Psom 5
5
Segner, donn mwa to proteksion
Pou sef koral, pou akonpagnman ar laflit. Enn Psom David.
1SEGNER, ekout mo lapriyer,
e tann mo douler kriye.
2Twa mo Bondie, mo Lerwa,
ekout mwa kan mo kriye twa,
se twa ki mo priye.
3SEGNER, boner gramatin to tann mo lavwa;
kouma soley leve mo prepar tou pou twa#5:3 Enn lot posibilite: kouma soley leve mo ofer twa mo sakrifis; oubien, mo ofer twa mo lapriyer.
e lerla mo atann.
4To pa enn Bondie ki pran plezir dan lemal;
seki fer lemal pena plas kot twa.
5Bann vantar pa pou tini dibout divan twa;
to deteste move dimounn.
6To detrir bann manter,
SEGNER, to ayir bann kriminel ek bann voler.
7Akoz labondans to gran lamour infini
mo pou kapav rant dan to lakaz,
bes mo latet dan direksion to Tanp sakre,
e avek gran respe mo pou azenou.
8SEGNER, twa ki zis, gid mwa, ena boukou ki pe kasiet pou atak mwa.
Tir tou bann obstak ki ena lor sime tonn montre mwa pou swiv.
9Pa kapav fer konfians seki sorti dan labous mo lennmi;
zot lespri ranpli ar destriksion;
zot lagorz kouma tonbo ouver;
zot lalang servi pou tronp dimounn.
10Bondie, deklar zot koupab;
fer ki zot prop konplo devir zot anba-lao;
pous zot andeor to prezans akoz zot bann pese
parski zot finn revolte kont twa.
11Me tou ki konfie zot ar twa pou gagn to proteksion;
zame zot pou fini sante ar sa lazwa la;
protez bann ki kontan to nom,
akoz twa zot kriye ar lazwa.
12Wi, twa, SEGNER, to beni bann ki obeir twa,
to gran lamour anvlop zot e protez zot parey kouma enn boukliye.
Aktualisht i përzgjedhur:
Psom 5: KMNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Nouvo Testaman Kreol Morisien Harmonisation NTPS KM © Bible Society of Mauritius, 2021.