१ थेसलोनिकि 4
4
परमेस्वरके खुसि पार्लार जिबन
1आखिरिमा दाजिभाइ दिदिबहिनिहान हो, पर्भु येसुभि ताहान्इ परमेस्वरके मन पर्लार जिबन कस्के जिए पर्ताइ कलार कुरा हामिभि सिखिसक्लाटो र ताहान्इ ओस्ने गरि जिइधार्लाटो, आब ताहान्को जिबन झन झन नाम्रो होख्तिहि जाउस् कहिकनि पर्भु येसुको नाउँमा अनुरोध गर्ताहि। 2क्यारेकनि पर्भु येसुको अधिकारभि हामिइ ताहान्के जुन अर्तिहान देलोरहिँ उ कुरा ताहान्के थाहा बाटि।
3ताहान पबित्र होखो कलार परमेस्वरको इच्छा हो, उसिगर्ते ताहान बेभिचारभि दुस्हि बिस्हेउ। 4अरुइ आदर देउस् कहिकनि ताहान सभइ आफ्नो जिउ पबित्र धारे पर्ताइ कलार त ताहान्के थाहा बाटि। 5तर परमेस्वरके नाचिन्लाहार अरु जातको मानिसहान जस्ने बेभिचार गर्लार कुरामा लागि झिनपरो। 6एस्के इ कुरामा कुन्हुँइ पनि बिस्वासि दाजिभाइहान्को दुल्हिसिन बेभिचार गरे नाहोख्ताइ। सभइ ओस्नो ननाम्रो धन्दा गर्लारहान्के त पर्भुइ सजाए देताइ कहिकनि पहिलिहि ज हामिइ चेतावनि देलो रहुँ। 7क्यारेकनि परमेस्वरइ हाम्राइ त असुद्द होखे नाहो, तर पबित्र जिबन जिए कहिकनि बोलालो हो। 8उसिगर्ते जुनइ इ आदेसके इन्कार गर्ताइ, ओइ मानिसके नाहो, तर जुन परमेस्वरइ ताहान्के पबित्र आत्मा देताइ ओख्राइ इन्कार गर्ताइ।
9दाजिभाइ दिदिबहिनिहान्को बिचमा कस्के माया गरे पर्ताइ कलार कुरा लेखिधारे नापर्ताइ। क्यारेकनि परमेस्वरइ आफिइ ज ताहान्के एकआर्काके माया गरे पर्ताइ कलार सिखालाटि। 10माकेडोनिया इलाकाको सभइ दाजिभाइ दिदिबहिनिहान्के ताहान्इ साच्चि माया गर्ताओ। तर पनि दाजिभाइ दिदिबहिनिहान हो, झन बढि ओस्ने माया गर्ले जाहेउ कहि हामि ताहान्के अनुरोध गर्ताहि। 11हामिइ ताहान्के पहिलिहिं कलो जस्ने ताहान अरुके दुख देलार मानिस झिनहोखो। बरु ताहान्इ आफ्नो आफ्नो धन्दामा मात्रे ध्यान देहेउ र आफिके चाहेलार कुराको लागि आफि ज कजाइलार गर्हेउ। 12यदि ताहान्इ एस्नो गर्नि येसुमा बिस्वास नागर्लारहान्इ ताहान्के आदर गर्तात्, अनि ताहान्के कुन्हुँसिन भर परे नापर्ताइ।
पर्भु आएकते पहिलि मर्लोहान्को बारेमा सिछा
13दाजिभाइ दिदिबहिनिहान हो, मरिसक्लो बिस्वासिहान्के क्या होख्बि कलार बारेमा ताहान्इ इ कुरा बुझ्लो हामि चाहाताहुँ, ताकि आस नाहोख्लो मानिसहान जस्ने ताहान सोकमा झिनपरो। 14क्यारेकनि येसु मर्लोभि फेरि जिउते होखिक कलार कुरा हामि बिस्वास गर्ताहुँ। उसिगर्ते येसुके बिस्वास गरिकनि मर्लो मानिसहान्के परमेस्वरइ फेरि येसुसाँङ्हे लेग्ताइ।
15पर्भुको बचन अनुसार हामि ताहान्के सिखाताहि, पर्भु आउलार दिनसम्म हामि जिउते होख्लारहान कते आघु उ मरिसक्लो मानिसहान्इ पर्भुके भेट्तात्।#१ कोरिन्थि १५:५१-५२ 16क्यारेकनि पर्भु आफिइ आग्याको चर्को सोरमा, मुख्य स्वर्गदुतको सोर र परमेस्वरको तुरहिको सोरसिन स्वर्गभि आउताइ। ओइबेलामा खिरिस्टमा बिस्वास गरिकनि मर्लोहान सभइकते आघु जिउते होखिकनि उठ्तात्। 17तब उनहान साङ्साङ्हे पर्भुके आकासमा भेटेके हामि जिउते होख्लोहान बद्रिमा उठाइलेघेताहु। एस्के हामि सधइ पर्भुसिन रताहुँ।#१ कोरिन्थि १५:५१-५२ 18उसिगर्ते इ बचनइ एकआर्काके हउसला देहेउ।
Aktualisht i përzgjedhur:
१ थेसलोनिकि 4: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.