लूका 9
9
ईसू अपन बारह परेरीत मन ला भेजथे
(मत्ती 10:5-15; मरकुस 6:7-13)
1एक दिन ईसू हर, अपन बारह झन चेला मन ला एक संगे बलाईस अऊ, ओमन ला सब दुस्टआत्मा मन ला निकाले कर, अऊ बेमरीहा मन ला चंगा करे कर, सक्ति अऊ अधिकार देहीस। 2अऊ ओमन ला परमेस्वर कर राएज कर बारे में परचार करे बर, अऊ बेमरीहा मन ला चंगा करे बर भेजीस। 3ईसू हर ओमन ला कहीस, “तुमन डगर बर लाठी, झोला, रोटी, रुपीया-पईसा अऊ दुई गोट अंगा झईन धरीहा। 4जे घनी तुमन कोनो गांव में जईहा, त उहां ककरो एगोट घर में रईहा, जब ले ओ गांव ले बिदा नई होईहा। 5जे कोनो तुमन कर खभेर ला नई मानही, त तुमन ओ गांव ले निकले घनी, परभू ओमन ला एक दिन जरूर दंड देही, एला बताए बर, अपन गोड़ कर धुररा ला झरराए राखीहा।” 6तेकर ओमन निकेल के, गांव-गांव में सुघर खभेर ला सुनावत, अऊ सबेच जघा कर बेमरीहा मन ला, ठीक करत जात रहीन।
हेरोदेस कर चिंता
(मत्ती 14:1-12; मरकुस 6:14-29)
7गलील कर राजा हेरोदेस अंतिपास हर, ईसू कर काम कर चरचा सुईन के घबराए गईस, काबरकि तनिक झेमन कहीन कि यूहन्ना बतिस्मा देवईया, जेहर मएर गए रहीस, ओहर जी उठीस हवे, 8अऊ तनिक झेमन कहीन, कि एलियाह देखार देहीसे, अऊ तनिक दूसर झेमन कहीन, कि आगू कर अगमजानी मन में ले, कोनो हर फेर जी उठीस हवे। 9बकिन हेरोदेस राजा हर कहीस, “मंए तो यूहन्ना कर मूड़ी ला पुजवाए देहे रहें, त अब एहर कोन लागे, जेकर बारे में मंए एकस अचमहों कर गोएठ ला सुनत हों?” अऊ ओहर ईसू ला देखे कर कोसिस करे लागीस।
ईसू पांच हजार मईनसे मन ला खवाथे
(मत्ती 14:13-21; मरकुस 6:30-44; यूहन्ना 6:1-14)
10तेकर जे घनी परेरीत मन फिर के आईन, त जे जाएत ओमन करे रहीन, ओ सब जाएत ला ईसू के बताए देहीन, त ईसू ओमन ला अलगे कएर के, बेतसएदा नांव कर एगोट सहर में ले गईस। 11बकिन भीड़ कर मईनसे मन जाएन गईन, कि ईसू हर आईस हवे, तेकर ओमन ईसू कर पाछू होए लेहीन, त ईसू हर खुसी-खुसी ओमन जग मिलीस, अऊ ओमन जग परमेस्वर कर राएज कर, गोएठ बात करे लागीस अऊ जे बेमरीहा मन चंगा होए बर चाहत रहीन, ओमन ला चंगा करीस। 12जे घनी बेर बुड़े लागीस, त बारहों परेरीत मन आए के ईसू ला कहीन, “तंए ए भीड़ ला बिदा कर, तेमेकि चाएरो कती कर गांव, अऊ बस्ती में जाए के रहे बर, अऊ खाए बर जुगाड़ करें, काबरकि एजग हर सुनसान हवे।” 13ईसू हर ओमन ला कहीस, “तुहींच मन एमन ला खाए बर देआ।” तेकर ओमन कहीन, “हमर जग तो पांच ठे रोटी, अऊ दुई गोट मछरी कर छोंएड़ अऊ कांही नईए, बकिन अगर हमन जाए के, ए सब मईनसे मन बर खाए बर बेसाए लानबो, त पूईर सकथे।” 14ओमन करीबन पांच हजार सवांग रहीन। तेकर ईसू हर अपन चेला मन ला कहीस, “ए मईनसे मन ला, पचास-पचास कर पांएत में बईठाए देआ।” 15त ओमन ओहीच कस करीन, अऊ सब झेला बईठाए देहींन। 16तेकर ईसू हर पांच गोट रोटी ला, अऊ दुई गोट मछरी ला धरीस, अऊ सरग कती ला देख के, परमेस्वर कर धनबाद करीस, अऊ टोएर-टोएर के अपन चेला मन ला देहत गईस, कि ओमन मईनसे मन ला परोसें। 17तेकर सब झन खाए के अघाए गईन अऊ चेला मन, बांचल टुटका ला बारह ठे पथिया में भरीन।
पतरस हर ईसू ला मसीह मानथे
(मत्ती 16:13-20; मरकुस 8:27-30)
18एक दिन ईसू हर एके झन पराथना करत रहीस, अऊ ओकर चेला मन ओकर संगे रहीन, त ईसू हर ओमन जग पूछीस, “मईनसे मन मोके का कथें?” 19ओमन जबाब देहीन, तनिक मईनसे मन कथें, “यूहन्ना बतिस्मा देवईया, अऊ तनिक झेमन एलीयाह, अऊ तनिक झेमन कथें कि जूनहा अगमजानी में ले, कोनो हर जी उठीस हवे।” 20तेकर ईसू हर ओमन जग पूछीस, “बकिन तुमन मोके का कहथा?” त पतरस हर जबाब देहीस, “परमेस्वर कती ले भेजल मसीह।” 21तब ईसू हर ओमन ला अगियां देके कहीस, एला कोनोच के झईन बतईहा।
22फेर ईसू ओमन ला कहीस, “मंए मईनसे कर बेटा, जरूर ढेरेच दुख सहूं, अऊ यहूदी मुखिया मन, अऊ मुख याजक मन, अऊ कानहूंन कर सिखोईया मन, मोके नई पतियाहीं अऊ माएर देहीं, अऊ मंए तीसर दिन में जी उठहूं।”
ईसू कर चेला बने कर मतलब
23तेकर ईसू ओमन ला कहीस, “जे कोनो मोर चेला बने बर चाहथे, ओके अपन ईछा ला छोंड़े बर परही, अऊ सगर दिन अपन कुरूस उठाए के, मनेकि दुख सएह के मोर पाछू में चले। #9:23 सचा चेला अपन सब ईछा, रिज-रंग, अऊ हर किसीम कर सुख बिलास ला छोंएड़ के, परभू ईसू बरीक अपन जानोच ला देहे बर तियार रथे। 24अगर तुमन अपन जिनगी ला बचाए बर चईहा, त तुमन अमर जिनगी ला गंवाए देईहा। बकिन अगर तुमन मोर बर, अपन जिनगी ला गंवाए देईहा, त तुमन अमर जिनगी ला पाए जईहा। 25अगर कोनो मईनसे हर सबेच संसार ला पाए के, परमेस्वर कर संगे अमर जिनगी ला गंवाए दारही, त ओके का फयदा होही? 26जे कोनो हर मोके अऊ मोर गोएठ ले लजाही, त मंए मईनसे कर बेटा, जे घनी अपन दाऊ कर, अऊ पबितर सरगदूत मन कर महिमा संगे आहूं, त ओमन जग लजाहूं। 27मंए तुमन ला फूरोंच कहथों, कि जेमन एजग ठड़होईन हवें, एमन में ले कोनो एकस हवें, कि जब ले परमेस्वर कर राएज ला देख नई लेहीं, तब ले नई मरहीं।”
ईसू कर रूप हर बदलीस
(मत्ती 17:1-8; मरकुस 9:2-8)
28ए बात हर होए कर करीबन आठ दिन कर पाछू, ईसू हर पतरस, यूहन्ना अऊ याकूब कर संगे पराथना करे बर पहार में गईन। 29जे घनी ओ पराथना करतेच रहीस, त ओकर चेहरा कर रूप हर बदेल गईस, अऊ ओकर ओढ़ना हर ढेरेच उजर होए के चमके लागीस। 30त तुरतेंच दुई ठे मईनसे मन, ओकर जग परगट होए के गोठियात रहीन, अऊ ओमन तईहा जुग कर अगमजानी मूसा अऊ एलीयाह रहीन। 31ओमन महिमा कर संगे दिखत रहीन। ईसू कर मरे कर बारे में गोठियात रहीन, जेला ओके यरूसलेम में पूरा करे बर रहीस। 32ओही घनी पतरस अऊ ओकर संगता मन नींद में माते रहीन, अऊ जे घनी जागीन, त ओमन ईसू कर महिमा, अऊ ओकर संगे दुई ठे मईनसे मन ला ठड़होवल देखीन। 33जे घनी ओ दुनो झे ईसू जग ले जाए लागीन, त पतरस हर ईसू जग कहीस, “ए मालीक, हमरे एजग रहतेन, त ढेरेच बढ़िहां होतीस, एकरे ले हमरे तीन गोट झाला बनाबो, एगोट तोर बर, एगोट मूसा बर, अऊ एगोट एलियाह बर।” पतरस नई जानत रहीस, कि ओहर का कहथे। 34ओहर ए कहतेच रहीस, तेहीच घनी, बदरी हर आए के ओमन ला ढांएप लेहीस, अऊ जे घनी ओमन बदरी में ढपाए लागीन, त डराए गईन 35ते घनी ओ बदरी ले एगोट गोएठ सुनाईस, “एहर मोर चुनल बेटा लागे, एकर गोएठ ला सुना।” 36ए गोएठ ला सुईन के ओमन इते-ऊते ला देखे लागीन, त ओजग ईसू कर छोंएड़ अऊ कोनोच के नई पाईन, त ओमन चुप होए गईन, अऊ जे जाएत ओमन देखे रहीन, ओकर बारे में ढेरेच दिन ले ककरो जग गोएठ बात नई करीन।
दुस्टआत्मा धरल लईका ला ईसू चंगा करथे
(मत्ती 17:14-18; मरकुस 9:14-27)
37तेकर दूसर दिन, ईसू अऊ ओकर तीन ठे चेला मन पहार ले उतरीन, त एगोट बड़खा भीड़ ईसू जग मिले बर आईस। 38सुना, ओ भीड़ में ले एगोट मईनसे हर किरलाए के कहीस, “ए गुरूजी, मंए तोर जग बिनती करथों, कि मोर बेटा कर ऊपरे दया कएर के ओके बचाए ले, काबरकि ओ मोर एकेच ठन बेटा हवे। 39सुन, एगोट दुस्टआत्मा हर ओके धरथे, अऊ ओहर अचाकन किरलाए उठथे, अऊ दुस्टआत्मा हर ओके अईसना मूरकेटथे, कि ओकर लार गंजार निकले लागथे, अऊ ओके सताथे अऊ ढेरेच मुसकिल ले छोंड़थे। 40मंए तोर चेला मन जग बिनती करें, कि ओमन ओ दुस्टआत्मा ला निकाएल दें, बकिन निकाले बर नई सकीन।” 41ईसू हर जबाब देहीस, “ए बिस्वास नई करोईया, अऊ भटकल मईनसे मन, मंए केतना दिन ले तुमन कर संगे रहूं, अऊ तुमन कर गोएठ ला सहत रहूं? तोर बेटा ला एजग लान।” 42जे घनी ओमन लईका ला लानत रहीन, तेहीच घनी ओ दुस्टआत्मा हर ओके पटेक के मुरकेट देहीस, बकिन ईसू हर दुस्टआत्मा ला डांटीस, अऊ लईका ला ठीक कएर के ओकर दाऊ ला सोंएप देहीस। 43तेकर सबेच मईनसे मन, परमेस्वर कर बड़खा सामर्थ कर काम ला देख के, अकचकाए गईन।
ईसू हर, अऊ एक दाएर अपन मिरतु कर अगमबानी करथे
(मत्ती 17:22-23; मरकुस 9:30-32)
बकिन जे घनी सब मईनसे मन ओ काम ला, जेला ईसू करत रहीस, देख के अचमहों होए गईन। त ईसू हर अपन चेला मन ला कहीस 44“तुमन ए गोएठ ला धियान लगाए के सुना, अऊ सुरता करा, काबरकि मंए, मईनसे कर बेटा अपन दुसमन मन कर हाथ में धरुवाए जाए बर हों।” 45बकिन चेला मन, जे गोएठ ला ईसू हर गोठियात रहीस ओला नई समझत रहीन, अऊ ए बात हर ओमन जग ले लुकाए रहीस, तेमेकि ओमन एला झईन जाएन पाएं, अऊ ओमन ए गोएठ कर बारे में, ईसू जग पूछे बर डरावत रहीन।
कोन बड़खा हवे
(मत्ती 18:1-5; मरकुस 9:33-37)
46फेर चेला मन में ए बहस होए लागीस, कि हमन में ले सबले बड़खा कोन हवे? 47बकिन ईसू हर, ओमन कर मन कर बिचार ला जाएन गईस, अऊ एगोट लईका ला धईर के, अपन आगू में ठड़हुवाए देहीस, 48अऊ ओमन जग कहीस, “जे कोनो मोर नांव में, ए लईका ला अपनाथे, ओहर मोके अपनाथे, अऊ जे कोनो मोके अपनाथे, ओहर मोर दाऊ जेहर मोके भेजीस हवे ओके ला अपनाथे, काबरकि तुमन में ले जेहर सबले छोटे हवे, ओही हर सब झन ले बड़े हवे।”
49एला सुईन के यूहन्ना हर ईसू जग कहीस, “ए गुरूजी, हमरे एगोट मईनसे ला, तोर नांव ले दुस्टआत्मा ला निकालत देखेन, हमरे ओके रोकेन काबरकि ओहर हमर संगे होए के, तोर पाछू में नई चले।” 50बकिन ईसू हर कहीस “ओके झईन रोका, काबरकि जेमन तुमन कर बिरोध में नईएं, ओमन तुमन कती हवें।”
सामरी मन कर द्वारा ईसू कर बिरोध
51जे घनी ईसू कर सरग में जाए कर दिन हर, ठांवें आए गए रहीस, त ओहर यरूसलेम जाए कर बिचार ठाएन लेहीस। 52ईसू हर अपन जाए कर आगू, सामरी मन कर एगोट गांव में अपन खभरीहा मन ला भेजीस, कि ओकर आए बर जघा तियार करें। 53तेकर ओमन ऊहां पहुंचीन, बकिन उहां कर मईनसे मन ओकर सवागत नई करीन, अऊ वापिस फिराए देहीन, काबरकि ओमन जाएन गईन, कि ईसू यरूसलेम सहर कती जाथे। #9:53 सामरी अऊ यहूदी मन कर मझारे दुसमनी रहीस, तेकर ले यहूदी मन कर जघा में “यरूसलेम” जवईया ईसू कर सवागत, सामरी मन नई करीन। 54एला देख के ईसू कर चेला, याकूब, अऊ यूहन्ना हर कहीन, “ए परभू, का हमन#9:54 तनिक हाथ ले लिखल किताब मन में एहू कस लिखल हवे “एलीयाह अगमजानी कस” सरग ले आगी गिराए के, एमन ला भसम कएर देई। सरग ले आगी गिराए के, एमन ला भसम कएर देई?” 55बकिन ईसू हर, पाछू कती देख के ओमन ला घुड़काईस अऊ कहीस “तुमन नई जानत, हवा कि तुमन का कहत हवा, #9:55 कोनो हाथ ले लिखल किताब में ए भाग हर नईए। काबरकि मईनसे कर बेटा, मईनसे मन कर परान ला नास करे बर नहीं, बलकि परान ला बचाए बर आईस हे।” 56फेर ओजग ले ओमन कोनो दूसर गांव में चएल देहींन।
ईसू कर चेला बने कर कीमत
(मत्ती 8:19-22)
57जे घनी ओमन डगर में जात रहीन, त कोनो हर ईसू ला कहीस, “जिहां-जिहां तंए जाबे, मंहू तोर पाछू-पाछू जाहूं।” 58फेर ईसू हर कहीस, “सिटका मन कर रहे बर माड़ा, अऊ अगास कर चराई मन बर तो खोंता रथे, बकिन मंए, मईनसे कर बेटा मोर बर बिसोए कर जघोच नईए।” 59ईसू हर दूसर झन ला कहीस, “मोर पाछू होए ले।”#9:59 “पाछू होए ले” कर मतलब एकस हवे कि ईसू कर चेला बएन जा। त ओहर कहीस, “ए परभू, मोके जाए दे, कि मंए आगू मोर मरल दाऊ ला माटी दे आओं।” 60ईसू हर ओके ला कहीस, “मरल मन ला अपन मुरदा ला गाड़े दे, बकिन तंए जाए के, परमेस्वर कर राएज कर बारे में परचार कर।”#9:60 “मरल मन ला अपन मुरदा ला गाड़े दे” एजग मरल मन कर मतलब हवे आत्मिक रूप ले मरल मईनसे मन। 61फेर अऊ एक झन हर कहीस, “ए परभू, मंए तोर चेला बएन जाहूं, बकिन आगू मोके जाए दे, कि अपन घर कर मईनसे मन जग ले, बिदा लेके आओं।” 62ईसू हर ओके ला कहीस, “जे कोनो हर नांगर कर मुठीया ला धएर के, पाछू कती ला देखथे, ओहर परमेस्वर कर राएज कर लाएक नईए।” #9:62 एकर आत्मिक मतलब एकस हवे कि जे कोनो परभू में चले बर सुरू करथे, ओहर फेर संसार कती फिर के नई आए।
Aktualisht i përzgjedhur:
लूका 9: SGJ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© (Active) Wycliffe Bible Translators, Inc. All rights reserved.