Vakatekivu 9
9
Na Veiyalayalati ni Kalou kei Noa
1A sa vakalougatataki Noa kei iratou na luvena tagane na Kalou ka kaya, “Dou vakaluveni ka tubu me lewe vuqa mai, ka vakatawai vuravura.#Vteki 1.28 2Era na rerevaki kemudou na veimataqali manumanu kecega ena dela i vuravura, na manumanu vuka, na manumanu era dau qasi kei na ika kecega ni wasawasa. Era sa soli talega ki na ligamudou mo dou lewai ira. 3Na manumanu kecega kei na kau drokadroka kecega ena rawa mo dou kania, au sa solia vei kemudou me kemudou kakana. 4E dua wale ga na ka mo dou kakua sara ni kania, sai koya na lewe ni manumanu e tu kina na bula, o ya na kena dra.#Vsoro 7.26-27; 17.10-14; Vsoro 19.26; Vrua 12.16,23; 15.23 5Kevaka e dua e kauta tani na bula ni dua tale na tamata, ena totogitaki o koya. Au na solia na i totogi mate vua na manumanu sa vakamatea e dua na tamata. 6O koya yadua sa vakamatea e dua na tamata, ena vakamatei o koya mai vua e dua tale, ka ni a buli na tamata me vaka na Kalou.#Vteki 1.26; Lako 20.13
7“Mo dou vakaluveni ka tubu me lewe vuqa, ka me ra lewe levu na nomudou kawa ka vakatawana na veiyasa i vuravura.”#Vteki 1.28
8A sa kaya na Kalou vei Noa kei iratou na luvena tagane. 9“Au sa cakava oqo e dua na noqu veiyalayalati vata kei iko kei ira na nomu kawa, 10kei ira talega na veika bula kecega era tiko kei iko, na manumanu vuka, na manumanu manoa, kei na manumanu kila, na ka kecega a sobu mai ena waqa. 11Oqo na veika au na vakayacora ena noqu veiyalayalati kei iko: Au sa yalataka ni na sega tale ni vakarusai na veika bula kecega ena dua tale na waluvu; ena sega tale vakadua ni dua na waluvu me na vakarusa na vuravura.”
12A sa kaya tale na Kalou, “Sai koya oqo na i vakatakilakila ni veiyalayalati au sa cakava kei kemudou kei ira talega na manumanu kecega, 13au na biuta na noqu drodrolagi ena o. Oqo na i vakatakilakila ni noqu veiyalayalati kei vuravura. 14Ena gauna au na ubia kina na lomalagi ena o ni uca ka rairai mai na drodrolagi ena o, 15au na qai nanuma na ka au a yalataka vei kemudou kei ira kecega na manumanu. 16Ena gauna ena rairai kina na drodrolagi ena o, au na qai raica na noqu veiyalayalati tawa mudu vata kei ira na veika bula kecega ena dela i vuravura.” 17A sa kaya na Kalou vei Noa. “Sai koya oqo na i vakatakilakila ni veiyalayalati au sa cakava oqo kei ira na veika bula kecega ena dela i vuravura.”
O Noa kei Iratou na Luvena Tagane
18Sai iratou oqo na luve i Noa tagane e ratou a sobu mai ena waqa: o Semi, kei Ame, vata kei Jefeca. (O Ame na tamadra na kai Kenani.) 19O iratou na luve i Noa oqo e ratou sa tamadra na tamata kecega ena dela i vuravura.
20A sa yaco me dauteitei o Noa, o koya na i matai ni tamata me tea e dua na veivaini. 21A sa qai gunuva eso na waini, ka mani mateni kina. A sa luvata na nona i sulu, ka qai davo luvawale tu ena loma ni nona valelaca. 22Ni sa raica na luvawale i tamana o Ame na tama i Kenani, a mani lako yani ka tukuna vei rau na tuakana. 23E rau a qai kauta e dua na i tutuvi o Semi kei Jefeca ka taura e dakudrau me sivia na tabadrau ka lako vakanadaku yani ki loma ni valelaca me rau ubia na tamadrau; erau a vagolea tani na matadrau me rau kakua ni raica na nona luvawale. 24Ia ni sa yadra cake o Noa mai na nona moce ni mateni, a qai kila na ka sa cakava vua o koya na luvena tagane ka gone duadua, 25a sa kaya,
“Me tau na cudru vei Kenani!
Ena yaco me bobula vei ira na tuakana.”
26A sa kaya talega,
“Me vakacaucautaki o Jiova na Kalou i Semi!
O Kenani ena yaco me bobula i Semi.
27Me ia na Kalou na vakalevutaki i Jefeca!#9.27 Jefeca: Na yaca oqo e balebale vaka na “vakalevutaki” ena vosa vakaiperiu.
Me ra tiko ena vale i Semi na nona kawa!
O Kenani ena yaco me bobula i Jefeca.”
28Ni oti na waluvu, a qai bula voli o Noa me 350 tale na yabaki 29ka sa qai mate ni sa yacova na yabaki 950.
Aktualisht i përzgjedhur:
Vakatekivu 9: FNVDC12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Fijian New Version including Deuterocanonical Books © Bible Society of the South Pacific, 2012.