Vakatekivu 8
8
Oti na Waluvu
1A nanumi Noa na Kalou, kei na manumanu kila kecega, kei na manumanu manoa kecega era tiko kaya e waqa. A qai vakaliwava na Kalou e dua na cagi me liwava na dela i vuravura, a sa tekivu sara me lutu sobu na wai. 2Era a tasogo na i vurevure ni wai e vuravura ka vaka talega kina na veikatuba ni lomalagi; a siga talega na uca. 3Ni oti e 150 na siga, a sa qai tekivu me lutu sobu na wai. 4Ena i katinikavitu ni siga, ena i kavitu ni vula, a qai kasa na waqa ena ulunivanua mai Ararata. 5A sa lutu sobu tikoga na wai, me yacova na i katini ni vula ena i matai ni siga a qai rairai mai na dela ni veiulunivanua.
6Ni oti e 40 na siga, sa qai dolava o Noa na katubaleka ni waqa, 7a vakatala yani e dua na reveni. A sega ni lesu tale mai, ia sa veivukayaki voli ga me yacova ni sa mamaca na dela i vuravura. 8A qai tala yani na ruve o Noa me la'ki raica se sa lutu sobu na wai, se sega; 9ia me vaka ni se ubia tu ga na dela i vuravura taucoko na wai, a mani sega ni raica rawa na ruve e dua na vanua me ro kina. Ia ni sa lesu mai, a sa dodoka yani ki tuba o Noa na ligana, a sa taura na ruve ka biuta tale ki na loma ni waqa. 10A sa wawa me vitu tale na siga, a qai vakatala tale yani na ruve mai waqa. 11Ia ni sa lesu mai na ruve ena yakavi siga, a sa raica o Noa ni sa tokia tiko mai e dua na draunikau e gusuna. A sa kila kina o Noa ni sa lutu sobu na wai ena dela i vuravura. 12E a wawa tale o Noa me vitu tale na siga, a sa qai tala tale yani na ruve; ia sa mani sega ni lesu tale mai vua.
13Ni sa yabaki 601 o Noa, ena i tekitekivu ni siga ni matai ni vula, a sa yali na wai. A sa luvata tani o Noa na i ubi ni waqa ka vakararai, ka raica ni sa mamaca sara mai na dela ni qele. 14Ena i ka 27 ni siga ni karua ni vula, a sa mamaca sara kina vakadua na dela i vuravura.
15A sa qai kaya vei Noa na Kalou, 16“Sobu mai vata kei na watimu, o iratou na luvemu tagane, kei na dui watidratou. 17Kauti ira talega mai na veika bula kecega era tiko kei iko, na manumanu vuka, na manumanu yava i va, kei na manumanu era qasi, me ra mai vakawa ka tubu me lewe vuqa ena dela i vuravura.” 18A sa sobu mai na waqa o Noa vata kei na watina, kei iratou na luvena tagane, kei iratou na dui watidratou. 19Era a sobu talega mai ka lako mai vakamataqali vata na manumanu vuka kei na veika bula kecega.
Sa Vakacabo i Soro o Noa
20A sa tara o Noa e dua na i cabocabonisoro vei Jiova ka qai kauta mai e yadua na manumanu mai na veimataqali manumanu savasava, ka yadua mai na veimataqali manumanu vuka, ka vakacabori ira ena i cabocabonisoro me ra i soro kama. 21A sa boica na i soro ni veivinakati o Jiova ka sa kaya e lomana, “Au na sega tale ni cudruva na vuravura ena vuku ni ka ena cakava na tamata. Ni'u kila ni sa tekivu ca na vakanananu ni tamata mai na gauna e a gone kina. Au na sega tale ni vakarusa na veika bula kecega me vaka na ka au sa vakayacora oqo. 22Ia, me vaka na kena dede na vuravura, Ena sega sara ni mudu rawa kina na gauna ni kakaburaki kei na gauna ni tatamusuki. Na gauna mamaca kei na gauna suasua. Na vula i katakata kei na vula i batabata ka na vaka talega kina na siga kei na bogi.”
Aktualisht i përzgjedhur:
Vakatekivu 8: FNVDC12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Fijian New Version including Deuterocanonical Books © Bible Society of the South Pacific, 2012.