Mɔl 24
24
Bɛgya raalɛ bɛamaa Ayezeke
1Akee Ebileham yɛle kpanyinli kpalɛ, ɔyɛle ɛrelera nwosonwoso. Ɛdɛnkɛma noko ɛyila ye wɔ debie biala anu. 2Na Ebileham zele ye sonvolɛ ne mɔɔ le kpanyinli tɛla sonvolɛma mɔɔ wɔ sua nu ɛkɛ, na eza ɔnea ninyɛne mɔɔ wɔ sua nu ɛkɛ ne la amuala azo la kɛ, “Fa ɛ sa fula me ɛzɔlɛ nu.#24.2 Fula me ɛzɔlɛ nu: Dwuuma ka ndane ahile kɛ bɛnrɛhakyi ye ɛlɛ a, kɛ bɛyɛ ye la ɛne. 3Mekulo kɛ ɛfa Ɛdɛnkɛma, Nyamenle ne mɔɔ bɔle anwuma nee aze la ɛka ndane kɛ, ɛnrɛgya Keenama mɔɔ mede bɛ avinli la amra mraalɛ ne mɔ bie ɛnrɛmaa me ra nrenya ne, 4na ɛkɛhɔ me maanle nu wɔ me nwo amra anu, na ɛkɛhɔgya raalɛ ɛkɛmaa me ra Ayezeke.”
5Sonvolɛ ne bizale ye kɛ, “Na saa ngyengyene nu bie ala raalɛ ne se kɛ ɔnrɛra ɛke a, ɛnee memanva ɛ ra nrenya ye mengɔ maanle ne mɔɔ ɛvi nu ɛrale la anu ɔ?”
6Ebileham buale ye kɛ, “Nea boɛ na wɔanva me ra nrenya ne wɔanzia wɔangɔ maanle zɔhane anu. 7Ɛdɛnkɛma, Nyamenle ne mɔɔ wɔ anwuma, mɔɔ yele me vile egya sua nu nee azɛlɛ ne mɔɔ me kotoa nyɛma la zolɛ la azo, na ɔdendɛle ɔhilele me, ɔbɔle me ɛwɔkɛ kɛ, ‘Ɛ bo zo amra yɛɛ mebava azɛlɛ ɛhye meamaa bɛ’ la, bamaa ye soanvolɛ alumua ɛ nyunlu, na wɔagya raalɛ wɔ ɛkɛ ne wɔarɛlɛ me ra ye. 8Na saa raalɛ ne se kɛ ɔ nee wɔ ɛnrɛra a, ɛndo ndane ne mɔɔ melɛmaa wɔaha la; noko mmafa me ra nrenya ne ɛsia ɛkɔ lɔ.” 9Yemɔti sonvolɛ ne vale ɔ sa vulale ɔ menle Ebileham ɛzɔlɛ nu na ɔhanle ndane ɔhilele Ebileham wɔ edwɛkɛ ɛhye anwo.
10Akee sonvolɛ ne vale ɔ menle afunlumu ne mɔ anu bulu na ɔzile nu ɔhɔle. Ɔvale ahyɛlɛ ninyɛne dɔɔnwo mɔɔ ɔ menle ne ɛnlea ɛkpa nu ɛyeye la, na ɔhɔle Mɛsɔpɔteemea maanzinli nu suakpole ne mɔɔ Neehɔ dɛnlanle zolɛ la azo. 11Ɔhɔdwule sua ne kandiba la, ɔmanle afunlumu ne mɔ hotohotole suakpole ne bane ne anzi wɔ bula ne azo. Ɛnee aleɛ ɛlɛmua nwolɛ na yedwu mekɛ mɔɔ mraalɛ ne mɔ sesa nzule a. 12Na sonvolɛ ne zele kɛ, “O Ɛdɛnkɛma, me menle Ebileham Nyamenle, maa menli konim ɛnɛ kenle ye. Mesɛlɛ wɔ, kile ɛhulolɛ kpundii mɔɔ ɛlɛ wɔ me menle Ebileham anwo la. 13Megyi bula ye azo ɛke, yɛɛ menli mɔɔ wɔ suakpole ɛhye azo la amra mraalɛ ɛbɔ ɔ bo kɛ bɛba bɛarasesa nzule. 14Maa kakula raalɛ ne mɔɔ menwɔze ye kɛ, ‘Mesɛlɛ wɔ, ka wɔ dwora ne aze maa meno wɔ nzule ne bie,’ na ɔkɛbua me kɛ, ‘No bie, na maa memaa wɔ afunlumu ne mɔ bie bɛnlo’ la, ɛyɛ sonla ne mɔɔ ɛdawɔ wɔkpa nu wɔye ye wɔmaa Ayezeke la. Ɛhye bamaa meanwu kɛ wɔhulo me menle ne kpole kpalɛ.”
15Sonvolɛ ne anloa ampe, yɛɛ Ebileham adiema nrenya Neehɔ nee ɔ ye Melekaa bɛ ra nrenya Bɛtuwɛle ara raalɛ Relɛbɛka zo dwora ɔ kɔme zo ravindele ɛkɛ ne a. 16Kakula raalɛ ne anwo yɛ fɛ; ɔle bɛlɛra mɔɔ nrenya ɛtɛfale ye ɛlɛ a. Ɔhɔle nzubula ne anloa ɔhɔzale nzule na ɔvole. 17Sonvolɛ ne nriandile hɔyiale ye na ɔzele ye kɛ, “Mesɛlɛ wɔ, maa meno nzule ne mɔɔ wɔ wɔ dwora ne anu la bie.”
18Bɛlɛra ne buale kɛ, “Me menle, no bie.” Na ɔhanle ye dwora ne aze, ɔlɛle ye ɔ sa nu ɔmanle ɔnlonle nzule ne bie. 19Bɛlɛra ne manle sonvolɛ ne nzule ne bie nlonle na ɔwiele la, ɔhanle kɛ, “Mekaza nzule ne bie mearɛlɛ wɔ afunlumu ne mɔ noko, kɔkpula kɛ bɛ muala bɛkɛnlo bie la.” 20Ɛkɛ ne ala ɔwolale mɔɔ ɔzo la ɔguale kyɛnze ne mɔɔ bɛgua afunlumu ne mɔ nzule nu la anu. Ɔnriandile ɔhɔle nzubula ne anloa ɔhɔzale nzule ne bie ɔrɛlɛle afunlumu ne mɔ amuala ɔmanle bɛnlonle. 21Nrenya ne nleanle Relɛbɛka koonwu na ɔyɛle kɛ ɔnea saa Ɛdɛnkɛma gyi ɔ nzi wɔ ye adendulɛ ne anu a.
22Mɔɔ afunlumu ne mɔ wiele nzule no la, sonvolɛ ne vale ezukoa nvutuke ngɛba mɔɔ ye bolɛ yɛ se la zɔle bɛlɛra ne abonyi na ɔvale nwiɔ noko ɔguale ɔ sa. 23Na ɔzele kɛ, “Ɛ ze a le nwane? Ka kile me. Asoo ɛ ze lɛ sua wɔ ɛkɛ ne mɔɔ yɛkola yɛbasokoɛ nu a?”
24Relɛbɛka buale kɛ, “Neehɔ nee ɔ ye Melekaa bɛ ra nrenya Bɛtuwɛle ara raalɛ a le me.” 25Ɔvale ɔzɔle zolɛ kɛ, “Yɛlɛ ndile nee nya nya mɔɔ nane di a, yɛɛ eza yɛlɛ sua mɔɔ bɛbala nu a.”
26Sonvolɛ ne bɔle ɔ ti aze zonlenle Ɛdɛnkɛma 27zele kɛ, “Ayɛlɛyelɛ ɛha Ɛdɛnkɛma, me menle Ebileham Nyamenle ne. Ɔ rɛle ɛtɛfile ye ɛwɔkɛ mɔɔ ɔbɔle me menle, nee ye ɛhulolɛ kpundii ne mɔɔ ɔkulo ye la. Na mame, Ɛdɛnkɛma ɔdaye mumua ne yelie me gyɛlɛɛnye yeva me yera me menle anwo amra sua nu.”
28Akee Relɛbɛka nriandile hɔhanle edwɛkɛ ne hilele ɔ nli awuke nu amra. 29Relɛbɛka lɛ ɔ diema nrenya ko, bɛfɛlɛ ye Leeban. Na Leeban nriandile doale sonvolɛ ne wɔ nzubula ne anloa lɔ. 30Mɔɔ Leeban nwunle bɛ bonyi nee bɛ sa ngɛba ne mɔ mɔɔ nrenya ne ɛva ɛziezie Relɛbɛka na ɔdele edwɛkɛ mɔɔ ɔ diema raalɛ ne hanle ye wɔ nwolɛ amuala la, ɔhɔle sonvolɛ ne anwo lɔ na ɔhɔdole ye kɛ ɔgyi ye afunlumu ne mɔ anwo ɛkɛ, wɔ nzubula ne anloa. 31Ɔzele ye kɛ, “Wɔmɔ mɔɔ Ɛdɛnkɛma ɛyila wɔ a, bɛla. Mmagyinla ahane nehane. Ɔluakɛ meziezie ɛleka memaa wɔ nee wɔ afunlumu ne mɔ.”
32Yemɔti nrenya ne rale sua nu; Leeban zianyinle ye afunlumu ne mɔ na ɔmanle bɛ ndile nee nya nya. Ɔmanle nrenya ne nee ye menli mɔɔ ɔ nee bɛ lua la nzule bɛnrinzinle bɛ gyakɛ anwo. 33Akee bɛmanle bɛ debie kɛ bɛli. Na nrenya ne zele kɛ, “Saa metɛbɔle me amaneɛ ne a, menrɛli debie.”
Leeban zele kɛ, “Bɔ wɔ amaneɛ ne.”
34Nrenya ne zele kɛ, “Mele Ebileham sonvolɛ. 35Ɛdɛnkɛma ɛyila me menle kpole kpalɛ, yɛɛ yeyɛ sonlakpole. Yemaa yenyia mboane nee nlankɛ dɔɔnwo; yenyia ezukoa nvutuke nee dwɛtɛ fufule dɔɔnwo. Ɔlɛ ye sonvolɛ mrenya nee mraalɛ, yɛɛ afunlumu nee asoaso. 36Me menle aye Sɛla yɛle kpanyinli kpalɛ la, ɔwole ralɛ nrenya. Na ralɛ nrenya zɔhane yɛɛ me menle ne ɛva debie biala mɔɔ ɔlɛ la ɛmaa ye a. 37Me menle ɛmaa meha ndane, ɔse, ‘Mmagya Keenama mɔɔ mede bɛ avinli la mbɛlɛra ne mɔ bie ɛmaa me ra nrenya ne. 38Kɔ me maanle nu, me ze sua nu, medame me nwo amra anu, na kɔgya raalɛ maa me ra nrenya ne.’ 39Membizale ye kɛ, ‘Na saa raalɛ ne se kɛ ɔnrɛra ɛ?’ 40Na ɔbuale me kɛ, ‘Ɛdɛnkɛma mɔɔ mesonle ye la bamaa ye soanvolɛ nee wɔ ahɔ na yeamaa ɛ nwo ayɛ moavolɛ, na wɔagya raalɛ wɔ me nwo amra avinli, wɔ egya sua nu, wɔamaa me ra nrenya ne. 41Saa ɛyɛ ye zɔhane na bɛanva raalɛ ne bɛammaa wɔ a, yemɔ ɛnee ɛndo ndane ne mɔɔ wɔha la.’
42“Ɛnɛ ala a membandwule nzubula ne anwo a, na menganle kɛ, ‘O Ɛdɛnkɛma, me menle Ebileham Nyamenle, saa amgba ala me adendulɛ ye kɛyɛ saleɛ a, 43ɛnee kɛkala mɔɔ megyi nzubula ye anloa la, maa kakula raalɛ mɔɔ kɛra kɛ ɔbaza nzule, na menwɔze ye kɛ: Mesɛlɛ wɔ, maa me wɔ nzule ne ekyi meno,’ 44na ɔkɛze me kɛ, ‘Banlo bie, na maa menza bie memaa wɔ afunlumu ne mɔ la ɛyɛ raalɛ ne mɔɔ ɛdawɔ Ɛdɛnkɛma wɔye ye kɛ mengya ye memaa me menle ara nrenya ne la.’ 45Me nloa ampe bɔbɔ, yɛɛ Relɛbɛka ravindele ɛkɛ ne a, ɔzo ye dwora ɔ kɔme zo kɛ ɔbaza nzule. Ɔzale nzule ne la, menzele ye kɛ, ‘Mesɛlɛ wɔ, maa meno bie.’ 46Ɛkɛ ne ala ɔhanle ye dwora ne aze na ɔzele kɛ, ‘No bie, na eza mebaza bie meamaa wɔ afunlumu ne mɔ noko anlo.’ 47Akee membizale ye kɛ, ‘Nwane ara raalɛ a le wɔ?’ Ɔzele me kɛ, ‘Mele Neehɔ nee ɔ ye Melekaa bɛ ra nrenya Bɛtuwɛle ara raalɛ.’ Yemɔti menvale ngɛba menzɔle ɔ bonyi na menvale bie menguale ɔ sa. 48Akee membɔle me ti aze na menzonlenle Ɛdɛnkɛma, na menyele Ɛdɛnkɛma, me menle Ebileham Nyamenle ne ayɛlɛ, kɛ yeva me yelua adenle kpalɛ zo yemaa menyia raalɛ wɔ me menle anwo amra anu memaa ɔ ra nrenya ne a. 49Zɔhane ati, saa bɛkɛkponle na bɛkɛli nɔhalɛ bɛkɛmaa me menle ne ɛdeɛ a, ɛnee bɛha. Saa bɛnrɛkponle noko a, eza bɛha, amaa meanwu me bɛne nee me fema.”
50Leeban nee Bɛtuwɛle buale kɛ, “Deɛ mumua ne vi Ɛdɛnkɛma; yɛngola yɛnga nwolɛ ɛhwee. 51Relɛbɛka a lua ɛkɛ ne la, fa ye ɛ nee ye bɛhɔ na maa ɔhɔyɛ ɛ menle ara nrenya ne aye, kɛmɔ Ɛdɛnkɛma ɛha ala la.” 52Mɔɔ Ebileham sonvolɛ ne dele bɛ edwɛkɛ ne la, ɔdule ɔdɔle Ɛdɛnkɛma anyunlu ɔyeyɛle ye. 53Akee ɔvale anwoneɛ mɔɔ bɛva dwɛtɛ fufule bɛyɛ yɛɛ anwoneɛ mɔɔ bɛva ezukoa nvutuke bɛyɛ la ɔmanle Relɛbɛka. Eza ɔmanle ye adɛladeɛ. Ɔvale ninyɛne mɔɔ sonle bolɛ la noko ɔmanle Leeban nee ɔ nli.
54Na sonvolɛ ne nee menli mɔɔ ɔ nee bɛ lua la akee lile na bɛnlonle, na bɛlale. Bɛdwazole nwonlomɔ mangyee ne la, sonvolɛ ne zele kɛ, “Bɛmaa me adenle mengɔ me menle anwo lɔ.”
55Relɛbɛka adiema nrenya ne nee ɔ nli zele ye kɛ, “Maa kakula raalɛ ne nee yɛ ɛdɛnla kenle kɛyɛ bulu na ɛ nee ye ahɔ.”
56Sonvolɛ ne buale kɛ, “Bɛmmasi me aze. Ɛdɛnkɛma ɛmaa me adendule ne ɛyɛ kɛnlɛma, bɛmaa me adenle mengɔ me menle anwo lɔ.”
57Bɛzele ye kɛ, “Maa yɛvɛlɛ kakula raalɛ ne yɛbiza ye.” 58Na bɛvɛlɛle Relɛbɛka bɛbizale ye kɛ, “Ɛ nee nrenya ye kɛhɔ ɔ?”
Na ɔbuale kɛ, “Ɛhɛe, me nee ye kɔ.”
59Yemɔti bɛmanle Relɛbɛka nee ye raalɛ ne mɔɔ sonle ye la, nee Ebileham sonvolɛ ne nee ye menli ne mɔ adenle. 60Na bɛyileyilale Relɛbɛka bɛzele kɛ,
“Adiema raalɛ, yɛ menli mgbe mgbe bɛ nli!
Ɛ bo zo amra ɛli bɛ kpɔvolɛma anwo zo konim.”
61Na Relɛbɛka nee ye sonvolɛ mraalɛ ne mɔ vole bɛ afunlumu zo na bɛ nee Ebileham sonvolɛ ne zile nu hɔle.
62Mekɛ ne anu ɛnee Ayezeke vi Biyɛleehaelɔe fienemgbole ne anu ɛra, ɔluakɛ ɛnee ɔde Keena nyiakɛ. 63Aleɛ yɛle nɔsolɛ la ɔhɔle ye ɛya ne mɔ anu lɔ kɛ ɔkava adwenle; ɔmanle ɔ nye zo la, ɔnwunle kɛ afunlumu dɔɔnwo bie ɛlɛba. 64Relɛbɛka nwunle Ayezeke la, ɔvi ye afunlumu ne azo ɔdwule 65na ɔbizale Ebileham sonvolɛ ne kɛ, “Nwane nrenya a lua ɛya nu lɔ ɛlɛba arayia yɛ la?”
Sonvolɛ ne buale ye kɛ, “Me menle ne ɔ.” Yemɔti Relɛbɛka vale ɛdanlɛ hedale ɔ ti zo.
66Sonvolɛ ne hanle debie biala mɔɔ yeyɛ la amuala hilele Ayezeke. 67Ayezeke akee vale Relɛbɛka hɔle ɔ nli Sɛla ndanlɛ sua ne anu na Relɛbɛka yɛle ɔ ye; Ayezeke hulole ye somaa, yemɔti akee ɔ rɛle kyekyele na ɔ rɛle vile ɔ nli ewule ne.
Trenutno izabrano:
Mɔl 24: NB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible in Nzema © Bible Society of Ghana, 1998.