HLIMI 31
31
1Jakɔbe wi da gâ Laban wi najɛɛ pe kayoro loʔo da pe dáa nyu mâ yo: «Jakɔbe wí ma wò to wi yrɛbɛ pì bɛfu kpe. Wò to wi krɔʔɔ kiì gi wí ma kpe wiì mâ ki masaʔa ga ta ge.» 2Jakɔbe wɔ̀ɔ Laban wi yɛʔɛ̀ kɔrɔsi. Wɔ̀ɔ kí nya wi ìn dà bo wí ni adi nɛ pa wi da glú mâ po wí ni fan pomo ma na. 3Bajegɔ Nyɛʔɛlɛ à liʔi yo Jakɔbe ma mà yo: «Hrú ma kɛri ma tee pe klo ni wa deʔe ga na pe da má he ge. Mí bi bo má ni.»
4Jakɔbe wɔ̀ɔ Hrasyɛli nì, ní Leya yeri be. Pe dá bo wa wi ajobo krugu wa kere ni de. 5Mà báʔà yo pé kan mà yo: «Mí na yè to wi yɛʔɛ̀ wele naʔa nyaʔa woò nyɛ ná ni nɛ pa kplɛʔɛ na wi da glú mâ po ná ni pomo ma na, di na to wi Nyɛʔɛlɛ lí nyɛ ná ni. 6Yèé yé maʔa cɛn mi dí tunŋu kɔ yè to kan na fanŋa kì bɛfu ni. 7Yè to wɔ̀ɔ na fanla mà na sràʔà krɛʔɛ krɛʔɛhama kɛ̂, di Nyɛʔɛlɛ li ìn ki ta wi tipeʔe hanri ná na. 8Nyiŋi ga na wi daʔá yo mâ yo na sràʔà kiì gi ga mbara da nì tí nyɛ kabaʔa ní mbara tì bɛfu à ti na kabaʔa woro hin. Nyiŋi ga na wi daʔá yo mâ yo da nyogonro tiì bi bo na sràʔà, ti na pii bee hin pè bɛfu à pe na pin nyogonmo ní. 9Nyɛʔɛlɛ lí ma ajobo syɔ yè to ma mà pi kân ná ma. 10Nyiŋi ga na mbanyɛɛ ní ŋkanyɛɛ ní pe dáa acɛnŋɛɛ taʔa, à mi ŋlonʔo ŋolo màʔa nya mbapyɛɛ ní ŋkapyɛɛ ní bee pe dáa luru tí na pé nyɛ nyogonmo ní mà po kabaʔa ni kpo jɛnʔɛ ní. 11Nyɛʔɛlɛ li mlɛŋɛ wɔ̀ɔ báʔà yo ná kan ŋlonʔo na mà yo: ‹Jakɔbe!› À mi yo: ‹Mi ŋa.› 12Wɔ̀ɔ ná po: ‹Ma yɛʔɛ̀ jrɛʔɛ, ma ŋkapyɛɛ wele bee pé na luru ŋkanyɛɛ na be pé nyɛ nyogonmo ní mà po kabaʔala ní mà po nɛ jɛ̀nʔɛ́ ní, mɛjɛn mí maʔa nya kì bɛfu ga Laban wí na hanri má na ge. 13Mí nyɛ Nyɛʔɛlɛ la li dá lì tyɛʔɛ má na wa Betɛli ni wa deʔe ga na ma dá hùnmù wo ŋglɛnʔɛ na máʔà jrɛʔɛ màʔa yrigi, deʔe ga na ma da nofele kon ná ma ge. Ki tɔ na, ma jɛ̀ ma nyini naʔa ki klo la ni, ma hrù ma kɛri wa klo la ni pe da má he ge.› »
14Hrasyɛli nì, ní Leya nì à peʔe yo wí kan mà yo: «Wò tama nyɛ wa adi wò to wi krɔʔɔ ni ge yo? 15Wiì woò na wo cun nabonmoo yo, pɔɔ gâ wo pɛrɛ mâ wò gbejanra li de kɔ ge? 16Masaʔa kì bɛfu ga Nyɛʔɛlɛ lí ma syɔ wò to ma kí ma klɛn mà wòó kan ní wò pii ní be. Ki tɔ na, ga Nyɛʔɛlɛ lí ma yo má kan, maʔa hanri.»
17Jakɔbe wɔ̀ɔ jɛ mà wi cɛɛ ní wi pii luʔu be wa nyoʔomɛyee na be. 18Wi dá wi ajobo pì bɛfu kpe ní wi masaʔa nì ga wi dá da ge. Ki ajobo ba wi da pí ta wa Pada Aramu wiì ni. Ki kruʔu ma wɔ̀ɔ jɛ mà kɛri wi to Isake krugu wa Kana klo ni le. 19Nyiŋi ga na Laban wi dá bo wi kɛrí bì yà wi mbara ti yujoʔo konlo, Hrasyɛli wɔ̀ɔ wi to wi heme hɛnrɛ yu de. 20Jakɔbe wi dá Laban fanla we ŋa wi dá bo Aramu klo woo we, nyiŋi ga na wi dá fɛ wi ìn sari wi na. 21Wi dá fɛ wi kyɛʔɛ yrɛbɛ pì bɛfu ní. Wi dá jɛ ma lɔkpɔʔɔ pari maʔa kon mà na sye Galadi angolo namyɛlɛ na.
22Wlɛʔɛ tanriwoʔo na à pe yáʔà yo Laban kan mà yo Jakɔbe wí ma fɛ. 23Laban wɔ̀ɔ wi woo co be, à pe pa Jakɔbe na mà tanʔa wì krugu fɔ mà ta wlɛrɛ nasyɛn fɔ mà yɔ́ɔ̀ co wa Galadi angolo na le. 24Di Nyɛʔɛlɛ à li bâ yo Laban nì we ŋlonʔo na mòo po: Ma mà co jango mò gá kà yo Jakɔbe kan we tipeʔe gi yo kmaʔa gi yo.
25Laban wɔ̀ɔ yâ no wa Jakɔbe na mòo nya wí ma wi kpasyoro go kán wa angolo yugu na. Laban nì, ní wi woo ní à pe pe woʔo kàn be kpo Galadi angolo yugu na ge. 26Ki nyiŋi na Laban wɔ̀ɔ Jakɔbe po we: «Má ma nyaʔa hanri banmɛ ge? Kí ma po mɛlɛ á ma na fanla mâ na sye na picɛɛ ní be nɛ pa ŋkloo nyɛ bee pé ma co mlaʔa kpele fanŋa nì ge? 27Nyaʔa ma kan má ma hra mâ fɛ ge? Má ma nafanla kɛ, ali mɛ ìn ja sari na na. Mi dí bì ma troʔo lafiʔimi nì, ní ŋuru ní, cala kmomo ní, ní akɛ kmomo ní. 28Mɛ ìn na yaʔa bì sari na pii nabii ní picɛɛ na be. Má maʔa hanri nɛ pa kabajɛn nyɛ we. 29Na kyɛʔɛ kí nyɛ fanŋa nì bì gban bì tipeʔe hanri ye na, di ma to Nyɛʔɛlɛ lí maʔa yo ná kan yebliʔi ni mà yo: ‹Ma mà co, jango mò gá yo Jakɔbe nì we tipeʔe gi yo kmaʔa gi yo.› 30Koò tipeʔe ga na má na fyala mâ cori mâ bi gɛri ma to go ni, nyaʔa ma kan má ma domi na heme hɛnrɛ yu de.»
31Jakɔbe wɔ̀ɔ Laban po we: «Mi dáa fyaʔa mà yo kana má bi baʔa honri bì yo má bi ma picɛɛ syɔ be ná ma yo. 32Di ki woo wi kù na ma ma heme hɛnrɛ nya ŋa ma ge. Wò syɛnwoo pe yɛʔɛ̀ na ga kí nyɛ mawoʔo maʔa crɛʔɛ maʔa fàrà wa na woo pe kpafoʔo ni maʔa kpe.»
Jakɔbe wi ìn dàʔa cɛn bì yo Hrasyɛli wi wi dá ki heme hɛnrɛ yu de.
33Laban wɔ̀ɔ je wa Jakɔbe wi kpasyoro go nî mà je wa Leya wi woʔo ni mà je wa nɛ pe tungɔɔ cɛɛ syɛn pe kpasyoro goro ni de. Wi ìn yraʔa kà nya. Wi gâ nyini wa Leya wi kpasyoro go ni ge, wɔ̀ɔ je wa Hrasyɛli woʔo ni. 34Hrasyɛli wí dá wi to wi heme hɛnrɛ kpe de mà ti le wa nyoʔomɛ aconʔo noʔo na mà klɛn tí na. Laban wɔ̀ɔ wele wa kpasyoro go kì bɛfu ni. Wi ìn yraʔa kà nya. 35Hrasyɛli wɔ̀ɔ wi to po we: «Na to, wò gá nàʔà ta ná ni nàʔa po mi ìn jɛ bì yere ma yɛʔɛ̀ ma, mɛjɛn na fogonyiŋi kí ma tyɛʔɛ.»
Laban wɔ̀ɔ wele wa kpasyoro go kì bɛfu ni. Wi ìn wi heme hɛnrɛ nya de wa. 36Lama à mi gban Jakɔbe na we. Wɔ̀ɔ kí yo Laban kan nɛ mà yo: «Na tipeʔe deʔe kí nyɛ hanbe? Na kapeʔe àʔa po hanbe, áʔa po ma pa ná na mà na na prɔ ki dihongbanʔa ga nì ge? 37Nyiŋi ga na ma bâ na go yrɛbɛ wele be, à ma ma go yraʔa kigii nya wa na wobo ni be? Maʔa yrigi naʔamɛ na go woo ní, ní ma go woo ní pe yɛʔɛ̀ ma, pe pi nya jango peʔe tyonri wo kan, mì nì mo ní we. 38Yɛʔɛ́ fonɛrɛ wi ŋa mí ma ta wa ma deʔe na ge, ma mbara nì, ní ma ŋkaa ní pe ìn daa hin bì da jɔʔɔ, mi ìn je ma mbapɛɛ pèè ka wa ma ajobo ni be. 39Mi ìn je ban má kan ajoʔo kà nì kí po pé maʔa hlugu. Mi dáa ki sari ma ma, ajoʔo o ajoʔo ga pé bi yu na ma kpɛntomo mi yoo, ná kiì ban, yebliʔi gi yoo ge. 40Wre ti dáa fugu ná na kpɛnmɛ na me. Wyere à ti na na cun yebliri ni de. Ŋlomo ìn dàá bin na ná wa na nyɛʔɛ ni ge. 41Welé, ki yɛʔɛ́ fonɛrɛ wi ŋa mí ma ta wa ma go nî ge. Mi dá tunŋu kɔ má kan yɛʔɛ́ kɛ̂ mà kɛ̀ ticɛrɛ ma picɛɛ syɛn kala na le mà yɛʔɛ́ noli tunŋu kɔ má kan ma ajobo kala na le. À ma na sràʔà krɛʔɛ krɛʔɛhama kɛ̂. 42Nàʔa po na to wi Nyɛʔɛlɛ li ìn dì bo ná ni, Abrahamu wi Nyɛʔɛlɛ le, la na to Isake wí na fyaʔa ge, paʔa bo ma di na troʔó kyɛʔɛ ni waʔa. Nyɛʔɛlɛ lí ma na cɔlɔʔɔ nya ní na kyɛʔɛ tunŋu ní ge. À lì li kiti kon we yaaga ni we.»
43Laban wɔ̀ɔ Jakɔbe po: «Ki picɛɛ bee be mì na woo bɛ. Ki pii bee be mì na woo bɛ. Ki ajobo ba be mì wobo bi. Yrɛbɛ pì bɛfu ba má na nyaʔa mì wobo bi. Alaʔa nî pa mi gban bì nyaʔa hanri na picɛɛ kan be ní pe pii ní bee pé ma he naʔa drunya ni we? 44Ma pan wo ba nofwɔʔɔlɔ kon wò ma mì nì mo ní we, jango ki woʔo ga ki krɛ̀ʔɛ̀ wo ma jɛnlɛ mì nì mo ní we.»
45Jakɔbe wɔ̀ɔ ŋglɛnʔɛ kpe màʔa yrigi jango ki krɛ̀ʔɛ̀ jɛnlɛ.
46Jakɔbe wɔ̀ɔ kí yo wi woo ma be mà yo: Ye ŋglɛnrɛ glo ye ti kpoʔolo. Ki kruʔu ma pè bɛfu à pe kpoʔolo mà li be ki ŋglɛnrɛ na de. 47Laban wi dáa ki deʔe yeri Jegari Sahaduta.#31:47 Sahaduta (Jegari): Ki na po pé yo ga pé ma ple ki na áʔa po wo syɛnwoo ge. Jakɔbe wɔ̀ɔ naʔa yeri Galɛde.#31:47 Galɛde: Ki na po pé yo: Ga pé ma ple ki na, áʔá po wò syɛnwoo ge. 48Laban wɔ̀ɔ yo: «Ki ŋglɛnrɛ da wo kpoʔolo ti po wo ma jɛnlɛ mì nì mo ní.»
Kiì kɔsɔ na pe dáa ki deʔe yeri Galɛde. 49Pé na ki deʔe yeri kpo Mitisipa, mɛjɛn Laban wi daʔá yo mà yo: «Nyɛʔɛlɛ li da wo kɔrɔsi mì nì mo ní nyiŋi ga na wó gà laʔa wò na bí bunŋu wò na ge. 50Nà ma gaa na picɛɛ cun be tipeʔe bì nì bì cɛɛ pèè kpe nɛ, hɛn wà ban wí bi da wo nyaʔa mì nì mo ní we, Nyɛʔɛlɛ liì na wo nyaʔa mà po wò syɛnwoo.»
51Laban wɔ̀ɔ Jakɔbe po we: «Ma ki ŋglɛnrɛ da wele de. Mí ma ple ti na ní ki jɛnlɛ la nì mí ma tyɛʔɛ ma yɛʔɛ̀ ma ge. 52Ki ŋglɛnrɛ da wo ple ti na ti po wò syɛnwoo. Ki jɛnlɛ la li plɛ̀n li po wo syɛnwolo kpo mì nì mo ní we. Mi ìn bi ba má na bì no leʔe bì doro ki ŋglɛnblere da na de. Mo fanna mò ga hru bì ba ná na bì ki ŋglɛnrɛ da toro de ní ki jɛnlɛ ní le, jango bì tipeʔe hanri. 53Abrahamu wi Nyɛʔɛlɛ, la Nahɔri wi wolo le, pe to wi Nyɛʔɛlɛ li po mì nì mo ní wò kiti konfɔlɔ.»
Jakɔbe wɔ̀ɔ wì klan Nyɛʔɛlɛ la na Isake wi dáa fyaʔa ge.
54Jakɔbe wi dá sraʔá fara wa angolo yugu na mà wi woo yeri be, à pe li. Pe dá li mà syɛn wa angolo yugu na mà kpɛnmɛ to me.
Trenutno izabrano:
HLIMI 31: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire