१ थेसलोनिकि 3
3
1उसिगर्ते ताहान्के भेटे हाम्राइ जारे हतार होखिक, र हामि एथेन्स सहरमा तिमोथि बिना ज बिसे नाम्रो होख्ताइ कहि हामिइ बिचार गर्हि।#पेरेरित १७:१५ 2र ताहान्को बिस्वासके बलियो बनाए र हउसला देहेके लागि तिमोथिके ताहान्ठुँ पठाहि। उ परमेस्वरको लागि हामिसिन धन्दा गर्ताइ र मानिसहान्के खिरिस्टको बारेमा नाम्रो खबर सुनाए साहेता गर्ताइ। 3क्यारेकनि सतावटहान पर्लो कारनइ ताहान कुन्हुँइ पनि हरेस झिन खाओ कलार हाम्रो इच्छा हो। क्यारेकनि येसुमा बिस्वास गर्लार मानिसहान्को जिबनमा यस्नो दुखहान परमेस्वरको योजनाभि आउताइ कलार कुरा ताहान्के थाहा बाटि। 4क्यारेकनि हामि ताहान्सिन रतेखेरि, हामि सभइके सतावटहान आइपर्ताइ कहिकनि पहिलिहि ज कलो रहिं। आखिरमा कलो जस्ने ठ्याके होखिक, इ ताहान्के थाहा बाटि। 5क्यारेकनि ताहान्के भेटे हतार होख्लोइ ताहान बिस्वासमा बलियो बाटो कि नाहे कहि बुझेके लागि मइ तिमोथिके ताहान्ठुँ पठाइन। क्यारेकनि जाँच गर्लार सइतानइ ताहान्के फसाइकनि हाम्रो मेहनत बेकार गरिदिहिक कि कहिकनि मइ डराइलो रहिन।
तिमोथिइ आन्लो खबरमा पावल खुसि होख्लो
6तर तिमोथि आन्हा भर्खर ताहान्ठुँभि आइकनि ताहान्को माया र बिस्वासको बारेमा नाम्रो कुरा सुनाइक।#पेरेरित १८:५ ताहान्इ हाम्राइ धेरे माया गरिकनि सधइ सम्झलो कुरा र ताहान्इ हाम्राइ भेटे जारे ज मन गर्लो कुरा हाम्राइ सुनाइक। हाम्राइ पनि ताहान्सिन भेटे धेरे मन बाटि। 7उसिगर्ते दाजिभाइ दिदिबहिनिहान हो, ताहान्को बिस्वासको नाम्रो कुरा सुनिकनि हामिमा होख्लो दुख र सतावटमा पनि हाम्रो मन खुसि होख्लाटि। 8क्यारेकनि ताहान पर्भुमा बलियो बाटो कलार खबर सुनिकनि साच्चि ढुक्कसिन सास फेरे पाउलोटाहुँ। 9ताहान्इ हाम्रो लागि आन्लो खुसिको कुराको लागि परमेस्वरके जत्का धन्येबाद देनि पनि थोरे होख्ताइ। 10ताहान्को बिस्वासके झन बलियो बनाएके लागि ताहान्सिन आमुने सामुने भेट होखे सकुस् कहिकनि रात दिन जोसिहिकनि पर्थना गर्ताहि।
11आब हाम्रो परमेस्वर बुबा आफिइ र हाम्रो पर्भु येसुइ ताहान्ठुँ आएके लागि हाम्रो बाट खोलिदिउस्। 12अनि हामिइ ताहान्के माया गर्लो जस्ने पर्भुइ पनि ताहान्के एकआर्काके र सभइ मानिसहान्के धेरे माया गर्लार बनाइदिउस्। 13हामि यस्के पर्थना गर्ताहिँ क्यारेकनि परमेस्वरइ ताहान्को मनके बलियो बनाइदिउस्, ताकि हाम्रो पर्भु येसु आफ्नो सभइ पबित्र मानिसहान्सिन#३:१३ पबित्र मानिसहान्सिन इथि केइ मुख्य सोरोतहान्इ मानिसहान नाहो, तर स्वर्गदुतहान पनि हो कतात्। फेरि आउते हाम्रो परमेस्वर बुबाको आघु ताहान्के पबित्र र निर्दोस बनाइदिउस्।
Aktualisht i përzgjedhur:
१ थेसलोनिकि 3: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.