Matta 25
25
Ba'ada təkəra Ku'ipəlyakə Kuma
1“Atə bəji nga təlkur huɗamələm kwa pabiya da ku'ipəlyakə kuma, nda tə fa'atə fitəla ka nda ki dləu sal gambəl. 2Təfu ku huɗa nda kəkənghəu, tufu tsəu njir dəma. 3Nji kəkəng inda tə hətə fitəla kənda, kəl ja, a da nda kar gwa'ar mal matsa nda ku fitəla nda wa. 4Kəl nda njir dəma inda nəkənda, nda hətə mal ku təkəu matsa nda ku fitəla. 5Manda sal gambəl tə shivi, ngə ku'i mahi'i inda ghəya ndzamhanyi, nga ɗa hanyi tə fa'aya nda tlərəɓəu.
6“Adala vu'i kurakə tə nda mandə nda ku hanyi, ‘Janə ma sal gambəl! Zəbiya ma hya dləutsə nyi!’ 7Kəl ngə ku'ipəlyakə kuma inda tə hya'ati ga ɓatlətə fitəla kənda i. 8Ngə ku'ipəlyakə kəkəng tufu inda tə nar nyi nə njir dəma inda, ‘Gətsə ea ma mal kəhi ngə ja, janə fitəla kəea kwa ta.’ 9Ngə njir dəma inda tə ɓəlakə nda, ‘A da kwa ɗa wa, aka a da kwa nji ka dəhəmən wa. Bəliya hya ki ɗəlbiya nəkə hi ka kərnəhi.’
10“Kəl ja, sakanda nda ku lakur təra ki ɗəl mal nda, sal gambəl tə shili. Ku'ipəlyakə inda tə ɓatliyadzə nda, tə dləutsə nyi ga gwa nacha tə mbwar ladər gha mala nda, ngə nja haɗənda nyaki.
11“Ahir nga, ngə alenya ku'ipəlyakə tufu inda tə ɓəla shili kwa nga, ‘Tlakəu! Tlakəu! Mbəɗiya ea nyaki ea gwa.’
12“Kəl ngə sal gambəl nda tə na, ‘Jiri yo nar hi a da yo zəndə hi wa.’ ”
13Aka əngə ja, “Hya ngya na ɓəla! Aka a da hya kwa zəndə pəchi ndara bəji nda Zər Ndə kwa ɓəla shili wa.
Ba'ada təkəra Mavi'i Makərəu
(Luk 19:11-27)
14“Əsəkə tsəu, təlkur huɗamələm kwa pabiya da vanya ndə nda biya ka ki zhuli naɗəu. Təvi cha təra, cha nga mavi'i nyi ga tsau nda gəna nyi ku cha nda. 15Kala ndə cha nənyi sənda tsa'atsa'a na dunama nyi, ndə zhang cha nənyi sulai dəbu tufu, vanya ndə sulai dəbu mətləu, vanya ndə tsəu cha nənyi sulai dəbu zhang, ngə cha biya təra. 16Mava nda tə dləutsə sulai dəbu tufu nda ki shafəli ni, ga uya zhar sulai dəbu tufu təkəri. 17Əngə tanyi, mava nda dləutsə sulai dəbu mətləu nda tsəu, tə məra ənga ga uya zhar sulai dəbu mətləu. 18Kəl ja, mava nda dləutsə sulai dəbu zhang nda tə təra ga ki labiya ka'u ga chiu gəna tlakə nyi nda kwa.
19“Ahir bəji 'ualəu, tlakən nda tə ɓəl shili tə mbwar zhuli, ga yau mavi'i inda sənda nda mər na gəna inda. 20Mava nda dləutsə sulai dəbu tufu nda tə shili na zhar dəbu tufu cha na, ‘Tlakəu ka na'a sulai dəbu tufu, janə ya uyatə zhar sulai dəbu tufu təkəri.’ 21Ngə tlakə nyi tə nar nyi, ‘Yawa, nakə mava mənakə nda na jiri, ka ɗa na jiri təkəra sə kushiu, aka ənga ya kwa fəkə nghə təkəra sə 'ualəu. Anda ka mər hirgyaɗi naya!’
22“Mava nda tə dləutsə sulai dəbu mətlə nda tə shili ga na, ‘Tlakəu, ka na'a sulai dəbu mətləu, janə ya uyatə sulai dəbu mətlə təkəri.’ 23Tlakə nyi tə na, ‘Yawa, nakə mava mənakə ka, nda na jiri, ka ɗa na jiri təkəra sə kushiu, aka ənga yo fəkə nghə təkəra sə 'ualəu. Anda ka mər hirgyaɗi naya!’
24“Kəl ngə mava nda tə dləutsə sulai dəbu zhang nda tə shili ga na, ‘Tlakəu, a zəndətə ya ənda nakə ndə dzau ka, ka kwa mərəya sə tə fa nda pa'a ka tləka, ya ka kwa tsəm tə mbwa nda pa'a ka uchənda chuli ti. 25Ləvər tə səya ɗa, aka ənga ya chiu gəna nghə nda ku ka'u, janə səngha.’
26“Ngə tlakə nyi tə ɓəlakə nyi, ‘Nakə mava pəla'a, ndə kukufəu! A zəndətə kə ənda yo mər sə tə fa nda pa'a ya tləka, ya kwa tsəm tə mbwa nda pa'a ya uchənda. 27A kitə ja ko nda ki pəu gəna ɗa ku məɗəwa tsa'aka yo nda shili fa'abiya sə ɗa na zhar nya nyacha.’ 28Ngə cha na, ‘Dləuya ma gəna ngə tsa cha nga, hya nənyi nə ndər sulai dəbu kumə nga. 29Aka ndə nda na sə njo tsakətə nyi ga cha uya 'ualəu, kəl ja, ndə nda pa'a da ni, mada sənda kushə tsa cha ma'a njo dləuya. 30Kəl nda mava pəlapəla'a ngə nənyi, vakəu nyi ma gwa ku kutlə ɗimi nga, tangnda nja kwa tiwi na ɗəhir.’
Batəbatər Nəuma
31“Aku bəji nda Zər Ndə kwa shili ku səli nyi, ana Chama nyi i dəhəu, cho ngyata nyi ku dzəga təlkur nyi, 32dəhə jul njir dunəya kwa tsəmiya dzə ma nyi. Kəl cho təkəbiya nji, tang wi ngə ndər ɓəla kwa təkəbiya kətəng ana kushishi. 33Cho piya kətəng tə chisəma cha, kushishi tə matsala cha. 34Kəl Təl kwa nar nyi nə nji'inda tə chisəma cha nda, ‘Anda ma, nahi nda Ada ɗa tə səkə hi papa'akur! Anda ma hya fa'aki na təlkur nda nja ɓatliya hi ɗəɗəm tə bəji nda Hyel tə ghəya mər dunəya ti. 35Aka ya kwa ngatə huɓa hya na'a sərsuma, ya kwa ngatə hili hya na'a ɓiti, təya mihiɓi hya dləutsə ɗa ku ki kəhi. 36Təya dura'a ngə hya handzə ɗa dzaki, təya na shiləka ngə hya shiləkəbiya ɗa, sakanda ya ku jarum hya shili usa ɗa.’
37“Njir mər sə tsa'atsa'a inda kwa ɓəlakə nyi, ‘Saka manə ja Tlakə tə ea la'a nghə na huɓə ngə ea nənghə sərsuma, ndara ana hili ngə ea nənghə ɓitya? 38Saka manə ea la'a nghə mihiɓi ngə ea dləutsə nghə ku ki kəea, ndara dura'a ka ngə ea handzə nghə dzakya? 39Saka manə ngə kə ɗana shiləkə ndara ku jarum ea usa ngha?’ 40Kəl Təl nda kwa ɓəlakə nda, ‘Jiri yo nar hi, dəhə sakanda hya mərtə nyi əngə nə ndə butəbutə zhang ku huɗa zamə ɗa ka kwamə ɗa inga, naya nda hya mərtə ɗa.’
41“Kəl Təl kwa nar nyi nə nji'inda tə matsala cha nda, ‘Təra ma dzə ɗa, nahi nji'inda na huɗətla Hyel təkəra hi! Təra ma yo hu'u nda ba'anawa nda nja ɓatliya ka sərtakə ka chama nyi i. 42Təya na huɓa a da hya na'a sərsum wa, təya na hili, a da hya na'a ɓiti wa. 43Təya mihiɓi, a da hya dləutsə ɗa ku ki kəhi wa, təya dura'a a da hya handzə ɗa dzaki wa, təya na shiləka, ana aku jarum a da hya usa ɗa wa.’
44“Kəl nanda tsəu nda kwa ɓəlakə nyi, ‘Saka manə ja Tlakə ea la'a nghə na huɓa ndara hili, ndara mihiɓi ndara dura'a, ndara ana shiləka ndara ku jarum ya ngə a da ea vala nghə wa?’ 45Kəl cho ɓəlakə nda, jiri yo nar hi, ‘Dəhə sakanda hya ngyari vala zhang ku huɗa ka zamə ɗa ka kwamə ɗa ingə butəbutə inga, naya nda hya ngyar vala.’ 46Nji inən nə ngə ja, njo təra nanda yo ɓwaɓwatə nda pa'a kwa wura, kəl nda njir mər sə tsa'atsa'a kwa təra yo pi nda ba'anawa.”
Trenutno izabrano:
Matta 25: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
