लुका 23
23
पिलातसकर अगाडि येसु
(मति २७:१-२,११-१४; मर्कुस १५:१-५; युहन्ना १८:२८-३८)
1महासभाकराइ सेब्बाइ सदस्यलत उठ्ला र येसुलाइ पिलातस हक्लनाइ लाकाइला। 2होल्किन येसुलाइ दोस लाइतिन बाज्ला, “हेइनिन आफिलाइ ‘मुइ मुक्ति दिनार राजा खिरिस्ट हो बाज्ल र कइसरलाइ कर तिरइ बइपर’ बाजिके हाम्रो देसकराइ मान्छेल्काइ भड्काइ धर्ल हाइनिन भेट्टाइले।”
3ह्य सुनिके पिलातसिन येसुलाइ सोदल्ते, “केति तुइ यहुदिल्को राजा हो?”
येसुन बाज्ले, “तुइ ने उन्खा बाज्छस।”
4पिलातसिन मुख्य पुजारिल्काइ र उछि जम्मा हक्लाइ भिडकाइ बल्-ल्याक, “मुइ ह्य मानुसकर केइ दोस बइभेट्टाइनाइ।”
5तर होल्किन बड्खो सोरिन साराइतिन बाज्ला, “हेइनिन गालिल छेत्रबान सुरु गरिके सेब्बे यहुदिया छेत्र र इछि पुनि आफ्ने सिछ्या दितिन मान्छेल्काइ भट्काइतिन आछ।”
हेरोद राजाकर अगाडि येसु
6ह्य सुनिके पिलातसिन सोद्ले, “ह्य मानुस गालिल छेत्रकर हो?” 7येसु हेरोद राजाकर छेत्रकर रइलसइ बाजिके था पाइके पिलातसिन येसुलाइ हेरोद हक्लनाइ पाठाइदिल्ते। ह्व बेला हेरोद यरुसलेमनाइ रइल। 8येसुलाइ देखिके हेरोद एकदम खुसि हक्ले किनारइभने होइनिन येसुकर बारेनाइ सुन्ल रइल र धेरइ दिनदेखि ने येसुलाइ हेर्नार मन गर्ल रइल। होइनिन येसुन गर्ल केइ अचम्मकर काम पुनि हेर्नार आस गर्ल रइल। 9हेरोदिन येसुलाइ धेरइ कुरो सोदल्ते, तर येसुन केइ पुनि जबाफ बइदिल्ते। 10मुख्य पुजारिल्किन र धर्म-गुरुल्किन येसुलाइ हक्ल नहक्ल दोस लाइला। 11ह्व पछि हेरोद र होक्र सिपाइलत मिलिके येसुलाइ गिल्ला गर्तिन बइमजार बेबहार गर्ला। अनि येसुलाइ राजान लाइनार लुगा लाइदिके पिलातस हक्लनाइ ने फर्काइदिल्ते। 12होइ दिन देखि राजा हेरोद र पिलातस मिल्ला किनारइभने पइला हेरोद र पिलातस दुस्मन रइला।
येसुलाइ मिर्त्यु दन्ड दिल
(मति २७:१५-२६; मर्कुस १५:६-१५; युहन्ना १८:३९—१९:१६)
13ह्व पछि पिलातसिन मुख्य पुजारिल्काइ, यहुदि अगुवाल्काइ र जनताल्काइ बालाइके बल्-ल्याक, 14“तोराल्किन मान्छेल्काइ भड्काइले बाजिके ह्यलाइ मुइ हक्लनाइ आन्लो। तोराल्के अगाडि केरकार गर्तिन तोराल्किन लाइल दोस मुइनिन हेइनाइ बइभेट्टाइनाइ। 15हेरोदिन पुनि केइ दोस नभेट्टाइकइ होलाइ हाइ हक्लनाइ ने फर्काइदिलाछ। हेरो, हेइनिन मिर्त्यु दन्ड पाइनार केइ अपराध गर्ल बइने। 16होइ हुदान मुइ ह्यलाइ कोर्रा लाइके छाड्दिछिन।” 17[उछिकर चलन अन्सार निस्तार चाडकर उपलछ्यनाइ पिलातसिन एउटो कइदिलाइ छाड्दइ पर्तेल्ति।]#२३:१७ धेरइजसो सोरोतनाइ ह्य पद लेख्ल बइपाय
18तर सेब्बाइ मान्छेल्किन साराइतिन बाज्ला, “ह्यलाइ मिर्त्यु दन्ड दिके हाम्रो लागि बारब्बालाइ छाड्देउ।” 19बारब्बा चाइ सहरनाइ बिद्रोह गरिके र मान्छे मार्ल हुदान झ्यालखन्डनाइ पर्ल रइल।
20येसुलाइ छाड्दिनार मन गरिके पिलातसिन मान्छेल्काइ फेरि सम्जाइल्याक। 21तर होल्किन झन बड्खो सोरिन साराइतिन बाज्ला, “होलाइ कुरुस#२३:२१ कुरुस अपराधिल्काइ हात र गोडनाइ खिल ठोकिके कुरुसनाइ मार्तेला। ह्य एउटो ठाडो काठनाइ अर्को तेस्रो काठ ठोकिके बानाइल हक्सि।नाइ झुन्डाइ पर्छइ, कुरुसनाइ झुन्डाइ पर्छइ।”
22फेरि पिलातसिन तेस्रो चोटि होल्काइ बल्-ल्याक, “किनारइ? ह्य मानुसिन केति बइमजार काम गर्लाछ? मुइनिन ता ह्यलाइ मिर्त्यु दन्ड देइ पर्नार केइ दोस बइभेट्टाइनाइ। होइ हुदान मुइ ह्यलाइ कोर्रा लाइके छाड्दिछिन।”
23तर होल्किन झन बड्खो सोरिन एकजुट हकिके साराइतिन बाज्ला, “ह्यलाइ कुरुसनाइ झुन्डाइ ने पर्छइ।” होल्किन साराइकइ ने जित्ला। 24अनि पिलातसिन येसुलाइ होल्किन बल्लठि गर्नार फइसला सुनाइल्याक। 25पिलातसिन बिद्रोह गरिके र मान्छे मारिकइ झ्यालखन्डनाइ पर्ल बारब्बालाइ चाइ छाड्दिल्ते तर येसुलाइ चाइ होल्को इछ्यानाइ छाड्दिल्याक।
येसुलाइ कुरुसनाइ झुन्डाइल
(मति २७:३२-४४; मर्कुस १५:२१-३२; युहन्ना १९:१७-२७)
26येसुलाइ उछ्यान लिके जाइधर्तिन सिपाइकिन कुरेनि सहरकर सिमोनलाइ गाउँबान आइधर्ल भेट्टाइला। सिपाइकिन होलाइ आठाइके येसुकर कुरुस बोकाइकइ येसुकर पछि-पछि हिनइ लाइला।
27मान्छेल्को बड्खो भिड येसुकर पछि लाग्ला। उछि बिलाप गर्तिन कान्नाराइ बेटिलत पुनि रइला। 28येसुन होलतदिसउँने फर्किके बाज्ले, “ए यरुसलेमकराइ बेटेकलत, मोर लागि जुनकाँदो, तर तोरा आफ्ने लागि र आफ्ने बेटार-बेटेरको लागि काँदो। 29किनारइभने इन्खा दिन आइनारआछि, जब मान्छेल्किन बाज्नारआछत, ‘बाँझि बेटिलत, नानि बइपाइलाइ बेटिलत र दुत बइख्वाइनाराइ बेटिलत धन्यकराइ हो।’ 30ह्व बेला मान्छेल्किन पाहाडलाइ ‘हाइउप्रान झर’ र डाँरालाइ ‘हाइलाइ छोप’ बाज्नारआछत।#हो १०:८; पर ६:१६ 31किनारइभने हेल्किन गाछ हरियो हक्तिन ता डढेलो लाइछत भने, झन सुक्खा हक्तिन केति गर्छत?”
32होल्किन दुइटाइ अपराधिल्काइ पुनि येसुसिन मिर्त्यु दन्ड देइ लाकाइल्याक। 33जब होलत खप्परे बल्ल ठउँनाइ आइपुग्ला, उछि होल्किन येसुलाइ कुरुसनाइ झुन्डाइला र ह्व दुइटाइ अपराधिल्काइ पुनि एउटोलाइ येसुकर दाइने पटि र अर्कोलाइ देब्रे पटिकर कुरुसनाइ झुन्डाइल्याक। 34अनि येसुन बाज्ले, “हे ब्वा, हेल्काइ माफ गर्खन किनारइभने हेल्किन केति गर्तिन आछत हेल्काइ था बइने।” अनि सिपाइकिन चिठ्ठा हालिके येसुकर लुगा आफि-आफिनाइ बाड्ला।#भजन २२:१८
35मान्छेल्किन ठडाइके हेरिधर्लाइ रइला। यहुदि अगुवाल्किन येसुलाइ खिसि गर्तिन बाज्ला, “हेरो, हेइनिन आनेल्काइ ता बाचाइल्याक। यदि ह्य परमेसोरिन छान्ल मुक्ति दिनार राजा खिरिस्ट हो भने आफिलाइ पुनि बाचाइदिक।”#भजन २२:७
36सिपाइकिन पुनि आइके येसुलाइ अङ्गुरकर आम्तो मद्य ख्वाइकइ गिल्ला गर्तिन बाज्ला,#भजन ६९:२१ 37“यदि तुइ यहुदिल्को राजा हो भने आफिलाइ बाचाउ।”
38येसुकर कापाल उप्रान “ह्य यहुदिल्को राजा हो” बाजिके लेख्ल दोस-पत्र धर्ल रल्ति।
39कुरुसनाइ झुन्डाइल एउटो अपराधिन गिल्ला गर्तिन बाज्ले, “केति तुइ ने परमेसोरिन पाठाइल खिरिस्ट बया? तुइ आफिलाइ र हाइलाइ पुनि बाचाउ।”
40तर अर्को अपराधिन होलाइ हाकार्तिन इत्तिके बलल्ते, “तुइलाइ परमेसोरकर डर बइलाग्यास? ह्व पुनि हाइ जिन्खाए दन्ड भोगिधर्लाछ। 41हाइनिन ता आफिन गर्ल कामकर दन्ड पाइधर्लाछे, तर हेइनिन ता उन्खा बइमजार काम गर्ल बइने।” 42ह्व पछि होइनिन येसुलाइ बलल्ते, “हे येसु, तुइ आफ्ने राज्यनाइ आइतिन मुइलाइ पुनि सम्जि।”
43येसुन होलाइ बलल्ते, “साँच्चि मुइ तुइलाइ बल्छु, आज ने तुइ मुइसिन स्वर्गनाइ हक्नार आछस।”
येसुकर मिर्त्यु
(मति २७:४५-५६; मर्कुस १५:३३-४१; युहन्ना १९:२८-३०)
44लगभग दिउँसो बार बजेसिन तिन बजे सम्म सारा देसनाइ आँधारिन छोपल्ते। 45घामिन पुनि उज्यालो बइदिल्ते र मन्दिरनाइ टाङ्ल पर्दा उप्रसिन हेठ्ठसम्म दुइ भाग हकिके च्यात्तिल्ते।#पर २६:३१-३३ 46अनि बड्खो सोरिन साराइतिन येसुन बाज्ले, “हे ब्वा, मुइ मोर आत्मा तोर हातनाइ दिछु।” ह्य बाजिके येसुन परान त्याग्ले।#भजन ३१:५
47इन्खा हक्ल देखिके कप्तानिन परमेसोरकर पर्सन्सा गर्तिन बाज्ले, “साँच्चि ने ह्य मानुस धर्माति रइलसइ।”
48अनि ह्य सेब्बे घटना हेरइ जम्मा हक्लाइ मान्छेल्को भिडकिन ह्य देखिके कान्तिन बिलाप गर्तिन घर फर्किला। 49येसुकराइ चिनाजानिलत र गालिल छेत्रबान आइलाइ बेटिलत बद्दुरेबान ठडाइके ह्य घटना हेरिधर्लाइ रइला।#लुक ८:२-३
येसुकर लास चिहाननाइ
(मति २७:५७-६१; मर्कुस १५:४२-४७; युहन्ना १९:३८-४२)
50महासभाकर सदस्यलत मद्दे यहुदिया छेत्रकर अरिमाथिया सहरबान आइल एउटो योसेफ नाउँ गर्ल मानुस रइल। ह्व मजार र इमान्दार मानुस रइल। 51होइनिन परमेसोरकर राज्यलाइ अस्याइधर्ल रइल। महासभाकराइ मान्छेल्किन येसुलाइ मार्नार कुरो गर्तिन ह्व सहमत बइरइल। 52ह्व पिलातसकर उछि जाइके येसुकर लास लाकाइ पाउ बाजिके माङ्ले। 53अनुमति पाइल पछि लासलाइ कुरुसबान झारिकइ मलमलकर लुगान बेरिकइ चट्टाननाइ खोपिकइ बानाइल चिहाननाइ धर्ला। ह्व चिहाननाइ पइला कुनुल्को लास धर्ल बइरल्ति। 54ह्व दिन चाइ बिस्राम-दिनकर लागि तयार गर्नार दिन रल्ति, अनि बिस्राम-दिन सुरु हकइ आँट्ल रल्ति।
55गालिल छेत्रबान येसुलाइ पछ्याइतिन आइलाइ बेटिलत पुनि योसेफसिन जाइला र चिहाननाइ येसुकर लास धर्ल हेर्ला। 56ह्व पछि होलत घर फर्किके लासनाइ लाइनार बास्नादार तेल र अत्तर ठिक पार्ला।
अनि परमेसोरकर नियम अन्सार बिस्राम-दिननाइ होल्किन बिस्राम गर्ला।#पर २०:१०; बेब ५:१४
Aktualisht i përzgjedhur:
लुका 23: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.