Mattheos 18
18
1Unkan hehan waonspewicakiye cin Jesus en hipi qa heciyapi; Maḣpiya wokiconze kin en tuwe iyotan tanka he.
2Unkan Jesus hokśiyoqopa wan kico qa wicacokaya ehnaka;
3Qa heya; Awicakehan heciciyapi; Nihduhomnipi śni, qa hokśiyoqopa iyenicecapi śni kinhan, maḣpiya wokiconze kin en yaipi kte śni.
4Tuwe ihduhukuye c̣a hokśiyoqopa kin de iyecen canteyuze cinhan, maḣpiya wokiconze kin en iyotan tanka kin hee.
5Qa tuwe hokśiyoqopa dececa wan, micaje on, iyowinkiye cinhan, he miye iyowinmakiya ece.
6Qa tuwe hokśiyoqopa kin dena, wacinmayanpi kin, wanji waḣtanikiye cinhan, he inyan wiyutpan wan tahu en iyakaśkapi, qa iye miniwanca ośbe kin en iyoḣpeyapi unkanś waśte kta tuka.
7Waḣtaniwicayapi kin on oyate kin woteḣi yuhapi kta; eya waḣtanikiyapi yuke kta iyececa; tuka wicaśta tuwe waḣtaniwicaya hecinhan, he woteḣi yuhe kta.
8Heon etanhan, ninape qa nisiha waḣtaniniyanpi hecinhan, hena hdakse c̣a eḣpeya wo; huha kaksapi wiconi en yai kta hee waśte, qa nape nonpa qa siha nonpa hduha peta owihanke wanica en iyoḣpeniyanpi kte cin he śica.
9Qa niiśta waḣtaniniye cinhan, hduśdoke c̣a eḣpeya wo; iśta wanjidan hduha wiconi en yai kte cin he waśte, qa iśta napin hduha peta owihanke wanica en iyoḣpeniyanpi kte cin he śica.
10Ihnuhan dena cikcistinpidan wanjidan eśta śiceyadake cinhan; heciciyapi ce; Maḣpiya ekta ohnihdewicayapi tawapi kin hena Ate maḣpiya ekta un kin ite ohinniyan wanyakapi ece.
11Wicaśta Cinhintku kin taku atakuniśni qon he niye kta on hi.
12Hecen token idukcanpi he. Wicaśta wan taḣinca wanunyanpi opawinge wicayuhe, c̣a etanhan wanjidan kitaninśni hecinhan, wikcemna napcinwanka sanpa napcinwanka hena owanjidan ewicahnake c̣a ḣe kin ekta iyaye c̣a wanji taninśni kin he okide śni he.
13Qa iyeye cinhan, awicakehan heciciyapi; hee on iyuśkin, qa wikcemna napcinwanka sanpa napcinwanka tokiya iyayapi śni kin hena on iyuśkin śni ece.
14He iyececa, dena cikcistinpidan wanjidan eśta toki eḣpeyapi kta, Niyatepi maḣpiya ekta un kin hecen tawacin śni.
15Tuka nisunka waniciḣtani kinhan, ekta ye c̣a iye niye kiciśnana he okiciyaka ye; naniḣon kinhan nisunka ake yahduhe kta.
16Tuka ananigoptan śni kinhan, hehan wanji qa iś nonpa om de kta; hecen waayatanin nonpa, qa iś yamni ipi kin on wicoie owasin yusutapi kta.
17Tuka hena nakun anawicagoptan śni kinhan, hehan okodakiciye kin owicakiyaka wo; unkan okodakiciye kin anawicagoptan śni kinhan, hehan Ikcewicaśta qa wamnayanpi kin iyecen yahdawa kta.
18Awicakehan heciciyapi; Taku maka akan yakaśkapi kinhan, he maḣpiya ekta kaśkapi kta; qa taku make akan yakiduśkapi kinhan, he maḣpiya ekta kiyuśkapi kta.
19Akeś heciciyapi; Tuwe nom maka akan taku wanjidan yadapi kta e wayeconzapi kinhan, Ate maḣpiya ekta un kin he ecen ecawicakicon kta.
20Tukten nom yamni, micaje on mniciyapi kinhan, hen wiciyopeya waun ece.
21Hehan Inyan en hi qa heciya; Itancan, misunka tona wamiciḣtani qa wecicajuju kta he; śakowin hehanyan he.
22Jesus heciya; Śakowin hehanyan kta, eciciye śni, tuka wikcemna śakowin ece śakowin.
23Heon etanhan maḣpiya wokiconze kin wicaśtayatapi wan iyececa, he wowidake wicayuhe cin wicakiciyawa kta:
24Unkan wicakiciyawa icunhan wanji mazaska tkeutapi tanka kektopawinge wikcemna iyohiye sni kin he ahipi.
25Unkan on kajuju kta takudan yuhe śni, hecen yuhe cin he tancan wiyopeyapi kta, qa tawicu, qa cinca, qa taku yuhe cin owasin, qa kajujupi kta, keya.
26Heon wowidake un kin he en makipusdiya eḣpeic̣iya, cekiye c̣a heya; Itancan, amakipe ye, owasin cicicajuju kta.
27Hehan yuhe cin he wowidake tawa kin onśikida, kiyuśka qa ikicazo qon kicicajuju.
28Tuka wowidake un kin he tankaa iyaye c̣a om idakapi kin wanji, kaśpapidan opawinge ikicazo kin he iyeya, qa iyaḣpaye c̣a poskin yuze c̣a heciya; Tona imiyecazo kin micicajuju wo.
29Hehan kici idakapi un kin he siha en eḣpeic̣iya, cekiye c̣a heya; Amakipe ye, kinhan owasin cicicajuju kta.
30Unkan wicada śni; tuka iyaye c̣a conkaśke mahen kaśkahnaka, oicazo hdajuju kta hehanyan.
31Unkan kici wowidake unpi kin hena taku econpi kin wanyakapi qehan, nina iyokiśicapi: heon en hipi qa wicayuhe cin taku econpi kin owasin okiyakapi.
32Hehan yuhe cin he ake kico qa heciya; Wowidake niśice ḣinca, icazopi hinsko tanka qon he cicicajuju, cemayakiye cin heon.
33Hecen miye onśioida kin he iyecen kici wowidake yaun kin iś eya onśiyakida kta iyecece śni he.
34Unkan yuhe cin śihda qa kakiśyapi kte cin en wicaqu, tona iyohiye śni qon ocowasin hdajuju kta hehanyan.
35He iyecen, Ate maḣpiya ekta un kin ecaniconpi kta, otoiyohi cante eciyatanhan nisunkapi tona waniciḣtanipi kin wicayecicajujupi śni kinhan,
Trenutno izabrano:
Mattheos 18: DAKOTANT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Copyright 2015 American Bible Society. All Rights Reserved.
