Romanos 3
3
1¿Kꞌãrẽ biata bꞌʉ judíota bꞌaira? ¿Kꞌãrẽ biata bꞌʉ kꞌakua eta kꞌõpe bꞌaira? 2Ne biodꞌeba biata bꞌʉa. Mawũã bꞌʉa wãrãnebai naara judíorãã dedꞌekadꞌaba izhi bedꞌeara Daizezebara. 3¿Kꞌõbe sãwũãĩpe ʉ̃kʉrʉ ãzhidꞌebemaba ĩjãna ẽãrã? ¿Mawũã ĩjãna ẽãba izha jaradꞌara aribꞌae ẽka Daizezebara? 4¡Mawũã ẽã! Baribʉrʉ Daizezera wãrĩnu bedꞌea bꞌʉa, maʉ̃ne zhãrã bꞌera jõma sewa nebʉrʉmiã. Maʉ̃ẽnabemata zhi bꞌʉmata mawũã bꞌʉa:
Wãrĩnuã adꞌaya bʉa jarabʉrʉ bedꞌeara, aramaʉ̃ne kiaweya bʉta jibʉrʉra. (Salmos 51:4)
5Dazha bia ẽãta obꞌʉba Daizezera biata ũdubi bꞌʉbʉrʉ, ¿kꞌãrẽta jaradꞌaipe? ¿Daizezera bia ẽka bia ẽãta obʉrʉ kꞌarea zuburia obʉrʉdꞌera? Mʉrã bedꞌea kꞌobꞌʉa zhãrã mawũã bedꞌea bꞌedꞌe. 6¡Mawũã ẽã! Daizezeta biata bꞌʉ ẽbʉrʉ, ¿sãwũã kꞌawua oipe ẽjũãne zhãrã bꞌera? 7Ʉ̃kʉrʉba jarabada kĩrãkꞌa dazhi sewa nebʉrʉ bꞌʉba Daizezera wãrĩnu bedꞌea bꞌʉta kꞌawuabi bꞌʉbʉrʉ, ¿kꞌãrẽã jara bꞌʉ dazhira kꞌazhirua omiãta? 8¿Jaraidꞌe bꞌʉ ẽka daira ewaradꞌe jara panʉta, ʉ̃kʉrʉba dai mawũã jara bꞌera Daizezebara zuburia oidꞌe bꞌʉ ẽka? Daibara mawũã badabidꞌa: ¿Bia ẽãta odꞌaya biata zemarẽã?
Ne ẽã biata bꞌʉra
9¿Mawũẽ sãwũãpe? ¿Dazhirã judíorãta audre biarãkꞌa awʉrʉrã kꞌãñabara? ¡Mawũã ẽã! Daibara kꞌawuabisidꞌa jõma judíorãta judíorã ẽãta kꞌazhirua edre bꞌeta. 10Maʉ̃ẽnabemata zhi bꞌʉmata mawũã bꞌʉa:
Biata bꞌʉra ne ẽã miã abꞌabidꞌa.
11Miõba kꞌawua ẽã kꞌãrẽ sãwũãta, miõba jʉrʉ ẽã Daizezera.
12Izhi maẽbara jõma jãpe nʉmeã, aramaʉ̃ne izhima biata nʉme ẽã. Ne ẽã biata obꞌʉra, ne ẽã miã abꞌabidꞌa. (Salmos 14:1-3; 53:1-3; Eclesiastés 7:20)
13Mitia bedꞌea bꞌeba beudꞌa jou tabꞌʉ uriata mitiata ewa nʉmʉ kĩrãkꞌa bꞌʉa ãzhi nemirã, ãzhi kĩrãmerã sewa nebʉrʉmiã. Zhãrã bĩ ẽã obꞌe bedꞌeara dãma neãrã kĩrãkꞌa bꞌʉa ãzhi i edre. (Salmos 5:9; 140:3)
14Ãzhi ibara zhãrã ikꞌazhirua jara bĩ ẽã bꞌea. (Salmos 10:7)
15Jẽrũ zokea wãẽba bꞌea zhãrã beaita.
16Ne ãrĩkua zhãrã zuburia okua bꞌea ãzhi wã maẽ.
17Aramaʉ̃ne kꞌawua ẽã bꞌea zhãrã bawara adu-a bꞌaira. (Isaías 59:7-8)
18Daizeze wawiaira ne ẽã ãzhi krĩchadꞌera. (Salmos 36:1)
19Kꞌawua bꞌea jõma Daizeze ũrãgꞌaba jara bꞌʉra jara bꞌʉa judíorã maʉ̃ ũrãgꞌa edre bꞌea, aramaʉ̃ne jõma chupea kꞌobꞌedꞌe zhãrã jõma kꞌawua okuaya Daizezebara. 20Daizezeba ũrãgꞌa Moiséa diadꞌata aribꞌae nʉmʉbara beubarira miõta bedꞌea ne ẽã bꞌʉ ẽã Daizeze kĩrãbitara. Awuarabʉrʉ maʉ̃ ũrãgꞌabara kꞌawuabi bꞌʉa dazhira kꞌazhirua omiãta.
Bedꞌea ne ẽã bꞌʉya ĩjãbʉrʉdꞌeba
21Mawũãmina idꞌira Moisé ũrãgꞌa aribꞌaedꞌa ẽãne sãwũã bedꞌea ne ẽã bꞌʉira kꞌawuabisia Daizezebara, maʉ̃ zhi jarama Moisé ũrãgꞌaba, Daizezeba bedꞌeata jarabibarirã bꞌeadꞌaba. 22Zhi jarama Daizezebara bedꞌea ne ẽã bꞌʉita Jesucristodꞌebemata ĩjãbʉrʉdꞌeba, maʉ̃ta izhidꞌebemata ĩjãbʉda jõmaʉ̃ĩtabema, mawũẽ miõta awuara eda ẽã. 23Jõmaʉ̃ba kꞌazhiruara obada, mawũẽ ãĩ bꞌea Daizezeta kĩrãwãrẽãnebara. 24Mawũãmina izhi biaba bari bedꞌea ne ẽã okua bꞌʉa ẽdrʉira nʉmʉba Jesucristodꞌeba. 25Daizezeba dazhi bedꞌea ne ẽã bꞌʉira Jesucristota bꞌʉdꞌata dazhibari wa erezoadꞌata ĩjãbʉrʉdꞌeba nʉmʉã, aramaʉ̃ne izhara sãwũã bedꞌea ne ẽã bꞌʉita kꞌawuabi bꞌʉba zrogꞌa bedꞌea ne ẽã okua bꞌʉa kꞌazhiruata odꞌapeadꞌara nawedꞌa. 26Mawũẽ idꞌi ewadera izha sãwũã bedꞌea ne ẽã bꞌʉita kꞌawuabi nʉmʉrã izhira biata bꞌʉba bedꞌea ne ẽã obꞌʉa zhi ĩjãbʉrʉra Jesúsdꞌebemata.
27¿Aramaʉ̃nerã arakꞌãwũãrã bia nʉmaĩka? ¡Arakꞌãwũãrã ãĩ bꞌʉya! ¿Bia nʉmaĩka Moisé ũrãgꞌadꞌebara? ¿Bia nʉmaĩka maʉ̃ ũrãgꞌata aribꞌae bꞌʉdꞌebara? Mawũã ẽã, awuarabʉrʉ bia nʉmaña Jesúsdꞌebema ũrãgꞌata ĩjã bꞌʉba. 28Mawũẽ kꞌawuaidꞌera Daizezebara dazhira bedꞌea ne ẽã obꞌʉa Jesúsdꞌebemata ĩjãbʉrʉdꞌeba, mawũã o ẽã Moisé ũrãgꞌata aribꞌae nʉmʉba.
29¿Daizezera bari judíorãneka? ¿Izhabꞌa Daizezera judíorã ẽãta bꞌedꞌe ẽka? Wãrãnebai izhabꞌa judíorã ẽãta bꞌedꞌea. 30Maʉ̃ẽnabema Daizezera abꞌabai bꞌʉa. Mawũẽ izhara Jesúsdꞌebema ĩjãbʉrʉdꞌeba bedꞌea ne ẽã bꞌʉya kꞌakua eta kꞌõ bꞌera, Jesúsdꞌebema ĩjãbʉrʉdꞌeba bedꞌea ne ẽã bꞌʉya kꞌakua eta kꞌõ ẽã bꞌera. 31¿Mawũã Jesúsdꞌebema ĩjãbʉrʉdꞌeba seribidꞌa ẽbaika Moisé ũrãgꞌara? ¡Mawũã ẽã! Awuarabʉrʉ mawũãrã aribꞌae bꞌea maʉ̃ ũrãgꞌata.
Aktualisht i përzgjedhur:
Romanos 3: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.