John 15
15
1O̱ki. Jesus sota̱mitotoisapsskanistsiiwa omo̱nikapiimiksi, “Niisto̱wa a̱nnaoʼka annaahka niita̱ʼpamiwahka a̱nni o̱o̱mistska otsi̱taisaisskiihpi soyikapi̱nniihpi. Ki ni̱nna a̱nni a̱o̱toitsikatoomi amostsiska. 2O̱ki. Oma̱a mata̱piiwa, a̱o̱toitsikatooma soyikapi̱nniihpists, a̱akssaʼtsimiaawa. Ikkami̱tsstsiihki otsini̱ʼpi saoʼkani̱ksi ma̱tohtohkoikioʼpi otsi̱tsawayi̱i̱naʼsspi, a̱ksota̱msaoʼtsima. Kii omi̱i̱stsi otsi̱tayiinaʼsspi, a̱i̱ksiʼkkaahkaanistotsimaistsi. Ki a̱nniai a̱kitsistapakayiinaʼsiyaawa. Niʼto̱i̱ niitsiiwa ni̱nna ki niisto̱wa.
3Kiisto̱aawa ni̱nna kika̱i̱sikkaʼpssakkoaawa kisa̱o̱mmitsitapiʼssoaawa. Kita̱a̱nistohpoaawaistsi, a̱nnihkaoʼka ko̱mohtsiksikkaʼpistotootspoaawa. 4O̱ki. Omiiya saoʼka̱niksi, manistsi̱poʼtsstsiihpi ami̱i mistsi̱si, niʼto̱i̱ kita̱ksstsinaaʼnistsakiohpipaitapiiyihpoaawa niisto̱wa. Ki nita̱ksaakiohpipaitapii kiisto̱aawa. Omi̱i̱ya saoʼka̱niksi ikka̱msawattsitsipoʼtsstsisi omiia miistsi̱si a̱kitsawatta̱yiinaʼsiwa. Kii niʼto̱i̱ niitsiiwa: kiisto̱aawa ikka̱msawattohpipaitapiiyinoainiki niisto̱wa, kipa̱i̱tapiʼssoawaistsi ma̱takattohpanioʼpa. 5Niisto̱wa a̱nni omii miistsi̱si. Kiisto̱aawa a̱nni anni̱stsi sa̱oʼkaniksiistsi. Oma̱a ikka̱mohpipaitapiisi niisto̱yi, kii ikka̱mohpipaitapiiniki osto̱yi iika̱kakawoi ota̱nisttsissistsi iihtohko̱i̱kioʼpistsi. Kiisto̱aawa ikka̱msawattohpokaʼpaissiimokiinoainiki ma̱taakatto̱noaohtaohkoyikioʼpi kiisto̱aawa. 6Omi̱i̱ksi ka̱taʼohpipaitapiiksi niisto̱yi, niʼto̱i a̱kanistotoayi a̱nni ka̱taʼohpanioʼpists saoʼka̱niksiistsi. Ami̱i̱stsi saoʼka̱niksistsi a̱ksistapaapiksiihpi. Ki aihkitsi̱ksiisoyisaawa a̱kitomoipohtoohpiaawa. A̱kitso̱yaapiksiihpiaawaa amiia pako̱yittsi. A̱kohpitohpakoyittsiiyaawa. A̱nnia a̱kanistotoayaawa omi̱i̱ksika̱taʼohpipaitapiiksi niisto̱yi.
7O̱ki. Ikka̱mohpipaitapiiyinoaainiki niisto̱wa, kii ikka̱msawaatstoominoainiki ni̱tssksinimaatstohkihpistsi, kita̱ksotamanikkihpoaawa kita̱yaakanikkihpoaawayi, ki a̱nniai ki ta̱kitanisttotomoohpoaawa. 8Kiisto̱aawa iika̱kakawo iihtohko̱i̱kioʼpistsi kita̱nisttsissiistsi, ki a̱nnihkayi ni̱nna a̱kohtsitsspimmawa. Ki a̱kstaminako kiisto̱aawa kita̱mssoayi omiiksiska itoma̱i̱ʼtakiiksi niisto̱i.
9Nanista̱komimmi̱yihpi ni̱nna, kita̱i̱totoisapakomimmohpoaawa. Pinipo̱ʼtsita kita̱komimmohsoaayi. 10O̱ki. Ikkama̱nistaiʼtsiminoainiki, nitoka̱kihtsimaanistsi, kita̱kohtitsayipoʼtsiihpoaawa kita̱komimmohsoaayi. Niiʼto̱i nanista̱nistaiʼtsiihpiaawa ni̱nna otoka̱kihtsimaanistsi ki a̱nnihkayii no̱mohtsayipoʼtsiihpa nita̱komimmi̱yisi.
11O̱ki. A̱a̱mostsi no̱mohtanistoohpi ka̱a̱hkitaikakitaiʼtaamiʼtakssoayi. Nita̱a̱hsiʼtakssini kita̱kohtoʼtsiiʼtaamsspoaawa, ki a̱nnihkayii no̱mohtanistoohpa amo̱stska kita̱a̱nistohpoaawaistska.
12O̱ki. A̱wakomimmotsiiyika. A̱nniai kanisto̱kakohtomoohpoaawa. Kanista̱komimmohpoaawayi, istoto̱i̱sapakomimmotsiiyika. 13Kita̱kanistohpoaawa manistsi̱i̱hpi istohkana̱i̱ʼtaʼpakomimmihtaani: Oma̱a iima̱tskaohsiwa ma̱a̱hkohtahtsawaiʼnssi ota̱kkaaiksi, a̱nnahkaoʼka istohkana̱i̱ʼtaʼpakomimmiiwaiski. 14Kiisto̱aawa kita̱kka̱amokihpoaawa ikkama̱nistaiʼtsiminoainiki kitoka̱kohtomoohpoaawaistsi. 15Nima̱takattaniihpa kiisto̱aawa kika̱kanikapiimatohpoaawa. Takaa oma̱a a̱yanikapiimatawa, ma̱takssksinima anniska ota̱a̱nikapiimakkiska ota̱wanisttsiihpiayi. Niʼto̱i kima̱tanistsspoaawa. Ki̱tssksinima̱atsoohpoaawa ni̱tohkanawaani̱yihpistsi ni̱nna. Na̱a̱hkanisttsissi. Nima̱takattaniihpa kika̱kanikapiimatohpoaawa. A̱nnohkayi ta̱kahtsawaanii kita̱kkaamohpoaawa.
16Kiisto̱aawa, kima̱tssiikoʼtookihpoaawa. Niisto̱wa ki̱tssiikoʼtoohpoaawa. Kanistsi̱poʼtoohpoaawa ka̱a̱hkohkanawa̱niitoohsoayi. Kipa̱i̱tapiʼssoaawayi a̱kitohtoʼtsistapitsstsiiwa iihtohko̱i̱kioʼpi. Kii a̱a̱mohka iihtohko̱i̱kioʼpihka ma̱takssikihtsi̱i̱waatsiksi. Ki a̱nnimayii aoka̱manistainoainiki ni̱nna ikka̱mohtokamanistainoainiki kita̱mssoayi ami̱i̱ksiska itoma̱i̱ʼtakiiksi niisto̱yi kita̱ki̱tohkanaohkokkoaawa kitsi̱i̱kamanistahpoaawayi.
17A̱waakomimmotsiiyika. A̱nniayi kanisto̱kakohtomoohpoaawa.
18O̱ki. Aiʼka̱i̱mmotsiinoainiki ka̱taʼyaomaiʼtakiiksi issksini̱kaaki niista̱wa a̱nniskaoʼkinayi otsi̱i̱tomi̱kaimmawaawayiska. 19Kitsi̱toʼtsspoaawopi ka̱taʼyaomaiʼtakiiksi kita̱kitakomimmokoaayaawa. A̱wattakomimmotsiiyaawa. Ki kiisto̱aawa ko̱mohtssikahksipoʼtoohpoaawa ka̱a̱hksawattsitoʼtssoaayi ka̱taʼyaomaiʼtakiiksi, ki a̱nnimayii kita̱kohtsi̱kaimmokoaayaawa.
20O̱ki. Pina̱atstooka anniihka kita̱a̱nistohpoaawayihka. Kitsi̱totoisapsskanistohpoaawa oma̱a a̱ʼpaoʼtomohkiwa ma̱toʼtsitsksspssiiwa otsi̱naaimi. Omi̱i̱ksi ka̱taʼyaomaiʼtakiiksi nitsaa̱kamoʼsistotookiaawa, kiisto̱aawa kita̱kstamoohkattsao̱kamoʼtsistotookoaayaawa. Ma̱tanistaiʼtsi̱maiks nita̱a̱niihpi. Ki a̱nnimayi a̱kstamoohkattsitsawanistaiʼtsimiaawa kita̱a̱niihpoaawayi. 21Ma̱tssksinoyiiyaawa anniska nito̱ʼtsskookiska, A̱ʼpistotookiiyiska. Ki a̱nnihkayii ko̱mohtakanisttotookoaayaawa a̱a̱mostska kana̱o̱kaʼpistska. Kita̱kohtanisttotookoayaawaistsi niisto̱yi kitoma̱i̱ʼtookssoaayi.
22Niisto̱wa nika̱taiʼtoʼtoohtopi nika̱taiʼsitsipssatayaawopi a̱nnohka ma̱takohtotoiʼma̱waiksaawa maka̱ʼpii. Ki ni̱tssitsipssatayaawa, ki a̱nnohkayii ma̱takohkoiʼpoatomoohsi̱waiksa.
23Oma̱a nita̱i̱kaimmoka, noohka̱ttsi̱kaimmiiwa ni̱nni.
24Nitsi̱tsspianisttsiihpistsi o̱tapiʼssina, ma̱tonoaitsstsiihpa noohki̱i̱tssimmi a̱nni a̱a̱hkanisttsi. Nika̱taaʼnisttotsiihtopiaawa ma̱takohtotoiʼma̱waiksaawa maka̱ʼpii. Ki nita̱nisttotsiihpiaawa, ki a̱nnohkayii nitsino̱o̱kiaawa, ki nimi̱skitsi̱kaimmokiaawa, kii ni̱nni. 25A̱a̱mohka manista̱i̱hkaʼsspiaawa itsi̱kayissiinaapsskohkatoʼpa nato̱i̱sinaakssini a̱kanistaihkaʼsiiyaawa. Ki a̱nnihkayii iihtani̱staisiiwa. O̱mohtawaatsi̱moihkaahpistsi sina̱a̱kssiistsi, itssi̱naiʼpa nita̱ksiksisstoitsi̱kaimmokiaawa.
26Oma̱a̱hk kita̱ksspommookoaawahka a̱koʼtoowa. Osto̱yi nita̱kohtoʼtsskoawa anniska ni̱nniska. A̱nnahkaoʼka Natowo̱ttakahka. Kita̱kohkokkoaawa moka̱moʼtaʼpi. Osto̱yi a̱kohtoʼtoowa ni̱nni, ki a̱kaistamatsiiwa mata̱piiyi nita̱mihpi. Ki ta̱kohtssksinimaatsookoaawa niisto̱yi.
27Kii kiisto̱aawa kita̱kaistama̱atsaawaawa o̱tapiʼssini nita̱mihpi. Takaa kiisto̱aawa kitsi̱tohpokaʼpaissiimokihpoaawa istsitsa̱omatapaaoʼsi ki a̱nnohka.”
Trenutno izabrano:
John 15: BLA1979
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Translated by Wycliffe Bible Translators. Published by the Canadian Bible Society 1979.
