लुका 22
22
येसुलाइ मार्नार दाउ
(मति २६:१-५; मर्कुस १४:१-२; युहन्ना ११:४५-५३)
1अखमिरि#२२:१ अखमिरि पिठो फुलाइकर लागि सोडा, काउलो र मइदा केइ पुनि बइहाल्ल चामलकर मात्र पिठो। जिन्खाए भोल्टा, बाब्रो, मटेङ्ग्रा। पिठो खाइनार चाड नजिक आइल रल्ति। ह्यलाइ निस्तार चाड बाज्छे।#पर १२:१-२७ 2मुख्य पुजारिल्किन र धर्म-गुरुल्किन येसुलाइ किनिखे मार्नार बाजिके दाउ हेर्तेला, तर मान्छेल्कोसिन होलत डाराइतेला।
यहुदा इस्करियोतकर बिस्वासघात
(मति २६:१४-१६; मर्कुस १४:१०-११)
3होइ बेला बारुटाइ चेलालत मद्दे एउटो यहुदा इस्करियोतकर मन भित्र दियाबलस पस्ले। 4होइनिन मुख्य पुजारिलत र मन्दिर रुङ्नाल्को कप्तानलत हक्लनाइ जाइके “येसुलाइ किनिखे पक्राइदेइ सक्छु” बाजिके सल्ला गर्ले। 5होलत खुसि हक्ला र होलाइ पइसा दिनार कबुल गर्ला। 6यहुदा सहमत हक्ले र मान्छेल्को भिड बइहक्ल बेलानाइ सुटुक्क येसुलाइ पक्राइदिनार मउका हेरइ लाग्ले।
निस्तार चाडकर लागि भोज तयार
(मति २६:१७-२५; मर्कुस १४:१२-२१; युहन्ना १३:२१-३०)
7अखमिरि पिठो खाइनार चाडकर दिन आल्ते, पइलो दिन निस्तार चाडकर थुमा बलि गरइ पर्तेल्याक। 8येसुन पत्रुस र युहन्नालाइ इन्खा बाजिके पाठाइल्याक, “जाइके हाम्रो लागि निस्तार चाडकर भोज ठिक पारो।”
9होल्किन येसुलाइ सोद्ला, “हाइ ह्य भोज कछि जाइके ठिक पारु?”
10येसुन होल्काइ बल्-ल्याक, “तोरा सहरनाइ पस्ल पछि गाग्रिनाइ पानि बोकिके जाइधर्ल एउटो मानुसलाइ भेट्टाइनारआछो र होक्र पछि-पछि लागो। 11अनि ह्व जुन्टो घरनाइ पस्छइ ह्व घरकर मालिकलाइ बलो, ‘गुरुन तुइलाइ सोद्लाछ, मुइ आफ्ने चेलाल्कोसिन बसिके निस्तार चाडकर भोज खाइनार पाउना कोठा कछि आछि?’ 12होइनिन तोराल्काइ उपल्चो तालानाइ सजाइल बड्खो कोठा देखाइनारआछ, र उछि ने भोज ठिक पारो।”
13होलत जाइला र येसुन बल्ल जिन्खाए भेट्टाइला अनि होल्किन निस्तार चाडकर भोज ठिक पार्ला।
अन्तिम भोज
(मति २६:२६-३०; मर्कुस १४:२२-२६; १ कोरिन्थि ११:२३-२५)
14खाइनार बेला हक्ल पछि येसु आफ्ने बारुटाइ पेरितकोसिन भोज खाइ बस्ले। 15येसुन होल्काइ बल्-ल्याक, “मुइ दुख भोगइ भन्दा अगि ह्य निस्तार चाडकर भोज तोराल्कोसिन बसिके खाइनार मन गर्ल रइनाइ। 16किनारइभने मुइ तोराल्काइ बल्छु, परमेसोरकर राज्यनाइ ह्य भोजकर अर्थ पुरा नहकुन्जेलसम्म मुइ ह्य भोज फेरि खाइनार बइने।”
17अनि येसुन कचउरा लिले र परमेसोरलाइ धन्नेबाद दिल पछि चेलाल्काइ बल्-ल्याक, “ह्य लिउबे र तोरा आफि-आफिनाइ बाँडिकइ खाओ। 18मुइ फेरि तोराल्काइ बल्छु, परमेसोरकर राज्य नआउन्जेलसम्म अब मुइ अङ्गुरकर रस पिनार बइने।”
19अनि येसुन पिठो लिले र परमेसोरलाइ धन्नेबाद दिल पछि ह्व पिठो भाच्ले र चेलाल्काइ दितिन बल्-ल्याक, “तोराल्को लागि दिल ह्य मोर सरिर हो। मोर सम्जनानाइ ह्य खाइनार गरो।” 20उन्खाए गरिके खाइसक्ल पछि येसुन कचउरा लिले र बाज्ले, “ह्य कचउरा मुइनिन तोराल्को लागि बगाइनार रकतबान बन्ल नयाँ करार हो।”#यर ३१:३१-३४
21“तर हेरो, मुइलाइ पक्राइनार मानुस पुनि मुइसिन ने टेबुलनाइ खाइ धर्लाछ।#भजन ४१:९ 22किनारइभने मानुसकर बेटाक ता परमेसोरिन इछ्या गर्ल अन्सार जाइ ने पर्छि, तर धिक्कार ह्व मानुसलाइ, जुनिन मानुसकर बेटाकलाइ धोका दिछि।”
23ह्य सुनिके चेलालत “हाइ मद्दे इन्खा काम गर्नार कुन हो?” बाजिके आफि-आफिनाइ सोदासोद गरइ लाग्ला।
सेब्बाइ भन्दा बड्खो कुन हो?
24ह्व पछि चेलालत “हाइ मद्दे कुन्टो चाइ सेब्बाइ भन्दा बड्खो हक्नार हो” बाजिके हानाथाप गरइ थाल्ला।#मति १८:१; मर्क ९:३४; लुक ९:४६ 25येसुन होल्काइ बल्-ल्याक, “सन्सारकराइ राजाल्किन चाइ आफ्ने जनताउप्रान मनपरि सासन गर्छत र सासन गर्नारकिन चाइ हाइ जनताल्को भलाइ गर्नाराइ हो बाज्छत।#मति २०:२५-२७;१०:४२ 26तर तोरा चाइ उन्खा जुनहको। तोरा मद्दे जुन सेब्बाइ भन्दा बड्खो आछ, ह्व सेब्बाइ भन्दा स्यान्खो बन्दिक, र अगुवा हक्नारिन चाइ सेवा गर्दिक।#मति २३:११; मर्क ९:३५ 27किनारइभने बड्खो कुन हो? भात खाइ बस्नार कि सेवा गर्नार? केति भात खाइ बस्नार बया र? तर मुइ तोराल्को माजनाइ सेवा गर्नार जिन्खाए आछु।#युह १३:१२-१५
28“तोरा चाइ मोर सेब्बे दुखनाइ मुइलाइ साथ दिनाराइ हो। 29जिनिखे मोर ब्वान मुइलाइ एउटो राज्य गर्नार अधिकार दिले, मुइ पुनि तोराल्काइ दिनारआछु। 30मोर राज्यनाइ तोरा मुइसिन टेबुलनाइ बसिके खाइनार र पिनारआछो अनि सिहासननाइ बसिके इज्राएलकराइ बारे कुल उप्रान न्याय गर्नारआछो।”#मति १९:२८
पत्रुसकर इन्कारबारे येसुकर भबिस्यबानि
(मति २६:३१-३५; मर्कुस १४:२७-३१; युहन्ना १३:३६-३८)
31“सिमोन, सिमोन, हेर, सइतानिन तोराल्काइ गहुँ निफन्लठि निफन्नार आग्या माङ्लाछ। 32तर मुइनिन तोर बिस्वास जुननाठ्दिक बाजिके पार्थना गर्दिलाछु, फेरि तुइ बिस्वासनाइ बल्-ल्यो हक्ल पछि तोर दाजेर-भाएरकाइ पुनि बिस्वासनाइ बल्-ल्यो बानाखन।”
33पत्रुसिन येसुलाइ बलल्ते, “पर्भु, मुइ तुइसिन झ्यालखन्ड जाइ र मरइ पर्तिन पुनि तयार आछु।”
34तर येसुन बाज्ले, “पत्रुस मुइ तुइलाइ बल्छु, आज राति भाले बासइ भन्दा अगाडि तुइनिन मुइलाइ बइचिनु बाजिके तिन फेरासम्म बाज्नारआछस।”
ठिक परिके बसो
35येसुन होल्काइ बल्-ल्याक, “जब मुइ तोराल्काइ पइसा, झोला र जुत्ता बिना पाठाइल रइनाइ, केति तोराल्काइ केइ कुरोकर कमि हक्ल्या?”#मति १०:९-१०; मर्क ६:८-९; लुक ९:३;१०:४
होल्किन बाज्ला, “बइहकल्ते।”
36येसुन बाज्ले, “तर अब जुनसिन पइसा आछि, होइनिन पइसा बोक्दिक, झोला हक्नारिन झोला पुनि बोक्दिक र जुनसिन तरवार बइने होइनिन आफ्ने लुगा बेचिके एउटो तरवार किन्दिक। 37मुइ तोराल्काइ बल्छु, ‘ह्व अपराधिल्कोसिन गनिले’ बाजिके धर्मसास्तरनाइ लेख्ल कुरो मोर जिबननाइ पुरा हकइ ने पर्छि, र मोर बारेनाइ लेख्ल कुरो पुरा हकिधर्लाछि।”#यस ५३:१२
38चेलाल्किन बाज्ला, “पर्भु, हाइसिन इछि दुइटो तरवार आछि।”
येसुन जबाफ दिल्याक, “ल-ल हकल्ते।”
जइतुन डाँरानाइ येसुकर पार्थना
(मति २६:३६-४६; मर्कुस १४:३२-४२)
39अनि येसु बाइर निस्किके सदइठि जइतुन डाँरानाइ जाइले, र चेलालत पुनि येसुसिन जाइला। 40ह्व ठउँनाइ पुग्ल पछि येसुन चेलाल्काइ बल्-ल्याक, “तोरा परिछ्याबान जोगइ सकउ बाजिके पार्थना गरो।”
41येसु अलि ओभर जाइके घोडा टेकिके पार्थना गरइ लाग्ले, 42“हे ब्वा, तोर इछ्या हक्लान ह्य दुखकर कचउरा मुइबान हटाइदेउ। तर मोर इछ्या बया, तोर इछ्या पुरा हक्दिक।” 43अनि स्वर्गबान एउटो स्वर्गदुत आइके येसुलाइ सक्ति दिल्ते। 44येसुकर मन एकदम दुखन भरिल हुदान अजइ धेरइ पार्थना गरइ लाग्ले र येसुकर पसिना रकतकर थोप्लाठि भुइनाइ झरिधर्ल रल्ति।
45येसु पार्थनाबान उठिके चेलालत हक्ल ठउँनाइ फर्किके आइतिन होलत सोकिन गर्तिन निदाइधर्ल भेट्टाइले। 46येसुन होल्काइ बल्-ल्याक, “तोरा किनारइ निदाइधर्लाछो? उठो परिछ्याबान जोगइ सकउ बाजिके पार्थना गरो।”
येसुलाइ आठाइलाइ
(मति २६:४७-५६; मर्कुस १४:४३-५०; युहन्ना १८:३-११)
47येसुन ह्य कुरो बाज्तिन गर्तिन मान्छेल्को भिड उछि आइपुग्ला। बारुटाइ चेलालत मद्दे एउटो यहुदा बल्ल चेलान चाइ भिडको अगि-अगि आइके येसुलाइ मइँ खाइकर लागि येसुकर नजिक जाइले। 48तर येसुन होलाइ बलल्ते, “यहुदा, केति तुइ मानुसकर बेटाकलाइ मइँ खाइके धोका दिछस?”
49ह्य देखिके अब केति हक्नार हो बाजिके चेलाल्किन येसुलाइ बल्ला, “पर्भु, हाइ तरवार चालाउ?” 50होलत मद्दे एउटो चेलान पर्धान पुजारिकर नोकरकर दाइने कान च्वाटइ छिङ्गाइदिल्ते।
51तर येसुन होल्काइ बल्-ल्याक, “हक्लो, अब इन्खा जुनगरो।” अनि येसुन ह्व मानुसकर कान छुइकइ बिसेक पार्दिल्ते।
52अनि येसुलाइ पक्रइआइलाइ मुख्य पुजारिल्काइ, मन्दिर रुङ्नाल्को कप्तानकाइ र धर्म-गुरुल्काइ येसुन बल्-ल्याक, “केति मुइ डाका हो र? तोराल्किन मुइलाइ पक्रइकर लागि लउरि र तरवार लिके आइलाइ? 53मुइ दिन्ने मन्दिरनाइ तोराल्कोसिन हक्तिन तोराल्किन मुइलाइ बइपक्रिलो। तर अब तोराल्को काम गर्नार बेला हो र आँधारिकर सक्ति हेइ हो।”#लुक १९:४७;२१:३७
पत्रुसिन येसुलाइ बइचिनु बाज्ल
(मति २६:५७-५८,६९-७५; मर्कुस १४:५३-५४,६६-७२; युहन्ना १८:१२-१८,२५-२७)
54होल्किन येसुलाइ आठाइके पर्धान पुजारिकर घरनाइ लाकाइला। पत्रुस पुनि बद्दुरबान येसुकर पछि-पछि आइले। 55मान्छेलत चात्राकर माजनाइ आगि जिगाइके तापिधर्लाइ रइला। पत्रुस पुनि होल्कोसिन बस्ले। 56एउटि नोकर्निन पत्रुसलाइ आगि तापिकइ बस्ल देखिके मजसिन हेर्तिन बाज्लि, “ह्य मानुस पुनि येसुसिन रइल।”
57तर पत्रुसिन इनिखे इन्कार गर्तिन बाज्ले, “ए बेटि, होलाइ मुइ बइचिनिन।”
58एकछिन पछि अर्कोन पत्रुसलाइ देखिके बलल्ते, “तुइ पुनि होलत मद्देकरे एक हो।”
तर पत्रुसिन बाज्ले, “ए साथि, मुइ बया।”
59लगभग एक घन्टा पछि अर्को एउटो मानुसिन बलल्ते, “ह्य मानुस पुनि पक्कइ येसुसिन रइल, किनारइभने ह्य पुनि गालिलि ने रइलसइ।”
60तर पत्रुसिन बाज्ले, “ए साथि, मुइ होलाइ बइचिनिन, तुइ केति बाजिधर्लाछस।” पत्रुसिन बाज्तिन-बाज्तिन भाले बास्ले।
61अनि येसुन फर्किके पत्रुसलाइ हेरल्ते। “आज तुइनिन मुइलाइ भाले बासइ भन्दा अगाडि तिन फेरासम्म बइचिनु बाजिके बाज्नारआछस” बाजिके येसुन बल्ल कुरो पत्रुसिन सम्जिले। 62अनि पत्रुस बाइर निस्किके धुरु-धुरु कान्ले।
येसुकर गिल्ला
(मति २६:५९-६८; मर्कुस १४:५५-६५; युहन्ना १८:१९-२४)
63येसुलाइ आठाइके लाकाइनाराइ मान्छेल्किन येसुलाइ गिल्ला गर्ला र हिर्काइला। 64येसुकर आँखि लुगान बान्दिकइ हिर्काइतिन सोद्ला, “तुइलाइ हिर्काइनार कुन हो? लु अगमबानि गर्ते।” 65इत्तिके बिजेत गर्तिन येसुकर बिरुद्दनाइ साराइ थाल्ला।
महासभाकर अगाडि येसु
(मति २६:५७-६८; मर्कुस १४:५३-६५; युहन्ना १८:१९-२४)
66ब्यान उज्यालो हक्ले सात अगुवालत, मुख्य पुजारिलत र धर्म-गुरुलत जम्मा हक्ला। अनि येसुलाइ महासभानाइ लाकाइला, 67र बल्ला, “तुइ मुक्ति दिनार खिरिस्ट हो भने हाइलाइ बल।”
येसुन होल्काइ बल्-ल्याक, “मुइनिन बल्तिन पुनि तोरा बइ पत्याओ। 68मुइनिन केइ कुरो सोद्नाइ भने पुनि जबाफ बइदेओ। 69तर अबसिन उसो मानुसकर बेटाक सेब्बाइभन्दा सक्तिसालि परमेसोरकर दाइने पटि बस्नारआछ।”
70अनि होलत सेब्बाल्किन सोद्ला, “उसोभए केति तुइ ने परमेसोरकर बेटाक हो ते?”
येसुन होल्काइ जबाफ दिल्याक, “तोराल्किन ने बाज्छो, मुइ होइ हो।”
71ह्व पछि होल्किन बाज्ला, “अब हाइलाइ केतिकर साछि चाइले र? हाइनिन होक्रे मुखबान सुनिहाल्ले नि।”
Aktualisht i përzgjedhur:
लुका 22: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.