Romanos 2
2
Daizezeba kꞌawua oidꞌebema
1Maʉ̃ba bʉ zhãrã jara bꞌʉra bedꞌea ne ẽãne bꞌarãrũã, bʉa awʉrʉta jarabʉrʉdꞌera bʉzhikusa jarabʉrʉa, bʉa zhãrã jara bꞌʉta abꞌaʉta obꞌʉdꞌeba. 2Kꞌawua bꞌea bia ẽãta obꞌera Daizezebara pua kꞌawua obaria kꞌãrẽ odꞌa wãrãneba. 3Bia ẽãta obada bꞌeta bʉa jara bꞌʉta bʉara abꞌaʉta obꞌʉra, ¿bʉ krĩchama bʉra ẽdrʉika Daizezeba pua kꞌawua oidꞌebara? 4¿O bʉma seri ẽka izha kꞌãbãẽã sozuburia nʉmʉba zrogꞌa bꞌʉra, bʉara kꞌawua ẽã nʉmʉ ẽka izhara sozuburia bꞌʉta kꞌazhiruara ãmape izhita pẽwãmarẽã? 5Mawũãmina bʉ sora zarea nʉmʉã kꞌazhiruata ãmape izhi pẽwãĩrã, mawũẽ izhi kĩrũbita bʉzhikusaita bira wã kĩrũ zuburia oi ewariedꞌa. Maʉ̃nerã kꞌawuabiya sãwũã pua kꞌawua oi bꞌʉdꞌe obʉrʉta Daizezebara. 6Izhara abꞌa abꞌaʉa kꞌãrẽ diaya ãzha kꞌãrẽ odꞌabari. 7Izhi ũme bꞌai jõ ẽãta diaya biata obꞌeba jʉrʉ bꞌea izha bia jaramarẽã, beukꞌata bꞌʉmarẽã. 8Mawũãmina kĩrũ pua kꞌawua oya ãzha krĩñata obꞌeba aribꞌaedꞌa ẽãrã bedꞌea izhidꞌe wãrãta, awuarabʉrʉ obꞌera bia ẽãta. 9Izha pua kꞌawua obʉrʉdꞌera zuburia bꞌeaya, sopua bꞌeaya bia ẽãta obꞌera judíorãta judíorã ẽãta. 10Mawũãmina izhima bia nʉmeba bia jaraya adu-a bꞌeabiya biata obꞌera judíorãta judíorã ẽãta. 11Aramaʉ̃ne Daizezebara zhãrã awuara eda ẽã.
12Moisé ũrãgꞌa ne ẽã bꞌeta kꞌazhiruata obꞌera maʉ̃ ũrãgꞌa ne ẽã aduadꞌaya, Moisé ũrãgꞌa erubꞌeta kꞌazhiruata obꞌera maʉ̃ ũrãgꞌadꞌeba pua kꞌawua okuaya. 13Moisé ũrãgꞌa bari ũrĩ bꞌeba biata duanu ẽã Daizeze kĩrãbitara, awuarabʉrʉ maʉ̃ ũrãgꞌa aribꞌae bꞌeta izhima biata bꞌea. 14Judíorã ẽãba Moisé ũrãgꞌa ne ẽãta maʉ̃ ũrãgꞌadꞌebemata obꞌera ũrãgꞌa ne ẽmina ũrãgꞌata bꞌea ari ãzhita. 15Aramaʉ̃ne ũrãgꞌadꞌebema obꞌeta ũdubi bꞌera zhi bꞌʉma ãzhi sodꞌe, krĩchabara kꞌawua bꞌea kꞌãrẽ obʉdara biata o bia ẽãta, bedꞌea bara bꞌeta o bedꞌea ne ẽã bꞌeta. 16Daizezeba kꞌawua obʉrʉ ewadera zhãrãnebema kꞌawuadꞌa ẽãrã Jesucristodꞌeba kꞌawua oya bedꞌea biata mʉã jara bꞌʉdꞌe.
Judíorãbara aribꞌaedꞌa ẽã ũrãgꞌara
17Marãbara marã judío abꞌeta Moisé ũrãgꞌadꞌeba Daizeze ũme bedꞌea ne ẽãne bꞌea. 18Izha kꞌãrẽ krĩñata kꞌawua bꞌeta ũrãgꞌabara jaradia bꞌʉa kꞌãrẽta biata. 19Jipa edebadadꞌe bꞌea Daizezedꞌebema kꞌawuadꞌa ẽãba daʉbꞌerrea bꞌe kĩrãkꞌa bꞌeta, mazhima ʉ̃nata bꞌea pãrĩguadꞌe bꞌerãĩta. 20Zhi kꞌawua ẽã bꞌeta wũãwũã kĩrãkꞌa bꞌeta ũrãgꞌabadadꞌe bꞌea, Moisé ũrãgꞌata erubꞌedꞌeba kꞌãrẽ kꞌawua bꞌedꞌe bꞌea, kꞌawua bꞌedꞌe bꞌea wãrãta. 21Bʉa awʉrʉ ũrãgꞌa bꞌʉta, ¿kꞌãrẽã zhi ũrãgꞌa ẽpe bʉzhikusara? Nezrʉga ẽbaita jara bꞌʉta, ¿kꞌãrẽã nezrʉga bꞌʉ? 22Kĩma ẽãta erukꞌãĩ ẽbaita jara bꞌʉta, ¿kꞌãrẽã kĩma ẽãta erukꞌãĩ bꞌʉ? Ne zhi zromarãne erubꞌera ũduama bꞌʉta, ¿kꞌãrẽã ne biara maʉ̃rã dedꞌabema zrʉgabari? 23Bʉma bʉara Moisé ũrãgꞌara biodꞌe kꞌawua bꞌʉta, ¿maʉ̃ ũrãgꞌa aribꞌae ẽãba kꞌãrẽã bĩ ẽã jarabi bꞌʉ Daizezera? 24Maʉ̃ẽnabemata zhi bꞌʉmata mawũã bꞌʉa: Judíorã ẽãta bꞌebara Daizezera bĩ ẽã jara bꞌea marãneba.
25Wãrãnebai kꞌakua eta kꞌõ bꞌʉra biga Moisé ũrãgꞌata aribꞌae bꞌʉbʉrʉ, mawũãmina maʉ̃ ũrãgꞌata aribꞌae ẽbʉrʉ bʉ kꞌakua eta kꞌõpe bꞌʉra kꞌakua e kꞌõ ẽkĩrãkꞌa bꞌʉa. 26Aramaʉ̃nerã kꞌakua eta kꞌõ ẽã bꞌʉba Moisé ũrãgꞌata aribꞌae bꞌʉbʉrʉ, ¿kꞌakua e kꞌõ ẽã bꞌʉra kꞌakua e kꞌõpe bꞌʉ kĩrãkꞌa bꞌʉ ẽka? 27Kꞌakua e kꞌõ ẽã bꞌʉba Moisé ũrãgꞌata kĩrãẽpa aribꞌae bꞌʉbara kꞌawuabiya bʉara Moisé ũrãgꞌara kꞌawua bꞌʉta, kꞌakua eta kꞌõpe bꞌʉta aribꞌae ẽãta maʉ̃ ũrãgꞌara. 28Judío arata bꞌʉ ẽã bari ʉ̃rʉ̃ba bꞌʉra, miã kꞌakua e kꞌõpe bꞌʉ ẽã bari ʉ̃rʉ̃ kꞌõ bꞌʉra zharadꞌe. 29Awuarabʉrʉ judío arata bꞌʉa soidꞌu bꞌʉta, kꞌakua e kꞌõpe bꞌʉa soidꞌu bꞌʉta, mawũã bꞌʉa Jawurebiadꞌeba soidꞌu bꞌʉta, aramaʉ̃nerã bari ũrãgꞌata kꞌawua bꞌʉdꞌeba mawũã bꞌʉ ẽã. Mawũã soidꞌu bꞌʉra zhãrãbara ibia jaradꞌa ẽã, awuarabʉrʉ ibia jaraya Daizezeba.
Aktualisht i përzgjedhur:
Romanos 2: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.