Hechos 9
9
Jesúsdꞌebema ĩjãna Sauloba
1Saulobara Jesús pẽwã bꞌera beakuaita waragꞌa nʉmʉba zesia sacerdote wagꞌauma. 2Mobe kꞌarta widꞌisia de zhi jʉrebadata Damasco pʉwʉrʉdꞌe nʉmeza wãĩta, aramaʉ̃ne zhũmakĩrãrãta, wũẽrãrãta, Jesús pẽwã bꞌeta ũdura jidakua weita Jerusalénʉẽna. 3Mawũãmina odꞌe wãne Damasco kꞌaita babʉrʉdꞌe aritiaudꞌe izhita pʉrra urua tẽũsia bãjãneba. 4Mawũẽ egorodꞌe bꞌaebʉrʉdꞌe nemita ũrĩbʉrʉdꞌera izhaa mawũãsia: Saulo, Saulo, ¿bʉa mʉrã kꞌãrẽã pẽwã bꞌʉ?
5Mawũãĩ izhara mawũãsia: ¿Bʉra kꞌaipe Nokꞌó?
Mawũãĩ mawũãsia: Mʉrã Jesúa, bʉara mʉta pẽwã bꞌʉa, bʉra kꞌãwũãrã dobꞌa pugabʉrʉa sumiãta ne kĩrãkꞌa.
6Mawũãĩ Saulobara peraba ure mawũãsia: Nokꞌó, ¿bʉara mʉã kꞌãrẽta oita krĩñape?
Mawũãĩ Nokꞌobara mawũãsia: Piradrʉpe pʉwʉrʉedꞌa wãrũã, mama jaradꞌaya bʉa kꞌãrẽ oita.
7Ũmakĩrãrã Saulo bawara wãbʉdara pera kꞌopanasia wãrãne nemita ũrĩbʉdadꞌe miõ ũdudꞌa ẽãba. 8Saulo egorodꞌeba piradrʉpe dabʉ ogꞌabʉrʉdꞌera ne ũdu ẽbasia. Mawũẽ juwuadꞌeba erbꞌari ededꞌape edꞌa wãbisidꞌa Damasco pʉwʉrʉdꞌe. 9Mama ewari ũbea bꞌasia ne ũdu ẽã, nekꞌo ẽã, baniã do ẽã.
10Maʉ̃ne Damascodꞌe bꞌasia Jesúsdꞌebema ĩjã bꞌʉta Ananía abadata. Nokꞌobara kꞌãĩmokꞌaradꞌe kĩrãkꞌa maʉ̃ã mawũãsia: Ananía.
Mawũãĩ izhara panaʉ̃ mawũãsia: Mʉrã za bꞌʉa Nokꞌó.
11Mawũãĩ Nokꞌobara mawũãsia: Piradrʉpe wãrũã pʉwʉrʉdꞌe o Jipata jarabadaidꞌu. Mobe Juda dedꞌa jʉrʉdua iabꞌa Saulo abadata Tarso pʉwʉrʉdꞌebemata, izhira zhiwidꞌi nʉmʉã. 12Izhara kꞌãĩmokꞌaradꞌe kĩrãkꞌa ũdusia ũmakĩrã Ananía abadata, ũdusia deidꞌu zepe juwua ʉ̃rʉ̃ bꞌʉ kꞌobꞌʉta wakusa ne ũdumarẽã.
13Mawũãĩ Ananíabara panaʉ̃ mawũãsia: Nokꞌó, mʉãrã biodꞌeba ũrĩbaria maʉ̃nebemata, zuburia okua bꞌʉbidꞌa bʉdꞌebema ĩjã bꞌeta Jerusalénne. 14Namabidꞌa nokꞌorã sacerdoterãneba zarea bꞌʉa jidakuaita jõma bʉdꞌebema ĩjã bꞌeta.
15Mawũãĩ Nokꞌobara mawũãsia: Wãrũã, maʉ̃ mʉã jʉrʉsia mʉnebemata jarakꞌa wãmarẽã judío ẽãta bꞌea, reyrãta bꞌea, Israel bꞌea. 16Mʉã izhaa kꞌawuabiya izhi sãwũã zuburiai barata mʉnebemata jara bꞌʉdꞌera.
17Mawũãĩ Ananía wãpe deidꞌu wãsia, mobe juwua izhi ʉ̃rʉ̃ bꞌʉpe mawũãsia: Mebea Saulo, Nokꞌo Jesús bʉ zedꞌa odꞌe bʉaa zhi ũdubidꞌaba mʉta zokꞌasia bʉta wakusa ne ũdumarẽã, Jawurebiaba bira bꞌamarẽã.
18Audre ẽãne izhi dabʉdꞌeba bꞌeda kꞌara kĩrãkꞌa ogꞌa bꞌaebʉrʉba wakusa ne ũdusia. Aramaʉ̃ne piradrʉpe buru kꞌoesia. 19Mobebʉrʉ nekꞌobʉrʉba kꞌakua zareasia. Aramaʉ̃ne Saulora ewari ʉ̃kʉrʉ bꞌesia Jesúsdꞌebema ĩjã bꞌeta Damascodꞌe bꞌe bawara.
Saulo miã ũrãgꞌadꞌa Damascodꞌe
20Maʉ̃nerã de zhi jʉrebada nʉmeza jarakꞌasia Jesúra zhãrã Ẽdrʉbita Daizeze Warrata. 21Izhi bedꞌeata ũrĩbʉdabara jõmaʉ̃ba kꞌawua ẽã krĩcha mawũãsidꞌa: ¿Naʉ̃ ẽka Jesúsdꞌebema ĩjã bꞌeta Jerusalénne zuburia okua nʉmanarã, maʉ̃ kꞌarea naĩnu zesi ẽka jidakuape edeita nokꞌorã sacerdoterã kĩrãbita?
22Saulora wuaabʉrʉ wãnigua bedꞌea nʉmʉba kꞌawua ẽã okua nʉmasia Damascodꞌe judíorã bꞌeta, aramaʉ̃ne dajada kꞌawuabiga nʉmasia Jesúra zhãrã Ẽdrʉbita.
Saulo ẽdrʉdꞌa judíorã juwuadꞌeba
23Ewari bio babʉrʉdꞌera judíorã bedꞌea ausidꞌa Saulo beadꞌaita. 24Mawũãmina maʉ̃ta kꞌawuasia Saulobara. Ãzhara pʉwʉrʉdꞌera o abꞌaʉdꞌe puertaza ewaridꞌe diamase kꞌawua duanasia beadꞌaita. 25Mawũẽ Jesúsdꞌebema ĩjã bꞌebara pʉwʉrʉta muroba pʉrra nʉmʉ audꞌu diamase edꞌaa ʉra bꞌaebisidꞌa jirabꞌʉdꞌape jamaradꞌe.
Saulo zedꞌa Jerusalénʉẽna
26Saulo Jerusalénʉẽna zebʉrʉdꞌera ãba bꞌa krĩñasia Jesúsdꞌebema ĩjã bꞌe bawara. Mawũãmina jõmaʉ̃ba wawiabʉdaba ĩjãna ẽbasia izha ĩjã bꞌʉra. 27Mawũẽ Bernabéba wesia Jesúsba zokꞌakuadꞌama, mobe maʉ̃rãã nebʉrʉsia odꞌe sãwũã Sauloba Nokꞌo Jesús ũdudꞌata sãwũã bedꞌeadꞌata. Aramaʉ̃ne sãwũã Damascodꞌe wãnigua bedꞌeadꞌata Jesús jara. 28Aramaʉ̃ne Saulora ãzhi bawara Jerusalénne bꞌesia, ãĩ wãnata zepe wakusa wã bꞌesia. 29Maʉ̃nerã Jesús jara wãnigua bedꞌea bꞌesia griegorãã, mawũãmina maʉ̃rãbara bea krĩña jirpanesia. 30Mebẽrãbara maʉ̃ta kꞌawuadꞌape edesidꞌa Cesarea pʉwʉrʉidꞌu, mobe zokꞌasidꞌa Tarso pʉwʉrʉedꞌa.
31Aramaʉ̃ne mebẽrã adu-a duanesia Judea druadꞌe bꞌera, Galileadꞌe, Samariadꞌe bꞌera. Maʉ̃nerã soidꞌu duane wãta Daizeze wawia duane wãsia. Aramaʉ̃ne eaba wãsia Jawurebia kꞌarebadꞌeba.
Enea bꞌedꞌa
32Pedrora jõmaʉ̃ma wã bꞌʉba zesia mebẽrã bꞌema Lida pʉwʉrʉdꞌe. 33Mawũẽ mama ũdusia iabꞌa Enea abadata, maʉ̃ kʉdꞌadꞌe tabꞌʉta ocho año bata kꞌaya bꞌasia kꞌakua pira ẽã. 34Pedrobara mawũãsia: Enea, Jesucristobara bʉra bꞌebiya. Piradrʉpe bʉzhi estera bʉratʉrua.
Mawũãĩ aramaʉ̃ta piradrʉsia. 35Maʉ̃ta jõmaʉ̃ba ũdusidꞌa Lida pʉwʉrʉdꞌe bꞌeba, Sarón pʉwʉrʉdꞌe bꞌeba, mawũẽ maʉ̃rãbara ĩjãsidꞌa Jesúsdꞌebema.
Dorca beudꞌata piradrʉdꞌa
36Jope pʉwʉrʉdꞌe Jesúsdꞌebema ĩjã bꞌʉta bꞌasia Tabita abadata, maʉ̃bara jara krĩña bꞌʉa Dorcata. Maʉ̃ wũẽrãbara biata obꞌʉba kꞌãrẽ dia bꞌasia zuburia bꞌea. 37Maʉ̃ta maʉ̃ ewade kꞌayape beusia. Beudꞌata okꞌawa bꞌedꞌe kꞌakuara sʉgʉdꞌape tabꞌʉsidꞌa kʉdꞌadꞌe. 38Lida pʉwʉrʉra Jope pʉwʉrʉ kꞌaitaba Jesúsdꞌebema ĩjã bꞌebara Pedro mama kꞌobꞌʉta ũrĩnaĩ, ũmakĩrãrã ũme zokꞌasidꞌa zuburia bedꞌea mawũãnamarẽã: Dããrã barãrũã daima zeita.
39Mawũẽ Pedrora piradrʉpe wãsia ãzhi bawara. Jũẽbʉrʉdꞌera beuwãrã tabꞌʉidꞌu edesidꞌa kʉdꞌa ʉ̃rʉ̃bemaĩnu, mama wũẽrãrã pẽdrarãba jõmaʉ̃ba jẽgabi bʉredrʉbʉdata wuata ũdubisidꞌa Dorcaba okua bꞌadꞌata ãzhi bawara bꞌasidꞌe. 40Jõma ãĩ wãbigape Pedro sãkꞌokꞌodꞌe kꞌobꞌepe zhiwidꞌisia. Mobe beuwãrãta akʉ mawũãsia: ¡Tabita, piradrʉrua!
Dabʉ ogꞌabʉrʉdꞌe Pedrota ũdui jewedꞌasia. 41Pedrobara juwuadꞌe jidape piradrʉbisia. Mobebʉrʉ trʉ̃sia Jesúsdꞌebema ĩjã bꞌeta, dewara trʉ̃sia pẽdrarãta, aramaʉ̃ne ũdubigasia zokꞌai. 42Maʉ̃ta trʉ̃poasia Jope pʉwʉrʉ jõma, mawũẽ bioba ĩjãsidꞌa Jesúsdꞌebema. 43Pedrora Jope pʉwʉrʉdꞌe ewari bio bꞌesia Simón abada dedꞌa, ne eta bi-ia obari maẽ.
Aktualisht i përzgjedhur:
Hechos 9: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.