Romanos 4
4
Ĩjãĩne bꞌʉa Abrahamne kĩrãkꞌa
1¿Kꞌãrẽta jaradꞌaipe dazhirã zeze Abrahamnebema? 2Izha kꞌãrẽ obꞌʉba Daizezeba Abraham bedꞌea ne ẽã bꞌʉsibʉrʉ, bꞌakꞌausia kꞌãrẽneba sobia bꞌaira, mawũãmina Daizeze kĩrãbita ẽã. 3Maʉ̃ẽnabemata zhi bꞌʉmata mawũã bꞌʉa: Daizezeba jarabʉrʉra Abrahambara ĩjãbʉrʉba bedꞌea ne ẽã bꞌʉsia. 4Iabꞌa trajadꞌata pagꞌabʉdadꞌera bari diabada ẽã, awuarabʉrʉ diabada izhi trajadꞌabari. 5Mawũãmina kꞌãrẽ o ẽãne bia ẽãta bꞌʉra Daizezebara bedꞌea ne ẽã bꞌʉbarita ĩjãrã, mawũã ĩjãbʉrʉdꞌeba bedꞌea ne ẽã bꞌʉya. 6Aramaʉ̃ kĩrãkꞌa rey Davidbidꞌa sobia bꞌaita jarasia Daizezeba bedꞌea ne ẽã bꞌʉbʉrʉra kꞌãrẽ o ẽãne. 7Maʉ̃ta mawũãsia:
¡Sobia bꞌeaya bia ẽãta odꞌapeadꞌata Daizezeba bedꞌea ne ẽã bꞌʉkuabʉrʉra, kꞌazhiruata biodꞌeba bedꞌea ne ẽã bꞌʉkuabʉrʉra!
8¡Sobia bꞌaya Daizezeba bedꞌea ne ẽã bꞌʉbʉrʉra kꞌazhiruadꞌeba! (Salmos 32:1-2)
9¿Mawũã sobia bꞌaira bari kꞌakua e kꞌõ bꞌeitabemakꞌa, kꞌakua eta kꞌõ ẽã bꞌeitabidꞌa nʉmʉ ẽka? Daibara jara bꞌea Daizezeba jarabʉrʉta Abrahamba ĩjãbʉrʉdꞌeba bedꞌea ne ẽã bꞌʉdꞌata. 10¿Sãwũã bedꞌea ne ẽã bꞌʉsi? ¿Kꞌakua eta kꞌõpe bꞌʉdꞌe o kꞌakua eta kꞌõ ẽã bꞌʉdꞌe? Mawũã bꞌʉ ẽbasia kꞌakua eta kꞌõpe bꞌʉdꞌe, awuarabʉrʉ mawũã bꞌʉsia kꞌakua eta kꞌõ ẽã bꞌʉdꞌe. 11Abraham kꞌakua eta kꞌõnabara kꞌawuabi bꞌʉa Daizezeba bedꞌea ne ẽã bꞌʉdꞌata izha jarabʉrʉta ĩjãbʉrʉba wadꞌi kꞌakua eta kꞌõ ẽã bꞌʉdꞌe. Aramaʉ̃nerã kꞌakua eta kꞌõ ẽã bꞌeba Daizezedꞌebema ĩjã bꞌe zezea, abꞌarika ĩjã bꞌeba bedꞌea ne ẽã duanukꞌãrĩã. 12Kꞌakua eta kꞌõpe bꞌe zezeta bari kꞌakua eta kꞌõpe bꞌeitabema ẽã, awuarabʉrʉ abꞌarika ĩjã bꞌeitabema dazhirã zeze Abrahamba ĩjãna kĩrãkꞌa kꞌakua eta kꞌõ ẽwedꞌa.
Daizezeba jaradꞌara aribꞌae bꞌʉa ĩjãbʉdadꞌeba
13Daizezeba naʉ̃ ẽjũãta Abrahanʉã diaya adꞌara o izhidꞌeba zedꞌairãã diaya adꞌara mawũã ẽbasia ũrãgꞌata aribꞌaebʉrʉba, awuarabʉrʉ mawũãsia bedꞌea ne ẽã bꞌidꞌapʉba izha jarabʉrʉta ĩjãbʉrʉdꞌeba. 14Moisé ũrãgꞌa aribꞌae bꞌeba Daizezeba diaita jaradꞌata jidadꞌaibʉrʉ, ĩjãĩnebema nʉmʉrã seri ẽãneba kꞌãrẽ ẽã Daizezeba diaya adꞌara. 15Moisé ũrãgꞌara aribꞌaedꞌa ẽãba Daizezera kĩrũbi bꞌea. Mawũãmina maʉ̃ ũrãgꞌata ne ẽã maẽrã maʉ̃ ũrãgꞌadꞌe wãẽãnaĩ ne ẽã.
16Maʉ̃neba Daizezeba diaita jaradꞌara izhidꞌebemata ĩjã bꞌedꞌeba diaya, aramaʉ̃nerã izhi biaba diaya. Maʉ̃ta Abraham warrarãnebema jõmaʉ̃ĩta nʉmʉã. Bari Moisé ũrãgꞌadꞌe bꞌeitabema ẽã, awuarabʉrʉ Abrahamne kĩrãkꞌa ĩjãbʉdaitabema, aramaʉ̃ne izhira dazhirã jõmaʉ̃ zezea. 17Maʉ̃ẽnabemata zhi bꞌʉmata mawũã bꞌʉa: Mʉã bʉra bꞌidꞌapʉa zhãrã bio zezeta. Mawũãneba Daizeze kĩrãbitara zhãrã bio zezeta bꞌʉa, izhidꞌebemata Abrahamba ĩjãnarã Daizezebara beudꞌapeadꞌara piradrʉbibaria, kꞌãrẽ ne ẽbadꞌata obaria.
18Daizezeba warra barabiya abʉrʉra Abrahambara ĩjãsia zhi kĩmanebara warra baraidꞌe bꞌʉ ẽãta, aramaʉ̃ne bꞌesia zhãrã bio zezeta, maʉ̃ẽnabemata mawũãsia: Kꞌãwũã chĩdau bio kĩrãkꞌa nʉmaña bʉ warrarãnebemata. 19Maʉ̃ta ĩjãĩrã edꞌabꞌae ẽbasia, krĩcha nʉma ẽbasia izhira zhi zõrãta, maʉ̃ne ya beubodꞌo kĩrãkꞌa bꞌasia cien año badea bꞌʉba, mawũã ĩjãĩrã edꞌabꞌae ẽbasia tokꞌata bꞌʉbara zhi kĩma Sara. 20Izhara ĩjã ẽã nʉma ẽbasia Daizezeba diaya abʉrʉra, awuarabʉrʉ soidꞌu ĩjãbʉrʉba ibia jarasia Daizezera. 21Jipa kꞌawuasia Daizezera zhi zromata izha jaradꞌa aribꞌaeira. 22Mawũã ĩjãbʉrʉdꞌeba Daizezebara bedꞌea ne ẽã bꞌʉsia.
23Bari Abraham ʉ̃rʉ̃ bꞌʉdꞌa ẽbasia mawũã bedꞌea ne ẽã bꞌʉdꞌara. 24Awuarabʉrʉ dazhirãsidꞌa abꞌarika bedꞌea ne ẽã duanukꞌãrĩã dazhirãbara izhidꞌebema ĩjã bꞌeba beudꞌata piradrʉbidꞌata Jesús dazhirã Nokꞌota. 25Daizezebara Jesús chãbꞌarisia beumarẽã dazhirã kꞌazhirua omiãta bꞌebari, beudꞌata piradrʉbisia dazhirã bedꞌea ne ẽã bꞌʉita.
Aktualisht i përzgjedhur:
Romanos 4: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.