HLIMI 32
32
1Ki kpɛntoʔo jɛfanʔa na, Laban wɔ̀ɔ jɛ mà wi pii ní wi picɛɛ co mà sari pe na mà Nyɛʔɛlɛ wa pé kan jango pe frɛmɛ ta. Ki kruʔu ma wɔ̀ɔ hru mà kɛri wi korohaʔa na ge.
Jakɔbe wí ma kondo mà yaʔa bì yà Esawu flin we
2Jakɔbe wi dá wi kloʔò kpe mà na sye, à mlɛŋɛyee ma yâ flin wi ní. 3Jakɔbe wi da gâ pe nya, wɔ̀ɔ yo: «Nyɛʔɛlɛ li mlɛŋɛyee bɛ.» Ki nyiŋi na wɔ̀ɔ yele kan ki deʔe na mà naʔa yeri Mahanayimu.#32:3 Mahanayimu: Mahanayimu kɔ̀rɔ́ wí ŋa: Janma syɛn ná kiì ban, mlagmoo klɛnmɛ syɛn.
4Jakɔbe wɔ̀ɔ tunbee troʔo wa wi yɛʔɛ̀ Esawu krugu ŋa wi lɛ we, wa klo la ni pé na yeri Seyiri, wa Edɔmu Klɛnmɛ ni. 5Wi daʔá yo pé kan mà yo: «Ga ye bi ya yo na fɔlɔ Esawu kan kí ga: ‹Ma tungɔɔ Jakɔbe wí yo: Mi kɛrí mà yâ glɛn wa Laban deʔe na fɔ mà bâ no ŋaŋa ni ge. 6Niri nyɛ ná ma, sofɛnŋɛɛ ní, mbara nì, tungɔɔ nabii ní cɛɛ ní. Mí ma hɛɛn troʔo pe yaʔa yo na fɔlɔ kan jango bì haʔama ta wi yɛʔɛ̀ ma ge.› »
7Tunbee à pe hru mà pan Jakɔbe krugu mà bɔ́ɔ̀ po: «Wó ma kɛri ma lɛ Esawu krugu we. Wí nyɛ wa. Wí na pan mà krugu hɛɛn saa syɛn ní.» 8Jakɔbe wɔ̀ɔ fya ceŋge. Wi yɛʔɛ̀ àʔa pɛn wí na. Wɔ̀ɔ hɛɛn kon be klɛnmɛ syɛn bee pe dá bo wí ni ge, ní mbara nì, niri nì, ní nyoʔomɛyee ní be. 9Wɔ̀ɔ kí yo mà yo: «Esawu nòo ja ba do pèè na bì pe kpo, pe tɔɔ pa pe gban bì fɛ bì syɔ.» 10Jakɔbe wɔ̀ɔ yo: «Na to Abrahamu wi Nyɛʔɛlɛ, na to Isake wi Nyɛʔɛlɛ, Bajegɔ Nyɛʔɛlɛ la liì na po: ‹Hru ma kɛri ma klo ni wa deʔe ga na pe da má he, Mí bi yà kmaʔa hanri má kan ge.› 11Mi ìn dì yala ma kmama mì bɛfu ní ní ma sinmi mì bɛfu ní ma ma da jɛʔɛ́ ma tungɔɔ na we, mɛjɛn mi dá ki Jurudɛn ŋa kon na kanganla ní. Ki tɔ na mí ma kon mà po hɛɛn klɛnmɛ syɛn. 12Mí na ma nyɛri, ma na syɔ na lɛ wi kyɛʔɛ ma ge, na lɛ Esawu wi kyɛʔɛ ge. Mɛjɛn mí na fyaʔa mà yo wí gà ban bì ba do ná na bìʔi plɛn pii ní pe nyɛɛ ní be. 13Mo má maʔa yo mà yo: ‹Mí bi kmaʔa hanri má na, pa mi ma kluʔu pii nyɛʔɛ be nɛ pa nyugbɔmo tanla tanyrɛʔɛ nyɛ ge. Pé bi nyɛʔɛ fɔ hɛn wóo gban bi pe tonli.› »
14Jakɔbe wɔ̀ɔ syɛn be ki deʔe na mà kpɛnmɛ to wa wi kyɛʔɛ yrɛbɛ pì bɛfu ní. Wɔ̀ɔ pà fara mà pi kân Esawu ma we ŋa wi lɛ we. 15Ŋkapɛɛ too kɔgunnu, ŋkanyɛɛ fonɛrɛ, mbanyɛɛ too kɔgunnu, mbapɛɛ fonɛrɛ, 16nyoʔomɛ cɛɛ fonɛrɛ mà kɛ̀ kɛ̂ ní pe pii ní bee pe dáa ŋori ge, niniri too syɛn, ní nupyaʔa kɛ̂, sofɛnŋɛɛ cɛɛ fonɛrɛ ní nabiʔi kɛ̂ nì 17mà pi konʔolo klɛnmɛ klɛnmɛ mà pi kân wi tungɔɔ ma be mà pe po: Ye klu na yɛʔɛ̀, yee kpafoʔo wa yè kân ajobo nì be. 18Wɔ̀ɔ kí yo kplɛɛ kan mà yo: «Na lɛ Esawu nòo yá flin ma ní nyiŋi ga na, nòo ma yugu bì yo: ‹Han woo wi má ni? Má na sye hanbe? Han ajobo bi ba wa ma yɛʔɛ ge?› 19Moo po di: ‹Ma tungɔɔ Jakɔbe wobo bi. Mí ma ki hɛnkplɛɛ tun wa na fɔlɔ Esawu ma we. Welé, wiì wì tala wí na pan wa wò kruʔu ma ge.› »
20Wɔ̀ɔ ki kayotege kiì yo syɛnwoo kan be, tanriwoo ní, ní pè bɛfu ní bee pe da bá ajobo na be. Ki pomo ma miì na ye bi yà yo na fɔlɔ Esawu nì we, nyiŋi ga na yé bi yà flin wi ní ge. 21Yeʔe yo ye yo: «Welé, ma tungɔɔ Jakɔbe wí na pan wa wò kruʔu ma ge.»
Mɛjɛn wi dáa nyu mà yo mí bi wi lama fiʔi wi na na yrɛbɛ ba nì pí nyɛ wa na yɛʔɛma ni we. Ki kruʔu ma pa mi yɔɔ nya na nyɛʔɛ ni ge. Kana pɔɔ yà ná flin kmaʔa. 22Wɔ̀ɔ ki yrɛbɛ troʔo be wa wi yɛʔɛ̀. Wiì wɔ̀ɔ ko wa mà kpɛnmɛ to wa ki deʔe na ge.
Jakɔbe wí ma can Nyɛʔɛlɛ ní le
23Wi da bâ jɛ yeblimi ni wi cɛɛ syɛn ní, wi tungɔɔ cɛɛ syɛn ní, wi pii kɛ̂ mà kɛ̀ nigbe ní, à pe tanʔa ma lɔʔɔ gâ kon pé na yeri Yabɔki ge. 24Wi da pe troʔó à pe yâ lɔʔɔ kon pe ní. Yrɛbɛ pì bɛfu ba pi klɛ́n mâ wiì kan wɔ̀ɔ pì bɛfu hanri à pi toro be ki deʔe na. 25Jakɔbe wi dá go wì yɛ. À hɛn wa ma bâ jan wí ni ki yebliʔi ni fɔ mà bâ no Kpɛnkaʔa na. 26Ki naŋa pɔɔ da gáʔà nya wi ìn bi gban buu can, wɔ̀ɔ wi kmo wi hɛnŋɛɛ ni ge. Àʔa fuʔuru wí na nyiŋi ga na pe dáa jan ge. 27Ki naŋa wɔ̀ɔ wí po: «Na wa mí bi da sye, mɛjɛn kpɛnmɛ mí na cɛn bì do.» Jakɔbe wɔ̀ɔ wí po: «Mi ìn bi ma wa ma da sye kí po mɛ ìn frɛmɛ pa ná na ge.»
28Naŋa wɔ̀ɔ wi yugu mà yo: «Pé na ma yeri mɛlɛ?» Wɔ̀ɔ yo: «Pé na na yeri Jakɔbe.»
29Ki naŋa wɔ̀ɔ wí po nɛ: «Ma yele le pe ìn bi da ma yeri Jakɔbe adi, di pé bi da ma yeri Israyɛli, mɛjɛn má ma can Nyɛʔɛlɛ ní le mà can kpo hɛɛn ní be, à ma pe ja.»
30Jakɔbe wɔ̀ɔ wi yugu mà yo: «Maʔa hanri bì ma yele cɛn le.» Wɔ̀ɔ wí po: «Nyaʔa ma kan á ma na na yele yugu le?»
Wɔ̀ɔ frɛmɛ pa be wi na ki deʔe na. 31Jakɔbe wɔ̀ɔ yele kan ki deʔe na mà naʔa yeri Penuwɛli, mɛjɛn wi daʔá yo mà yo: «Mí ma Nyɛʔɛlɛ nya le na nyɛʔɛ ní, na nyìli à li syɔ.» 32Yaa ki da bo kí ma jɛ kɔ nyiŋi ga na wi dá jɛ be Penuwɛli ni we. Jakɔbe wi dáa heʔeri wi cesiʔi ki kala na le. 33Kiì ma kan fɔ mà bâ no alaʔa na Israyɛli pii poò na cesiʔi kapanra ka de, mɛjɛn Nyɛʔɛlɛ li dá Jakɔbe kmo we wa wi cesiʔi kapanra na de.
Trenutno izabrano:
HLIMI 32: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire