Markus 3
3
Yesu tə Mbandə Ndə tə Pəchir Ngyaməngya
(Mat 12:9-14; Luk 6:6-11)
1Vanya bəji cha ɓəla gwa ku vi pətlənya, kəl jan vanya ndə ana cha cha tətənyi tangnda. 2Alenya nji da ku pama nda kwa gwa'a laku nda nda kwa səya Yesu na bikəu, aka ənga, nda kwa ndzam nyi nda la'a nda cho mbandə ndə nda tə Pəchir Ngyaməngya.
3Ngə Yesu tə nar nyi nə ndə nda cha cha tətənyi nda, “Zəbiya ka ta'i tə bama madawa.” 4Ngə Yesu tə jawar nda, “Mi sənda gadlagadla na nja mər tə Pəchir Ngyaməngya? Sə mənakə zəma, aa səɗimi? Nja mbəɗandə pi zəma aa nja tsəya?”
Kəl ja, a nji da ɓəlakə nyi wa. 5Ngə cha ndzamtə nda na huɗətla, cho mər huɗətla na ɓaɓalkura ɗufwa nda, ngə cha nar nyi nə ndə nda na cha cha tətənyi nda, “Ndəɗabiya cha ka.” Ngə cha ndəɗabiya, təma cha cha nda mbəa. 6Ngə njir Farisi inda biya ga ki ghəya mbanya ka njir nəu hir Hiridus a təkəra laku nda nda kwa tsəya Yesu.
Dlama Nji tə Nəu Yesu
7Kəl Yesu ka shawa nyi tə hya'ati ga təra gwa nya fa'a Galili. Nji ɗang gagaɗa tə nəu nyi hya'atə vu Galili ana ma'a njir hə'i Yahudiya, 8ana hə'i Urshalima, ana hə'i Idumiya, ana nji'inda biyatə ya dəl Urdun, ana nji'inda təwa mələm Taya ana Sidon. Nji ɗang tə ngatə dəhə sə'inda cho məra, ngə nda shili ka nda la'a nyi. 9Aka ɗangkura nji, ngə Yesu tə nar nyi nə shawa nyi nda shili na nyi zər param tsa nja da hikətə nyi. 10Cha mər ənga aka a wurtə cha mbandə nji ɗanghəu, ngə a ɗa dəhə njir shiləkə kwa tsaɗə kərnənda shili da cha aka nda tsəka nyi. 11Dəhə bəji nda nji'inda na məlləm ku kəra nda tə la'a nyi, kəl nda kwa dla ma nyi na ləlla nda kwa na, “Nakə ngə Zər Hyel.”
12Kəl ja, cha tsau nda bar, ngwa nda da dəkarnyi nə madawa ndara wa cha wa.
Yesu tə Ɗəmtsə Shawa Kwabəmətləu
(Mat 10:1-4; Luk 6:12-16)
13Ahir nga, Yesu tə təra gyo ma, cha nga nji'inda cho i, ngə nda shili da cha. 14Ngə cha ɗəmtsə nji kwabəmətləu ga nga nda changhabal. Cho i nda maka ma'i kə'i cha ana cha sənda nda ki bəzə Mafakə Mənakəu, 15ana cha nənda gyalkur gədləbiya məlləm. 16Jan nji kwabəmətlə inda cha ɗəmtsə. Shiman nda Yesu tə fəndzə nyi tləm Bitrus, 17Yakubu ana zamə nyi Yohana nguli Zabadi, nanda ingə cha fəndzə nda tləm, Buwarnajis, nacha ngə “Nguli Dəradla.” 18Andrawus, Filibus, Batalamaus, Matta, Toma, Yakubu zər Halfa, Tadawus, Shiman ndər nyida hə'i nyi, 19ba'a Yahuda Iskərayoti ndər tləɗa nyi.
Yesu ana Ba'alzabul
(Mat 12:22-32; Luk 11:14-23; 12:10)
20Yesu ka shawa nyi a gu ki nda cha na ngya kwa, aka ɗangkura dlama ɓəla daɓətə dza, a Yesu ka shawa nyi da uya lakur səm sərsum wa. 21Nda njir ki kənda ngatə ənga, ngə nda shili kanda səya nyi, aka nda kwa na, “Kəra cha gwaɗəti!”
22Ka maləm gadlagadla Musa inda hya'atə vu Urshalima tə na, “Ba'alzabul təl məlləm nga gu kəra cha! Ya ana gyalkur nyi ngə cho gədlə məlləm.”
23Ngə Yesu tə nga nji'inda shili da cha ga ɓwanya nənda ana ba'ada, “Aman Shantan kwa gədlə Shantana? 24Ma təlkur tə təkə mətləu, zhang kwa mər dawa na zhang, təlkur nda do ta'i wa. 25Əngə tanyi tsə'u ma ki tə təkəbiyadzə mətləu, zhang kwa mər dawa na zhang, a ki nda nda kwa ta'i wa. 26Ya macha Shantan kwa mər dawa na kərnyi ga təkəbiyadza, a da cho ta'i wa, ba nənyi wurtə ndani.
27“Jiri a ndə da kwa nau gwa ku ki gyal kwa gwa fa'aya ki nyi wa, kəl nda cha ghəya mbiya gyal nda gwadagəu, təvi cho nau fa'aya ki nyi.
28“Jiri yo nar hi, njo far na dəhə səpəla'a ana ɓwanya ɗimi nda nja pə təkəra Hyel. 29Kəl ja, madawa tə pə ɓwanya ɗimi təkəra Shanguɗə Karti, a da njo farbikə nyi ba'anawa wa. Səpəla'a nyi ngya tə təkəra cha ba'anawa.” 30Yesu tə pə ənga aka nda na, “Məlləm ku kəra cha.”
Amanya Yesu ka Zamənya Yesu
(Mat 12:46-50; Luk 8:19-21)
31Kəl ka zamənya Yesu ka ama nyi tə shili. Nda ta'i biya ga sə vanya ndəu cha gwa nga nyi. 32Dlama nji tə ngya ga ɓandə nyi, ngə nda nar nyi, “Jan ama nghə ka zamə nghə kwa gwa'a nghə biya.”
33Ngə cha jau nda, “Ka wa ngə ama ɗa ka zamə ɗa?” 34Ngə cha ndzamar nji'inda tə ngya dzə nyi ga na, “Ja'inə ka ama ɗa ka zamə ɗa! 35Dəhə ndə nda mər sənda Hyel kwa i, nacha ngə zamə ɗa, kwamə ɗa ana ama ɗa.”
Trenutno izabrano:
Markus 3: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
