Matyò 4
4
Ndə̂plè ə mɔ̀m Njisə̀s
(Mâk 1.12-13; Lûk 4.1-13)
1Zuʼse Ŋwaʼase ə nə̀ Njisə̀s ə ndùə elùʼ ashəshəe kə ndə̂plè mɔm vəyn fu. 2È və pamə ècho sə mtuʼ m̀ghɨm kyàʼ zhiə va, chɨ̀ŋ e zafə Vəyn. 3Ndə̂plè ə pə̀ sê Vəyn ə pìə nə, “Ə ò nyi vâ Fèzhə̀, O tsâ sê chi ghɨnə nə ghe kəmne sə apayn ə kwaŋke.”
4Pîza, Njisə̀s ə pə̀ynsə̀ nə, “Ə nyàʼ ə Ŋwàʼlè ə̀ Fezhə̀ nə, ‹Wùə nə ndamə kə va kûmə̀ àpayn ə kwaŋke, pîza kûmə̀ èghɛ ə Fezhə̀zè.›”
5Ndə̂plè ə nə̀ Njisə̀s ə ndùə ə Njèlusalɛ̀m, mə za nyi tə̀ʼ è Ŋwaʼa. È və tɔmə vəyn atsas ə Ndɛ Ètsə̀məke. 6Ndə̂plè ə pìə sê Njisə̀s nə, “Ə ò nyi Va Fèzhə̀, o tânə̀ tso ə chi, kûmə̀ nə ə nyàʼ ə Ŋwàʼlè ə̀ Fèzhə̀ nə:
‹Zhə̀fè nə̀ tomə sètsì nə se ko ghô;
tsì sə təynse nə̀ kyîə kɔʼsə̂ ghò ə ghənə gho,
kə ò tàʼa pfɨ̀nə pì aghol kɛke e chi.›”
7Njisə̀s ə pə̀ynsə̀ nə, “Ə nyaʼ kepî ə Ŋwàʼlè ə̀ Fèzhə̀ nə, ‹Kə ò tə mɔm Pɛ̂pɛ Zhə̀ fɛfe.›”
8Ndə̂plè ə nə̀ Njisə̀s ə ndûə È etûə pfɨ̀yn è tyàfə ə tyə̀nə̀ tèndâʼà tə mbite tekɨ̂m è ghaʼ zɛ ə ze nyi ətəyn, 9Ndə̂plè ə pìə nə, “M nə̀ fo èfɨa vɨ̂yn sê ghò èkɨ̂m ezhoghɛ ò tɨm ngwuʼə ə ngɨmnə̂ mi.”
10Njisə̀s ə pə̀ynsə̀ nə, “Kɛse ə mi epàm ə Satàyn. Ŋwàʼlè ə̀ Fèzhə̀ pi nə, ‹Ngɨmne Pɛ̂pɛ Zhə̀ fɛfe ə fɨaʼà kə sê Fəynfe.›”
11Ndə̂plè ə ke zà vəyn, tsìsè ə pə̀ tsâmtə̀ vəyn.
Njisə̀s ə zhə̀tè fɨ̂aʼ ə vəynze ə Ngalìlî
(Mâk 1.14-15; Lûk 4.14-15)
12Kə Njisə̀s tè zɨ nə ə fà Njɔyn Fo m̀mò ə ndɛ̂ chaʼ, È ve kɛsə̂ ndô ndûə apàs endaʼa ə Ngalìlîkè, 13È tè ndo apàs endaʼa Nazalɛ̀tkè ə ndùə se ndamə apàs endaʼ ə Kàpanùmkè. Eluʼ vɛ sas ə ndɛ Zepulùnkè tè nyi ətəyn è Naftalì. 14Njisə̀s tè ndu ə Kàpanùm se nə̀yn nə ghɛ zɛ ə fɨ̀aʼtè Èsayà tè pi pəyn səmɔʼ: È tè pi nə,
15“Ndaʼa ə Zepulùnzè è ndaʼa ə Naftalìzè, endom se ndù enjwì ə fengwaŋve,
apàs e engyinə̂ ə tsò Njondàynkè,
Ngalìlî, apàs endaʼ kɛ ghɨ etumə ndamə ətəyn.
16Ghɨ ghɛ ə ghe ndamə alɨm
ə fe payn eghaʼazè;
Ghɨ ghɛ ə ghe nyi ke echo èkwu ə kyî sɔzaze.”
17Se zhə̀tè ashìŋə̀ kɛ ə Njisə̀s tè ndùə Ngalìlî, ə zhə̀tə̀ se ndàʼà tom ə̀ Fèzhə̀ pîə nə: “Ghàyn kəmne ə ghànə sepi, kûmə̀ nə fɔ̂yn ə Fezhə̀ və paʼsə̂.”
Njisə̀s ə chɔʼ chùmtè èpàm sə shise
(Mâk 1.16-20; Lûk 5.1-11)
18Njisə̀s tè kwìə tsɛ̂ etipì enjwì ə Ngalìlîvè tuʼ fife, ə fe Shimùyn yî ànyìə vəyn Andɨ̀lò, ghənə e maʼà fèlàm ə tsô se ko embwɔ̀, ə nyi efɨ̀aʼ ə ghənə̂zè. 19Njisə̀s ə pìə sê ghənə nə, “Ghàyn pəyn chumte mi, kè kə ghàyn ko mbwɔvè zôyn m nə̀ zaʼlê ghàyn kə ghayn kaʼa ə pɨlə kômə̀ ə̀təm əghɨ̀ghè nə ghe chumte mi.” 20Kè sə ashìŋə̀, ghənə za m̀làm mə̂ ghənə̂m ə zhə̀tə̀ sə̂ chûmtə̀ Njisə̀s.
21Kə ghənə tè kɨŋte ndu se chə, Njisə̀s ə fe kwəynsə̂ ə̀ ndômnè ə̀ pɛ̀, ə Njə̂m yî Njɔyn mə nyi əghɔ Zepɛ̀ndîə. Ghənə tè nyi ə ngwùʼ èghaʼâ yîghə̀ pɨ̀a, pɨaʼtə̂ m̀làm mə ghənə̂m. Njisə̀s ə tɔŋɔ̂ ə̀ghɔ nyì ghɛ ə̀pɛ̀ nə ghənə chumte Vəyn. 22Kè sə ashìŋə̀, ghənə fɨə ə ngwùʼ èghaʼâ ə zà ə̀ pɨ̀a ə ghənə̂ghè ə zhə̀tə̀ sə̂ chùmtə̀ Njisə̀s.
Njisə̀s zaʼlə̂, ndaʼà tom ə̀ Fèzhə̀, tsuʼə əghɨ zafə
(Lûk 6.17-19)
23Njisə̀s ə ndò kwîə ka tè ndaʼà tèkɨ̂m endaʼa Ngalìlîzè zaʼlə̂ èghɛ ə Fezhə̀zè ə se ndɛ sə atsɨ̀yntese, kɛsə̂ ndâʼà tom èchùŋ kûmə̀ èfɔ̂yn nə Fezhə̀vè. È tè tsuʼə əghɨ ezafə əkɨ̂m è kɨsè kyì tə tezaf tɛ ə te tè nyi ə ghənə fètəyn. 24Zhɔ̂ŋə Vəynve ə waŋə ndûə kə luʼ tekɨ̂m apàs endaʼ ə Silyàkè. Zɨnə nə̀ ghɨghe pə̂ è ghɨ ezafə ghəkɨ̂m sê Vəyn. Ghənə tè pə̂ èghɨ ghɛ ə tè zɨə tsôsè ə tekyì tə tezaf tekɨ̂m. Ghɨ ghɛ ə tè kyi pamə̂ tə satàyntè, è ghɛ ə tè pfɨ̂ə èpfɨ̀kè, è ghɛ pâs ə ghənə ke wìynke tè nyi mə kə kwu, Njisə̀s ə tsuʼə ghənə əkɨ̂m 25Zɨnə tè nə̂yn nɔ̂yn e tsɨəve ə fɨə ə Ngalìlî, ə fɨə epɨ̀as ə Setɔ̂ŋvè eghɨm, ə fɨə ə Njèlusalɛ̀m, ə fɨə ə Njòndyâ è pâs endaʼ kɛ ə ke tè nyi engyinə̂ tsô Njondàyn ə chùmtə̀ Vəyn.
Trenutno izabrano:
Matyò 4: bfm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL
