SGK 7
7
Nowee a wɔ mu la ǹ goo-n boo
1Dɛnaa tɔ́n pɛ Nowee ne kɛnɛn: «Wɔ goo lɛ nɛ, n din laanka n kion minin tumaa. A giala, n bɛ́ kanaa kun ka min mɛnɛn nɛ, n dinsɔɔ̃ n pepere, bɛa minin kɛn lɛn bii. 2Siĩ gòã siinaa tɔrɔ mɛn tumaa bɛ́ n soɛ̃, n bɛ tumaa a papaa sɔbaa kũ, a sà laanka ǹ dan nɛ. A tɔrɔ mɛn tumaa bɛ́ a ba n soɛ̃ wa, a sà goon laanka ǹ dan goon kũ bɛn bii. 3N bàan tɔrɔ tumaa a papaa sɔbaa kũ, sà laanka ǹ dan. N bɛn tumaa kaa kunun n ni goo lɛ nɛ, màn mɛn bɛ́ toɛ, n nə ǹ tɔrɔ koa tán la bǎã tumaa nɛ. 4A giala, kànaa ka lɛawaa sɔbaa, ma á re la kiɛ, yǎa lɛawaa pusi ka tèlò pusi ni. Ma màn yiikoonaa mɛn tumaa zɛnaa má da tán, ma á re bɛn tumaa papaɛ̃, ma bɔ kanaa.» 5Dɛnaa dí mɛn tumaa pɛ Nowee ne, Nowee ná a tumaa nya ka a pɛ-n lɔn.
Bɔ̀n da ǹ mu gole
6Bɔ̀n da ǹ mu gole lɛ bɛ́ die kanaa ǹ mɛn waáraa, bɛ̀ Nowee lɛ̀ biɛsɔrɔ (600) nɛ. 7Nowee laanka a nɛnyaanan nə́ kaa goo lɛ nɛ, ka a lɔ nɛ, ka ǹ manaan nɛ. 8Tɔɔ gòã siinaan mɛnɛn bɛ́ n soɛ̃, ǹ mɛnɛn bɛ́ ǹ ba n soɛ̃ wa, bàanan laanka màn yiikoonaa bɔnboɛɛnɛn tumaa nɛ, 9ǹ tumaa a papaa daa Nowee li, a sà laanka ǹ dan nɛ, ǹ nə́ wɔ goo lɛ nɛ, ka Lawa bɛ́ á pɛ Nowee-n lɔn. 10Lɛawaa sɔbaa bɛ kio, bɔ̀n da ǹ mu gole lɛ tán mui.
11 #
Piɛ2 3.6
Nowee a yɛ lɛ̀ biɛsɔrɔ, mui paabaa ǹ wɔ a lɛawaa fulusɔbaabaa ǹ wɔ pinaa, tán giulun mu gole nə́ n da wɔlɔ la, lon a mu dɔǹɔn nə́ n bũ dadara bɛ lɛ a pinaa. 12La nə́ n tɔ tán, yǎa lɛawaa pusi ka tèlò pusi. 13A din pinaa nɛ, Nowee laanka a lɔ wɔ goo lɛ nɛ, ka a nɛ Sɛmu ni, Kaamu laanka Zafɛti ni, ka ǹ manaan nɛ. 14Don màn tɔrɔ tumaa dɔ́ wɔ kunun ǹ ni, ka tɔɔ màn tɔrɔ tumaa nɛ, a dadaran laanka a bɔnboɛɛnɛn nɛ, ka bàan tɔrɔ tumaa nɛ, màn nyàa kadɛnaa tumaa. 15Màn yiikoonaa tɔrɔ tumaa daa Nowee li goo lɛ nɛ. 16A tɔrɔ tumaa, a sà laanka ǹ dan na á goã we, ka Lawa bɛ́ á goã á pɛ Nowee-n lɔn. Bɛ kio, Lawa goo lɛ a kiɛnlɛ tã Nowee lɛ.
17Bɔ̀n da ǹ mu lɛ a la na á kaa yǎa lɛawaa pusi. Mu lɛ gole kɔ á goo lɛ saa lon. 18Mu lɛ dii lon, goo lɛ goã n lelen diɛ a lalan woe. 19Mu lɛ a dii lɛ gole kɔ tán á la yii ni. Kelen mɛnɛn dinin bɛ́ sasa parsiini, mu lɛ bɛn tumaa mui bǎã tumaa nɛ, 20á dii ǹ lalan ka guru yii fulusooro ne. Mu lɛ dii miɛ̃ á kelen papaã. 21Bɛ na á toa màn yiikoonaa mɛn tumaa bɛ́ tɔ we tán, ǹ tumaa gã: bàanan nɛ, tɔɔ mànan laanka don mànan nɛ, a dadaran laanka a bɔnboɛɛnɛn nɛ, ka minbuiinin dɔn nɛ. 22Màn woo màn tá tán la á n fɔfoã sii, bɛn tumaa gã.
23Dɛnaa na á zɛnaa miɛ̃, á màn yiikoonaa tumaa papaã á bɔ tán la: minbuiinin ni, màn yiikoonaan nɛ, a dadaran nɛ ka a bɔnboɛɛnɛn nɛ, ka bàanan dinin ni. Lawa nə́ ǹ tumaa papaã, á ǹ bɔ tán la. Nowee dinsɔɔ̃ na á la, kun ka a minin ni, ka màn mɛn tumaa bɛ́ goo lɛ-n kunun ǹ ni.
24Mu lɛ na á goã dii-n lon miɛ̃, á lɛawaa paabiɛ ka posooro (150) dɔ tán.
Trenutno izabrano:
SGK 7: SBPE2011
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
San Bible Protestant Edition © Bible Society of Burkina Faso, 2011.