लूका 10
10
परभू ईसू अपन सतर चेला मन ला भेजथे
1एकर पाछू परभू हर, अऊ सतर#10:1 कुछ हाथ कर लिखल किताब में सतर कर जघा में बहतर लिखल हवे। झन मईनसे मन ला ठहराईस, अऊ जे-जे सहर अऊ जघा में, ओके जाए बर रहीस, उहां दुई-दुई झन ला अपन ले आगू भेज देहीस। 2ईसू हर ओमन ला कहीस, “पाकल फसल तो ढेरेच हवें, बकिन बनिहार थोरहें हवें, एकरले परभू जेहर खेत कर मालीक हवे, ओकर जग बिनती करा कि ओहर अपन खेत कर फसल ला, लुए बर बनिहार ला भेज दे। 3अझेर जावा, सुरता राखीहा कि मंए तुमन ला, बिगुवा मन कर मझारे भेंड़ कस भेजत हों। 4एकरले तुमन जाए घनी, अपन बर पईसा कर थईला, झोला अऊ पनही झईन धरीहा, अऊ डगरे कोनो के झईन जोहारीहा। 5जे कोनो घर में तुमन जईहा, त ओ घर ला आगू, ए आसीस देईहा कि परमेस्वर कर सांती ‘ए घर में बनल रहे।’ 6अगर उहां कोनो हर आसीस पाए कर लाएक होही, त तुमन कर देहल आसीस हर उहां बने रही, नहीं तो तुमन जग फिर आही। 7जे घनी कोनो सहर में पहुंचिहा, त एगोट घर ले दूसर घर में झईन बुलीहा। एकेच ठन घर में रईहा अऊ जे जाएत खाए बर तुमन ला देहीं, ओही ला खईहा-पीहा। काबरकि बनिहार हर, अपन बनी पाए कर लाएक हवे। 8जे सहर में तुमन जईहा, अगर उहां कर मईनसे मन तुमन कर सवागत करहीं, अऊ जे जाएत तुमन कर आगू में परोसहीं, ओही ला खईहा। 9उहां कर बेमरीहा मन ला चंगा करीहा, अऊ ओमन ला कईहा, ‘परमेस्वर कर राएज हर, तुमन कर ठांवें आए पहुंचीस हवे।’ 10बकिन जे सहर में तुमन जईहा, अऊ अगर ओ सहर कर मईनसे मन, तुमन कर माएन-मरजाद नई करहीं, त ओमन कर गली में जाए के कईहा, 11‘तुमन कर सहर कर धुररो हर, जेहर हमर गोड़े लोटीसे, ओला हमन तुमन कर आगू में झराए देहथी, तबो ले एला देख के जाएन लेआ कि परमेस्वर तुमन कर नियाओ करही, अऊ परमेस्वर कर राएज हर, तुमन कर ठांवें आए पहुंचीस हवे।’ 12मंए तुमन ला फूरोंच कहथों, कि परमेस्वर कर नियाओ करे कर दिन में, दुस्ट सदोम#10:12 सदोम कर मईनसे मन ढेरेच बड़खा पापी रहीन। #उत्पत्ति 18:20सहर कर दंड ले बगरा, ए सहर कर दंड हर होही।”
अबिस्वासी सहर कर ऊपरे हाय
(मत्ती 11:20-24)
13“ए खूराजीन, ए बेतसएदा, कर मईनसे मन तुमन ऊपरे हाय! जे चमत्कार ला मंए तुमन कर दुनो सहर में करे हों, अगर ओहर सूर अऊ सएदा कस दुस्ट सहर में करल गए रतीस, त कब ले ओमन बोरा ला ओढ़ के, अऊ राख में बईठ के, मन ला फिराए लेहे रहतीन। #10:13 बोरा पहिरे कर मतलब हवे कि अपन पाप ले पछताप करे। 14बकिन परमेस्वर कर नियाओ करे कर दिन में, सूर अऊ सएदा सहर कर दंड ले, तुमन कर दंड हर ढेरेच बगरा होही। 15अऊ ए कफरनहूम सहर, का तंए सरग तक पहुंचबे? नहीं, तंए तो पताल लोकोच ले तरी जाबे। 16जे तुमन कर गोएठ ला मानथें, ओमन मोके मानथें, अऊ जेमन तुमन ला नकारथें, ओमन मोके ला नकारथें, अऊ जेमन मोके नकारथें, ओमन मोर भेजोईया परमेस्वर ला नकारथें।”
सतर चेला मन फिर के आईन
17तेकर ओ सतर झेमन आनंद करत फिरीन, अऊ कहे लागीन, “ए परभू, तोर नांव लेहे ले तो दुस्टआत्मा मन भी, हमर बस में रथें।” 18तब ईसू हर ओमन ला कहीस, “मंए सैतान ला सरग ले, बिजली कस गिरत देखत रहें। 19सुना, मंए तुमन ला, सब सांप अऊ बिछी ला दरमेसे कर, अऊ दुसमन कर सब सक्ति कर ऊपरे अधिकार देहे हों, अऊ कोनोच जाएत ले तुमन कर कांही नास नई होही। 20तबो ले तुमन एकर बर खुस झईन होवा, कि दुस्टआत्मा मन, तुमन कर बस में रथें, बकिन एकर बर खुस होवा, कि तुमन कर नांव हर सरग में लिखल हवे।”
ईसू हर दाऊ परमेस्वर कर धनबाद करथे
(मत्ती 11:25-27; 13:16-17)
21ओही घनी ईसू हर, पबितर आत्मा में आनंद ले भईर गईस अऊ कहीस, “ए दाऊ, सरग अऊ धरती कर परभू, मंए तोर धनबाद करथों, कि तंए ए बात मन ला, जेमन अपन आप ला गियानी अऊ समझदार समझथें, ओमन ले लुकाए के राखे, बलकि जेमन लईका सहींक हवें, ओमन कर ऊपरे परगट करे। हां, ए दाऊ, काबरकि एही हर तोके बढ़िहां लागीस। 22मोर दाऊ हर मोके ला, सब जाएत कर अधिकार देहीस हवे, अऊ कोनो नई जानें कि बेटा कोन लागे, सिरीप दाऊ हर जानथे, अऊ दाऊ कोन लागे एहू ला कोनो नई जानें सिरीप बेटा हर जानथे, अऊ जेकर ऊपरे बेटा हर दाऊ ला, परगट करे बर चाहथे, ओही हर जानथे।” 23तब ईसू हर चेला मन कती फिर के एके झन में कहीस, “जे चीज ला तुमन अझेर देखथा, ओला देखे बर तुमन केतना धन्य हवा। 24काबरकि मंए तुमन ला कहथों, कि ढेरेच अगमजानी मन अऊ राजा मन चाहीन कि ओमन ओ बात ला देखें अऊ सुनें, जे बात ला तुमन मोके करत देखेहा, अऊ मोके कहत सुनेहा, बकिन ओमन ओ बात ला देखे नई सकीन, अऊ सुने नई सकीन।”
दयालू सामरी कर अहना
25एक दिन एगोट यहूदी कानहूंन सिखोईया हर, ईसू कर परीछा लेहे बर पूछीस, “ए गुरूजी, अमर जिनगी पाए बर मंए का करों?” 26ईसू हर ओके ला कहीस, “तुमन कर धरम कर कानहूंन में का लिखल हवे? तंए ओला कईसे समझथस?” 27ओहर जबाब देहीस, “तंए परभू अपन परमेस्वर ला, अपन सबेच मन, अऊ अपन सबेच परान, अऊ अपन सबेच सक्ति ले, अऊ अपन सबेच बुद्धि ले मया कर, अऊ अपन परोसी जग अपनेच कस मया कर।” 28ईसू हर ओके ला कहीस, “तंए सही जबाब देहे, एही कस करबे, त तंए अमर जिनगी ला पाबे।” 29बकिन ओहर अपन-आप ला सही देखाए बर ईसू जग पूछीस, “त मोर परोसी कोन लागे?”
30ईसू हर एगोट कहनी बताए के, ओके ला जबाब देहीस, “एगोट मईनसे हर यरूसलेम ले एरीहो सहर जात रहीस, तब डांकू मन ओकर ओढ़ना ला लुईट लेहीन, अऊ माएर-पीट के दरमरहा छोंएड़ के चईल देहीन। 31अऊ एकस होईस, कि ओही डगर में ले एगोट यहूदी याजक हर जात रहीस, बकिन ओ मईनसे ला ओजग देख के, दूसर डगर में चईल देहीस। 32एही कस एगोट लेवी मईनसे हर, ओही जघा में आईस, अऊ ओहूच हर, ओ दरमरहा मईनसे ला ओजग के देख के, दूसर डगर में चएल देहीस। 33बकिन सामरी इलाका कर एगोट मईनसे हर, ओही डगर में जात रहीस, अऊ ओजग ओ दरमरहा मईनसे ला देखीस, त ओकर ऊपर सोगे होईस। #10:33 यहूदी मन सामरी मन ला नीच जाति कर समझत रहीन, तेकर ले यहूदी मन सामरी मन ला घिरना करत रहीन अऊ नई पतियावत रहीन। 34ओहर ओकर जग आए के, ओकर घाव में तेल अऊ अंगूर कर रस ला लगाईस, अऊ मलहम पटी बांधीस, अऊ अपन गदहा में चघाए के धरमसाला में ले गईस, अऊ ओकर सेवा-जतन करीस। 35दूसर दिन सामरी हर, दुई दिनार जेहर दुई दिन कर बनी कर बरोबर रहीस, निकाएल के धरमसाला कर मालीक ला देहीस अऊ कहीस, एकर सेवा-जतन करबे, अऊ जेतना अगराहा तोर खरचा होए रही, ओला मंए फिर के आहूं, त तोके दे देहूं।” 36तेकर ईसू हर कहीस, “अब तोर बिचार में, ए तीनों में ले, कोन हर ओ डांकू मन ले मारल मईनसे कर परोसी होईस?” 37ओ कानहूंन कर सिखोईया हर, ईसू ला कहीस, “ओही हर, जेहर ओकर ऊपरे दया करीस।” ईसू हर ओके ला कहीस, “जा, तंहू अईसनेच कर।”
मरियम सबले बढ़िहां भाग ला चुनथे
38जे घनी ईसू अऊ ओकर चेला मन जात रहीन, त एगोट गांव में पहुंचीन, जिहां मारथा नांव कर एगोट सवांगीन हर, ईसू ला अपन घरे बलाईस। 39मारथा कर एगोट बहिन रहीस, जेकर नांव मरियम रहीस। ओहर ईसू कर गोड़ तरी बईठ के, ओकर बचन ला सुनत रहीस। 40बकिन मारथा हर, सेवा करत-करत परेसान होए गईस। तेकर ईसू जग जाए के कहीस, “ए परभू, का तोके तनिकोच धियान नईए, कि मोर बहिन हर, सेवा-सतकार कर सब बोझ ला मोर ऊपरे डाएल देहीसे? तंए ओके ला कह कि ओहर मोर मदेत करे।” 41परभू हर ओके जबाब देहीस, “मारथा, ए मारथा, तंए ढेरेच बात कर चिंता करथस, अऊ परेसान होए जाथस। 42बकिन सिरीप एकेच ठन बात कर जरूरत हवे, अऊ ओ सबले बढ़िहां भाग ला, मरियम हर चुईन लेहीस हवे, जेला ओकर जग ले कभों लेहल नई जाही।”
Aktualisht i përzgjedhur:
लूका 10: SGJ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© (Active) Wycliffe Bible Translators, Inc. All rights reserved.