पेरेरित 10
10
कर्नेलियसइ पतरुसके बोलालो
1कइसरिया सहरमा कर्नेलियस नाउँ होख्लो एक जना मानिस बिस्तरहिक्। उ रोमि सिपाहिको इटालिया कलार पल्टनको कप्तान रहिक्। 2उ धर्मि मानिस रहिक्। उ र ओख्रो परिवार परमेस्वरको आराधना गर्लाहार मानिसहान रहाइ। ओंइ खाचोमा पर्लो मानिसहान्के नाम्रो मनइ साहेता गर्तरहिक र सधइ परमेस्वरसिन पर्थना गर्तरहिक। 3एक दिन ओंइ मझानो तिन बजेपट्टि दर्सनमा बुझ्लारगरि परमेस्वरको एउटा स्वर्गदुत आफ्नो नजिक आइकनि एस्के कलो सुनिक, “ए कर्नेलियस।”
4डराइतिहि कर्नेलियसइ ओख्राइ एकटकइ चाहिक र कहिक्, “क्या, कहइ?”
अनि स्वर्गदुतइ ओख्राइ कहिक्, “तोरो पर्थना र गरिबहान्के देलो साहेता भोगको रुपमा परमेस्वरको आघु पुग्लाटि। 5आब मानिसहान्के योप्पा सहरमा पठाहइ, र पतरुस कलार सिमोनके बोलाए पठाहइ। 6उ सिमोन नाउँ होख्लो चमारठुँ बिस्लाटि, जख्रो घर समुन्द्रको छेउमा बाटि।” 7जब ओख्रोसिन बोल्लार स्वर्गदुत जाइक्, तब कर्नेलियसइ आफ्नो नोकरहानमध्ये दुइ जना र लगातार ओख्रो सेवा गर्लार एक जना धर्मि सिपाहिके बोलाइक, 8र उनहान्के सभइ कुरा कहिकनि योप्पा सहरमा पठाइक्।
9अर्कना दिन उनहान जिते जिते योप्पा सहरको नजिक आइपुग्ते, मझानोको बार बजेपट्टि पतरुसचाहि पर्थना गरे घरको छतमा जाइक्। 10अनि उ जारे भुखाइक, र ओंइ केइ खाए खोज्लोरहिक, तर अरुहान्इ खइलाहार चिज बनाइधार्लो बेरामा पतरुस सोचमा बुडिक र एउटा दर्सन देखिक्। 11ओंइ स्वर्ग खोल्हेलो र उथिभि चारेउ कोनोमा बाधेलो च्यादरजस्ने केइ धर्तिपट्टि खसिधार्लो देखिक्। 12ओइ च्यादरमा धर्तिको सभइ खालको चारगोड्या जनावर र घिस्रलार जिब र आकासमा उडाइलार चराहान रहिक्। 13तब ओंइ एउटा आवाज सुनिक, “ए पतरुस उठ, र मारिकनि खाहइ।”
14तर पतरुसइ कहिक्, “नाहो पर्भु, क्यारेकनि मइ कन्हुँ केइ जुठो चिज नाखइलाटिन।”
15ओइ आवाज फेरि पतरुसइ दोस्रो पल्ट सुनिक, “परमेस्वरइ ज्या सुद्द पार्लाटि ओख्राइ तइ असुद्द झिनठान।” 16तिन पल्टसम्म एस्ने होखिक, र तुरुन्ते ओइ च्यादर स्वर्गपट्टि उठाइ लेगिहिक।
17जब पतरुस आफिइ देख्लो इ दर्सनको अर्थ क्या होग्बि कहिकनि मनमने अलमल्ल पर्लो रहिक्, ओइ ज बेरामा कर्नेलियसइ पठालो मानिसहान सिमोनको घर खोज्तिहि गेट नजिक ठेढावाइ, 18र चिच्याइकनि सुध्यावाइ, “पतरुस कलार सिमोन इथि बाटि कि नाटि ह?”
19जब पतरुस ओइ दर्सनको बारेमा सोचिधार्लो रहिक् तब पबित्र आत्माइ ओख्राइ कहिक्, “चाहइ, तिन जना मानिसइ तोर्हाइ खोजिधार्लाटाइ। 20उठ र तर जा, उनहान्के मइ पठालो हो, नाहिचकिचाइकनि उनहान्सिन लाग्हइ।” 21तब पतरुस तर ओघ्रिक, र उ मानिसहान्ठुँ जाइकनि कहिक्, “चाहो, ताहान्इ खोजिधार्लो मानिस मइ ज हो। ताहान क्यारे इथि आउलो हो?”
22उनहान्इ कहाइ, “एक जना कप्तान कर्नेलियस, जुन सोझो र परमेस्वरके आराधना गर्लाहार र सभइ यहुदि जातभि आदर पाउलो मानिस हो। तोर्हाइ ओख्रो घरमा बोलाइकनि तोरो बोलि सुने कहि एउटा पबित्र स्वर्गदुतइ आग्या देलाटि।” 23तब पतरुसइ मानिसहान्के भित्र बोलाइकनि उनहान्के स्वागत गरिक्।
अर्कना दिन पतरुस उठिकनि उनहान्सिन जाइक्, र योप्पाको केइ बिस्वासि दाजिभाइहान पनि ओख्रो साङ्हे गेहाइ।
24फेरि अर्कना दिन उनहान कइसरिया पुग्वाइ। र कर्नेलियस आफ्नो आफन्त र मिल्लार साखाहान्के बट्याइकनि उनहान्को बाट चाहिधार्लो रहाइ। 25जब पतरुस भित्र पिसे लागिक तब कर्नेलियसइ ओख्रोसिन भेट गरि ओख्रो गोडमा घोप्टो परिकनि ढोग गरिक्। 26तर पतरुसइ ओख्राइ एस्के कतिहिँ उठाइक, “उठइ, मइ आफि पनि त मानिस ज हो।” 27तब पतरुस ओख्रोसिन गफ गर्ले घर भित्र गिहिक, र उथि ओंइ धेरे जना बट्हेलो भेटाइक। 28तब पतरुसइ उनहान्के कहिक्, “अरु जातसिन सङगत गरे, वा उनहान्के भेटघाट गरे एक यहुदिको लागि कत्का धर्म नियम बिरुध हो कलार कुरा ताहान्के थाहे बाटि, र पनि परमेस्वरइ मर्हाइ कुन्हुँ मानिसके अपबित्र वा असुद्द झिनठान्हइ कहि देखालाटि। 29उसिगर्ते बोलाले बितिके केइ नासुध्याइ मइ ताहान्ठुँ आइन। ताहान्इ मर्हाइ क्या कारनइ बोलालो हो? आब कहो।”
30तब कर्नेलियसइ कहिक्, “चार दिन पहिलि लगभग एइ बेरा घरमा मइ तिन बजेको पर्थना गरिधार्लो रहिन, तब उज्रो चम्किलो लुगा लगालो एक जना मानिस मोरो आघु ठेढाइक्, 31र कहिक्, ‘कर्नेलियस, परमेस्वरइ तोरो पर्थना सुन्लाटि, र तइ गरिबहान्के गर्लो साहेताको सम्झना होख्लाटि। 32उसिगर्ते योप्पामा मानिस पठाइकनि पतरुस कलार सिमोनके बोलाए पठाहइ। उ समुन्द्रको छेउमा चमार सिमोनको घरमा बिस्लाटि।’ 33तब मइ तुरुन्ते तोरोठुँ मानिस पठाइन, र तइ आइदेहेर नाम्रे होखिक। आब पर्भुभि तोर्हाइ आग्या होख्लो सभइ कुराहान सुने हामि सभइ परमेस्वरको आघु इथि बट्हेलाट्हुँ।”
पतरुसको उपदेस
34तब पतरुसइ बोले लागिक, “साच्चि ज आब मइ नाम्रोसिन बुझिन, कि परमेस्वरइ कुन्हुके नाछुट्यातलहाइ,#ब्यवस्था १०:१७ 35तर परमेस्वरइ हरेक जातमा ओख्राइ आराधना गर्लाहार र नाम्रो धन्दा गर्लारहान्के सुइकार गर्ताइ। 36ताहान्के थाहा बाटि कि येसु सभइको पर्भु हो। परमेस्वरइ ओख्रोभि सान्ति देलाहार सुसमाचार इजरायलिहान्के पठाइक्। 37युहन्नाइ गर्लो बप्तिस्मा लेहो कलार प्रचार गरिसक्लोपाछु, गालिल इलाकाभि सुरु गरिकनि यहुदिहान्को देसभरि प्रचार गर्लो बचनको बारेमा ताहान्के थाहे बाटि, 38परमेस्वरइ नासरतको येसुके अभिसेक गरिकनि पबित्र आत्माको सक्ति दिहिक्। ओंइ नाम्रो गर्तिहि र सइतानभि सताहेलोहान्के सन्चो बनातिहि भोइक, क्यारेकनि परमेस्वर ओख्रो साङ्हे रहिक्। 39अनि ओंइ यहुदिहान्को देसमा र येरुसलेममा गर्लो सभइ कुराको हामि गवाहि हो। ओख्राइ यहुदिहान्इ कुरुसमा झुन्ड्याइकनि मार्वाइ।” 40तर ओख्राइ ज परमेस्वरइ तिन दिनमा जिउते बनाइकनि उठाइक, र देखाइक, 41सभइठुँ त उ देखा नापरिक्, तर हामि जख्राइ परमेस्वरइ गवाहि होखे पहिलिहिभि ओंइ छानिक, र उ मर्लोभि जिउते होख्लोपाछु हामिइ ओख्रोसिन खाहुँ र पिहुँ। 42ओंइ हाम्राइ जनतामा प्रचार गरे, र उ जिउते र मर्लोहान्को फइसला गर्लाहार होखे परमेस्वरभि छान्हेलो मानिस हो कलार गबाहि देहेके आग्या गर्लाटि। 43सभइ अगमबक्ताहान्इ ओख्रो गबाहि देलाटाइ, कि ओख्रोमा बिस्वास गर्लाहार हरेकइ येसुको नाउँभि पापको माफ पाउतात्।
अरु जातहान्इ पबित्र आत्मा पाउलो
44पतरुसइ इ कुरा बोल्तिहि गर्ते बचन सुन्लार सभइमा पबित्र आत्मा आइक। 45अरु जातहान्मा पनि पबित्र आत्माको बरदान पठालो देखिकनि पतरुसको साङ्हे आउलो यहुदि बिस्वासिहान छक्क पर्वाइ। 46क्यारेकनि अरु जातको मानिसहान्इ अरु भासामा बोलिकनि परमेस्वरको पर्सम्सा गरिधार्लो यहुदि बिस्वासिहान्इ सुन्वाइ। तब पतरुसइ कहिक्, 47“हामि जस्ने पबित्र आत्मा पाउलाहार इनहान्के पानिको बप्तिस्मा लेहे कुन्इ रोके सक्ताइ?” 48अनि पतरुसइ उनहान्के येसु खिरिस्टको नाउँमा बप्तिस्मा देहे आग्या गरिक्। तब उनहान्इ पतरुसके केइ दिन होइ रहे कहि बिन्ति गर्वाइ।
Aktualisht i përzgjedhur:
पेरेरित 10: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.