Mattheos 17
17
1Unkan iyohaḣam anpetu śakpe hehan Jesus Inyan qa Jakob, qa iye sunkaku Johannes, hena iwicacu, qa paha wan tehanwankantu ekta awicaya;
2Qa wicitokam yutokecapi; ite kin anpetu wi kin iyecen iyega, qa tawokoyake kin iyoyanpa iyecen aka.
3Unkan iho, Moses qa Elias en ihdutaninpi qa kici wohdakapi.
4Hehan Inyan ayupte c̣a Jesus heciya; Itancan, den unyakonpi kin he waśte; yacin kinhan, den wakeya yamni ti unkagapi kta, wanji unnicagapi kta, qa Moses Elias kici wanjikji wicunkicagapi kta.
5Iahan icunhan iho, iyoyanpa maḣpiya wan aowicahanzi, qa iho, maḣpiya kin eciyatanhan wicaho wan heya; Micinkśi waśtewakidake c̣a on iyomakipi ḣince cin he dee ce; anagoptan po
6Unkan waonspewicakiye cin he naḣonpi hehan makipusdiya eḣpeic̣iyapi, qa nina kokipapi.
7Tuka Jesus en wicahi, qa wicayutan qa heya; Inajin po, qa kokipapi śni po.
8Unkan iśta yuwankan ikikcupi hehan, tuwedan wanyakapi śni, Jesus ecedan.
9Unkan paha kin etanhan kun hdicupi, hehan Jesus wahokonwicakiye c̣a heya; Wowanyake kin he tuwedan okiyakapi śni po, Wicaśta Cinhintku kin wiconṭe etanhan piya ikicage śni hehanyan.
10Unkan waonspewicakiye cin wiwangapi qa heciyapi: Wowapi kagapi kin, Elias tokaheya hi kta ce, eyapi kin, tokeca heyapi hwo.
11Unkan Jesus waayupte c̣a hewicakiya; Awicakehan Elias tokaheya hi kta, qa taku owasin yuecetu kta.
12Tuka heciciyapi; Elias wanna hi tuka iyekiyapi śni, qa token cinpi qon ecakiconpi. He iyececa Wicaśta Cinhintku kin iyepi eciyatanhan kakije kta.
13Hehan waonspewicakiye cin okaḣnigapi, Johannes baptem wicaqu qon e he ke c̣a heon hewicakiya.
14Unkan wicota en hdipi qehan, wicaśta wan en hi qa canpeśka makehde inajin,
15Qa heya; Itancan, micinkśi onśimicida ye, hanyetu wi ihnaśkinyan qa śicaya un; otakiya peta en iḣpaye c̣a otakiya mini en iyoḣpaya ece:
16Qa waonspewicayakiye cin wicawakahi, tuka asniyanpi kta okihipi śni.
17Hehan Jesus ayupte c̣a heya; Wicoicage wacinye śni qa wacin teḣike, tohanyan cicipi waun kta he; tohanyan iyowinciciyapi kta he; den makau po.
18unkan Jesus iyopeya, qa hecen wakan śice cin tankata hinanpa; unkan wihiyayedan oape kin hetanhan hokśidan kin asniyanpi.
19Hehan waonspewicakiye cin Jesus iśnana yanke cin en hipi qa heyapi; Tokeca unkiye he napeunyanpi kta unkokihipi śni he.
20Unkan Jesus hewicakiya; Wacinyayapi śni heon; awicakehan heciciyapi; Sinape su wanjidan hinskokeca wacinyayapi unkanś, paha kin de, Detanhan tokan iyaya wo, eyakiapi kta; unkan tokan iyaye kta, qa taku oyakitpanipi wanice kta.
21Tuka taku decece cin he cekiyapi qa wote śni unpi ecedan on tankan hinanpa ece.
22Unkan Galile en unpi icunhan Jesus hewicakiya; Wicaśta Cinhintku kin wanna ecadan wicaśta napepi kin en wicaqupi kta.
23Unkan kte pi kta, qa anpetu iciyamni kinḣan ake piya ikicage kta ce, eya. Unkan nina iyokiśicapi.
24Hehan Kapernaum en hipi qehan, tona mazaska mnayanpi ece kin Inyan en hipi qa heyapi; Waonspeniciyapi kin he mazaska mnayanpi en iyoḣpeye kta he.
25Unkan, Han, eya. Hehan tin hdicu qehan Jesus tokaheya ie c̣a heciya; Simon token idukcan he; maka akan wicaśtayatapi kin tokiyatanhan mazaska mnayanpi he; iye cincapi etanhan, qa iś wicaśta tokecapi kin etanhan.
26Wicaśta tokecapi etanhan, Inyan eya. Unkan Jesus heciya; Henan cincapi kin wicakaśkapi śni ece:
27Tuka śihda wicunyanpi kte śni, e heon niś mde kin ekta ye c̣a hinśkijupi wan minin iyeya wo, qa hogan tokaheya hiyu kin he icu wo; he i kin dukawa kinhan ohna kangi kagapi wan iyeyaye kta; he icu qa miye qa niye on wicaqu wo.
Trenutno izabrano:
Mattheos 17: DAKOTANT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Copyright 2015 American Bible Society. All Rights Reserved.
