मरकुस 9
9
1यीसु, चेलन से कहिन, “हम तोंहसे सही कहित हएन, कि जऊँ इहाँ ठाढ़ हें, उनमा से कुछ जने अइसन हें, कि जब तक परमातिमा के राज काहीं पूरी सामर्थ समेत आबत न देख लेइहँय, तब तक ऊँ पंचे बेलकुल न मरिहँय।”
यीसु के रूप बदलब
(मत्ती 17:1-13; लूका 9:28-36)
2छय दिना के बाद यीसु, पतरस अउर याकूब अउर यूहन्ना काहीं अपने साथ माहीं लइके, एकान्त माहीं कउनव ऊँच पहार माहीं गें। अउर उनखे अँगुअय यीसु के रूप बदलिगा। 3अउर यीसु के ओन्हा अइसन चमकँइ लाग, अउर एतना उजर होइगा, कि सगली धरती माहीं कउनव धोबी घलाय उआमेर उजर नहीं कइ सकय। 4अउर तिनहूँ चेलन काहीं मूसा नबी के साथ एलिय्याह देखाने, ऊँ दोनव जने यीसु के साथ बातँय करत रहे हँय। 5इआ देखिके पतरस यीसु से कहिन, “हे गुरू, हमार पंचन के इहाँ रहब निकहा हय; एसे हम पंचे इहाँ तीनठे मड़इआ बनाई; एकठे अपना के खातिर, एकठे मूसा नबी के खातिर, अउर एकठे एलिय्याह नबी के खातिर।” 6काहेकि पतरस इआ नहीं जाने पाबत रहे आँय, कि हम उनसे का कही, एसे कि ऊँ पंचे खुब डेराइगें रहे हँय। 7तबहिनय एकठे उजर बदरी आइके उनहीं पंचन काहीं लुकाय लिहिस, अउर उआ बदरी से इआ बोल सुनान: कि “ईं हमार पियार लड़िका आहीं, तूँ पंचे इनखे बातन काहीं मान्या।” 8तब ऊँ पंचे अचानक चारिव कइती निहारँइ लागें, अउर यीसु के अलाबा अउर कोहू काहीं अपने साथ नहीं देखिन।
9पहार से नीचे उतरत समय, यीसु उनहीं हुकुम दिहिन, कि जब तक मनई के लड़िका मरिके जिन्दा न होइ जाय, तब तक जऊँ कुछू तूँ पंचे देखे हया, उआ कोहू से न बताया। 10तिनहूँ चेला इआ बात काहीं याद रक्खिन; अउर कोहू से नहीं कहिन, पय आपस माहीं सोच-बिचार करँइ लागें, कि “मरेन म से जि उठँइ के का मतलब होइ सकत हय?” 11अउर ऊँ पंचे यीसु से पूँछिन, कि “मूसा के बिधान सिखामँइ बाले इआ काहे कहत हें, कि मसीह से पहिले एलिय्याह नबी जरूर अइहँय?” 12तब यीसु उनहीं पंचन काहीं जबाब दिहिन, कि “एलिय्याह नबी जरूर अइहँय, अउर मसीह काहीं सोइकार करँइ के खातिर, मनइन काहीं तइआर करिहँय, पय मनई के लड़िका के बारे माहीं, पबित्र सास्त्र म इआ काहे लिखा हय, कि उआ खुब दुख सही; अउर तुच्छ गिना जई? 13पय हम तोंहसे कहित हएन, कि वास्तव माहीं एलिय्याह त आय चुके हँय, अउर उनखे बारे माहीं पबित्र सास्त्र म लिखा हय, कि परमातिमा के सँदेस काहीं न मानँइ बाले लोग, जइसन चाहिन उनखे साथ उहइमेर बरताव किहिन।”
बुरी आत्मा से परेसान लड़िका काहीं नीक करब
(मत्ती 17:14-21; लूका 9:37-43)
14जब यीसु पहार से उतरिके चेलन के लघे आएँ, त देखिन कि उनखे चारिव कइती बड़ी भीड़ लगी हय, अउर मूसा के बिधान सिखामँइ बाले उनसे बहँस कइ रहे हँय। 15यीसु काहीं देखतय सगले जन चउआन रहिगें, कि यीसु कहाँ से आइगें, अउर उनखे कइती दउड़िके नबस्कार किहिन। 16यीसु मूसा के बिधान सिखामँइ बालेन से पूँछिन, “तूँ पंचे हमरे चेलन से काहे बिबाद करते हया?” 17भीड़ म से एकठे मनई उनहीं जबाब दिहिस, “हे गुरू, हम अपने लड़िका काहीं, जउने म गूँगी आत्मा सकान ही, अपना के लघे लइ आएन तय। 18जहँइठे गूँगी आत्मा ओही पकड़त ही, ओहिनठे ओही पटक देत ही: अउर ओखे मुँहे म फेन भरि आबत हय, अउर खुब दाँत पीसत हय, अउर उआ झुरान जात हय, हम अपना के चेलन से कहेन कि उआ गूँगी आत्मा काहीं निकार देई, पय ऊँ पंचे नहीं निकारे पाइन।” 19इआ बात सुनिके यीसु उनहीं जबाब दइके कहिन, “हे परमातिमा के ऊपर बिसुआस न करँइ बाले हठी मनइव, हम कब तक तोंहरे साथ रहब, अउर कब तक तोंहार सहत रहब? उआ लड़िका काहीं हमरे लघे लइ आबा।” 20तब ऊँ पंचे उआ लड़िका काहीं यीसु के लघे लइ आएँ। अउर जइसय उआ गूँगी आत्मा यीसु काहीं देखिस, तुरन्तय उआ लड़िका काहीं मुरेर के भुँइ म पटक दिहिस, अउर उआ मुँहे माहीं फेन बहाए लोटँय लाग। 21यीसु उआ लड़िका के बाप से पूँछिन, “इआ लड़िका के इआ हालत कब से ही।” लड़िका के बाप कहिस, “बचपन से।” 22अउर लड़िका के बाप यीसु से कहँइ लाग, “इआ गूँगी आत्मा लड़िका काहीं मारँइ के खातिर, कबहूँ आगी म, त कबहूँ पानी म पटक देत ही; पय अगर अपना कुछू कइ सकी त हमरे ऊपर तरस खाइके हमार मदत करी।” 23इआ सुनिके यीसु उआ लड़िका के बाप से कहिन, “अगर अपना कुछू कइ सकी? इआ कउनव बात आय! जे कोऊ परमातिमा के ऊपर बिसुआस करत हय, ओखे खातिर सब कुछ होइ जात हय।” 24लड़िका के बाप हरबिन गिड़गिड़ाइके यीसु से कहिस, “हे प्रभू, हम अपना के ऊपर बिसुआस करित हएन, हमरे ऊपर किरपा करी, कि हम पूरे मन से बिसुआस कइ सकी।” 25जब यीसु देखिन कि खुब मनई दउड़-दउड़िके भीड़ लगाए लेथें, तब यीसु बुरी आत्मा काहीं इआ कहिके डाँटिन, “हे गूँगी-बहिरी आत्मा, हम तोही हुकुम देइत हएन, कि इआ लड़िका से निकर जा, अउर एखे भीतर पुनि कबहूँ न सकए।” 26तबहिन उआ बुरी आत्मा चिल्लाइके, उआ लड़िका काहीं खुब मुरेरिके निकरिगे; अउर उआ लड़िका मरा कि नाईं परा रहिगा। उहाँ ठाढ़ कुछ मनई कहँइ लागें, कि लागत हय लड़िका मरिगा। 27पय यीसु उआ लड़िका के हाँथ पकड़िके उठाइन त उआ ठाढ़ होइगा। 28जब यीसु उहाँ से लउटिके घर म आएँ, तब उनखर चेला लोग अकेले माहीं उनसे पूँछिन, “हम पंचे उआ बुरी आत्मा काहीं काहे नहीं निकारे पाएन?” 29यीसु अपने चेलन से कहिन, “इआमेर के गूँगी आत्मा परमातिमा से प्राथना करँइ के अलाबा, अउर कउनव उपाय से नहीं निकारी जाय सकय।”
अपने मउत के बारे माहीं यीसु के पुनि भबिस्सबानी
(मत्ती 17:22-23; लूका 9:43-45)
30यीसु अपने चेलन के साथ उआ घर से चल दिहिन, अउर गलील प्रदेस से होइके जात रहे हँय! यीसु इआ चाहत रहे हँय, कि कोऊ जाने न पामय कि ऊँ कहाँ जाथें। 31काहेकि यीसु अपने चेलन काहीं परमातिमा के सँदेस के बातन काहीं सिखाबत रहे हँय, अउर उनसे कहत रहे हँय, कि “मनई के लड़िका, बिरोध करँइ बाले मनइन के हाँथ माहीं पकड़ाबा जई, अउर ऊँ पंचे ओही मारि डरिहँय, अउर उआ मरिके तीन दिन बाद पुनि जिन्दा होइ जई।” 32पय यीसु के इआ बात चेलन के समझ माहीं नहीं आई, अउर ऊँ पंचे यीसु से पूछँइ माहीं डेरात रहे हँय।
सबसे बड़ा को हय?
(मत्ती 18:1-5; लूका 9:46-48)
33पुनि यीसु अपने चेलन के साथ कफरनहूम सहर म पहुँचिके; एकठे घर माहीं आइके अपने चेलन से पूँछिन, “गइल म तूँ पंचे कउने बात माहीं बहँस करत रहे हया?” 34ऊँ पंचे कुछू नहीं बोले, काहेकि गइल माहीं चेला लोग आपस माहीं इआ बहँस करत रहे हँय, कि हमरे पंचन म से सबसे बड़ा को हय? 35तब यीसु बइठिके बरहँव चेलन काहीं अपने लघे बोलाइन, अउर उनसे कहिन, “अगर कोऊ सगलेन से बड़ा होंइ चाहत हय, त उआ सगलेन से छोट अउर सगलेन के सेबा करँइ बाला बनय।” 36अउर यीसु एकठे छोट क लड़िका काहीं लइके सगलेन के बीच माहीं ठाढ़ किहिन, अउर पुनि उआ लड़िका काहीं अपने पलथी माहीं बइठाइके उनसे कहिन, 37“जे कोऊ हमरे नाम से इआमेर के लड़िकन म से कउनव एकठे काहीं सोइकार करत हय, त उआ हमहीं सोइकार करत हय, अउर जे कोऊ हमहीं सोइकार करत हय, उआ हमहिन भर क नहीं, बलकिन हमहीं पठमँइ बाले परमातिमा काहीं सोइकार करत हय।”
जउन बिरोध माहीं नहिं आय उआ अपने कइती हय
(लूका 9:49-50)
38तब यूहन्ना यीसु से कहिन, “हे गुरू, हम पंचे एकठे मनई काहीं अपना के नाम से बुरी आत्मन काहीं मनइन म से निकारत देखेन, त हम ओही बरजेन कि तूँ अइसा न करा, काहेकि उआ मनई हमरे पीछे नहीं आबत रहा आय।” 39यीसु यूहन्ना से कहिन, “उआ मनई काहीं न बरजा; काहेकि अइसा कउनव मनई नहिं आय, जऊँ हमरे नाम से सामर्थ के काम करय, अउर हरबिन हमहीं बुरा कहि सकय, 40काहेकि जे कोऊ हमरे बिरोध म नहिं आय, उआ हमरिन कइती हय। 41जे कोऊ एक गिलास पानी तोहईं इआ जानिके पिआई, कि तूँ पंचे मसीह के चेला आह्या, त हम तोंहसे सही कहित हएन, कि उआ मनई ओखर प्रतिफल जरूर पाई।”
जे कोऊ दुसरे से पाप कराबत हय
(मत्ती 18:6-9; लूका 17:1-2)
42यीसु अपने चेलन से कहिन, “जे कोऊ हमरे ऊपर बिसुआस करँइ बालेन काहीं, चाह उआ छोट क लड़िकय होय, कउनव से पाप कराबत हय, त उआ मनई के खातिर इआ ठीक कहाई, कि एकठे बड़ी काहीं चक्की के जेतबा ओखे गरे माहीं बाँधिके, समुद्र माहीं फेंक दीन जाय, काहेकि परमातिमा के सजा एहू से जादा मिली। 43अगर तोंहार हाँथ तोंहसे पाप करामँइ के कारन बनत हय, त तूँ अपने हाँथ काहीं काटि डारा, बिना हाँथ के स्वरगराज माहीं जाब, दोनव हाँथन काहीं लए, नरक के आगी माहीं डारे जाँइ से निकहा हय, जउन कबहूँ बुझातिन नहिं आय। 44(जहाँ उनखर किरबा कबहूँ नहीं मरँय, अउर न कबहूँ ओखर आगिन बुझाय।) 45अगर तोंहार गोड़ तोंहसे पाप करामँइ के कारन बनत हय, त तूँ ओही काटि डारा, बिना गोड़ के स्वरगराज माहीं जाब, नरक के आगी माहीं डारे जाँइ से निकहा हय, 46(जहाँ उनखर किरबा कबहूँ नहीं मरँय, न कबहूँ ओखर आगिन बुझाय।) 47अउर अगर तोंहार आँखी तोंहसे पाप करामँइ के कारन बनत ही, त ओही निकारिके फेंकि द्या; नहीं त दुइठे आँखी लए नरक के आगी माहीं डार दीन जइहा। कनमा होइके परमातिमा के राज माहीं जाब तोंहरे खातिर एसे निकहा हय।” 48(जहाँ उनखर किरबा कबहूँ नहीं मरँय, न कबहूँ ओखर आगिन बुझाय।) 49काहेकि हरेक मनई आगी से नोन कि नाईं सुद्ध कीन जई#9:49 जइसन यहूदी लोग बली माहीं नोन डारत रहे हँय, उहइमेर कस्टन के द्वारा परमातिमा हमहीं पंचन काहीं सुद्ध करत हें।।#लैब्य 2:13 50नोन त निकहा होत हय, पय अगर ओखर सखरई खतम होइ जाय, त दुबारा ओही कउनव चीज से सखार नहीं कीन जाय सकय। इहइमेर अपने भीतर नोन कि नाईं गुन रक्खा, अउर एक दुसरे के साथ मिल-जुलिके रहा।
Aktualisht i përzgjedhur:
मरकुस 9: bag
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Wycliffe Bible Translators, Inc. All rights reserved.