Luke 21

Di aafrin weh wan wido gi

(Mark 12.41-44)

1Jesus luk op ahn si di rich pipl dem deh put dehn gif iina di aafrin baks dah di Templ. 2Den ihn nuotis seh wan puor uman, weh dah wehn wido, kom ahn drap iin two likl chienj mony —weh wehn haaly wot notn ataal. 3Jesus seh, “Ah deh tel unu di chruut: dis puor uman, weh no gat non hozban, put muo iina di aafrin baks an aala dem. 4Yo si, aala dem gi outa weh dehn no niid, bot dis uman gi aal weh ihn wehn gat fi liv aafa.”

Di trobl weh deh kom

(Matthew 24.1-14; Mark 13.1-13)

5Lietaraan, wen som a Jesus disaipl wende taak bout di Templ, how ih wehn prity op wid aal dehn prity uova big brik,#21.5 Nuotis seh: Di brik iina demde diez wehn uova big ahn prity; dehn wehn kot outa di hil ahn ker dah di plies fi mek di big hous dem. ahn bout di gif dem weh di pipl dem wehn bring fi gi God, Jesus seh, 6“Unu si aal demya tingz weh unu deh luk pan? Wel, di taim gwain kom wen nat iivn wan brik gwain lef pan tapa wan anada, weh dehn no gwain chruo dong.”

7Den dehn aks im, “Tiicha, dah wen dat gwain hapm, ahn wish sain wi gwain si fos so wi kyan nuo seh aal dis gwain suun staat?”

8Ahn Jesus seh, “Unu wach out ahn no mek nonbady fuul unu op; bikaaz plenty pipl gwain kom deh yuuz mai niem deh seh, ‘Ai dah di Mesaya!’ ahn ‘Di taim deh nier!’ Unu no fi fala dem. 9Ahn wen unu hier dehn taak bout plenty waar ahn rayat, no get uova fraitn, bikaaz aal demya tingz gwain hafy hapm fos, bot dat no miin seh dat dah di en yet.”

10Den Jesus gaan an ahn seh, “Di kontry dem gwain fait gens wan anada, ahn di kingdom dem gwain fait gens wan anada tu. 11Iina plenty difrent plies di ort gwain shiek op plenty, ahn di pipl dem gwain paas hongry, ahn dehn gwain gat wan paila uova bad siknis tu. Aal kain a fony tingz gwain hapm iina di skai weh gwain fraitn evrybady. 12Bot bifuor aal dis hapm, dehn gwain grab unu ahn haraas unu; dehn gwain han unu uova tu di sinigag liida dem fi mek dem joj unu ahn jiel unu. Den dehn gwain bring unu fronta di king ahn govana dem sieka weh unu chros ahn fala mi. 13Dat gwain gi unu wan chaans fi tel evrybady bout mii. 14So mek'op unu main fi no wory ataal hed a di taim weh unu gwain seh fi difen unuself, 15bikaaz Ai gwain gi unu di wod dem fi seh, ahn Ah gwain mek unu so waiz seh non a dem weh kom gens unu kyaahn rizis nar aagyo wid unu. 16Iivn som a unu muma ahn pupa ahn breda ahn kozn ahn fren dem gwain sel unu out; ahn dehn gwain kil som a unu tu. 17Evrybady gwain hiet unu sieka unu chros ahn fala mii. 18Bot unu no gwain luuz nat iivn wan hier straan. 19So no gi'op ahn unu suol gwain siev!

Jerusalem gwain get distrai

(Matthew 24.15-21; Mark 13.14-19)

20“Wen unu si wan paila suoldya deh kyamp-out roun ahn roun Jerusalem, den unu gwain nuo seh, dah taim fi ih get distrai. 21Den aala dem weh liv dah Judea lan fi hory, go'op pan di mountin dem, ahn dem weh deh iina di sity fi kom out ahn lef ih, ahn dem weh wende dah di kontry no fi go dah di sity; 22bikaaz demde gwain bii di die dem wen God gwain tek rivench jos laik how ih wehn rait dong iina di Skriptyo. 23How haad ih gwain bii iina demde diez fi di uman dem weh deh briid, ahn demde weh gat dehn likl bieby iina han, sieka wan paila sofarin weh gwain deh aal uova di lan. God gwain shuo how beks ihn deh wid disya pipl! 24Ahn di pipl dem fahn ada nieshan gwain kil som a unu wid suod, ahn grab di res ahn ker unu weh laik sliev; ahn den di farin pipl dem gwain ruul Jerusalem til wen di taim kom fi mek dem stap.#21.24 Or di vors kuda seh: “Dehn gwain faal dong bai di edj a di suod, ahn get ker weh laik sliev mongs aala di nieshan dem, ahn di Gentile dem gwain waak uova Jerusalem, til wen di Gentile taim kompliit.”

Wat gwain hapm wen Jesus, di Son a Man, kom bak pan ort

(Matthew 24.29-31; Mark 13.24-27)

25“Som fony tingz gwain hapm tu di son, di muun, ahn di staar dem. Pan ort di pipl dem fahn di ada nieshan dem gwain wory plenty, ahn iivn di big naiz weh di sii ahn di wiev dem mek, gwain kanfyuuz dem. 26Pipl gwain fraitn ahn fient-weh, sieka aal weh deh hapm pan ort, bikaaz aal di powa dem fahn iina hevn gwain get shiek op. 27Den, dehn gwain si di Son a Man deh kom bak iina wan kloud wid plenty powa ahn gluory. 28Now wen demya tingz staat hapm, unu stan op, lif op unu hed, bikaaz di taim deh nier fi God siev unu.”

Dis dah how wi gwain nuo seh di taim deh nier

(Matthew 24.32-35; Mark 13.28-31)

29Den Jesus tel dem dis parabl: “Luk pan di fig trii ahn aal di ada trii dem. 30Az suun az di liif staat sprout, unu kyan si fi unuself ahn nuo seh drai weda deh nier aredy. 31Rait so, wen unu si aal demya tingz weh Ah deh tel unu bout staat hapm, unu wi nuo seh God Kingdom deh nier.

32“Hier dis chruut weh Ah deh tel unu: Aal demya tingz gwain hapm bifuor di pipl weh deh liv iina daty taim ded. 33Disya hevn ahn ort gwain don weh wid, bot aal weh Ai deh tel unu gwain kantinyo fareva.

Get redy fi miit Jesus wen ihn kom bak

34“Unu main, unu no mek unu haat get hevy wid sin, laik di man weh wies ihn laif wid jronkinis, ahn di woriz a dis laif; ahn den, wen unu fain out, Dah Die kech unu aafa gyaad. Ih gwain kom aalava sodn laik wan trap; 35bikaaz dis die gwain kom, ahn evrybady pan dis ort gwain ekspiriens ih. 36So unu fi gat op unu gyaad aal di taim, ahn prie seh unu gat di strent fi get-weh fahn aal dem tingz weh gwain hapm, ahn di strent fi stan op fronta di Son a Man bitout fried nar shiem.”

37Evry die Jesus yuuztu tiich iina di Templ, ahn evry iivnin bifuor di son go dong ihn wuda go ahn spen di nait op dah di hil weh dehn kaal Alivz Mountin. 38Ahn aal di pipl dem fram roun dehso wuda get'op suun dah maanin fi go hier im dah di Templ.

Trenutno izabrano:

Luke 21: NTIC

Istaknuto

Podijeli

Kopiraj