पेरेरित 27
27
पावल रोम जाए लाग्लो
1हामि पानि जाहाजभि इटालिया जाएपर्ताइ कहि पक्का होख्लोपाछु, उनहान्इ पावल र अरु कइदिहान्के राजा अगस्टसको सेनाको कप्तान युलियसको जिम्मा लगाइदिहिक्। 2एड्रामिटेनोसभि एसियाको धेरे पानि जाहाज रोक्लार घाटहान होख्ले गेलार एउटा पानि जाहाजमा चढिकनि जाए लाग्हुँ। अरिस्ताखर्स नाउँ होख्लो थेसलोनिके सहरको एक जना माकेडोनि पनि हामि साङहे रहिक्। 3अर्कना दिन हामि सिदोन सहरमा आइपुग्हुँ। युलियसइ पावलके दया गरिकनि आफ्नो साखाहान्ठुँ जाइकनि खाचो पर्लार समानहान लेहे अनुमति दिहिक्। 4उथिभि फेरि हामि पानि जाहाजमा चढ्हुँ र बतास उल्टा चल्लो कारनइ बतासभि बचेके लागि साइप्रस ठुठिको आड लिहिकनि गेहुँ। 5किलिकिया र पामफिलिया इलाकाको धरि धरि होख्ले, हामि लुकिया इलाकाको एउटा माइरा सहरमा आइपुग्हुँ। 6उथि कप्तानइ अलेक्जेन्डरियाभि इटालिया गेलार एउटा पानि जाहाज भेटाइक् र ओंइ हाम्राइ पानि जाहाजमा चढाइदिहिक।
7धेरे दिनसम्म बिस्तारे बिस्तारे आघु बढ्ले अप्ठ्यारोसिन हामि क्निडस सहरको नजिक आइपुग्हुँ। उथि पुग्लोबेरामा बतासइ अझइ आघु बढे नादेलो कारनइ केरेट ठुठिको आड लिहिकनि हामि सालमोनेको धरि धरि होख्ले जाहुँ। 8अप्ठ्यारोसिन ओख्रो छेउ छेउ होख्ले हामि सुन्दर कलार घाटमा आइपुग्हुँ। उथिभि लासिया सहर नजिके रहिक्।
9समय धेरे जाइसक्लो रहिक् र उपास बिस्लार खास दिन पनि सक्हेलो रहिक्। ओइ बेरामा आँधि आइरताइ कलार कारनइ गर्ते समुन्द्र यात्रा पनि डरलाग्दो होखि सक्लो रहिक्। पावलइ उनहान्के 10यस्के कतिहिँ सम्झाइक्, “साखा हो, मर्हाइ यस्नो लाग्ताइ, हामि आन्हा इथिभि जाहुँ कनि पानि जाहाज र एख्रोमा होख्लो समानहान मात्र नास होख्लार नाहो, तर हाम्रो जिउ ज्यान पनि जाए डर बाटि।” 11तर कप्तानइ पावलको कुरामा कते पानि जाहाज चलालार मानिस र पानि जाहाजको मालिकको कुरा पत्याइक। 12जाडोको समय काटे, उ घाट नाम्रो पनि नारहिक्। कुनुहुँ हालतमा पनि उथिभि निस्किकनि फोनिक्स सहरमा ज पुगि जाडो काटे पर्ताइ कहि धेरे जस्नो मानिसहान्इ पानि जाहाज चलाइघाले सल्लाहा देहाइ। फोनिक्स सहर चाहिँ केरेट ठुठिको एउटा घाट रहिक्, र एख्रो मुखचाहिँ दछिन-पस्चिम र उत्तर-पस्चिमपट्टि फर्केलोइ ठुठिको आड लेहे सकिक्।
समुन्द्रमा बड्को आँधि आउलो
13जब दछिनपट्टिभि बतास बिस्तारे बिस्तारे चले लागिक, तब उनहान्इ सोच्वाइ कि आब हामि जाए सक्ताहुँ। अनि उनहान्इ पानि जाहाज अढाइकनि धार्लो कोङ्यासि निस्काइकनि केरेट ठुठिको छेउ छेउ होख्ले जाए लाग्वाइ। 14तर एक छिनपाछु त ठुठिपट्टिभि “उत्तर-पुर्ब” कलार बड्को आँधि बेरि एक्कासि अन्धाधुन्दा आइघालिक। 15ओइ आँधिइ पानि जाहाजके धक्याए लागिक, अनि हामि आघु बढे नासक्हुँ। उसिगर्ते पानि जाहाजके जते लेग्ताइ लेगुस् कहिकनि छाडिदेहुँ। 16क्लउडा कलार एउटा बिर्झिन ठुठिको आड लिहिकनि हामिइ अप्ठ्यारोसिन पानि जाहाजको पाछुपट्टि बाधिकनि धार्लो डोङोके बचाए सक्हुँ। 17र डोङोके तानिकनि भित्र आन्लोपाछु पानि जाहाज चलालाहार मानिसहान्इ पानि जाहाजके तरभि मोटो मोटो डोराइ बलियोसिन बाध्वाइ। पानि जाहाज लिबियाको छेउपट्टि सिरटिस कलार बालोमा भासेताइ कि कलार डरइ उनहान्इ पाल झारिदेहाइ र पानि जाहाजके बतासके भरमा छाडिदेहाइ। 18आँधिइ हाम्राइ जारे उफ्रालार र पछारलार गरिक्। उसिगर्ते अर्कना दिन उनहान्इ पानि जाहाजको समानहान हुर्याइदेहे लाग्वाइ। 19तिन दिनमा उनहान्इ आफ्ने हातइ पानि जाहाजमा चाहेलार समानहान हुर्याइदेहाइ। 20धेरे दिनसम्म घाम, तारा केइ देखे नापाइहिक। आँधि लगातार चलिधार्लो कारनइ हामि बाच्ताहुँ कलार आस पनि छाडिदिहुँ।
21मानिसहान्इ खइलार चिज नाखइलो धेरे दिन होखिसक्लो रहिक्, तब पावल उनहान्ठुँ आइकनि कहिक्, “साखा हो, ताहान्इ मोरो कुरा मानिकनि केरेट ठुठिभि पानि जाहाज नाचलालो होख्नि यस्नो दुख र नास ताहान्इ सहे नापर्लारिक। 22आब मइ ताहान्के कतिन, आट गरो, ताहानमध्ये कुन्हुँको जिउ नाजिताइ, तर पानि जाहाजचाहिँ नास होख्ताइ। 23क्यारेकनि मइ परमेस्वरको मानिस हो, र ओख्रो सेवा गर्तिन, आज राति मोरो छेउमा ओख्रो एउटा स्वर्गदुत आइकनि ठेडाइक 24र कहिक्, ‘पावल, झिन डराहइ, तइ रोमि बड्को राजा आघु ठेडाए ज पर्ताइ, परमेस्वरइ तोर्हाइ दया गर्लो कारनइ तइसिन पानि जाहाजमा चढ्लो सभइको परान परमेस्वरइ बचालाटि।’ 25उसिगर्ते साखा हो, आट गरो। मइ परमेस्वरमा बिस्वास गर्तिन, मर्हाइ जस्नो कलो रहिक्, ठिक ओस्ने होख्ताइ। 26तर हामिचाहिँ कुनुहुँ एउटा ठुठिमा ठोक्के पर्ताइ।”
27जब चउध दिन होख्लो रहिक्, र हामि एड्रियास समुन्द्रमा आँधिइ इते उते हुत्तिइ धार्लो रहुँ, तब आद्धा रातपट्टि पानि जाहाज चलालारहान्इ हामि कुनुहुँ भुइको नजिक पुगेलाग्लाटाहुँ कहि अनुमान गर्वाइ। 28उनहान्इ पानिको गइरो नापिकनि चाहाते सइतिस मिटर पत्ता लगावाइ, र आलि आघु जाइकनि फेरि पानिको गइरो नापिकनि चाहाते उनहान्इ लगभग सत्ताइस मिटर पत्ता लगावाइ। 29अनि कुनुहुँ बड्को पाथरउप्रो ठोक्केताइ कि कलार डरइ उनहान्इ पानि जाहाजको पाछुपट्टिभि चार ओटा अङकुसि खसावाइ र उज्यालो होखुस् कहि पर्थना गरे लाग्वाइ। 30पानि जाहाज चलालारहान भागे खोजिधार्लो रहाइ, र आघुपट्टि अङकुसि खसालार बाहानामा डोङो समुन्द्रमा झारिसक्लो रहाइ। 31तब पावलइ कप्तान र सिपाहिहान्के कहिक्, “यदि इ मानिसहान पानि जाहाजमा नाबिस्निसिन ताहान पनि नाबाच्ताओ।” 32उसिगर्ते सिपाहिहान्इ पानि जाहाजमा बाध्लो डोङोको डोराहान काटिकनि डोङो बगाइ देहाइ।
33जब उज्यालो होखे लागिक, तब पावलइ उथि होख्लो सभइ जनाके केइ खइलार चिज खाए कहिक्। ओंइ कहिक्, “आज चउध दिन होखि सकिक्, ताहान डरइ भुखभुखे केइ खइलार कुरा नाखाइ बिस्लाटो। 34उसिगर्ते केइ खाओ कहि मइ ताहान्के बिन्ति गर्तिन। केइ खइनिसिन ताहान्इ तागत पाउताओ, ताहान मध्ये कुन्हुँको कपारको एउटा केस पनि नास नाहोख्ताइ।” 35यत्का कहिकनि ओंइ रोटि लिहिक् अनि सभइको आघु परमेस्वरके धन्येबाद चढाइक र टुक्राइकनि खाए लागिक। 36तब उनहान्इ पनि आट पावाइ र केइ खइलार चिज खावाइ। 37पानि जाहाजमा हामि जम्मा दुइ सय छयहत्तर जना रहुँ। 38उनहान्इ अघाउन्ज्याल खइलोपाछु, पानि जाहाज हडुङो बनाए समुन्द्रमा गहुँ हुर्याइदेहाइ।
पानि जाहाज नास होख्लो
39जब बेहानो होखिक, उनहान्इ उ ठउँके चिने नासक्वाइ, तर उनहान्इ समुन्द्रको कुनुहुँ एउटा पाखा देख्वाइ। उ बालो ज बालो होख्लो ठउँ रहिक्। उनहान्इ पानि जाहाजके सकेसम्म ओइथि लेग्लाहार पक्का गर्वाइ। 40उनहान्इ अङकुसिको डोराहान काटिकनि अङकुसिहान समुन्द्रमा छाडि देहाइ, र बहनाहान्के बाधिधार्लो डोराहान खोलिदेहाइ। अनि आघुपट्टिको पाल उठाइकनि बतासपट्टि फर्काइ देहाइ र पानि जाहाजके पाखापट्टि लेग्वाइ। 41तर पानिमा होख्लो बालोको थुप्रोमा पानि जाहाज ठोकिकनि ओइथि भास्हिक, पानि जाहाजको आघुपट्टिको भाग अड्किक र चले नासकिक, पाछुपट्टिको भागचाहि भेलमा ठोक्किकनि टुक्रे लागिक।
42कइदिहान पउडि खेलाइकनि भाग्तात् कि कलार सोचिकनि सिपाहिहान्इ उनहान्के मारे सल्लाहा गर्वाइ। 43तर कप्तानइ पावलके बचाए खोजिकनि उनहान्के ओस्नो गरे नादिहिक। बरु कप्तानइ पहुँउरे सक्लारहान पानि जाहाजभि सुरुमा उफ्रिकनि पाखामा जाए, 44र बाकि होख्लारहानचाहि फल्याकहानमा र पानि जाहाजको टुक्राहानको साहेता लिहिकनि जाओ कहि हुकुम दिहिक्। यस्के सभइ जना नाम्रोसिन पाखामा पुग्वाइ।
Aktualisht i përzgjedhur:
पेरेरित 27: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.