Mɔl 28
28
1Ayezeke vɛlɛle Gyekɔbo na ɔyileyilale ye, na akee ɔzele ye kɛ, “Ɔnle kɛ ɛgya Keena mraalɛ ne mɔ bie. 2Dwazo kɔ Mɛsɔpɔteemea#28.2 Mɛsɔpɔteemea: Hibulu, Peedanɛlam. wɔ ɛ nli ɔ ze Bɛtuwɛle sua nu na kɔgya ɛ nli adiema nrenya Leeban amra mraalɛ ne mɔ anu ko. 3Nyamenle Bedevinli#28.3 Nyamenle Bedevinli: Hibulu, Ɛle Hyadae (El Shaddai). ne ɛyila wɔ na ɔmaa wɔ mralɛ dɔɔnwo na bɛyɛ mɔnwo amaa bɛayɛ ɛlɔne. 4#Mɔl 17.4-8 Mesɛlɛ kɛ ɔva Ebileham nyilalɛ ne ɔmaa wɔ nee ɛ bo zo amra, amaa bɛahola bɛava azɛlɛ ye mɔɔ Nyamenle vale manle Ebileham, mɔɔ bɛluolua zolɛ la!” 5Yemɔti Ayezeke manle Gyekɔbo hɔle Mɛsɔpɔteemea, wɔ Arelamenli Bɛtuwɛle ara Leeban, mɔɔ ɔ diema a le Relɛbɛka mɔɔ wole Gyekɔbo nee Yisɔ la anwo lɔ.
Yisɔ gya raalɛ bieko
6Yisɔ nwunle kɛ Ayezeke ɛyila Gyekɔbo na yemaa yehɔ Mɛsɔpɔteemea kɛ ɔhɔgya raalɛ wɔ nehane, yɛɛ wɔ ye ɛyilalɛ ne anu, ɔbɔle ye kɔkɔ kɛ ɔmmagya Keena mraalɛ ne mɔ bie. 7Eza Gyekɔbo ɛdie ɔ ze nee ɔ nli ane na yehɔ Mɛsɔpɔteemea. 8Yemɔti mɔɔ Yisɔ nwunle kɛ ɔ ze Ayezeke anye ɛnlie Keena mraalɛ ne mɔ anwo la, 9ɔhɔle Ebileham ara Yehyemeeyɛle ɛkɛ ne na ɔhɔgyale ɔ ra raalɛ Meehalate, mɔɔ ɔ diema nrenya a le Nɛbeeyo la.
Gyekɔbo ka ɛlalɛ wɔ Bɛtɛle
10Gyekɔbo vile Biyɛhyiba na ɔvale ɔ ti ɔbɔle Hɛlan. 11Ɔhɔdwule ɛleka bie la, ɛnee aleɛ ɛdwo ye, yemɔti ɔhale ɛkɛ ne ɔlale. Ɔvale ɛkɛ ne awolɛ ne mɔ ko ɔzɔle ɔ ti na ɔlafele. 12#Dw 1.51 Nɔe ne ɔka ɛlalɛ la, ɛnee kpolike gyi azɛlɛ ye azo na ɔ ti kpula Nyamenle ne ako abo lɔ, na Nyamenle soanvolɛma ɛlɛdi fodwu. 13#Mɔl 13.14-15 Ɛdɛnkɛma gyi ɔ ti zo lɔ na ɔlɛka kɛ, “Mame a mele Ɛdɛnkɛma, ɛ nlenya Ebileham nee ɛ ze Ayezeke Nyamenle ne a. Azɛlɛ ne mɔɔ ɛla zolɛ la, mebava meamaa wɔ nee ɛ bo zo amra. 14#Mɔl 12.3; 22.18 Ɛ bo zo amra bayɛ kɛ azɛlɛ nwo anwea. Bɛbadende bɛadwu adɔleɛ, aduduleɛ, sɔlɔ nee nyiakɛ. Na ɛdawɔ nee ɛ bo zo amra anwo zo yɛɛ ewiade amra kɔsɔɔti balua anyia nyilalɛ a. 15Na nea, me nee wɔ lua na mebanlea ɛ nwo zo wɔ ɛleka biala mɔɔ ɛkɔ la, na meava wɔ meazia meara azɛlɛ ɛhye azo. Ɔluakɛ menrɛgyakyi wɔ, kyesɛ mewie mɔɔ meva me nloa meha la yɛ.”
16Na Gyekɔbo vi nafelɛ nu dunwuele na ɔhanle kɛ, “Amgba, Ɛdɛnkɛma wɔ ɛke, yɛɛ menze a.” 17Ɛzulolɛ kpole hanle ye na ɔhanle kɛ, “Ɛke yɛ ɛzulolɛ kpole kpalɛ! Ɛke a le Nyamenle sua nu a, na anuhɔlɛ mɔɔ bɛfa nu bɛkɔ anwuma maanle nu la a le ɛke.”
18Yemɔti Gyekɔbo dwazole nwonlomɔ mangyee ne ala, ɔvale bolɛ ne mɔɔ ɔvale ɔzɔle ɔ ti la ɔkpɔnlanle ye sika na ɔguale nwole zolɛ. 19Ɔdonle ɛleka zɔhane Bɛtɛle.#28.19 Bɛtɛle: Ɔ bo a le “Nyamenle Sua nu.” (Ɛnee bɛfɛlɛ suakpole ne Lɛze.) 20Akee Gyekɔbo bɔle ɛwɔkɛ kɛ, “Saa Nyamenle nee me dua, ɔnea me nwo zo wɔ ɛleka mɔɔ melɛkɔ la, na ɔmaa menyia aleɛ medi, menyia ɛdanlɛ mekeda, 21na mesia meba Egya sua nu anzonudwolɛ nu a, yemɔ Ɛdɛnkɛma bayɛ me Nyamenle, 22yɛɛ bolɛ ɛhye mɔɔ mekpɔnla ye sika wɔ ɛke la, bayɛ Nyamenle sua nu. Na debie biala mɔɔ ɛdawɔ Ɛdɛnkɛma ɛkɛmaa menwɔnyia la, menwɔhyɛ nu bulu menwɔdu ɛkpɔ ko menwɔmaa wɔ.”
Trenutno izabrano:
Mɔl 28: NB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible in Nzema © Bible Society of Ghana, 1998.