Mateo 12
12
Kubena uhemba siku ja sabato
1Kikomo kija Yesu kabita muna imigunda disiku ja ukuhumula; wanahina zake nzala iwaluma, wandusa kubena lukuso lwa uhemba, waja. 2Awaja Mafariseo vuwaviwene wamulongela, “Lola wanahina zako wotenda mbuli hailinganye kuisanghana disiku ja Sabato!” 3Kawalongela, “Hamsomile viyatendile Daudi, viyakalile na nzala heyo na wayage? 4Avija viyengile muna ingʼanda ya Mulungu, viyaidile imigate ya nhambiko, na hivo vihile kumwake kuija hata waja wayage, komu wakulu wa nhambiko wali yeka. 5Kabili hamsomile muna Inzuma kamba siku ya ukuhumula wakulu wa nhambiko mngʼanda ya Mulungu woibeza isiku ya kuhumula, hawapatile gehile? 6Bali nomulongelani kamba hano kabahano Yali mkulu kubanza ihekalu! 7Kabili kamba mwitangile nhambulilo ya malonga gano: Nolonda bazi si kamba vinhu vya nhambiko, hisambi muwadumilize wali bule na matozo. 8Kilumbo Mwanage Munhu yuyo mndewa wa sabato.”
Mkono uholole
9Kakulawa hiko, kengila mngʼanda ya nhambiko. 10Na lola mumuja mna munhu mwene mkono uholole. Wamuuza walonga, “Avo vilinganya kuhonya disiku ja ukuhumula?” Giladi wamtaguse. 11Kawalongela, “Avo munhu yalihi mmwanza wenu mwene nghondolo imonga; aija nghondolo kagwila mkolongo disiku ja ukuhumula, yalekile kumgoga yamulave? 12He, munhu kabanza nghondolo miyanza mingahi! Avo vilinganya kusanghana ganogile siku ja ukuhumula.” 13Yomala kamulongela yuja imunhu, “Golosa mkono wako.” Kaugolosa, uhona, ubwela mgima kamba uyagwe. 14Bali Mafariseo walawa watenda mzengwe, vija vondawamkome.
Mlanzi utulike, lukumbulu lulawa yosi
15Na heyo Yesu yogatanga higo, kasegela hiko. Na wanhu bwando wamkoleleza, kawahonya wose. 16Na heyo kawagomesa sikuwambwililise. 17Giladi divikizwe longa dija dilongigwe na mtula-ndagu Yesaya yolonga:
18“Lola yuno yuyo Mwanangu isagule, Mnogelwa wangu,
moyo wangu unogelwa nayo.
Noigela Loho yangu mmwake,
na heyo kowapetela zingholo kitala.
19Hondayadete, bule hondayabwate,
wala munhu hadihulika dizwi jake mnzila.
20Mlanzi utulike hondayaubene, kabili lukumbulu lulawa yosi haluzima,
mpaka yondayagale ikitala chohuma.
21Na tagwa jake zingholo woditamanila.”
Kumbeza Loho ya Yesu
22Kikomo kikija wamgalila munhu mwene mizuka, kimbugumbugu na bubuwi; kamuhonya, bahaja ija ibubuwi kalonga na kulola. 23Wanhu wose wakanganya walonga, “Yuno hambwe mwanage Daudi?” 24Bali Mafariseo vuwahulike walonga, “Yuno kolava mizuka kwa mhiko za Beelzebuli Mwenembago, mkulu wa mizuka.” 25Yesu yozitanga ngelegeza zawo, kawalongela, “Kamba undewa uhawa na magomba wenyego kwa wenyego, hondaukale; kabili kihawa kiwambo bule ngʼanda, mana wogomba wenyego kwa wenyego, hondaime. 26Yahawa Mwenembago yamulave Mwenembago, kefutula heyo mwenyecho; avo undewa wake wokalaze? 27Na niye nihalava mizuka kwa Beelzebuli, wanahina wenu woilava na nani? Avo kwiza awo wondawamuhumeni. 28Bali niye nihalava mizuka na Loho wa Mulungu, kumbe undewa wa Mulungu umvikilani.
29Hebu munhu kodahaze kwingila mngʼanda ya zinhu gaga, yakavisole vinhu vyake, kamba tanhu handuse kumkaka na nzabi dija zinhu, kileka yavisole vili mngʼanda vyose?
30Munhu kamba hawile hamonga na niye, halingane na niye; kabili munhu kamba halundize hamonga na niye, kopwimbwisa. 31Kileka hivo nomulongelani, matozo gogose na longa jojose ja kufukula wosegezelwa iwanhu, bali kumfukulila Loho hondawasegezelwe. 32Munhu wowose yahamlonga gehile Mwanage Munhu, kosegezelwa; komu ayo yondayamulonge gehile Loho Ingʼalile, hondayasegezelwe mulumwengu uno wa dilelo, na auja okwiza.”
Biki dinogile au dihile
33“Muhalonda mujo unogile, ilumba muwe na biki dinogile; bule uhawa na biki dihile, na mujo wake wokwiha, kilumbo biki ditangikaga mmujo wake. 34Amweye mlelo wa mizoka, modahaze kulonga ganogile, mweye mwihile; kilumbo mlomo wa munhu wolonga gayamemeze mmoyo wake. 35Munhu yanogile kolava ganogile mbikilo jake dinogile; na munhu yehile kolava gehile mbikilo jake dihile.
36Bali heyo nomulongelani: mbuli yoyose ili bule mzoko yondawalonge walumwengu, wolava mhetelo ya longa dijo siku ja ikitala. 37Kilumbo mumo mmalonga gako kopetwa ihoko, kabili mmalonga gako kotaguswa.”
Kilolomboto cha Yona na Salomo
38Baho wayagwe wa wana-Nzuma na Mafariseo wamwidika walonga, “Mkulufunzi, tolonda utulagile kilolomboto.” 39Kedika kawalongela, “Lukolo lwihile na lwa ugoni lozahila kilolomboto. Bali hondalulagusilwe kilolomboto komu kilolomboto cha mlaguzi Yona. 40Kilumbo kamba vija Yona viyakalile siku ndatu imisi na ikilo muinda ya somba kulu, avo vivo Mwanage Munhu vondayawe siku ndatu imisi na ikilo muisi mgati. 41Wanhu wa Ninawi wokwima wima siku ja ikitala, wamtaguseni mweye, kilumbo wawo waleka gehile, wavumila gayalongile Yona; ahano kabahano Yali mkulu kubanza Yona. 42Mtawala mtwanzi yalawile Sheba kokwima wima siku ya ikitala, yamtaguseni mweye, kilumbo heyo keza yolawa nyenza za kimambukizo cha isi, giladi yahulike fiyuko zake Salomo; na hano kabahano Yali mkulu kubanza Salomo.”
Mzuka uli bule mhumulo
43“Mzuka mchapalisi mana umulawa munhu, wobita hanhu hali bule mazi, wozahila hanhu ha kuhumulila, hahapatile. 44Kwiza kolonga, Nobwela kungʼanda yangu kundawile. Avija viyezile, kaivika bule, ifagiligwa, ihambigwa. 45Mhunde kogenda kosola wayage hamonga, na hiyo mizuka iyagwe saba ihile kubanza heyo mwenyecho, na hewo wokwingila wokala mumo, na imunhu yuja hali yake ya ikimambukizo yokuwa ihile kubanza ya ikilongozi. Vivo vondaviwe muna umlelo uno uli uwiho.”
Mamo wa Yesu kamuwinza
46Viyakalile yolanguliza wanhu, lola mamaake na ndugu zake weza, wema kunze wolonda kulonga nayo. 47Munhu imonga kamulongela, “Mamo wako na ndugu zako weza, wema kunze wolonda kulonga nagwe.” 48Kedika kamulongela yuja yamulongele gaja, “Mamaangu yuyo yalihi, awo wandugu zangu kina nani?” 49Kawagolosela mkono wanahina wake, kalonga, “Lola mamaangu na wandugu zangu! 50Kilumbo yoyose yondayasanghane goyolonda Tata wangu yali Kuulanga, hiyo yuyo ndugu yangu na lumbu jangu na mama wangu.”
Trenutno izabrano:
Mateo 12: ZAM75
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
New Testament in Zaramo © United Bible Societies, 1975.
