Vargje biblike të njohura nga मरकुस 9

Ndaje

इआ सुनिके यीसु उआ लड़िका के बाप से कहिन, “अगर अपना कुछू कइ सकी? इआ कउनव बात आय! जे कोऊ परमातिमा के ऊपर बिसुआस करत हय, ओखे खातिर सब कुछ होइ जात हय।”

लड़िका के बाप हरबिन गिड़गिड़ाइके यीसु से कहिस, “हे प्रभू, हम अपना के ऊपर बिसुआस करित हएन, हमरे ऊपर किरपा करी, कि हम पूरे मन से बिसुआस कइ सकी।”

जब यीसु उहाँ से लउटिके घर म आएँ, तब उनखर चेला लोग अकेले माहीं उनसे पूँछिन, “हम पंचे उआ बुरी आत्मा काहीं काहे नहीं निकारे पाएन?” यीसु अपने चेलन से कहिन, “इआमेर के गूँगी आत्मा परमातिमा से प्राथना करँइ के अलाबा, अउर कउनव उपाय से नहीं निकारी जाय सकय।”

नोन त निकहा होत हय, पय अगर ओखर सखरई खतम होइ जाय, त दुबारा ओही कउनव चीज से सखार नहीं कीन जाय सकय। इहइमेर अपने भीतर नोन कि नाईं गुन रक्खा, अउर एक दुसरे के साथ मिल-जुलिके रहा।

“जे कोऊ हमरे नाम से इआमेर के लड़िकन म से कउनव एकठे काहीं सोइकार करत हय, त उआ हमहीं सोइकार करत हय, अउर जे कोऊ हमहीं सोइकार करत हय, उआ हमहिन भर क नहीं, बलकिन हमहीं पठमँइ बाले परमातिमा काहीं सोइकार करत हय।”

जे कोऊ एक गिलास पानी तोहईं इआ जानिके पिआई, कि तूँ पंचे मसीह के चेला आह्या, त हम तोंहसे सही कहित हएन, कि उआ मनई ओखर प्रतिफल जरूर पाई।”

यीसु अपने चेलन से कहिन, “जे कोऊ हमरे ऊपर बिसुआस करँइ बालेन काहीं, चाह उआ छोट क लड़िकय होय, कउनव से पाप कराबत हय, त उआ मनई के खातिर इआ ठीक कहाई, कि एकठे बड़ी काहीं चक्की के जेतबा ओखे गरे माहीं बाँधिके, समुद्र माहीं फेंक दीन जाय, काहेकि परमातिमा के सजा एहू से जादा मिली।

अउर अगर तोंहार आँखी तोंहसे पाप करामँइ के कारन बनत ही, त ओही निकारिके फेंकि द्या; नहीं त दुइठे आँखी लए नरक के आगी माहीं डार दीन जइहा। कनमा होइके परमातिमा के राज माहीं जाब तोंहरे खातिर एसे निकहा हय।”