə nyîŋə̀ è zhwîə wùə èkɨsè ndôm ə̀ wùə.” 28Pîza, m tsâ sê ghàyn zôyn nə, ə nayne pi ndè wùzhɔyn ə səmtə̂ se nyɨ̀ŋə̀ è vəyn, ə nyi mə è və nyɨ̀ŋə̀ è vəyn ə və təm. 29Ə shi zɛ ze ekɔyn twɔze nə̂yn nə ò nəyn pi, o pɔ̀ʼɔ̀ fɨsə̂ ə màʼà. E tsɔ̂fə̀ nə ò laʼ shi zɛ ze mɔ̀ʼ tsɛ̂ kə ə màʼa wiyn vɛve ekɨ̂m elùʼ ewûse. 30Ə gho kɛ ke ekɔyn etwɔke nə̂yn nə ò nəyn pi, o tənə màʼà. E tsɔ̂fə̀ nə ò laʼ gho kɛ ke àmɔ̀ʼ tsɛ kə ə maʼa wiyn vɛve ekɨ̂m elùʼ ewùs.
Ezaʼlê kûmə̀ èchyâsè ə malə̂zè
(Matyò 19.9; Mâk 10.11-12; Lûk 16.18)
31Ŋwàʼlè ə̀ Fèzhə̀ pì kepî nə, “Ə̂ chùm pîndè zhwiə vəyn, ə è və kyi se fo ŋwàʼlè sê vəyn se tyə̀yn nə è və chùm vəyn.” 32Pîza, M tsâ sê ghàyn zôyn nə: ə wùə chùm zhwiə vəyn, mə è paʼà ko vəyn yî wùndômə̀ ndò, wùzhɔynə ə̀təyn ə ndùə malə̂ wùə endômə̀ ə̀ndo, ə zə nyi nə ndomə̀ vəyn vɛ è chùm vəyn ə nə̀yn wùzhɔynə ə̀təyn nə è nyɨŋə yî wùndômə̀ ndò. Nâʼà pîndè vɛ ə è malə wùzhɔyn mə ə chum vəyn ə ndɛ ə̀ malə̂, ə zə nyi nə wùndômə̀ vɛ è malə vəyn ə nyɨŋə̀ yî zhwiə wùə ndò.
Ezaʼlê kûmə̀ emɨ mkàynzè
33Ghàyn ə zɨ kepî nə ə tè tsàyn sê ghɨ sə shi nə, “Kə ò nə kim m̀kâyn, pîza, nə̀yn ghɛ zɛ ə ò kàyn se nə̀yn sê Zhə̀fè.” 34Pîza, m tsâ sê ghàyn zôyn nə: kə wùə tə mɨ m̀kâyn. Kə ò tə mɨ m̀kâyn ezə elùʼ efɔ̀yn ekwùtwəynve kûmə̀ nə ə̀ nyi eluʼ vɛ ə Zhə̀fè kyi kyə̂ fə vəyn fe fɔ̀ynfè. 35Kə ò tə mɨ m̀kâyn ə chike ezə kûmə̀ nə ə̀ nyì fu kə Zhə̀fè nyi mə fə tɔmtê gholə Və. Kə wùə tə mɨ m̀kâyn ə Njèlusalɛ̀m ezə, kûmə̀ nə ə nyi endaʼa ə fɔ̀yn èghaʼâzè. 36Kə ò tə kayn pî ə tu kɛ kə ezə kûmə̀ nə ò vayn kàʼa ò nəyn pî nyuŋ àtu èmɔ̀ʼ nə è zə fɨfə kɨ̀sə è zə fɨ̂mə̀. 37Pîza ə ò pì nə ò nə̀ nə̀ èghɛ, “O pìə nə m nə̀ nə̂ zəynze” kə ò pi nə, “ày m nə̀ nə̂ va zəynze” nâʼà pî èghɛ èkè zɛ ò paʼse ətəyn ndo sê satàyn.
Ezaʼlê nə kə ò tə pə̂ynsè pi è pi
(Lûk 6.29-30)
38Ghàyn ə zɨ nə ə tè pì nə, Ə̂ wùə tsuʼ shi wûəzè, ə pɔŋɔ tsuʼə zə vəynze, ə wùə chɔʼ sɔŋ ə wùəzè, ə pɔŋɔ chɔʼɔ zə vəynze. 39Pîza, M tsâ sê ghàyn zôyn nə, “Kə wùə tə pə̂ynsè pi è pi. Ə̂ wùə sayn ghô apɔ̀ŋ ekɔyn etwɔke, o pə̀ynsə̀ tyə̂nə̀ kə mɔ̀ʼɔ̂ke ə è sayn mɨ̂sè.” 40Mə ə wùə njì ndû è ghò elùʼ esaʼ se sɔmə̂ ghò se fiə sendzɨs sɛse, o fo paʼsə̂ fepfɨ̂ se vəyn. 41Ə wùə chiynte ghô nə ò nji ndu è vəyn sə mâyl èmɔ̀ʼ, o ndùə sə se kìlomɛtà sèpɛ̀. 42Ə wùə ndɔnə fɨake sê ghò, o fo sê vəyn. Ə wùə kyiŋə se samsə̂ fi afɨa sê ghò, o samsə̂ fo sê vəyn.
Ezaʼlê nə ghɨghe ə kɔ̂ŋɔ̀ sèpàyn sə ghənə̂sè
(Lûk 6.27-28; 6.32-36)
43Ghàyn ə zɨ nə ə tè pì nə, “Kɔ̀ŋ soyn vɛ̂vè ə pànə̀ sèpàyn sɛse.” 44Pîza, M tsâ sê ghàyn zôyn nə, ghàyn kɔ̂ŋɔ̀ sèpàyn saynse, tsə̂mə̀ sê ghɨ ghɛ ə chɔʼɔ ghol ghaynghe. 45Ə ghàyn nə̀yn zamə, ə ghàyn ə nyi ə̀ ghɔ pɨ̀a vâynvè ekwùtwəyn. Kûmə̀ nə È nə̀ nə chwìə Vəyn ə panə sê ghɨ piə è ghɨ echûŋə̀ kè eghɨ, fo èghol sê ghɨ ghɛ ə nə̂ chùŋ è ghɛ ə nə̂ pi kè eghɨ. 46Zhə̀fè nə̀ maʼtə̀ ghàyn sə ghɛ ə ghàyn kɔ̀ŋə̀ kə ghɨ ghɛ ə kɔ̂ŋə̀ ghàyn ə? Piə ə̀ghɨ ghɛ ə tənə tâksè nə̀ kəpî zâ. 47Mə ghàyn tɔŋtə kə soyn saynse, ə nyi mə ghàyn nə̀ èghɛ zɛ ə nâʼà tsɨ̀yntsɨ̀ynə̀ wùə kàʼa è nəyn. Pî ə̀ghɨ ghɛ ə ghe keva Zhə̀fè nə̀ kəpî za? 48Ghàyn kyi sə̂ nyi chichi kè kə pɨ̀a vâyn ve ekwùtwəyn nyi chichi.
Trenutno izabrano:
Matyò 5: bfm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL
