Matta 24
24
Yesu tə Ɓwanya təkəra Sə'indo Ɗa ku Batəbatər Bəji.
(Mar 13:1-2; Luk 21:5-6)
1Nda Yesu kwa ngyar Mbwa'alə Hyel, ngə shawa nyi tə shili ga char nyi hər Mbwa'alə Hyel nda. 2Ngə Yesu tə na, “Kwa la'a hi sə'ingə dəhəa? Jiri yo nar hi, njo huhuɓənda dəhəu, a da njo ngyar mada hangu zhang təkəra vanyi wa.”
3Nda Yesu tə gi ngyata nyi kyatə Dəgəl Zaitun, kəl shawa nyi tə shili da cha səkənda. Ngə nda na, “Dəkar ea, sakamanə sə'ingə kwa ɗa? Mi sənda kwa char shili ngha, ana batəbatər bəja?”
4Ngə Yesu tə wum nə nda, “Gəla ma tsa madawa da shandə hi kər. 5Nji ɗang kwa nda shili ku tləm ɗa, nda kwa na ‘Naya nə Kəristi!’ Əngə nda kwa shandə nyi kər nə nji ɗanghəu. 6Hya kwa ngatə nja kwa pa ana nja kwa pə ɓwanyar pa, ngwa hya da ləvər wa. Tuku ngə sə'ingə kwa ɗa, kəl ja, batəbatər bəji da taa ɗa gwadagə wa. 7Vanya hə'i kwa pa na vanya hə'i, ka təl ka təl tsəu kwa pa kərnənda, huɓa kwa tla, ana hə'i kwa dzədzə tə mbwa pampaməu. 8Kəl ja, dəhə sə'ingə wi tangərmar ɓwaɓwatər ɓəlakərya tanyi nga.
9“Ətsəu njo səya hi njo ɗa məndza'u nahi, ana njo tsəya hi. Ətsəu njo ngya hi mada amani ku dunəya, aka nahi njir nəu ɗa. 10Aku bəji nga, nji ɗang kwa sha tanda tsa jirikur, nda kwa tləɗa dza, nda kwa ngyar kərnənda. 11Njir mətakər gəzhi kwa nda shili ɗanghəu, nda kwa shandənyi kər nə nji ɗanghəu. 12Ɗimikur kwa yatə dzə ku pama nji, nacha gwa'atə nyida tsəu kwa ɗa shishi'u nya ta nji. 13Kəl ja, ndə nda tə səsə'uti tsa'a yatə udiya, cho uya mbəɗa. 14Ya kəl nja bəzə Mafakə Mənakə nə təlkur huɗamələm ku dəhə dunəya ka ga nja ngati. Kəl udiya jwamər bəji kwa shili.
15“Aku bəji nda hyo la'a səɗimi nda kwa dyaɓəndə Mbwa'alə Hyel nda Daniel ndər mətakər tə ɓwanya təkər nda ta'i ku Mbwa'alə Hyel. (Ndər kəratsən cha ngabiya.) 16Yau nji'inda na ngya ku hə'i Yahudiya tuku nda təra na hwi gyo mə i. 17Ndə nda kyatə kəra vi ngwa cha da həɗa səya ka fa'a sə'inda ku ki nyi wa. 18Ndə nda kwa takəu, ngwa cha da ɓəla shi aka hə daura nyi wa. 19Sər təhuɗə na mahi'i huɗəu ana mahi'i nda na ngulisha'a nya 'ua nda ku bəji nga. 20Hya pətlənya ngwa bəjir hwi ngə da ɗa vuya ndara Pəshir Ngyaməngya wa. 21Aka ku bəji nga njo sa ɓwaɓwatə gagaɗa, nda nji da ta ɓə nə fwatə ku ghəyar dunəya wa, ya a da kwa tsakətə ɗa wa. 22Ma pa'a nja nda həya hanyi ingə wa, mada ndə zhang da kwa mbəɗə wa. Kəl ja, aka nji ɗəmɗəma, cha həya hanyi inga.
23“Aka əngə ja, madawa tə nar hi, ‘Ndzam ma, janə Kəristi!’ Ndara, ‘Wula cha hina nda!’ ngwa hya da nənyi jiri wa. 24Aka Kəristi nə gəzhi ana njir mətakər gəzhi kwa chabiyadza, nda kwa shili mər wawa'ar səshinshin ana sər muniya ka ga nda shandənyi kər nə nji, ma'a nji ɗəmɗəm nə Hyel, macha kwa nau nda. 25Ngatə ma, wurtə ya dəkar hi kaɗəu təvi sə'ingə kwa ɗa.
26“Aka əngə ma madawa nar hi, ‘Wula Kəristi kwatə dadil takəu,’ ngwa hya da biya ki ndzam wa. Ma nda na, ‘Ndzam ma, janə cha tə mbu tangna,’ Ngwa hya da dləukər wa. 27Aka wi ngə nghənghəɗir par kwa tiya huɗamələm tahəu, fwatə təwa zədər pəchi gwa tsa'a nə təɗər pəchi, əngə shilir Zər Ndəu.
28“Aka mbwa nda sə tətə ti, tangnda kwadəga kwa tsəmdza.”
Shilir Zər Ndəu
(Mar 13:24-27; Luk 21:25-28)
29“Ɗəɗəu tanyi ahir ɓwaɓwatər ngəna bəji,
‘Pəchi kwa gu kutla,
a tsə'u hya kwa mbəl wa,
sasəlga tsəu nda kwa pəpa səya kya huɗamələm,
ana gyalkur huɗamələm i kwa dzədzi.’
30“A tə bəji ngə ja, hyo la'a ba'adar shilir Zər Ndə kya huɗamələm. Dəhə jul nji tə dunəya nda kwa tiwi na huɗətla, ana nda kwa la'a Zər Ndə kwa səya kya huɗamələm ku ləmbəkəu, ana gyalkur ku dəgalər səli nyi. 31Ətsəu, cho sətə chama nyi i nda kwa mbəɗiya papam na kurakə banghəu, nda kwa tsəmtə nji ɗəmɗəm nə Hyel ku dəhə məngum fwaɗə nə dunəya.
32“Ndzam ma wur kanda, hya dlədləɓətə vanya sə tsari. Ma sakanda hya la'a cho dla'a kwa biyandə heli, a zəndətə hi ənda səyar jomən ɗatə ləhəu. 33Əngə tanyi ja, ma sakanda hya la'a dəhə sə'ingə kwa ɗa, hya zəndə ənda shilir Zər Ndə ɗatə ləhəu. 34Jiri yo nar hi, a njir bəji nə da kwa kuɗə wa, kəl dəhə sə'ingə tə ɗa. 35Huɗamələm na hə'i kwa zhazha, kəl ja, ɓwanya ɗa da kwa zhazhə pa'a wa.
A Ndə da Zəndə Pəchi ndara Saka wa
(Mar 13:32-37; Luk 17:26-30, 34-35)
36“A ndə da zəndə pəchi ndara sakanda sə'ingə kwa ɗa wa, mada chama Hyel i, ndara Zər, kəl nda Ada zhang tanyi. 37Bəji nda Zər Ndə kwa ɓəla shili ti, kwa ɗa tang wi bəjir Nuhu. 38Aku bəji nda təvi mandza nda, nji kwa səma ana sa, shili ka mahi'i kwa hədza, tsa'a tə bəji nda Nuhu tə gwatanyi ku param nda Hyel tə nar nyi cha ɓatlətə nda, 39dəhə ka ənga, a da nda zəndə sənda kwa ɗa wa, kəl sakanda mandza tə shili ga kwafənda nda ɓyatəu. Tang wi ngə tsəu kwa ɗa atə bəjir shilir Zər Ndəu. 40Atə bəji nda shili mətləu kwa mər tlər tə fa, njo hənda zhang kwa ngyar zhang, 41Mahi'i mətləu kwa ha'a tə bəra, njo hənda zhang njo ngyar zhang.
42“Aka əngə ja, hya ngya na ɓəla aka a da hya zəndə pəchi nda Tlakən hi kwa shili tə wa. 43Kəl ja, hya zəndi, macha tlakər ki kwa zəndə bəji nda ndər həl kwa shili tə vu'i, a da cho njihanyi wa, cho ngya cho ɓəla, a da cho ngyar ndər həl gu ki nyi wa. 44Aka əngə ja, nahi tsəu hya ɓatlətə kərnəhi, aka Zər Ndə kwa shili tə bəji nda pa'a kəra hya har ti.
Mava Kəla Jiri ana Nda na Jiri
(Luk 12:41-48)
45“Wa ngə mava jiri nda na dəma? Nacha ngə ndə nda tlakə nyi tə fəkənyi təkəra alenya mavi'i nda ku ki nyi, aka ga cha nənda sərsuma ku bəji tsa'atsa'a. 46Ndər papa'akur ngə mava nga, ma tlakə nyi tə shili həya nyi cho mər ənga. 47Jiri yo nar hi, tlakər mava ngə kwa shili fəkənyi təkəra dəhə sənyi nda da. 48Kəl ja, macha mava ngə ndə ɗimi cha, cho nar nyi nə kərnyi, ‘Tlakə ɗa da kwa shili kusə wa.’ 49Kəl cho gwa ku dəgə kuvanyi mavi'i, kəl səma ana sa ka njir wi na mbadla. 50Kəl tlakər mava nda kwa ɓəla shili tə pəchi nda pa'a kəra cha hari ana a tə sakanda pa'a cha kwa zəndi. 51Tlakər mava nda kwa shili tsətsaunda nyi, kwa nənda mbaɗə zhang ka nji dəmən, tangnda nja kwa tiwi na ɗəhir ti.
Trenutno izabrano:
Matta 24: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
