Mɔl 23
23
Sɛla ɛwu na Ebileham tɔ azɛlɛ azie ye
1Sɛla dɛnlanle aze lile ɛvolɛ ɛya ko, ɛvolɛ abulanwiɔ nee nsuu. 2Ɔwule Hibulɔn (Keleate Aaba), wɔ Keena maanle nu, na Ebileham zunle ye.
3Mɔɔ Sɛla wule la, Ebileham gyakyile funli ne ɛkɛ ne hɔle Hɛtema ɛkɛ ne na ɔzele bɛ kɛ, 4“Mele ɛyɛvolɛ a mede bɛ avinli ɛke a; bɛmaa me azɛlɛ mendɔ menyɛ me azie menzie me funli wɔ zolɛ.”
5Hɛtema buale ye kɛ, 6“Yɛmenle, tie mɔɔ yɛka la. Ɛle belemgbunli kpole a ɛwɔ yɛ avinli a. Ɛdawɔ neɛnlea yɛ nla ne mɔ na sie wɔ funli ne wɔ nla biala mɔɔ ɛkulo la anu. Yɛ nuhua biala ɛnrɛva ye nla ɛnrɛyɛ wɔ abokɛ, yɛɛ awie biala ɛnrɛgyegye wɔ wɔ funli ne ɛzielɛ nu.”
7Ebileham dwazole bɔle ɔ ti aze manle Hɛtema mɔɔ lɛ azɛlɛ ne la, yɛle bɛ mo 8na ɔzele bɛ kɛ, “Saa bɛkulo kɛ mesie me funli ne a, ɛnee mesɛlɛ bɛ, bɛzɛlɛ Zohaa ara Yifolɔn 9bɛmaa ɔva ye bolɛ bɔne ne mɔɔ wɔ Makepilaa la ɔmaa me. Ɔwɔ ye azɛlɛ ne abo lɔ. Metɔ meadua ye kakɛ wɔ bɛdabɛ bɛ nyunlu ɛke, na meava meayɛ azie.”
10Ɛnee Yifolɔn de Hɛtema ne avinli, na ɔbuale Ebileham ɔmanle Hɛtema mɔɔ yiale ɛkɛ ne la kɔsɔɔti dele. Ɔse, 11“Me menle, kyɛkyɛ, tie mɔɔ meka la. Mefa azɛlɛ ne memaa wɔ, yɛɛ bolɛ bɔne ne mɔɔ wɔ zolɛ la le wɔ ɛdeɛ. Mefa memaa wɔ, wɔ me menli ye mɔɔ ɛyia ɛke la amuala anyunlu. Fa sie wɔ funli ne.”
12Na Ebileham dwazole bɔle ɔ ti aze wɔ Hɛtema anyunlu, 13na ɔhanle ɔhilele Yifolɔn, ɔmanle Hɛtema mɔɔ ɛrayia ɛkɛ ne la amuala dele bie kɛ, “Mesɛlɛ wɔ, tie medame noko. Metua azɛlɛ ne kakɛ. Die, na maa menzie me funli ne wɔ zolɛ.”
14Yifolɔn buale Ebileham kɛ, 15“Me menle, tie me. Azɛlɛ mɔɔ bɛtɔ ye dwɛtɛ fufule ɛya nna la le duzu wɔ yɛ mu nwiɔ yɛ avinli? Wɔmɔ kɔzie wɔ funli ne wɔ ɛkɛ.” 16Ebileham kponlenle zolɛ na ɔzuzule dwɛtɛ fufule ne ɔmanle Yifolɔn, ɔmanle Hɛtema mɔɔ rayiale ɛkɛ ne la amuala nwunle ye. Ɔle dwɛtɛ fufule ɛya nna, kɛmɔ gualilɛma ɛzuzudeɛ ne mɔɔ bɛfa bɛsuzu bɛ ezukoa la kile la.
17Yemɔti Yifolɔn azɛlɛ ne mɔɔ wɔ Makepilaa, bolɛ bɔne ne mɔɔ wɔ zolɛ, yɛɛ mbaka kɔsɔɔti mɔɔ wɔ zolɛ la 18rayɛle Ebileham ɛdeɛ, kɛ ɔdaye ye agyadeɛ ɔ, wɔ Hɛtema mɔɔ rayiale la kɔsɔɔti anyunlu.
19Ɛhye anzi akee Ebileham hɔziele ɔ ye Sɛla wɔ bolɛ bɔne ne mɔɔ wɔ Makepilaa mɔɔ wɔ Mameli aduduleɛ la anu, wɔ Keena azɛlɛ zo. 20Hɛtema vale azɛlɛ ne manle Ebileham yɛle ye ɛdeɛ kɛ ɔva ɔyɛ azie.
Trenutno izabrano:
Mɔl 23: NB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible in Nzema © Bible Society of Ghana, 1998.