John 14
14
1Jesus itani̱stsiiwa oma̱nikapiimiksi, “O̱ki. Pini̱kihki̱niʼtakika; ama̱i̱ʼtooka A̱ʼpistotookiiyi. Noohka̱ttomaiʼtookik. 2Omi̱i̱m Ni̱nna A̱ʼpistotookiwa otsi̱taopiihpim itaka̱woyaawa omiistsi ita̱i̱psto̱pa̱oʼpistsi. A̱mohka ka̱taaʼnistsiiopi kima̱takanistohpoaawa. Niisto̱wa ta̱kohtsitapoo ka̱a̱hkohtaʼpistotomoohsoayi ka̱a̱hkitaopihpoaawa. 3Kii aoto̱i̱ʼksistaʼpistotsiminikiaawa ta̱ki̱tsskaistoo. Kita̱kitohpoʼkii̱pioohpoaawa, kii a̱nnimayii kita̱kitaʼpaisspoaawa omiima nitsi̱takaʼpaisspi. 4Kii kiisto̱aawa kika̱i̱ssksiniihpoaawa ka̱a̱hkanistohkoitoʼtoohpoaawayi nita̱yaakitapoohpi.”
5O̱ki. Oma̱a Thomas itani̱i̱wa, “O̱ki, nitsi̱naaimi. Nima̱tssksiniihpinnaan kita̱kitapoohpi. Tsa̱a̱htaa na̱a̱hkanistohkottssksiniihpinna̱a̱nahta na̱a̱hkanistohkoitoʼtoohpinnaani.” 6Itani̱i̱wa Jesusa “Niisto̱wa a̱nnahkaoʼka annaahka kita̱kohtohkoitoʼtoohpoaawahka. Niisto̱wa a̱nnahkaoʼka moka̱moʼtaʼpssi. Niisto̱wa a̱nnahkaoʼka o̱mohtsiistapitsstsiihpi manipa̱i̱tapiʼssini. Oma̱a mata̱piiwa ikka̱msaohtohkoyikisi niisto̱i ma̱takohkoitoʼto̱owaatsi ninni.
7O̱ki. Ki̱niitaʼpssksinookihpoaawopi kita̱kitoohkattssksinoaawa ni̱nna. Ki a̱nnohkayii kita̱komatapssksinoawaawa.”
8O̱ki. Itani̱i̱wa oma̱a Philip, “O̱ki nitsi̱naaimi. Noohka̱i̱stamaatsookinnaan ki̱nnoona; a̱nniayi kino̱o̱hkanisto̱kamanistohpinnaana. Nima̱takattsitsspo̱kamaniihpinnaan.” 9Jesus itani̱i̱wa, “Philip, kitsiksi̱samohpokaʼpaissiimohpoaawa, ki kitsi̱i̱miisawaitaʼpssksinookihpoaawa. Ikkami̱kainokiinoainiki kino̱o̱hkattsikainoawaawa ni̱nna. Kima̱ʼkanissi, ‘noohka̱i̱stamatsookinnaan ki̱nnoona’? 10Kaahkstama̱i̱ʼsayiʼtookihpoaawa nomohpipa̱i̱tapiiʼssi ni̱nna, ki ni̱nna omohpipa̱i̱tapiiʼssi niisto̱yi. Kii amo̱stska kita̱a̱nistohpoaawaistska nima̱tawattanistoohpiaawa. Ni̱nna iihpipa̱itapiiwa niisto̱i kii omi̱i̱stsi nita̱wanisttsiihpistsi, oosto̱yi a̱nnahkaoʼka a̱wattanisttotsimaistsi. 11Ama̱i̱ʼtsit nomohpipa̱i̱tapiʼssi ni̱nna kii omohpipa̱i̱tapiʼssi niisto̱yi. Ikkama̱nistaiksimsstaainoainiki kitsawa̱ohkottomaiʼtsissooaayi inao̱ʼkohtomaiʼtakika nitsipisatani̱sttsissiistsi. 12Kita̱kanistohpoaawa niitsi̱i̱yi. Oma̱a nita̱o̱maiʼtooka a̱kitotoisapaʼpoʼtakiwa niisto̱i, kii ota̱ʼpoʼtsiihpistsi a̱kitoʼtsitsksskonataʼpiiyaawa niisto̱yi nita̱ʼpoʼtakssiistsi, takaa niisto̱wa nita̱ksskitapoo ni̱nna. 13Kiisto̱aawa a̱nnikskaoʼkiaawa anni̱i̱ksiska itoma̱i̱ʼtakiiksi niisto̱yi, ki a̱nnihkayii kita̱kohtohkottsinihkatsimakkihpoaawa. Kita̱kitanistsiʼtoohpoaawa. Ni̱nna a̱kohtsitsspimmawa niisto̱yi nita̱kitanisttsiihpi. Niisto̱akaoʼka ohko̱yi. 14Ikkamo̱kamanikkiinoainiki ki̱tsstatoohpoaayi, kitakohtokamanikkihpoaawa kitamssoaayi amiiksiska itoma̱i̱ʼtakiiksi niisto̱i ki kita̱kitanisttotomoohpoaawa.
15Kii ikkama̱komimmokiinoainiki kita̱kitanistaiʼtsiihpoaawa nitoka̱kihtsimaanistsi. 16Ki nita̱kanistawa ni̱nna ma̱a̱hkitapipoʼtoahsi noohki̱i̱tssimmi ka̱a̱hksspommo̱yissoaayi, ki omi̱iska noohki̱i̱tssimmiska kima̱tako̱noayiistapa̱akkoawaatsinai. 17Oma̱a̱hka noohki̱i̱tssimmahka a̱nnahkao̱ʼka annaahka kita̱kohkokkoaawahka moka̱moʼtaʼpi. A̱nnahkaoʼka annaahka Natowo̱ttakahka. Ka̱taʼyaomaiʼtakiiksi ma̱takohkottoʼtoyiiwaiksi Natowo̱ttaki. Ma̱takohkottsinapimmi̱waiksaawayi. Ma̱takohkottonoyiiwaiksaawayi. Kiisto̱waawa ki̱tssksinoaawaawa. Ki̱tohpokaʼpaissiimokoaawa, kii kita̱ksistomatawaawa. 18Kiisto̱aawa, aiʼtsski̱toinoainiki, kima̱takitsiksisstoyimmohpoaawa a̱nni immaksi̱ʼni. Kita̱kitamattaistohkoohpoaawa. 19Aipstsi̱ksisisamosi omi̱i̱ksi ka̱taʼyaomaiʼtakiiksi mata̱piiksi nita̱kitsawattsinookiaawa. Kiisto̱aawa kita̱kattsistaiʼnookihpoaawa. Kii niisto̱wa nita̱ksaakiipaitapiiyi, ki a̱nnihkayi kita̱kohtoohkattanipaitapiihpoaawa, kiisto̱aawa. 20Anniihka aaʼnistsi̱i̱si kita̱kitotsistapiʼtsiihpoaawa niisto̱wa nomohpipa̱i̱tapiiʼssi ni̱nna, ki komohpipa̱i̱tapiiʼsoaayi niisto̱wa, ki niisto̱wa nomohpipa̱i̱tapiiʼssi kiisto̱aawa.
21Oma̱a maʼtsi̱ma nitoka̱kihtsimaanistsi, ki niita̱i̱ʼtsimaistsi, ki a̱nnahkaoʼka nita̱komimmokahka. Ki oma̱a nita̱komimmoka, ota̱kitakomimmoka ni̱nni, ki niisto̱wa nita̱kakomimmawa. Nitakitaistama̱atsoohsatawa.”
22O̱ki. Oma̱a ma̱ttanistawa Judas, ma̱tamiwa Judas Iscariot, matto̱o̱hkiitssimma, itani̱stsiiwa Jesusi, “O̱ki nitsi̱naaimi, tsia̱a a̱kanistaʼpi. Tsska̱a Kita̱kohtsawaistamaatsoohsatawa ka̱taʼyaomaiʼtakiiksi mata̱piiksi ki̱i̱wa kita̱kaistama̱atsoohsakkihpinnaani niisto̱nnaan?” 23Jesus itani̱i̱wa, “O̱ki, kana̱i̱tapiiwa nita̱komimmokiksi, a̱kanistaiʼtsimiawa nita̱a̱niihpistsi. Ota̱kitakomimmokoaawa ni̱nni. Ni̱nna ki nisto̱wa nita̱kitoʼtoohpinnaan omi̱i̱ksi. Nita̱kitaisksohpokaʼpaissiimannaaniaawa. 24O̱ki, ki oma̱a nika̱taaʼkomimmoka osto̱yi ma̱takanistaiʼtsima nita̱a̱niihpistsi. Ki a̱nnohka kito̱o̱htookihpoaawaistsi kita̱a̱nistohpoaawaistsi, nima̱tawattanistoohpiaawa; nito̱ʼtsskookahka, ni̱nnahka otsi̱ʼpoahsinaistsi.
25O̱ki. A̱nnohka kitsi̱tohpokaʼpaissiimohsoayi kitsi̱tanistohpoaawa a̱a̱mostska. 26Ki oma̱ahka kita̱ka̱i̱sspommokoaawahka oma̱a̱hka natowo̱ttakahka, kita̱kssksinima̱atsookoaawa kana̱ʼpaisistsi. Kita̱ksspommookoaawa ka̱a̱hksskssksinissoaayi kana̱ʼpaisistsi kita̱a̱nistohpoaawaistsi. Oma̱a Natowo̱ttaka, a̱nniskaoʼkinai ota̱koʼtsskoai ni̱nna. Niisto̱yi a̱kohtoʼtsskoyiiwayi.
27O̱ki. A̱nnohka kita̱yaaksskitohpoaawa. Kita̱kohpsskitohpoaawa iʼta̱a̱mipaitapiʼssini. Ma̱tanistapiiwaatsi manistsi̱ʼtaamistotootsiiyihpiaawa ka̱taʼyaomaiʼtakiiksi mata̱piiksi. Noohki̱i̱tsiwa amo̱o ko̱mohpsskitohpoaawayihka iʼta̱a̱mipaitapiʼssini. Ki a̱nnihkayii ko̱mohtanistohpoaawa, pini̱kihki̱niʼtakika. Piniko̱ʼpoka.
28Kito̱o̱htookihpoaawa kita̱a̱nistohsoaayi nita̱ksistapoohsi, ki ta̱kitamattsskitoʼtoo kiisto̱aawa. O̱ki, ikkama̱komimmokiinoainiki, kita̱kitohtsiksimatsiʼtakihpoaawa nita̱ksskitapoohsi ni̱nna. Takaa osto̱yi ito̱ʼtsitssksspssiwa niisto̱i. 29O̱ki a̱nnohka kitsi̱tsaomaanistaohkoyiʼpoaawayi kitsi̱tsi̱kayissohtsiʼpoatohpoaawa, ki a̱nnimayii aaʼnisti̱i̱si kita̱kohtsitoʼtomaiʼtakihpoaawa. 30Ki kita̱i̱tama̱aksiksistssitsipssatohpoaawa. Ta̱i̱tamaakoʼta̱akka oma̱a istsi̱nawa anno̱o ksa̱a̱hkommi, oma̱a Maka̱ʼpatoʼsiwa. Ki nima̱takohkottanistaʼpayistoto̱o̱kaatsi. 31Ki a̱nnohka, ta̱kaistamaatsaawa o̱tapiʼssini nita̱komimmahsi ni̱nni; nanista̱niiyihpi ni̱nni, a̱nniai nita̱kanisttsi. Oki̱h. A̱a̱hkonomatapaaoʼpa.”
Trenutno izabrano:
John 14: BLA1979
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Translated by Wycliffe Bible Translators. Published by the Canadian Bible Society 1979.
