पेरेरित 26
26
अग्रिपासको आघु पावलको बयान
1अग्रिपासइ पावलके कहिक्, “तोर्हाइ आफ्नो बारेमा बोले अनुमति बाटि।” तब पावलइ हातइ इसारा गरिकनि आफ्नो बचाउमा बोले लागिक,
2“हे राजा अग्रिपास, यहुदिहान्इ मर्हाइ लगालो सभइ दोसको बिरुधमा आज तोरो आघु मइ आफिके बचाएके लागि बोले पाउलोमा मइ आफिके भाग्यमानि ठान्तिन। 3खासगरि यहुदिहान्को सभइ चलन र तर्क बितर्कको बारेमा तोर्हाइ नाम्रोसिन थाहा बाटि। उसिगर्ते मोरो बयान नाआतिहिकनि सुनिदेहेस् कहि मइ बिन्ति गर्तिन।
4“मइ बिर्झिन रतेभि ज आजसम्म मोरो आफ्नो देसमा र येरुसलेममा मोरो जिबन कस्नो रहिक्, कहिकनि सभइ कुरा यहुदिहान्के थाहा बाटि। 5धेरे पहिलिभि उनहान्इ मर्हाइ चिन्तात्, हाम्रो धर्मको सभइ कते कट्टर दलमा पर्लार मइ एउटा फरिसि होखिकनि मोरो जिबन यापन गर्लाटिन। यदि उनहान्इ चाहनि इ कुराको गबाहि पनि देहे सक्तात्।#पेरेरित २३:६; फिलिपि ३:५ 6परमेस्वरइ हाम्रो पुर्खाहान्के गर्लो बाचामा मइ आस गर्लो कारनइ आज मइ इ फइसला गर्लार ठउँमा ठेडाइलाटिन। 7ओइ बाचा पाउलार आसमा हाम्रो बार कुलइ दिनरात पुरे मन लगाइकनि परमेस्वरको आराधना गर्तात्। राजा अग्रिपास, ओइ आसको लागि मर्हाइ यहुदिहान्इ दोस लगालाटाइ। 8परमेस्वरइ मर्लोहान्के जिउते बनाताइ कलार कुरामा ताहान्इ क्यारे बिस्वास नागर्ताओ?
9“मइ पनि त नासरतको येसुको नाउँको बिरुधमा केइ न केइ गर्हि ज पर्ताइ कहि सोच्लो रहिन। 10अनि मइ येरुसलेममा ओस्ने गरिन्। मुख्य पुजारिहानभि हक पाइकनि परमेस्वरको पबित्र धेरे मानिसहान्के झ्यालखानामा घालिन र उनहान्के मार्लार धन्दामा पनि सहमति देलो रहिन। 11सभइ सभाघरहान्मा जाइकनि उनहान्के घरि घरि सजाए दिहिकनि बिस्वास गरे छाडो कहि कोसिस गर्तरहिन। मइ रिसइ पागल जस्ने होखि अरु देसको सहरहान्मा पनि जाइकनि उनहान्के सताइन।#पेरेरित ८:३; २२:४-५
पावल आफि फेरेलो बारेमा कताइ
(पेरेरित ९:१-१९; २२:६-१६)
12“यस्के मइ मुख्य पुजारिहान्को हक र आग्या चिट्ठि पाइकनि दमस्कसपट्टि जाइन। 13हे राजा, बाटमा जितिहि गर्ते मझानो मइ आकासभि घाम कते पनि उज्यालो ज्योति देखिन, उ ज्योति मइ र मोरो साखाहान्को चारेउपट्टि चम्कि धार्लो रहिक्। 14जब हामि सभइ जना भुइमा उन्डलोरहुँ, तब हिब्रु भासामा मर्हाइ यस्के कहिधार्लो बोलि मइ सुनिन, ‘साउल, ए साउल, तइ मर्हाइ क्यारे सतातेर? मोरो इच्छाको बिरोध गर्लार त तोरो लागि ज दुख हो।’ 15अनि मइ सुध्याइन, ‘पर्भु, तइ कुन्को हो?’ पर्भुइ मर्हाइ कहिक्, ‘मइ येसु हो, जख्राइ तइ सताइ धार्लाटेर। 16आब उठइ र आफ्नो गोडमा ठेडाहइ, क्यारेकनिसिन तइ मर्हाइ देख्लो कुरा र भबिस्यमा मइ तोरोठुँ देखा पर्लार कुराको लागि सेबक र साछि बनालार उदेस्येइ मइ तोरोठुँ देखा पर्लाटिन। 17मइ तोर्हाइ तोरो आफ्ने जात र अरु जातहान्ठुँ पठातिहि बाटिन। मइ तोर्हाइ उनहानभि बचातिन। 18उनहान अन्धारभि उज्यालोपट्टि र सइतानको सक्तिभि परमेस्वरपट्टि फर्कुस् कहिकनि तइ उनहान्को आँखि खोलिदेहइ। एस्के उनहान्इ पापको माफ पाउतात् र मइमा बिस्वास गरिकनि पबित्र होख्लारहान्को हक उनहान्इ पनि पाउतात्।’
19“उसिगर्ते, राजा अग्रिपास, मइ उ स्वर्गभि आउलो दर्सनमा कहेलो बोलिको आग्यापालन गरिन। 20सभइ कते पहिलि दमस्कसमा, अनि येरुसलेममा र सभइ यहुदिया इलाकाभरि होख्लारहान्के र अरु जातहान्के पनि ‘आफ्नो आफ्नो पाप मानिकनि परमेस्वरपट्टि फर्कलो हो, कहि नाम्रो धन्दा गरिकनि सबुत देखाओ’ कहिकनि मइ पर्चार गरिन्।#पेरेरित ९:२०,२८-२९ 21उसिगर्ते यहुदिहान्इ मर्हाइ मन्दिरमा छोपिकनि मारे कोसिस गर्वाइ। 22तर आजको दिनसम्म मइ परमेस्वरभि साहेता पाइधार्लाटिन। उसिगर्ते बड्को बिर्झिन दोहइके गबाहि देतिहि मइ इथिन ठेडाइलाटिन। अगमबक्ताहान्इ र मोसाइ बोल्लो बचन साच्चि ज पुरा होख्ताइ कलार कुरा बाहेक अरु केइ नाकलाटिन। 23उनहान्इ कलो रहाइ कि खिरिस्टइ दुख भोगे पर्ताइ र मर्लोभि जिउते होख्लोहान मध्य उ पहिलो होख्ताइ, ओंइ आफ्नो जात र अरु जातहान्के उदार र मुक्तिको बारेमा प्रचार गर्ताइ।”#यसइया ४२:६; ४९:६; १ कोरिन्थि १५:२०
24ओंइ आफ्नो बचाउको लागि इ कुराहान बोल्तिहि गर्ते फेस्तसइ बड्को सोरमा कहिक्, “ए पावल, तइ सन्काइलो हो, तोरो धेरे ग्यानइ तोर्हाइ सन्काहा बनालाटि।”
25तर पावलइ कहिक्, “माननिय फेस्तस, मइ सन्काइलो नाहो, मइ त सत्य र नाम्रो बुद्धिको कुराहान बोल्तिहि बाटिन। 26राजा अग्रिपासके इ घटनाको बारेमा र मइ कलो कुरा ओंइ मनमा धार्लाटि। उसिगर्ते मइ ढुक्क बाटिन, ओख्रो आघु नाडराइकनि मइ बोले सक्तिन। क्यारेकनि इ कुरा गोप्पेमा होख्लो नाहो। 27राजा अग्रिपास, क्या तइ अगमबक्ताहान उप्रो बिस्वास गर्तेर्? मर्हाइ थाहा बाटि, तइ बिस्वास गर्तेर्।”
28राजा अग्रिपासइ पावलके कहिक्, “क्या तइ मर्हाइ थोरे समयमा खिरिस्टियन बनाए चाहातेर्?”
29पावलइ कहिक्, “थोरे समयमा होखुस् या त धेरे समयमा, तइ मात्रे नाहो, इ डोराहान बाहेक मोरो कुरा सुन्लाहार जत्का सभइ जना मइ जस्ने बिस्वासि होखुस्, कहि मइ परमेस्वरसिन पर्थना गर्तिन।”
30तब राजा अग्रिपास, हाकिम फेस्तस, बरनिकि र उथि बिस्लाहार सभइ जना उठ्वाइ। 31उनहान निस्कलोपाछु एक आर्कोसिन यस्के कतिहिँ बोल्वाइ, “इ मानिसइ मिर्तु दन्ड पाउलाहार अथवा जेल गेलार ओस्नो केइ धन्दा नागर्लाटि।” 32राजा अग्रिपासइ फेस्तसके कहिक्, “यदि एइ रोमि बड्को राजाठुँ बिन्ति नागर्लो होख्नि त एख्राइ छाडिदेनि पनि होख्लारिक।”
Aktualisht i përzgjedhur:
पेरेरित 26: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.