Mɔl 27
27
Ayezeke yileyila Gyekɔbo
1Ayezeke yɛle kpanyinli kpalɛ la, ɔ nye yɛle, yemɔti ɛnee ɔnnwu debie kpalɛ. Ɔvɛlɛle ɔ ra kpanyinli Yisɔ na ɔzele ye kɛ, “Me ra nrenya!”
Yisɔ liele zolɛ, “Egya, mewɔ ɛke.”
2Ayezeke zele ye kɛ, “Nea, akee mewie kpanyinli yɛ. Menze mekɛ mɔɔ menwɔwu a. 3Yemɔti fa wɔ ɛbɔlɛ ninyɛne ne mɔ, wɔ ɛda ne nee ye mbaka ne mɔ na kɔ ɛbɔ nu kɔhu nane bɛla. 4Fa to aleɛ fɛlɛko, kɛmɔ mekulo la, na fa bɛla maa menli, amaa meayileyila wɔ kolaa na meawu.”
5Mɔɔ Ayezeke ɛlɛtendɛ ahile Yisɔ la, ɛnee Relɛbɛka ɛlɛtie. Yemɔti mɔɔ Yisɔ hɔle ye ɛbɔlɛlilɛ ne kɛ ɔkakpondɛ nane yeahu ye yeara la, 6Relɛbɛka zele ɔ ra Gyekɔbo kɛ, “Mendele kɛ ɛ ze ɛlɛka ahile ɛ diema Yisɔ kɛ, 7‘Kɔhu nane bado aleɛ fɛlɛko maa menli, amaa meayileyila wɔ wɔ Ɛdɛnkɛma anyunlu kolaa na meawu’ 8Yemɔti me ra, tie mɔɔ meka meahile wɔ la. 9Kɔ nyɛmoa ne mɔ anu na kye mbɔnkye ngɛnlɛma ngyikyi nwiɔ bɛla maa mendo aleɛ fɛlɛko, kɛmɔ ɛ ze kulo la memaa wɔ, 10na fa kɔmaa ye maa ɔli, amaa yeayileyila wɔ kolaa na yeawu.”
11Gyekɔbo buale kɛ, “Ɔmɔ, me diema Yisɔ ɛdeɛ ɔ nwo le enrinli dɔɔnwo, na mame, me nwo ɛnle enrinli, 12wɔannea a ɛnee egya ɛva ɔ sa ɛvuovua me nwo, na ɔbanwu kɛ mera ye ɛbɛlɛbɛlalɛ. Ɛhye bava munzule arɛlɛ me, ɔnrɛyɛ nyilalɛ.”
13Ɔ nli zele ye kɛ, “Me ra nrenya, ɛ nwo munzule ɛgua medame me ti zo. Wɔmɔ yɛ mɔɔ meha la, na kɔhye bɛ bɛlɛ me.” 14Yemɔti ɔhɔhyele mbɔnkye mralɛ ne mɔ ɔrɛlɛle ɔ nli. Ɔ nli donle aleɛ fɛlɛko, kɛmɔ Ayezeke kulo la. 15Akee Relɛbɛka vale ɔ ra nrenya kpanyinli Yisɔ tɛladeɛ kɛnlɛma kpalɛ ne mɔɔ wɔ ɔdaye Relɛbɛka ɔ nwo ɛkɛ ne la ɔwulale ɔ ra kakula Gyekɔbo. 16Ɔvale mbɔnkye nwoma ne ɔkyekyele ɔ sa nee ɔ kɔme anwo, 17na akee ɔvale aleɛ fɛlɛko ne nee kpanwo, mɔɔ ɔdaye yeboɔboa yedo la ɔwulale ɔ ra nrenya Gyekɔbo asa anu.
18Gyekɔbo hɔle ɔ ze ɛkɛ ne na ɔzele kɛ, “Egya!”
Ayezeke buale kɛ, “Me ra nrenya, mewɔ ɛke. Na ɛdawɔ nwane ɔ?”
19Gyekɔbo buale kɛ, “Medame ɛ ra nrenya kpanyinli Yisɔ ɔ. Meyɛ mɔɔ ɛhanle ɛhilele me la; dwazo tɛnla aze di me nane aleɛ ye, na yileyila me.”
20Ayezeke zele ɔ ra ne kɛ, “Me ra nrenya, na kɛ ɔyɛ mɔɔ wɔnyia bie ndɛndɛ zɛhae ɛ?”
Gyekɔbo buale kɛ, “Ɔboalekɛ Ɛdɛnkɛma wɔ Nyamenle ne manle menyiale boɛ.”
21Ayezeke zele Gyekɔbo kɛ, “Bikye ɛke, me ra nrenya maa menva me sa menga wɔ menea saa amgba ɛdawɔ a le Yisɔ a.” 22Yemɔti Gyekɔbo bikyele ɔ ze manle ɔvuovuale ɔ nwo na ɔzele kɛ, “Ɛnelɛ ne le Gyekɔbo ane, na ɛsalɛ ye mɔ le Yisɔ asa.” 23Na yeannwu ye sonla holɛ, ɔboalekɛ ɛnee ɔ sa anwo le enrinli dɔɔnwo kɛ Yisɔ asa anwo la. Na ɔyileyilale ye. 24Ɔbizale ye kɛ, “Asoo amgba ɛdawɔ a ɛle me ra Yisɔ?”
Gyekɔbo buale kɛ, “Ɛhɛe, medame Yisɔ ɔ.”
25Ayezeke zele kɛ, “Me ra, fa aleɛ ne bɛla maa menli, na menyileyila wɔ.” Yemɔti Gyekɔbo vale aleɛ ne hɔziele ɔ nyunlu ɛkɛ, na ɔlile. Ɔrɛlɛle ye nwanye noko, na ɔnlonle. 26Akee Ayezeke zele Gyekɔbo kɛ, “Me ra, bikye me na fo me nvoka anwo.” 27#Hib 11.20 Yemɔti Gyekɔbo bikyele ye na ɔvole ɔ ze anvoka anwo. Ayezeke vunvuanle tɛladeɛ ne mɔɔ ɔwula la anu na ɔyilale ye ɔzele kɛ, “Tie, me ra nrenya ye anwo nganeɛ le kɛ ɛya mɔɔ Ɛdɛnkɛma ɛyila zolɛ la anu nganeɛ. 28Nyamenle ɛdɔ ɛbɔlɛ vi anwuma ɛgua ɛ nwo zo, na ɔmaa wɔ azɛlɛ ɛhye aleɛ, ɛnyia abɛlɛ nee nwanye dɔɔnwo. 29#Mɔl 12.3 Ɔmaa menli ɛzonle wɔ, na maanle maanle ɛbɔ bɛ ti aze ɛmaa wɔ. Ɔmaa ɛzie ɛ mediema ne mɔ, na ɛ nli akunlu amra mrenya ɛbɔ bɛ ti aze ɛmaa wɔ. Awie mɔɔ kɛbɔ wɔ sasa la, munzule ɛha ye, na mɔɔ kɛyileyila wɔ la, nyilalɛ ɛha ye!”
Yisɔ bodo Ayezeke kɛ ɔyileyila ye
30Ayezeke yileyilale Gyekɔbo wiele na Gyekɔbo hɔle la, yeandwu ɛleka biala yɛɛ Yisɔ vi ɛbɔlɛlilɛ ne rale a. 31Ɔdaye noko ɔdonle ye aleɛ kɛnlɛma bie na ɔvale ɔrɛlɛle ɔ ze. Ɔzele ɔ ze kɛ, “Egya, mebodo wɔ dwazo na di me ɛbɔlɛ nane aleɛ ye, na yileyila me.”
32Ɔ ze Ayezeke bizale kɛ, “Ɛdawɔ nwane ɔ?”
Ɔbuale kɛ, “Medame ɛ ra nrenya kpanyinli Yisɔ ɔ.”
33Ɛkɛ ne ala, Ayezeke anwo wozole ye kpole kpalɛ na ɔbizale kɛ, “Ɛnee nwane a hɔlile ɛbɔlɛ ɛhendeɛ ne vale donle aleɛ rɛlɛle me, mɔɔ meli ɔ muala, meyileyila ye kolaa na wɔara la? Ɛhɛe, na Nyamenle bayila ye noko!”
34Yisɔ dele ɔ ze edwɛkɛ ne la, ɔzunle kpole kpalɛ; ɔzunle alɔbɔlɛ nee nyane ɛzunlɛ na ɔbodole ɔ ze kɛ, “Egya, yileyila me, medame zɛhae noko.”
35Ayezeke zele kɛ, “Ɛ diema nrenya ne ɛrabɛlɛbɛla me ɛlie wɔ nyilalɛ ne ɛhɔ.”
36 #
Mɔl 25.29-34
Yisɔ hanle kɛ, “Na yemɔ, amgba bɛfɛlɛ ye Gyekɔbo! Fane nwiɔ mɔɔ yeli me ndunlumi la ɛne. Ɔliele me awolɛ kpanyinli gyinlabelɛ ne; ɛnɛ noko yeralie me nyilalɛ ne yehɔ. Egya, wɔangyakyi bie wɔammaa me ɔ?”
37Ayezeke buale kɛ, “Nea, meva ye meyɛ wɔ kpanyinli kɛ ɔzie wɔ, na meyɛ ye kɛ ɔ mediema mrenya ne mɔ kɔsɔɔti ɛzonle ye. Eza meyɛ ye kɛ ɔnyia abɛlɛ nee nwanye dɔɔnwo. Me ra nrenya, na duzu a menyɛ memaa wɔ a?”
38 #
Hib 12.17
Yisɔ hanle kɛ, “Egya, asoo nyilalɛ kokye ala a ɛlɛ a? O Egya, yileyila me, medame zɛhae noko.” Na Yisɔ zunle kpole kpalɛ.
39Akee Ayezeke zele ye kɛ,
“Nea o, na azɛlɛ mɔɔ ɛhwe la azo yɛɛ ɛbadɛnla a,
Yɛɛ anwuma ɛbɔlɛ ɛnrɛdɔ ɛ nwo zo.
40 #
Mɔl 36.8; 2 Arl 8.20 Wɔ nrɛnlande nloa yɛɛ ɛbalua na ɛ sa ahɔ ɛ nloa a,
Yɛɛ ɛbazonle ɛ diema nrenya ne.
Na saa ɛte atua a, ɛbaye ɛ nwo wɔavi ye ɛzonlenlɛ bo.”
41Yisɔ hyile Gyekɔbo wɔ nyilalɛ ne mɔɔ ɔ ze ɛva ɛyileyila ye la ati, na ɔhanle ye ɔ ti anu kɛ, “Ɔka ekyii na mekɛ mɔɔ yɛfa yɛazu egya la adwu, na yemɔ anzi mebahu me diema Gyekɔbo.”
42Na bɛhanle Yisɔ edwɛkɛ ne bɛhilele ɔ nli Relɛbɛka. Yemɔti Relɛbɛka zoanle manle bɛhɔvɛlɛle Gyekɔbo bɛmanle ye, na ɔzele ye kɛ, “Nea, ɛ diema Yisɔ ɛli ɛ nwo nyane na yebɔ adwenle kɛ ɔku wɔ kolaa na ɔ kunlu adwo. 43Yemɔti me ra, tie me. Dwazo, nriandi kɔ me diema Leeban anwo lɔ wɔ Hɛlan. 44Kɔdɛnla ɔ nwo ɛkɛ ne di mekɛ ekyii, 45kɔdwu kɛ ɛ diema ne ɛya ne kɛdwo na ɔ rɛle kɛvi mɔɔ wɔva wɔyɛ ye la, na akee meazoa meamaa bɛarava wɔ. Ɔnle kɛ metɛnla ɛke memaa bɛdabɛ bɛ mu nwiɔ bɛwu kenle ko.”
Ayezeke maa Gyekɔbo ahɔ
46Akee Relɛbɛka hanle hilele Ayezeke kɛ, “Hɛte mraalɛ bɔbɔ akee ɛmaa ɛbɛlabɔlɛ ne ɛzɛkye me adwenle. Saa Gyekɔbo gya Hɛte mraalɛ ɛhye mɔ anu bie a, ɛnee duzu nvasoɛ yɛɛ medame membale ɛbɛla la menyianle a?”
Trenutno izabrano:
Mɔl 27: NB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible in Nzema © Bible Society of Ghana, 1998.