SGK 8
8
Nowee n soe n boe mu la ǹ goo ne
1Lawa nə́ n yiri koa Nowee li. Don mànan laanka piɛ mànan mɛnɛn dɔn nə goã kun ni goo lɛ nɛ, á n yiri koa ǹ dɔn li. Bɛ lɛ nɛ, á piɛ̃ bɔ, mu lɛ ná a giala kɔ á gisĩ. 2Tán giulun mu yalan nə́ n lɛ tã, lon a mu dɔǹɔn dɔn nə́ n lɛ tã. La nə́ n lɛ kũ a die wa. 3Mu lɛ na á goã piɛ̃ boɛboɛ. Bɔ̀n da ǹ mu gole lɛ a daa lɛawaa paabiɛ ka posooro (150), mu lɛ gisĩ. 4Mui sɔbaabaa ǹ wɔ a lɛawaa fulusɔbaabaa ǹ wɔ pinaa, goo lɛ golee Araraa kele goon la. 5Mu lɛ goã piɛ̃ miɛ̃, yǎa mui fùbaa ǹ wɔ a lɛawaa fulugoonbaa ǹ wɔ pinaa, kelen mìi tɔ́n soo kanaa.
6A bɛ́ á dɔ lɛawaa pusi, Nowee goã á sìã mɛn bɔ goo lɛ ganaa, á bɛ lɛ bũ, 7á zankoo da. Bɛ yoo, á goã woe bɛ̀ a daa, yǎa mu lɛ piɛ̃ á tán kooro daa. 8A bɛ́ n yii diɛ zankoo la foɛ̃, á tɔ́n zɛrɛkantoan goon da, á n giɛ a ganaa bɛ̀ mu lɛ piɛ̃ á n bɔ tán. 9Sɛnɛ, zɛrɛkantoan lɛ bǎã yɛ á mɛ tán a-n wa, a giala, mu goã tán bǎã tumaa nɛ. Bɛ lɛ nɛ, á wusoo á n bɔyaa á daa Nowee li goo lɛ nɛ. Nowee dɔ nə́ n gɔn dia á kũ á da goo lɛ nɛ. 10Á wusoo á n yii da lɛawaa sɔbaa bɛ kio doo, á zɛrɛkantoan lɛ bɔ goo lɛ nɛ á da. 11Wasamiɛ̃n lɛn li, á n bɔyaa á daa Nowee li, ka *olivie da luu bɔlɔn nɛ a lɛ-a. Nowee tɔ́n dɔ̃ ka bɛ nɛ, mà mu lɛ kiɛɛrɛ kɔ tán. 12Á wusoo á n yii da lɛawaa sɔbaa bɛ kio doo, á zɛrɛkantoan lɛ da. A wusoo á n bɔyaa á daa a li bɛ kio doo wa.
13Nowee lɛ̀ biɛsɔrɔ ka goonbaa ǹ wɔ (601) a mui bibinaa a lɛawaa bibinaa pinaa, mu lɛ piɛ̃ á tán kooro daa. Nowee goo lɛ a lɛpii bɔ á bɔ lɛ, á yɛ bɛa biikoo li, mà tán gɔ́ɔ̃ kooro ne. 14Mui paabaa ǹ wɔ a lɛawaa fuəwensɔbaabaa ǹ wɔ pinaa, tán laa duduu.
15Lawa tɔ́n pɛ Nowee ne kɛnɛn: 16«Soo n nə n bɔ goo lɛ nɛ, n din laanka n lɔ nɛ, ka n nɛnyaanan laanka n manaan nɛ. 17Màn yiikoonaa mɛn tumaa bɛ́ kunun n ni, a dadaran nɛ ka a bɔnboɛɛnɛn nɛ, ka bàanan nɛ, ǹ waa, ǹ soo kunun n ni, ǹ nə n da wɔlɔ la, ǹ nɛn yɛ, ǹ mɔnaa tán la.» 18Nowee soo á n bɔ goo lɛ nɛ, kun ka a nɛnyaanan nɛ, ka a lɔ laanka ǹ manaan nɛ. 19Siĩ gòã siinaa tumaa soo á n bɔ goo lɛ nɛ, ka bàanan tumaa nɛ, ǹ tumaa soo tɔrɔ tɔrɔ.
20Bɛ kio, Nowee *wúlu bɔ ǹ bǎã dɔ Dɛnaa wɔ lɛa. Màn gòã siinaa mɛn tumaa laanka bàan mɛn tumaa siĩ bɛ́ n soɛ̃, á gogoon bɔ bɛn tɔrɔn tumaa bii, á ǹ kɔ Lawa la *wúlu màn lɛa, á ǹ siĩ tumaa tã wúlu bɔ ǹ bǎã lɛ nɛ. 21Dɛnaa bɛa wúlu màn gìĩ kɔ́ɔ̃n lɛ ma, á tɔ́n pɛ a din gɔ́ɔ̃ nɛ kɛnɛn: «Ma a re lɛn pipiã bíi tán li doo duduu, minbuiin nɛ a zɛnaa ǹ sii taman yii wa. Minbuiin nɛ n yui tán ka sii baraa zɛnaa nɛ a foo-n sɛn, sɛnɛ, ma a re dɔlɔ boe màn yiikoonaa tumaa ganaa doo duduu, ka ma bɛ́ má zɛnaa lɔn wa.
22Bɛ̀ kanaa kɛ tan biikoo woo biikoo,
màn tɔrɔ diɛ laanka a kurii ba re sàabiɛ wa.
Nɛn á bɔ laanka sɛ̀fuu á bɔ á re sàabiɛ wa.
Taã á waa laanka bɔ̀nɔn á kɔ á re sàabiɛ wa.
Lɛ̀ á waa laanka tèlò á kɔ á re sàabiɛ wa.»
Trenutno izabrano:
SGK 8: SBPE2011
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
San Bible Protestant Edition © Bible Society of Burkina Faso, 2011.